29
Jerusalem ii Thuakna
1 Pathian ii biaknatau ahi Jerusalem mama a lal ahi hi! David ii ngiana khuapi sia a lal ahi hi! A an neak poaite le poai khaamnate taw kum khat, kum nii omsak zii po vun,
2 tua zawkciang, “Pathian ii biaknatau” a kici khuapi tungah Pathian in siatna thengsak tu hi. Kaana le tauna om tu a, a khuapi buppi sia chi taw a kituam biaknatau khat bang hi tu hi.
3 Pathian in tua khuapi sia kiim uum in, sim tu in uumci tu hi.
4 Jerusalem sia leinuai pan pau nuamin a kisaan thithaa khat bang le leivui sung pan hong suak aw theap khat taw kibang tu hi.
5 Jerusalem awng, nang hong sim ngamdangmite theampo leivui bangin kimut keak tu a, a kiitakhuai ngalkapte sia taangphaw bangin leangkeak tu hi. Muanmawk ngawl het le thakhat thu in,
6 Vaanglianbelpa Topa in vanto le zinliing taw nang hong suatak tu hi. Ama in vuipi nguapi le a kuang vazak mei khiak tu a,
7 tuasia ciang Pathian ii biaknatau khuapi a sim minamte ii ngalkap hon theampo, a ngalhiam le a ngalvanh a vekpi — na theampo — zanin khua ngaisut bang, mangmat khat bangin mang vadi tu hi.
8 Jerusalem sim tu in a kikhawmtua minamte theampo sia, andu ngilkial in a pukthi dek mihing khat in a mang in an ne a, a khanlaw ciang a ngilva tuan ngawl, ahibuale tuidu dangtaak mihing khat in a mang in tui ne a, a khanlaw ciang a dangko in a thoto taw kibang tu hi.
A ki awlmawk ngawl Kidop natu Thupiakte
9 Paisuak vun a, mawmaw in om vun! Paisuak vun a, mittaw in om vun! Sapittui ne ngawl bulin kham vun! Zu mal khat zongh ne ngawlin hoi vatut vun!
10 Mutthip natu in Topa in na mut hong suaksak hi. Kamsaangte sia mihingte ii mittang hi tu a, ahihang Pathian in amate mit humcipsak hi. Ref 29:10 Rom 11:8
11 Kamsaan mukholnate theampo ii a khiakna sia note hong lak ngawl tu hi; a kikhakcip laizial khat taw kibang tu hi. Laisim thei khat kungah paipui in, nang hong sim tu in sawl le te a laizial kikhak cip ahikom kei sim thei bong hong ci tu hi.
12 Laisim thei ngawl khat tungah tua lai pia in hong simsak ta'n ci in sawl le te, ama in kei sim thei bong ci in hong zo kik tu hi.
13 Topa in, “Hi mihingte in kong bia tu uh hi hong ci a, ahihang amate kammalte sia khiakna nei ngawlin, a thinsung in thudang ngaisun hi. Amate biakna sia bangma hi ngawlin, a teptee pak uh mihingte zui tu ngeinate bekma hi lel hi. Ref 29:13 Mt 15:8-9; Mk 7:6-7
14 Tua ahiciang keima in amate muanmawk khol ngawlin a kiitakhuai tuasiatna, khat zawkciang khat ka tungsak tu a, lamdang ka sasak tu hi. Mihing ciimte a mawmaw suakin, a pilna theampo sia kimanna nei ngawl tu hi,” ci hi. Ref 29:14 1 Cor 1:19
Maisang atu Lametna
15 A ngealnate Topa tungah a iimcip nuamte, a lal ahi hi! Amate a tup a sawmte vawt ku uh a, kuama in hong mu buan te, hong he buan te ci in ngaisun uh hi.
16 Amate in na theampo lumlet uh hi. Beal seakpa le tungman a koisia thupi zaw ziam? Mihing khat ii a vawt sa na khat in a vawt pa tungah, “Nang in kei nong vawt bua hi,” ahibuale, “Na vawt sia nangma in na he bua hi,” ci thei tu ziam? Ref 29:16 Is 45:9; Rom 9:20
17 Kam tepteena sungah, khuangei ngawlin taam thukpui sia lo ngam hong suak tu a, tuaciang lo ngam sia taam suak kik tu hi, ci hi.
18 Tua ni ciang, nangongte in laibu a ngingin a kisim sia za thei tu a, khuazing sungah a om mittawte in, a mit uh hakin khuamu tu uh hi.
19 Zawngkhal in, a kiniamkhiak mihingte in, Topa ahi, Israel ii a thiangtho Pathian ii a piak lungdamna sia khatvei nga kik tu uh hi.
20 Tuasia sia midangte a zawthawk vawtte le Pathian a melsiate ii bona hi tu hi. Mawnei theampo kilalsak tu hi.
21 Ngual dang a sonsiate, khialna lian neite, daan piak tu a khaktante le thumaan mihingte tungah thu khaikim in thu a khen thei ngawl natu leilot thusonte sia Pathian in lalsak tu hi.
22 Tua ahikom tu in ngimna pan Abraham a suatak, Israel te ii Pathian Topa in, “Ka mite awng, note hong kimaimawlsak nawn ngawl tu a, maizumna taw na mai uh daang nawn ngawl tu hi.
23 Keima kong piak tu tanote na mu uh ciang, keima sia Israel ii a thiangtho Pathian ka hi hunlam na tel tu uh hi. Zatakna nong pia tu uh a, lamdang sa in launa taw ka mai ah na ding tu uh hi.
24 Mihing mawmawte in thu tel thei tu a, a phuphun mihingte in a kihil tu uh sia lungdam tu uh hi,” ci hi.