2
A Seksol Pa
1 Ih Topa Jesus Christ hong pai kik natu le ama taw omkhawm tu in, ih kikhoptuana thu taw kizomin: suapuite awng, Ref 2:1 1 Th 4:15-17
2 Topa hong pai tu Ni sia hong tung zo hi ci in a kison thu taw na khua ngaisutna uh nawngkaisak heak vun a, na thin kiamsak memeang heak vun ci in kong thuum uh hi. Hi thu sia kote kamsaanna sung, ahibuale thuhilna sung, tua ahibuale laithak atna sungah kote in son hi ci in kingaisun hi thei tha tu hi.
3 Bangbang po ahizong kuama in na theamsak heak vun. Banghang ziam cile a khakbel Kileedona, hong om a, hell sung a theng tu in a kisep sa A Seksolpa hong kilangh mateng in tua Ni sia hong tung ngawl tu hi.
4 Ama in pathian a kici theampo ahibuale biak thei theampo langpan tu a, tuate tungsia ah ama le ama kikoi tu hi. Ama in Pathian Biakinnpi sung ngawngawn ah tum in to tu a, Pathian ka hi hi ci tu hi.Ref 2:4 Dan 11:36; Eze 28:2
5 Ciamtee ngawl nu ziam? Hite sia no taw ka omkhop lai in kong sonsiat sa ahi hi.
6 Ahitazong, tu laitak hisia a pian ngawl natu in a khak khat om a, tuasia bang ziam na heak uh hi. Tua ahikom a hun a cin ciang A Seksolpa hong kilangh tu hi.
7 A lamdang Seksolna in tu in na hong seam zo hi, ahihang a khaktanpa a kihepkeak matengin a piang tu thu sia piang ngawl lai tu hi.
8 Tuasia zawkciangin A Seksolpa sia hong kilaak tu a, ahihang Topa Jesus hong pai ciang, a kam sung pan a huu pusuak sia taw ama that tu a, a taang velvol a vaangletna taw lalcipsak tu hi.Ref 2:8 Is 11:4
9 A Seksolpa sia Satan vaangletna taw hong pai tu a, nalamdang lakna a theam le a lamdang na nam tuatuamte hong vawt tu hi, Ref 2:9 Mt 24:24
10 tuaciangin a lal tu teng tungah a seksol theamna namcin zangh tu hi. Amate lal tu hi, banghang ziam cile amate a kihutna tu thumaan thutak sia a saang bua uh a, a it bua uh hi.
11 Tua ahikom Pathian in telkhialna vaang ama te sungah puak a, amate in a maan ngawl thute a up natu in na seamsak hi.
12 Tua ahikomin, tua thumaan thutak a um ngawl, mawna sungah a nuamsa theampo, kipuavawk tu hi.
Note Ngupna nga tu hong Kiteal
13 Topa hong it suapuite awng, note atu in Pathian tungah a tawntungin lungdam ka ko hamtang tu uh hi. Banghang ziam cile Thaa ii vaangletna taw ama mi thiangthote hong suasak natu le thumaan thutak na upna uh taw a kingum phitbelte na sua natu uh in Pathian ii tealte na hi uh hi.
14 Lungdamna Thupha no tungah kong hilna uh tungtawnin Pathian in hisia atu hong sam hi; Ama in ih Topa Jesus Christ minthanna tel na nga natu hong sam ahi hi.
15 Tua ahikom suapuite awng, thuhilna le laithakna taw kong hil uh thumaante kholet vun a, kip takin ding vun.
16 Ih Topa Jesus Christ ama mama le eite hong it a, a thuthiamna taw a kiam ngeingawl thinletna le lametna kho hong pia, ih Pa Pathian in,
17 a tawntungin a pha sep natu le pau natu hong hanthawn in hong thahat sak tahen.