3
Thu hong Ngetsak tavun
1 A khakbel in suapuite awng, Topa thu sia note sungah na saan bangma in, manlang takin a kizel natu le thasiana taw a kisaan thei tawntung natu in, kote atu thu hong ngetsak tavun.
2 Mihing seksolte le misiate khut sung pan Pathian ii hong suataksak natu in thu hong ngetsak si tavun; banghang ziam cile mihing simin tua thu um ngawl hi.
3 Ahihang Topa sia thumaan a, ama in note A Ngilopa kung pan hong keamcingin hong thahatsak tu hi.
4 Note kungah kong son thute na zui uh bangma in zui paisuak tatak tu ci in note muanna thin kote sungah Topa in hong pia hi.
5 Pathian hong itna le Christ ii hong piak thuak zawkna a thukzaw in na tel thei natu Topa in lam hong pui tahen.
Nasep tu Vaipuak
6 Suapuite awng, kong lamlak nate zui ngawl a, datham nuntakzia taw a nungta suapuite theampo kung panin na kikeam tavun ci in Topa Jesus Christ min taw thu kong pia uh hi.
7 Ko ngamtat bang na ngamtat tu uh sia noma ma in na heak uh ahi hi. Note taw ka om uh lai in ko datham ngawl khu hi.
8 Man piak ngawlin kuama tung pan huna saang ngawl khu hi. Tua taangin naseam a, diang khu hi; note khat po atu in supna zanna ka hi ngawl natu in a sun a zanin ka seam tan uh hi.
9 Hi bangin ka hi uh sia, ngual ii hu tu le et tu in, a kilawm ngawl ka hi uh hang, ahi bua hi; nong ettee tu le nong zui tu in tuabangin ngamta ka hi uh hi.
10 No taw ih om lai in, “Na a seam nuam ngawl peuma an nesak ngawl tu hi,” kong ci uh hi.
11 Hi bangin kong ci theina uh sia, no sungah mihing pawlkhat datham a, ngual nasepna kamkumh in, nawngkaisak tu ci simngawl sep dang nei ngawl ci in ka za uh hi.
12 Topa Jesus Christ min taw hi mihingte tungah ahi tu bangin nungta tahen a, nasepna taw a nuntak natu thalaw tahen, ci in kidop natu thu ka pia uh hi.
13 Ahihang suapuite awng, a pha sepna sia cimtak peuma heak vun.
14 Hi laithak sungah kong son uh thute a zui ngawl tu khat po om tha tu hi. Tuabang ahile, ama sia ciamtee tavun a, na koithong lel vun, tua hile, ama a maizum tu hi.
15 Ahihang ama na ngal vawt heak vun; tua hi ngawl zaw in, suapui khat bangin a kidop thei natu na hil vun.
A khakbel Kammalte
16 Eite thinnopna ii naak ahi Topa ama mama in, a tawntung le a nanam in, thinnopna hong pia tahen. Topa in note theampo taw hong omkhawm tahen.
17 Paul in kong paupui hi ci in lai kong thaak sia keima khut tatak taw ka at hi: Laithak ka at sim ka minthuna sia hisia ahi hi; lai ka atzia hi bang ahi hi.
18 Ih Topa Jesus thuthiamna in note theampo taw hong om tahen.