THESSALONICA TE
Tungah Paul ii Laithak A niina
(Paul's Second Letter to the Thessalonians)
Christ hong pai kik natu muanmawkna taw buaina sia in Thessalonica Pawlpi sungah nawngkaisak tan hi. Thessalonica te tungah Paul ii laithak a niina sia in, Topa hong pai kik ni hong theng zo hi ci upna taw kisai in a at ahi hi. Paul in tua ngaisutna a puuaphatna ah, Christ hong heak kik ma in, “A seksolpa” a kici khat ii lampuina taw ngitlona le tatsiatna a saangbel dong hong theng masa tu hi, tua sia in Christ langpan tu hi.
Sawltakpa in ama laithak a simte sia haksatna le thuakna kawm pan a kip a kho in a om natu, Paul le a nasep puite ii a nuntak natu na a sep uh bangin, a nasep natu, le thupha vawtna ah a thinkiam ngawl natu uh thupi laak in laithak at ahi hi.
1
1 Paul, Silas le Timothy in —
Ih Pa Pathian le Topa Jesus Christ neisa Thessalonica pawlpi mite tungah lai kong thaak uh hi:Ref 1:1 Sawl 17:1
2 Ih Pa Pathian le Topa Jesus Christ in note tungah thuthiamna le thinnopna hong pia tahen.
Christ hong Pai kik hun Thukhenna
3 Suapuite awng, note atu in hun theampo ah Pathian ka pok uh kul hi. Tuabang ka ngamtat tu uh sia maan hi, banghang ziam cile na upna uh nasia khan mama a, tuaciang note khat sim ii midangte na itna uh lian vaial hi.
4 Pathian ii pawlpite sungah no huvau ka kisuantaakna uh sia in hi thu hang ahi hi. Vawtsiatna le ngimna teng theampo na thuak uh kawm panin, thuak zawkna le upna na nei tan uh hu in a kisuangtaak ka hi uh hi.
5 Tu a na thuakna teng in Pathian thukhen na sia thumaan a hina kilanghsak hi, tua in noma ii na ngimlaw uh ama Kumpi Ngam taw a kilawm hong suaksak tu hi,
6 Pathian in a maan bangin seam tu hi: note hong thuaksakte tungah thuakna tungsak tu a,
7 tuaciang no a thuakte le ko zongh nopsakna hong pia tu hi. Topa Jesus in ama ii a thahat vantunglalangte taw
8 Pathian a nialte le Topa Jesus Lungdamna Thupha a zui nuam ngawlte daan pia tu in meikuang taw hong pai ciang ama in tuasia seam tu hi.
9-10 Ama ii mihing theampo le a thu um mihingte tung pan minthanna le vaang piakna a nga tu in, tua Ni Topa hong pai ciang, Topa mai le vaanglet minthan na pan amate kikhen tu a, tawntung lalcipna daan thuak tu hi. Note zongh, ko ii kong son thute um zo na hi uh ciangin tua thu um te sungah na kihel tu uh hi.Ref 1:9 Is 2:10
11 Note atu in a tawntungin thu kong ngetsakna in hi thu hang ahi hi. A nungta tu in ama hong sap na nuntakna sungah a kiphu a kilawm hong suasak natu in, Pathian munah kong ngetsak uh hi. Ama in a vaangletna taw phat natu na deina theampo khuangkhimsak tahen a, upna taw nasepna hong taangtungsak tahen.
12 Hi bangin ih Pathian le Topa Jesus Christ ii thuthiamna taw ih Topa Jesus min in, note tung pan minthanna saang tu a, note zongh in ama tung pan minthanna na saang tu uh hi.