5
Topa ii Hong Pai tu Na Kinging vun
1 Suapuite awng, hi thute hong pianna tu a hun a taang huvau, lai kong at tu uh kul sa ngawl khu hi.
2 Banghang ziam cile noma ma in Topa Ni sia, zan lai a, nguta khat hong pai bang in, hong pai tu hi, ci in a pha tak na he uh hi.Ref 5:2 Mt 24:43; Lk 12:39; 2 Pe 3:10
3 Mihingte in, “Na theampo thim khipkhep hi, lungmuanna om hi,” a ci laitakin thakhat thu in, siatna sia amate tungah hong theng vat tu hi! Nau a suak tu numei khat sia nautun a, a nat bangin thakhatin hong pai tu hi, tuaciang mihingte a suakta buatu uh hi.
4 Ahihang suapuite awng, note in khuazing sungah om ngawl nu hi, tua ahikom tua Ni in nguta khat hong pai a, lamdang na sak bang ahi buatu hi.
5 Note theampo in khuavak ii neisa, sun hun ii neisa na hi uh hi. Eite sia zan ii neisa, khuazing sungah a omte ih hi bua hi.
6 Tua ahikom ngualdangte bangin ih mutthip buatu hi; eite khangciimin ih pilvang tu hi.
7 Zan sia mihingte mut hun hi; zanin amate zukham uh hi.
8 Ahihang eite in sun hun ii neisa ih hi a, ih pilvang kul tu hi. Eite in upna le ki itna sia awmdalna in ih silh tu a, ih lamet ngupna sia thik lukhu bangin ih khuk kul hi.Ref 5:8 Is 59:17; Eph 6:13-17
9 Pathian in eite sia a thin uukna thuak tu in hong teal bua a, Topa Jesus Christ tungtawnin, ngupna a nga tu in hong teal hi zaw hi.
10 Ama hong pai ciang, ih thi a ih nung zong, ama taw ih nuntak khop thei natu in eite atu a thi ahi hi.
11 Tua ahiciang tu laitak a, na sep uh bangma in khat le khat kihanthawnin na kihuu tavun.
A khakbel Hilna le Nuksetna
12 Suapuite awng, Tapidaw nuntakna sungah lam hong lak, hong hil a, no sungah na hong seamte tungah ahi tu bang zatakna na piak natu in kong ngen uh hi.
13 Amate ii sepna hu in itna le zatakna lianbel taw na kizom tavun. Noma sungah kilemna taw na om tavun.
14 Suapuite awng, hi bangin kong hanthawn uh hi. A zuzaute kidop natu thu na pia vun a, a lauthauhte na hansua vun, a thazawmte na hu vun, a kuama theampo tungah thinsau in na khual vun.
15 Khialna sia khialna taw in na thuk heak vun a, khat le khat tung le mihing theampo tungah phatna vawt tu sia hun theampo sungah na tup na sawm uh na hisak tavun.
16 A tawntungin lungdam vun,
17 hun theampo sungah thu ngen tawntung vun,
18 na theampo sungah lungdamko vun. Christ Jesus taw pumkhat a, na nuntak sungah Pathian hong deisak thu in hisia ahi hi.
19 Thaa Thiangtho na khaam heak vun;
20 Pathian tung pan hi a kici kamsaannate sia zawngsak heak vun.
21 Na theampo na sittel vun: a pha teng na keam tavun,
22 A sia nam theampo na pial tavun.
23 Eite thinnopna hong pia Pathian in note a nanam in hong thiangthosak tahen, na nuntakna buppi - na thaa, na thinsung le na pumpi — hong keam tahen, Topa Jesus Christ hong pai ciangin sepkhial vawtkhial theampo taw hong kipealsak tahen.
24 Hong sampa ama in na hong seam tu hi, banghang ziam cile ama thumaan hi.
25 Suapuite awng, ko atu zongh thu hong ngetsak tavun.
26 Thu um theampo suapui kinapna taw na kimuak tavun.
27 Thu um mi theampo tungah hi laithak na sim natu in Topa thuneina suangin kong thawn hi.
28 Ih Topa Jesus Christ ii thuthiamna no tungah hong om tahen.