4
Pathian ii Dik a sak Nuntakzia
1 A khakbelin suapuite awng, Pathian ii diksak nuntakzia sia, ko tung panin na sin sa uh ahi hi. Hisia in note nuntakzia sia ma ahi hi. Tu in tua sang zong a nasia zaw in na nuntak natu uh Topa Jesus min taw kong ngen uh a, kong thawn uh hi.
2 Banghang ziam cile Topa Jesus thuneina taw hilna kong piakte na he uh hi.
3 Pathian in note thiangtho in, numei le pa paktatna pan a thiangtho tak a, a kipealte na hi tu uh hong dei hi.
4 No pasalte khat sim in, na zi uh taw a thiangtho le a thasiahuai in nuntakzia tu na heak uh kul hi.
5 Pathian a he ngawlte bangin cii le sa deina taw na nungta heak vun.
6 Tua ahikom hi thu tungtaang ah, kuama in ama ii Tapidawpuipa tungah khial ngawl tu a, hamphatna in la thei ngawl tu hi. Hi thu kong son ngei zo uh a, tuabang a ngamtate Topa in daan pia tu hi, ci in nasia takin kidop natu kong son zo uh hi.
7 Pathian in eite sia paktatna taw nungta ngawlin a thiangtho nuntakna taw a nungta zaw tu in hong sam hi.
8 Tua ahikom, hi kihilna a nial pawpo sia mihing nial ahi bua a, a Thaa Thiangtho no tungah hong pia Pathian nial ahi hi.
9 Noma thu up puite itna tu huvau lai at tu kul ka sa bua uh hi. Khat le khat na ki it natu in Pathian in no tung mama ah hong hil zo hi.
10 Tuaciang a tatak ci leang Macedonia ngam mun theampo ah a om, suapui teng tungah tuabangin na ngamta zo uh hi. Tua ahikom suapuite awng, tu a sangin zongh a kician zaw lai in na ngamta tavun.
11 Kong son ngeisa bangma in, na nuntakna sungah nuam hithiatin na nuntak tu, noma taw kisaite bek ngaisutin nei tu, noma nuntak natu in na thalaw natu uh teng sia tup in na nei vun.
12 Hi bang teng taw in thu um ngawlte ii zatakna na nga tu uh a, tuaciang na kitaangsapna tungtaang ah kuama na konlaw uh a kul buatu hi.
Topa hong Pai natu
13 Ko ii suapuite awng, lametna a nei ngawlte bangin na khuangai ngawl natu in, a thisate huvau thumaan thutak na heak tu uh ka dei uh hi.
14 Jesus thi a, tho kik hi, ci in ih um hi, tua ahikom ama um a, a thite sia Pathian in Jesus taw hong la kik tu hi, ci in ih um hi.
15 Tu a kong hil uh sia in Topa ii hilcianna ahi hi: Topa hong pai ni in, ei a nungta laite in a thisate mai ah ih pai buatu hi. Ref 4:15–17 1 Cor 15:51–52
16 Vantunglalangte sung pan a lianbel sia ii aw taw thupiak auna, Pathian lemle aw om tu a, tuaciang Topa ama mama vantung pan hong tuaksuk tu hi. Christ um a, a thite hong tho masabel tu a,
17 tua hunin a nungta lai eite sia Topa taw vui sungah kisi tu in, amate taw meei sungah hong kikaikhawm tu hi. Tuabangin eite in a tawntungin Topa taw ih omkhawm tu hi.
18 Tua ahikom, hi kammalte taw khat le khat na kihanthawn tavun.