5
1 Tua hun lai in kamsaang niite ahi Haggai le Iddo ii tapa Zechariah in Judah le Jerusalem ah a teang Jew te tungah Israel ii Pathian min suangin thu son kipan uh hi. Ref 5:1 Hag 1:1; Zec 1:1
2 Shealtiel ii tapa Zerubbabel le Jehozadak ii tapa Joshua te in a thusonte a zaak uh ciang Jerusalem Biakinnpi sakkik kipan a, kamsaangte nii in hu uh hi. Ref 5:2 Hag 1:12, Zec 4:6-9
3 Thakhat thu phialma in Euphrates nitumna sang ngamukmangpa Tattenai, Shethar Bozenai le a seppui uliante Jerusalem ah pai in, “Hi Biakinnpi sak tu le a sungah vanh teng a nguan tu in akua in thu hong pia ziam?” ci in dongh uh hi.
4 Amate in Biakinnpi sakna ah a hu teng ii min zongh dongh uh hi.
5 Ahizong Pathian in Jew lampuite mitsuan nginge a, Persia uliante in kumpilianpa Darius tungah laithak in a zo kik mateng bangma law ngawl tu in khensat uh hi.
6 Amate in hi bangin kumpilianpa tungah thu zasak uh hi.
7 “Darius kumpilianpa awng, thinnopna taw ngam uk thei ta in.
8 “Nangma Kumpipa awng, kote Judah ngam sungah ka pai uh a, a lian Pathian ii Biakinnpi sia suangtum lian mamate taw kisa in, a pang zongh thing pangluaite a kithung in ka mu uh a, tua thu he lete kong oai uh hi. A nasep belcing mama a, ngaih vahuut uh hi.
9 Tuasia ciang a kua ii thu taw hi Biakinnpi kisa kik a, a vanhte kinguan ziam, hong son natu in a lampuite ka dongh uh hi.
10 Hi nasep a lampuite akua teng ziam kong son thei natu in amate min zongh ka dongh hi.
11 “Amate in, ‘Kote vantung le leitung Pathian ii naseamte hi in, a vaanglian Israel kumpipa khat ii kum tam mama lai in a sak phit le vanh a kinguan Biakinnpi sia a sa kik ka hi uh hi.
12 Ahizong ka taanghpupite in vantung Pathian thin uuksak ahiciang, Chaldean kumpi ngui sung pan Babylon kumpipa Nebuchadnezzar in amate zosak hi. Biakinnpi sia kisia sakin tua mipite Babylon ah sal in kila hi. Ref 5:12 2 Kum 25:8-12; 2 Khang 36:17-20; Jer 52:12-15
13 Tua zawkciang Cyrus kumpilianpa in Babylon kumpilianpa ahi zawk a kum khat kumin Biakinnpi a kisak kik natu thupia hi. Ref 5:13 Ezra 1:2-11
14 Nebuchadnezzar ii Jerusalem Biakinnpi pan a laak Babylon biakinn ah a koi biakinn a zak khamh le ngunn, Biakinn vanh zakte puuapha kik hi. Cyrus in tua teng Judah ngamukmang tu in a koi Sheshbazzar tungah pia hi.
15 Tua kumpilianpa in tua vanhte la a, Jerusalem Biakinnpi ah koi kikin nidang a sakna ngei mun ma ah Biakinnpi a sakkik natu in ama sawl hi.
16 Tua ahiciang Sheshbazzar hong pai in a tawdap phaasak hi; tua hun pan kipan tu dong Biakinnpi kisa zom a, ahizong kiman ngawl lai hi, ’ci in zo hi.
17 “Tu in, Nang Vaanglianpa, na lung a kim le Babylon kumpi thu tepteenate sungah Cyrus in hi Jerusalem Biakinnpi sakkik natu in thu a piak le a piak ngawl kansak in a, hi thu taw kisai nangma deina bang hong zasak ta'n,” ci hi.