4
Biakinnpi Sak kikna Kilangpan
1 Judah le Benjamin mite ii ngalte in saltaang a cia kikte ii Israel te ii Pathian, Topa Biakinnpi a sak kikna thu za uh hi.
2 Tua ahiciang amate pai a Zerubbabel le a bee a phung lutangte taw a kimu uh ciang, “Ko zongh Biakinnpi sakna ah hong kihelsak tavun. Noma biak Pathian ma kote in bia khu hi, Assyria kumpilianpa Esarhaddon in hi lai ah teang tu in hong paisak pan kipan ama tungah sangaw biakpiakna pia khu hi,” ci uh hi. Ref 4:2 2 Khang 17:24-41
3 Zerubbabel, Joshua le a bee a phung lutangte in amate tungah, “ Topa kote Pathian biakinn sak natu in nong hu tu ka kisamh bua uh hi. Persia kumpilianpa Cyrus ii hong thupiakna bangin koma teng ma in ka sa tu uh hi,” ci hi.
4 Tuaciang tua ngam sungah a teang mite in a sak ngawl natu in Jew te thinkiam sakin lauthawn tu hanciam uh hi.
5 Amate a langpan natu in Persia kumpi uliante zongh sumnguk pia uh hi. Amate in Cyrus kumpi maan hun sung theampo le Darius kumpi maan hun dongin tubangin langpan tan uh hi.
Jerusalem Sak kikna Kilangpan
6 Xerxes kumpilianpa maan hun a kipat ciang Judah le Jerusalem ah a teangte ii ngalte in amate a langpanna lai pia uh hi. Ref 4:6 Est 1:1
7 Persia kumpilianpa Artaxerxes maan hun ciangin Bishlam, Mithredath, Tabeel le a pawlpuite in kumpilianpa tungah laithak at kik uh hi. Tua laithak sia Aramaic lai taw in ki at a, a kisim ciang pheen kik kul hi.
8 Ngamukmangpa Rehum le ngamsung thuzeakpi Shimshai te zongh in Jerusalem khua thu taw kisai kumpilianpa Artaxerxes tungah a nuai a bangin laithak at uh hi:
9 “Ngamukmangpa Rehum le ngamsung thuzeakpi Shimshai, a pawlpuite, thukhente le Elam ngam sungah a om Erech, Babylon le Susa khuate ah a teang ulian dang theampote tung pan
10 tuaciang a lian le a thahat Ashurbanipal ii amate inn pan a khiin Samaria khuapi sung le Euphrates nitumna ngamsung mundang ah a teensak midangte theampo tung panin kong thaak khop uh lai ahi hi.”
11 A laithak sia a nuai a bang hi:
“Euphrates nitumna sangah a teang na naseamte in kumpilianpa Artaxerxes tungah lai kong thaak uh hi.
12 “Nangma vaanglian kumpipa in, na ngam tuatuam panin hi mun ah hong pai Jew te ii Jerusalem khua ah teang a, a ngilo khuapi le kumpi leedo thei, tua khuapi a saat kikna thu he le te kong oai uh hi. Amate in luphung cian tu kipan zo a, hai ngawlin zo tu hi.
13 Vaanglian kumpipa awng, hi khuapi kisa kikin a luphungte kimanthiang le a mite in phiangshia piak tawlnga in, na kumpi sum tum kiam tu hi.
14 Tu in kote sia nangma a vaanglian kumpipa khutnuai ah a seamte ka hi uh ciang, hi bangin a pian tu sia mu nuam ngawl khu hi, tua hi a,
15 na taanghpupite nusiat thu tepteena laibu sungah na kat kik tu in ngaisutna kong pia uh hi. Tuabangin kan kik le te hi khuapi sia kumpi leedo tawntung khuapi a hina le taanghlai hun a kipan kumpite le ngam ukte a buaisakna thu na mu tu hi. A mite sia uk hak tawntung hi. Tua hangin a khua kilalsak hi.
16 Hi khua kisaat kikin a luphungte kizo thiang thong le vaanglian kumpipa nangma in Euphrates nitumna ngam teng uk zo nawn ngawl tu ci thu telthiang khu hi.”
17 Kumpilianpa in hi bangin lai thuk hi:
“Ngam uk mangpa Rehum, ngamsung thuzeakpi Shimshai le Samaria le Euphrates nitumna sangah a teang pawl le lawmte awng kong paupui hi.
18 “Nong laithak kipheen kik in keima hong kisim hi.
19 A thu kan tu in ka sawl a, thu a kat ciang nidang tawngh hun pan Jerusalem sia kumpi a langpan tawntung a, a leedote le thu nawngkai vawtte taw a kidimna kimu takpi hi.
20 A thahat kumpite maang in Euphrates nitumna sang theampo uk in shia le phiangshia khon uh hi.
21 Tua ahikom thu kong piak kik mateng tua mite in khuapi a sakkik nawn ngawl natu in thupia tu nu hi.
22 Ka ngam phattuam nate a kilalsak ngawl natu in thakhat thu in tuasia seam paih vun,” ci hi.
23 Hi Artaxerxes ii laithak sia Rehum, Shimshai le a pawlpuite tungah a kisim po ciang amate Jerusalem ah manlang takin pai in Jew te khuapi a sakkik sia zawthawk thu taw tawlngasak uh hi.
Biakinnpi Sak Nasep Kipan kik
24 Biakinnpi sakkik sia kitawlngasak a, Persia kumpilianpa Darius ii kumpi maan a kum nii kum dong bangma seam ngawlin omcip hi. Ref 4:24 Hag 1:1; Zec 1:1