6
Cyrus Kumpilianpa ii Thupiakna Kimu kik
1 Tuaciang Darius kumpilianpa in Babylon khua ah a kikeam kumpite thu tepteena laibu sungah tua thute kan tu in thupia hi.
2 Ahizong Media ngamsung Ecbatana khua sungah a nuai a bang thu tepteena a om laizial khat kimu hi:
3 “Ama ii kumpi maan zawk a kum khat kum in Cyrus kumpilianpa in sangaw biakpiakna le meihal biakpiakna mun tu in Jerusalem Biakinnpi a kisak kik natu thupia hi. Biakinnpi sia metre 27 saangin metre 27 zai tu hi.
4 A pangte suangtum dawl thum a cian simin thing dawl khat taw kisa tu hi. A sum bo theampo kumpi sum sung pan kipia tu hi.
5 Nebuchadnezzar kumpipa ii Jerusalem Biakinnpi pan Babylon ah a paipui khamh le ngunn, vanh zakte zongh Jerusalem Biakinnpi sung a omna ngei tek ah kikoi kik tu hi,” ci in a kitepteena mu uh hi.
Darius in Nasep A Zop natu Thupia
6 Tuasia ciang Darius in a nuai a bangin zasak kik hi:
“Euphrates nitumna ngamukmangpa Tattenai, Shethar Bozenai le Euphrates nitumna ngam ah a om a nasep pui uliante awng,
“Biakinnpi pan kiheam vun a,
7 Biakinn sakna nawngkaisak heak vun. Judah ngamukmangpa le Jew lampuite in Pathian Biakinnpi sia a om na ngei ma ah sa kiksak vun.
8 Amate ii a sak kikna na hu natu uh in hi lai sungah thu kong pia hi. Hi nasep a kisuangsamh ngawl natu in Euphrates nitumna sang pan phiangshia a kinga kumpi sum sung pan a bona teng theampo manlang takin kipiaksak tu hi.
9 Jerusalem ah a om thiampite ii ni simin kisamh hi hong ci pawpo peal ngawlin pia tu nu hi: vantung Pathian tungah meihal biakpiak natu in khuitalnote, tuute ahibuale tuunote ahibuale zungtaang, ci, sapittui ahibuale olive thau ahi hi.
10 Vantung Pathian ii a saan thei tu in sangaw biakpiakna a piak thei natu le keima le ka tapate atu in thupha nong nget thei natu in hisia sep tu ahi hi.
11 Tua banah hi thupiakna a zui ngawl a om le a inn zawlliang khat kidawkeaksak tu a, a mong khat kizumin tuaciang ama pumpi kisunlet tu hi. A inn sia ninthuk kisua tu hi.
12 Ama a kibiak natu mun Jerusalem khuapi a teal Pathian in hi thupiakna nial a, tua Biakinnpi a lalsak nuam kumpi ahibuale minam peuma susia tahen. Keima Darius in hi thu kong pia zo hi. Ka thupiak sia na zui siat tu uh ahi hi.”
Biakinnpi Ki aap
13 Tuasia ciang ngamukmang Tattenai, Shethar Bozenai le a naseppui uliante in kumpilianpa thupiak bang linlian in vawt siat uh hi.
14 Jew lampuite in kamsaang Haggai le Zechariah te ii hanthotna taw a Biakinnpi sak ngai tawto uh hi. Amate in Biakinnpi sia Israel te ii Pathian le Persia kumpiliante ahi Cyrus, Darius le Artaxerxes te ii thupiak bangin zo thiang uh hi. Ref 6:14 Hag 1:1; Zec 1:1
15 Amate in Darius ii kumpilian a sep zawk a kum luk kum Adar tha, ni thum ni in Biakinnpi zo uh hi.
16 Tua zawkciang Israel mite — thiampite, Levi te le saltanna pan a cia kik midang theampote in lungdam takin Biakinnpi aap uh hi.
17 Biakinnpi aapna in amate in khuital 100, tuu 200, le tuuno 400 te sangaw biakpiakna in pia a, Israel nam sim atu mawphel biakpiakna in keal khat tek, keal 12 pia uh hi.
18 Amate in Moses laibu sungah kihilna om bangin Jerusalem biakinn naseam tu in thiampite le Levi te zongh kaikhawm uh hi.
Paisan Poai
19 Saltanna pan hong cia kik mite in a kum kik, a tha masa, ni sawm le ni li ni in Paisan Poai khaam uh hi. Ref 6:19 Pu 12:1-20
20 Thiampite le Levi te theampo in amate le amate kithiansua in a zeksa om bangin thiangtho uh hi. Levi te in hong cia kik mite theampo atu le thiampite le amate mama atu in Paisan Poai sangaw biakpiakna in ngannote ngo uh hi.
21 Tua biakpiakna sate saltanna pan hong cia kik Israel te theampo le tua ngam ah a teang doai biate ii biakna nusia a Israel ii Topa Pathian bia tu in hong paite in ne uh hi.
22 Ni sali sung lungdam takin Tol saw ngawl Anluum Poai khaam uh hi. Israel te ii Pathian ii Biakinnpi a sakkikna ah a hu natu Topa in Assyria kumpilianpa sia Jew te ngup nopna thin neisak ahikom amate lungdamna taw kidim hi.