26
Anpal taw Biakpiakna
1 “ Topa na Pathian hong piak tu ngam la in na teen zawk uh ciang,
2 note khat simin na laak maksak uh na lo anpalte sung pan khen khat tek khum khat sungah koi in, biakna mun khat sia ah paipui tu nu hi. Ref 26:2 Pu 23:19
3 Tua hun lai in, vaipuak a nei thiampipa kungah pai in, ‘Ka taanghpupite tungah ko hong piak tu a kamciamsa ngam ah ka tum zo uh hi, ci in Topa ka Pathian tungah tu in ka kona uh ahi hi,’ ci vun.
4 “Thiampipa in nangma tung pan tua khum hong saang tu a, Topa na Pathian biaknatau mai ah koi tu hi.
5 Tuaciang Topa mai ah hi kammal teng a lot in son in: ‘Ka taanghpupi sia a vak kawkoai Aram mi hi a, a innkuanpuite Egypt ngam ah teang tu in a paipui pa hi. Amate tualai ah a pai lai in mihing tawm bek hi a, ahizong amate tam pha in a thahat minam suak hi.
6 Egypt te in kote hong vawtsia in zawthawk thu taw sal nasep hong seamsak uh hi.
7 Tuasia ciang ka taanghpupite ii Pathian, Topa tungah hu ngenin ka au uh hi. Ama in hong za a, kote thuakna, haksatna le buainate hong mu hi.
8 Ama in a vaangletna le a thahatna taw Egypt ngam pan hong suatak hi. Ama in nalamdang lakna te le a lamdangte vawtin a kiitakhuai nate piangsak hi.
9 Ama in hi munah hong paipui a, khuinoai le khuaitui a luanna hi ngampha le ngamnuam hong pia hi.
10 Tua ahiciang tu in ama hong piaksa anpalte Topa kungah kong paipui hi,’ na ci tu hi.
“Tuaciang Topa mai ah na khum nga suk vun a, tualai ah na bia vun.
11 Topa na Pathian in nang le na innkuanpuite hong piak naphate hangin lungdamko vun; Levi te le note sungah hong teang ngamdangmite zongh taw lungdamko khawm vun.
12 “Kum thum simin na lo ante — sawm a khat sumpite — sia Levi te, ngamdangmite, tangate le meingong nupite tungah pia vun, tua hile mipite omna theampo ah amate neak tu a kisap za tek nei tu uh hi. Tuabang na vawt zawk uh ciang, Ref 26:12 Thkna 14:28-29
13 Topa tungah, ‘A thiangtho sawm a khat sumpite ka inn ah bangma taang ngawl hi; nong thupiak bangin Levi te, ngamdangmite, tangate le meingongte tungah ka pia zo hi. Sawm a khat sumpi tungtaang ah na thupiakte khat zongh ka nial bua a ka mangil bua hi.
14 Hee in kaikut a ka om ciang zong, sumpi peuma ka ne bua hi; biakna taw kisai in a thiang ngawl ka hi hun ciang zong, bangma ka inn pan ka pusua bua hi; mithi an siana in ka zangh bua hi. Topa awng na thu hong ni khi hi; sawm a khat sumpi taw kisai nong thupiak theampo ka vawt siat zo hi.
15 Vantung na omna thiangtho mun pan hong ensuk ta'n a, Israel na mite thupha hong pia ta'n; ka taanghpupite tungah na kamciam bangin nong piaksa ngamnuam le ngampha zongh thupha hong piaksak ta'n,’ ci vun.
Topa ii Mite
16 “Tuni in Topa na Pathian in ama ii thukham theampo zui tu in no tungah thu hong pia hi; tua ahiciang tuate na thin na lung theampo taw thumaan takin zui vun.
17 Tuni in Topa sia note Pathian in na saang zo uh hi, a thu ni a, ama ngeinate theampo zui tu le a thupiak theampo seam tu in kamciam na pia zo uh hi.
18 Ama hong kamciam bangin tuni in Topa in note sia ama mihing in hong saang zo a; ama thukham theampo zui tu in thu hong pia hi. Ref 26:18 Pu 19:5; Thkna 4:20;7:6;14:2; Tit 2:14; 1 Pe 2:9
19 Ama ii piansak minam dang theampo sangin a lianzaw in note hong vawt tu a, ama min pokin na patoai tu uh hi. Ama kamciam bangin note ama mihing na hi tu uh hi,” ci hi.