27
Suangte tungah A ki at Pathian ii Thukhamte
1 Tuaciang Moses in Israel lampuite taw kopin mipite tungah, “Tuni a kong piak kihilna theampo zui vun.
2 Jordan ngun kaantan in Topa na Pathian ii hong piakna ngamsung na tum uh ni in, suang lian pawlkhat phut in, buan taw zut vun a, Ref 27:2-8 Jos 8:30-32
3 tuate tungah hi thukhamte le hilnate theampo at vun. Na taanghpupite ii Pathian, Topa ii hong kamciamna ahi ngamnuam le ngampha sungah na tum uh ciang,
4 le Jordan ngun langkhat na thet uh ciang tuni in kong hil bangin Ebal Mual tungah hi suangte phut vun a, buan taw zut vun.
5 Tua munah thik hiamh taw a kitan ngawl suang taw a kivawt biaknatau khat ciang vun,
6 banghang ziam cile Topa na Pathian atu in na cian biaknatau peuma a ki attan ngawl suangte taw bekin kivawt tu hi. Tualai ah meihal biakpiaknate na pia tu uh a, Ref 27:5-6 Pu 20:25
7 sangaw biakpiakna pia in pawlkhop biakpiaknate ne in Topa na Pathian mai ah lungdamko vun.
8 Buan taw a kizut suangte tungah Pathian ii thukham kammal theampo a kician in at vun,” ci hi.
9 Tuaciang Moses in Levi thiampite taw Israel mite theampo tungah, “Israel mite awng, pha tak hong nadon tavun. Tuni in Topa na Pathian ii mi na suak zo uh hi;
10 tua ahiciang tuni in kong piak ama thukham theampo zui in keamcing tavun,” ci uh hi.
Thu ni ngawlte Haamsiatna
11 Tuaciang Moses in Israel mite tungah,
12 “Jordan ngun na kaan zawk in, mipite tungah thupha a kipiak ciang a nuai a minamte sia Gerizim Mual tungah ding tu uh hi: tuate sia Simeon, Levi, Judah, Issachar, Joseph le Benjamin namte ahi hi. Ref 27:12 Thkna 11:29; Jos 8:33-35
13 A kihaamsiat ciang a nuai a minamte Ebal mual tungah ding tu uh hi; tuate sia, Reuben, Gad, Asher, Zebulun, Dan le Naphtali namte ahi uh hi.
14 Levi te in hi kammalte nging takin pau tu hi:
15 “ ‘Suang, thing ahibuale leisung sumpiangte taw milim vawt a, tuasia a bia ku pawpo tungah Pathian haamsiatna tung tahen; Topa in milim biakna ngaimaw hi.’
“Tuasia ciang mipi theampo in ‘Amen!’ ci in zo tu uh hi. Ref 27:15 Pu 20:4;34:17; Thiam 19:4;26:1; Thkna 4:15-18;5:8
16 “ ‘A pa ahibuale a nu a zatak vawt ngawl pawpo tungah Pathian haamsiatna tung tahen.’
“Tuasia ciang mipi theampo in, ‘Amen!’ ci in zo tu uh hi. Ref 27:16 Pu 20:12; Thkna 5:16
17 “ ‘A innpaam khat ii ngisuang a khiin pawpo tungah Pathian haamsiatna tung tahen.’
“Tuasia ciang mipi theampo in, ‘Amen!’ ci in zo tu uh hi. Ref 27:17 Thkna 19:14
18 “ ‘Mittaw khat a lamlak khial pawpo tungah Pathian haamsiatna tung tahen.’
“Tuasia ciang mipi theampo in, ‘Amen!’ ci in zo tu uh hi. Ref 27:18 Thiam 19:14
19 “ ‘Ngamdangmite, tangate le meingong nupite ii nga tute a khaktan pawpo tungah Pathian haamsiatna tung tahen.’
“Tuasia ciang mipi theampo in, ‘Amen!’ ci in zo tu uh hi. Ref 27:19 Pu 22:21;23:9; Thiam 19:33-34; Thkna 24:17-18
20 “ ‘A pa zite khat pawpo khialpuina taw a pa a maimawlsak pawpo tungah Pathian haamsiatna tung tahen.’
“Tuasia ciang mipi theampo in ‘Amen!’ ci in zo tu uh hi. Ref 27:20 Thiam 18:8;20:11; Thkna 22:30
21 “ ‘Nganhing taw a khial pawpo tungah Pathian haamsiatna tung tahen.’
“Tuasia ciang mipi theampo in, ‘Amen!’ ci in zo tu uh hi. Ref 27:21 Pu 22:19; Thiam 18:23;20:15
22 “ ‘A suapuinu ahibuale a suapui sealhnu a khialpui pawpo tungah Pathian haamsiatna tung tahen.’
“Tuasia ciang mipi theampo in, ‘Amen!’ ci in zo tu uh hi. Ref 27:22 Thiam 18:9;20:17
23 “ ‘A sunghnu a khialpui pawpo tungah Pathian haamsiatna tung tahen.’
“Tuasia ciang mipi theampo in, ‘Amen!’ ci in zo tu uh hi. Ref 27:23 Thiam 18:17; 20:14
24 “ ‘Mihing a that ku pawpo tungah Pathian haamsiatna tung tahen.’
“Tuasia ciang mipi theampo in, ‘Amen!’ ci in zo tu uh hi.
25 “ ‘Mawnei ngawl mihing khat thatlum tu in sumnguk a saang pawpo tungah Pathian haamsiatna tung tahen.’
“Tuasia ciang mi theampo in, ‘Amen!’ ci in zo tu uh hi.
26 “ ‘Pathian thukham theampo le hong hilna teng a zui ngawl pawpo tungah Pathian haamsiatna tung tahen.’
“Tuasia ciang mipi theampo in, ‘Amen!’ ci in zo tu uh hi. Ref 27:26 Gal 3:10