25
1 “Sonteena in Israel te nii sia thu kinei in zum kithen a, thu a khen ciang khat sia maw ngawlin a dang khat sia maw hi.
2 A maw pa sia saat thuak tu in thu a kikhen le, thukhenpa in ama, lei ah boksakin saatsak tu hi. Bang tanvei saat tu cisia ama khialna lian a vawtna bang hi tu hi.
3 Ama sia sawmlivei dong kisaat thei tu a, ahizong tuaza sangin tamzaw ngawl tu hi; tuaza sangin a tamzaw le mipite mai ah maizum a pia suak tu nu hi. Ref 25:3 2 Cor 11:24
4 “Khuital khat an na cilsak laitakin a muk tuamsak heak vun. Ref 25:4 1 Cor 9:9; 1 Tim 5:18
A Thi Suapuipa tungah Sep tu
5 “Unau nii inn khat ah teang khawm a, khat sia tapa nei ngawlin a thi le, a zi sia innkuan dangah pasal nei thei ngawl tu hi; mithi pa ii suapuipa in ama a teenpui tu sia a vaipuak ahi hi.
6 Mithi pa ii bee le ngui Israel minam sungah a bo ngawl natu in amate ii nei a tapaciil sia mithipa ii tapa in kingaisun tu hi.Ref 25:5-6 Mt 22:24; Mk 12:19; Lk 20:28
7 Ahizong mithi pa ii suapuipa in ama a teenpui nuam buale tua nu sia khua lampuite mai ah pai tu a, ‘Ka pasal suapuipa in a vaipuak seam ngawl hi. Ama in Israel mite sungah a suapuipa atu in suan le paal pia nuam ngawl hi,’ ci in son tu hi.
8 Tuaciang khua lampuite in tua pa samin thu sonpui tu hi. Tua pa in a teenpui nuam bualai ahile,
9 a suapuipa zi in khua lampuite mai, ama kungah pai in tua pa ii peangdap langkhat suutsak in, a maitang cilphii in, ‘A suapuipa atu in suan le paal a pia nuam ngawl sia tungah hi bangin kivawt hi,’ ci tu hi.
10 Israel sungah tua pa ii innkuan sia, ‘A peangdap a kisuusak pa ii innkuan,’ kici tu hi. Ref 25:7-10 Rut 4:7-8
Thukham Dangte
11 “Pasal nii kihau a, a khat sia pa ii zi in a pasal hun nuamin, a khat sia pa ii cil le zang a zapsak ahile,
12 tua nu hesuak ngawlin; a khut tansak vun.
13-14 “Toaisuangte le piciangte na zak uh ciang theam heak vun.
15 Topa na Pathian ii hong piak tu ngam ah na khan a sau thei natu in toaisuangte le piciangte thumaan thutak taw zangh vun.
16 Topa in ngualtheamte ngaimaw hi. Ref 25:13-16 Thiam 19:35-36
Amalek te Thalup tu in Thupiakna
17 “Egypt ngam pan nong pai uh lai in, Amalek te ii hong vawtnate phawk vun.
18 Amate in Pathian kiita ngawl ahiciang noma toi in na tha uh a bo ciang na nung pan hong simin, nungsangah a toi a baa theampo hong thatlum siat hi.
19 Tua ahikom, Topa na Pathian in ngam hong pia in, na kiim ah a teang na ngalte kung pan ngalmuanna hong piak ciang Amalek te theampo thatlum siat vun, tua hile kuama in amate phawk nawn ngawl tu hi. Tuasia mangil heak vun! Ref 25:17-19 Pu 17:8-14; 1 Sa 15:2-9