19
Bukna Khuapite
(Mi Simna 35:9-28; Joshua 20:1-9)
1 “ Topa na Pathian ii hong piak tu ngam sungah a teang mihingte Topa na Pathian in a mot siat zawkciang le a khuapite le a innte la in, tua munah na teen zawk uh ciang, Ref 19:1-13 Jos 20:1-9
2-3 tua ngam sia khen thum in khen vun a, a khen simin ol takin a kihaw thei khuapi khat tek nei tu hi. Tuasia hun ciang mihing khat in ngual khat po a thalup ciang, a buk natu in tua khuapite khat pawpo zuan thei tu hi.
4 Mihing khat in a ngal ahi ngawl khat a thatlum tha ahile, tua khuapite khat pawpo zuanin suakta tu hi.
5 Sonteena in, mihing nii duisung ah thingtom tu in kuankhawm a, khat pa ii thing a siik laitak a heitang zuukin a lawmpa sia a khalum tha le ama tua khuapi thumte khat sungah tai in suakta tu hi.
6 Bukna khuapi khat bek om thong hile a tai natu khuala leih tu ahiciang, a phulam nuam a mealheak pa in mawnei ngawl a innpaam pa pha tu a, thin uuk tutna in thatlum tha tu hi. Tua hi a, ama in a ngal pa ahi ngawl mihing khat thatlum tha ahi hi.
7 Tua ahikom bukna khuapi thum koi tu in thu kong pia hi.
8 “ Topa na Pathian in na taanghpupite tung a sonsa bangin na ngam uh keak vaial in, ama kamciamsa ngam theampo no hong piak ciangin,
9 khuapi thum na teal thua tu uh hi. Tuni in kong thupiak theampo vawt a, Topa na Pathian it in, hong hil bangin na nungta uh le ama in hi ngam note hong pia tu hi.
10 A maw ngawlte in thina a thuak ngawl natu le, Topa ii hong piak tu ngam sungah a thi uh hu in mawsiatna a thuak ngawl natu in hi bangin seam vun.
11 “Ahizong sonteena in, mihing khat in a ngal pa thatlum lui a, tua zawkciang a suakta tu in khuapi thumte khat zuan hi.
12 Tuabang thu a om ciangin ama khua lampuite in tua pa a kithalup thei natu in, ama samsak tu a, a thalup pa ii mealheakte tungah phulam in a thalup tu in aap tu hi.
13 Ama hesuak heak vun. Israel te sung pan mihing that pa bosak vun, tua hile na ma uh vang tu hi.
Taanglai Ngite
14 “ Topa na Pathian ii hong piak tu ngam sungah nidang lai pekin a kiphut, na innpaam na lopaam te ii ngisuang khiin heak vun. Ref 19:14 Thkna 27:17
Tetti taw Kisai
15 “Khialna lian a vawt khat mawsak natu in tetti khat bek taw kicing ngawl a; mihing khat maw piak natu sia a tawmbel in tetti nii kisamh hi. Ref 19:15 Mi 35:30; Thkna 17:6; Mt 18:16; Jn 19:31; 2 Cor 13:1; 1 Tim 5:19; Heb 10:28
16 Mihing khat in midang khat a natsak nopna hangin thumaan ngawl taw maw a suan le,
17 a nii in biakna mun khat sia ah pai tu a, tua laitak vaipuak nei thiampite le thukhente in a thu khensak tu uh hi.
18 Thukhente in tua thu a pha takin kantel tu a; a Israel mipuipa sia thumaan ngawl taw a mawsak thawthong ahile,
19 mawsiat a thuak pa ii a thuak tu daan sia ama in thuak tu hi. Tuabangin thumaan ngawl ngitlona bosak tu nu hi.
20 Tuasia ciang a kuama po in tua thupiang za tu a, lau in, kuama in tuabang a sia vawt kik ngeingawl tu hi.
21 Hi bang thute ah hesuakna lak heak vun a; daan piak natu sia nuntakna khat luangin nuntakna khat, mittang khat luangin mittang khat, hatang khat luangin hatang khat, khut khat luangin khut khat, peang khat luangin peang khat hi tu hi. Ref 19:21 Pu 21:23-25; Thiam 24:19-20; Mt 5:38