20
Ngal taw Kisai
1 “Na ngalte sim tu in na kuan uh ciang, ngalleangte, siphute le ngalkaphonpi khat sia note neiza sangin a tamzaw in na mu uh ciang tuate kiita heak vun. Egypt pan hong suatak Topa na Pathian sia note taw hong omkhawm tu hi.
2 Ngalsim tu na kipat ma in, thiampi khat sia mai sangah hong pai tu a, ngalkaphonpi tungah,
3 ‘Israel mite awng ngai vun! Tuni in ngal simin na kuan tu uh hi. Na ngalte kiita heak vun a, lau in liing heak vun.
4 Topa na Pathian in note hong tonpui tu a, zawna hong pia tu hi,’ ci tu hi.
5 “Tuasia ciang ngalkap bute in a mite tungah, ‘Hi sungah inn thak a sak zawk bek hi a, aapna a vawt ngawl lai khat pawpo a om ziam? A om le a inn ah cia kik tahen. Tua hi ngawlin ngal sungah ama a kithat le a inn sia mi dang khat pawpo in aapna vawt tu hi.
6 Hi sungah sapithuan thak a vawt zawk bek hi a, ahizong sapitnga a lo ngawl lai khat pawpo a om ziam? A om le a inn ah cia kik tahen. Tua hi ngawlin ngal sungah ama a kithat le mi dang khat pawpo in tua sapittui taw nuamsa tu hi.
7 Hi sungah zi nei tu in mo dongh sa khat pawpo a om ziam? A om le a inn ah cia kik tahen. Tua hi ngawlin ngal sungah ama a kithatlum le midang khat pawpo in a dok sa numei sia teenpui tu hi,’ ci tu hi.
8 “Tuaciang ngalkap bute in a mite tungah, ‘Hi sungah patau in a lauthauh khat pawpo a om ziam? A om le, a inn ah cia kik tahen. Tua ahi buale ama in a dangte thin lalsak tu hi,’ ci si tu hi.
9 Ngalkap bute in ngalkaphonpi tungah a thuson a man zawkciang a pawl sim atu in lampuite kiteal tu hi.
10 “Khuapi khat sim tu in a pai uh ciang a masa phit belin tua khua mite na khutnuai ah hong tum thei natu in hun pia vun.
11 Amate in kongpite hong honin hong ki aap ahile, a vekpi in na sila suak tu a, na na hong sepsak tu hi.
12 Ahizong tua khua mite hong ki aap nuam ngawlin do tu hong sawm zaw le tua khuapi na ngalkaphonpite taw uumci vun.
13 Topa na Pathian in tua khuapi zawna hong piak ciang a sung a om pa theampo thatlum siat vun.
14 Ahizong noma atu in numeite, patangte, ngannote, le khua sung a om nadang theampo la thei tu nu hi. Na ngalte neisa theampo zangh thei tu nu hi. Topa in note tungah hong pia zo hi.
15 Note teen natu ngam pan a khualana khuapite tungah tu a bangin vawt tu nu hi.
16 “Ahizong Topa na Pathian ii hong piak ngam sungah a om khuapite na laak uh ciang, mihing theampo thatlum siat vun.
17 Topa ii hong thupiakna bangin a mihing theampo, Hit te, Amor te, Canaan te, Periz te, Hiv te le Jebus te mon vun.
18 A pathiante a biak ciang a kiihuai nate sep tu hong hil na taw, Topa tungah a maw na sua ngawl natu in amate thatlum siat vun.
19 “Khuapi khat na laak nop uh ciang khuangei mama sung na kiim uum ta uh zong a thingnga kungte phuktan heak vun. A thingnga ne vun a, ahihang a kungte lalsak heak vun; a kungte sia na ngalte uh hi ngawl hi.
20 Thingkung dangte na phuk thei tu uh a, khuapi a kilaak mateng in kulh uumna in zangh thei tu nu hi.