8
1 ယဆၢမုၢ်လၢ်လၢနကမ့ၢ်ယဒီပုၢ်ဝဲၢ်ခွါ,
လၢယမိၢ်ဒုးအီတ့ၢ်အီၤအနုၢ်န့ၣ်လီၤ.
တုၤနုၤတစု, ယမ့ၢ်ဘၣ်သဂၢၢ်နၤလၢကျဲခိၣ်ဒီး,
ယနၢမူနၤကသ့, ဒီးတမ့ၢ်ပှၤကတဲယၤနီတဂၤဘၣ်.
2 ယကဆှၢနၤဆူယမိၢ်အဟံၣ်ပူၤ,
တၢ်လီၢ်ဖဲနကသိၣ်လိယၤလၢတၢ်အဲၣ်န့ၣ်လီၤ.
ယကဟ့ၣ်နၤထံခၣ်လၢအဃါဃုာ်ဒီးတၢ်နၢမူအစီ,
ယသလဲသၣ်အစပံးထံလၢနကအိအီၤအဂီၢ်လီၤ.
3 နစုစ့ၣ်ဖီၣ်ဃးယကိာ်, ဒီးနစုထွဲန့ၣ်မၤမုာ်ယၤလီၤ.
4 ဝ့ၢ်ယရူၤၡလ့ၣ်အဖိမုၣ်သ့ၣ်ဧၢ, အၢၣ်လီၤယၤလၢသုတမၤတံာ်တာ်ဘၣ် ပတၢ်အဲၣ်လိာ်ပသးဘၣ်န့ၣ်တက့ၢ်.
ပိာ်မုၣ်တဖၣ်
5 ပှၤလၢအဟဲလၢပှၢ်လၢ်ကျါဒီးဟံးဃာ်လိာ်အစုဒီးအတၢ်အဲၣ်န့ၣ် မ့ၢ်မတၤတဂၤလဲၣ်.
ပိာ်မုၣ်
ယထိၣ်ဂဲၤထၢၣ်နၤလၢသ့ၣ်ဖီသၣ်အဖီလာ်,
တၢ်လီၢ်လၢနအိၣ်ဖျဲၣ်တ့ၢ်န့ၣ်လီၤ.
6 အိးထီၣ်နသးလၢနကအဲၣ်ယၤထဲတဂၤဧိၤ,
ဒီးဖိးဟုယၤထဲတဂၤဧိၤတက့ၢ်.
တၢ်အဲၣ်န့ၣ်ဆူၣ်ထဲသိးဒီးတၢ်သံ,
တၢ်အဲၣ်တၢ်ကွံအဂံၢ်အဘါဆူၣ်ဒ်တၢ်သံအနီၢ်ကစၢ်န့ၣ်လီၤ.
ကပျီၤထီၣ်ဝဲဒ်မ့ၣ်အူလၣ်ဒီးအီၣ်တၢ်ဒ်မ့ၣ်အူလၢအသလၣ်လီၤအသး တပျုာ်တပျီၤအသိးန့ၣ်လီၤ.
7 ထံမၤလီၤပံာ်အီၤတသ့ဘၣ်, ထံလုၣ်ဘၢတၢ်မၤလီၤဘျၢအီၤတသ့ ဘၣ်.
ဘၣ်ဆၣ်ပှၤတဂၤဂၤမ့ၢ်ကျဲးစၢးပှ့ၤန့ၢ်တၢ်အဲၣ်လၢအတၢ်ထူးတၢ် တီၤဒီး,
တၢ်လၢအဝဲကမၤန့ၢ်မ့ၢ်, တၢ်သးဟ့, တၢ်သးဘၣ်အၢလီၤ.
ပိာ်မုၣ်အဒီပုၢ်ဝဲၢ်ခွါတဖၣ်
8 ပအိၣ်ဒီးပဒီပုၢ်ဝဲၢ်မုၣ်သးစၢ်တဂၤ,
ဒီးအနုၢ်တဖၣ်ဆံးဒံးဝဲန့ၣ်လီၤ.
ဖဲပိာ်ခွါသးစၢ်တဂၤဟဲဃ့အဲၣ်အီၤန့ၣ်, ပမၤတၢ်လၢအဂီၢ်ကသ့ဒ်လဲၣ်.
9 အဝဲမ့မ့ၢ်တၢ်ဒူၣ်တခါဒီး,
ပကဘှီထီၣ်န့ၢ်အီၤတၢးခၢၣ်သနၢၣ်စ့တဖျၢၣ်န့ၣ်လီၤ.
ဘၣ်ဆၣ်အဝဲမ့မ့ၢ်ကျဲစၢၤတပူၤဒီး,
ပကဒီဒၣ်အိၣ်ပှိၤအီၤလၢသ့ၣ်ဆှိးအ့ရ့းအသ့ၣ်ဘၣ်တဖၣ်လီၤ.
ပိာ်မုၣ်
10 ယဲဒၣ်အံၤယမ့ၢ်တၢ်ဒူၣ်တခါ,
ဒီးယနုၢ်တဖၣ်မ့ၢ်အတၢးအခၢၣ်သနၢၣ်တဖၣ်န့ၣ်လီၤ.
ပှၤလၢယအဲၣ်အီၤတဂၤသ့ၣ်ညါဝဲလၢ,
ယထံၣ်န့ၢ်တၢ်သးမံဒီးတၢ်ဃူတၢ်ဖိးဒီးအီၤလီၤ.
ပိာ်ခွါ
11 စီၤပၤၡလိၤမိၤအိၣ်ဒီးအစပံးလီၢ်တလီၢ်,
ဖဲတၢ်လီၢ်တတီၤလၢအဘၣ်တၢ်ကိးအီၤလၢ ဘဧၤလဟမိၣ်လီၤ.
အဝဲဒိးလဲလီၤဝဲဆူပှၤထူစံာ်ဖိတဖၣ်အအိၣ်,
ဒီးပှၤတဂၤစုာ်စုာ်န့ၣ်ဟ့ၣ်အီၤစ့အဘ့ၣ်တကထိန့ၣ်လီၤ.
12 စီၤပၤၡလိၤမိၤဒိးန့ၢ်ဘၣ်အစ့အဘ့ၣ်တကထိ,
ဒီးပှၤထူစံာ်ဖိတဖၣ်မၤန့ၢ်ဝဲခံကယၤစုာ်စုာ်ဒ် အတၢ်နီၤဟ့ၣ်အသိးလီၤ.
မ့မ့ၢ်ယဲယအိၣ်ဒီးယကစၢ်ဒၣ်ယဲအစပံးလီၢ် တလီၢ်န့ၣ်လီၤ.
13 ယတၢ်အဲၣ်ဧၢ, ပျဲယနၢ်ဟူနကလုၢ်လၢတၤသၣ်လီၢ်တက့ၢ်.
ယတံၤသကိးတဖၣ်အိၣ်ခိးဝဲဒ်သိးကနၢ်ဟူနကတိၤတၢ်လီၤ.
ပိာ်မုၣ်
14 ယတၢ်အဲၣ်ဧၢ, ဟဲဆူယအိၣ်ဒ်တၤဟိစဘံတဒု,
ဒ်တၤဟိဖါဖိတဒုအသိး, ဖဲကစၢၢ်တဖၣ်လၢသ့ၣ်နၢမူ အထူၣ်တဖၣ်မဲထီၣ်ဝဲအလိၤန့ၣ်တက့ၢ်.