7
ပိာ်ခွါ
1 နမ့ၢ်ပိာ်မုၣ်ဖိလၢအလီၤလးတဂၤဒိၣ်မးလဲၣ်
နခီၣ်လၣ်တဖၣ်လၢခီၣ်ဖံးအပူၤန့ၣ်ဃံလၤဝဲဆံးဒိၣ်လဲၣ်
နကံၣ်ဒုၣ်အက့ၣ်ကွီၤတဖၣ်ဖျၢၣ်ဝဲ လီၤဂာ်ဒ်ပှၤစုသ့ တဂၤအတၢ်မၤလၢမၤဝဲအသိးလီၤ.
2 နဒ့မၤအသးဒ်လီခီတဖျၢၣ်,
လၢစပံးထံနၢမူတဖၣ်တလီၤသံးနီတဘျီ အသိးန့ၣ်လီၤ.
နဟၢဖၢမၤအသးဒ်ဘုကၠူၣ်တကဒိၣ်,
လၢဖီဒ့ၣ်ညါတဖၣ်ကဝီၤဃာ်အီၤအသိးန့ၣ်လီၤ.
3 နနုၢ်ခံတိၣ်လီၤဂာ်ဒ်တၤဟိစဘံသဃံာ်ခံဒုအသိးန့ၣ်လီၤ.
4 နကိာ်လီၤဂာ်ဒ်ကဆီမဲအတၢးထီခၢၣ်သနၢၣ်တဖျၢၣ် အသိး,
နမဲာ်ချံတဖၣ်လီၤဂာ်ဒ်နိၣ်တဖၣ်လၢကီၢ်ဃ့ၡဘိၣ် အဝ့ၢ်ပူၤ,
အိၣ်ဘူးဒီးဝ့ၢ်ဖးဒိၣ်န့ၣ်အတြဲၤလီၤ.
နနါစ့ၤလီၤအဲၣ်လီၤကွံဒ်လဘၤနိၣ်အတၢးထီခၢၣ်သနၢၣ်
လၢအဆၢထၢၣ်ဒီသဒၢဝ့ၢ်ဒၤမ့းစ့းအသိးန့ၣ်လီၤ.
5 နခိၣ်အိၣ်ထီၣ်ထီဒ်ကစၢၢ်ကၢ်မ့ၤလးအသိးန့ၣ်လီၤ.
နခိၣ်သူသံၣ်အသး, ကပီၤဒ်သတိၢ်အဂ့ၤကတၢၢ်အသိး,
အတၢ်ဃံတၢ်လၤဖီၣ်န့ၢ်စီၤပၤအသးသ့ဝဲန့ၣ်လီၤ.
6 နလီၤအဲၣ်လီၤကွံနးလဲၣ်, နဃံနလၤဒိၣ်မးလဲၣ်
နတၢ်အဲၣ်လၢအမၤမုာ်လၤသးခုတၢ်န့ၣ်လၢပှဲၤဝဲဒၣ် ဒိၣ်မးလဲၣ်.
7 နမ့ၢ်တၢ်လၢအမဲာ်မုာ်ဘၣ်သးပှၤ, လီၤဂာ်ဒ်လိၣ်အထူၣ်တထူၣ်အသိး,
ဒီးနနုၢ်လီၤဂာ်ဒ်သ့ၣ်စူၣ်ပလူၣ်သၣ်အချံၣ်တဖၣ်အသိးန့ၣ်လီၤ.
8 ယကထီၣ်လိၣ်အထူၣ်န့ၣ်,
ဒီးဒဲးန့ၢ်အသၣ်လီၤ.
နနုၢ်ခံတိၣ်မၤအသးဒ်စပံးသၣ်အချံၣ်တဖၣ်လၢယဂီၢ်,
နတၢ်သါထီၣ်သါလီၤနၢမူဒ်ဖီသၣ်တဖၣ်အသိး,
9 ဒီးနကိာ်ပူၤလီၤဂာ်ဒ်စပံးထံအဂ့ၤကတၢၢ်အသိးန့ၣ်လီၤ.
ပိာ်မုၣ်
မ်စပံးထံယွၤလီၤန့ၢ်ယတၢ်အဲၣ်,
ယွၤလီၤလၢအနိးဖံးဒီးအမဲအလိၤန့ၣ်တက့ၢ်.
10 ယဘၣ်ဃးဒီးပှၤလၢယအဲၣ်တဂၤ, ဒီးအဝဲအဲၣ်ယၤန့ၣ်လီၤ.
11 ဟဲ, ယတၢ်အဲၣ်သးဘိဧၢ, မ်ပကလဲၤသကိးဆူခိခိၣ်,
ဒီးမၤလၢာ်ကွံာ်မုၢ်နၤဖဲသဝီတဖၣ်အပူၤတက့ၢ်.
12 ပကဂဲၤဆၢထၢၣ်ဂီၤဂီၤဒီးကွၢ်စပံးမုၢ်တဖၣ်,
ဒီးထံၣ်မ့ၢ်အဒိၣ်ထီၣ်လံဧါ, မ့ၢ်အဝဲသ့ၣ်ဘိၣ်ထီၣ်ဖးထီၣ်လံဧါ,
ဒီးသ့ၣ်သလဲသၣ်ဖျိထီၣ်လံဧါန့ၣ်တက့ၢ်.
ဖဲန့ၣ်ယကဟ့ၣ်နၤယတၢ်အဲၣ်န့ၣ်လီၤ.
13 နကနၢဘၣ်ဒူးဒးသၣ်အစိ,
ဒီးတၤသၣ်လၢအဂ့ၤခဲလၢာ်န့ၣ်အိၣ်ဘူးဒီးပပဲတြီလီၤ.
ယတၢ်အဲၣ်သးဘိဧၢ, ယပာ်ဃာ်န့ၢ်နၤ,
တၤသၣ်အသီမ့ၢ်ဂ့ၤ, အလီၢ်လံၤမ့ၢ်ဂ့ၤလၢအဝံၣ်အဘဲတဖၣ်န့ၣ်လီၤ.