24
(၁ကွဲး.၂၁:၁-၂၇)
1 လၢတၢ်မၤအသးအဂၤတဘျီန့ၣ်, ယွၤသးဒိၣ်ဘၣ်ပှၤကီၢ်အံၣ်စ ရ့လးဖိဒီးအဝဲမၤဒ်သိးစီၤဒၤဝံးကဒုးဟဲဘၣ်တၢ်ကီတၢ်ခဲ လၢအဝဲသ့ၣ်အဖီခိၣ်လီၤ. ယွၤစံးဘၣ်အီၤ, “လဲၤဒီးဂံၢ်ပှၤဂီၢ်မုၢ် လၢကီၢ်အံၣ်စရ့လးဒီးကီၢ်ယူဒၤအပူၤတက့ၢ်.”
2 လၢတၢ်န့ၣ်အဃိ, စီၤဒၤဝံးဟ့ၣ်လီၤအကလုၢ်ဆူအသုးမုၢ်အသုး ခိၣ်ကျၢၢ်စီၤယိၤအာ်အအိၣ်ဒီးစံးဝဲဒၣ်, “လဲၤဃုာ်ဒီးနသုးခိၣ်သုးနၢ်တဖၣ်သကုၤကီၢ်အံၣ်စရ့လးအဒူၣ် တဖၣ်အကျါစးထီၣ်လၢကီၢ်လၢအအံၤတခီတုၤဆူအဂၤတခီဒီးဂံၢ်ပှၤ ဂီၢ်မုၢ်တဖၣ်တက့ၢ်. ယအဲၣ်ဒိးသ့ၣ်ညါမ့ၢ်အဝဲသ့ၣ်အိၣ်ဆံးအါလဲၣ်န့ၣ်လီၤ.”
3 ဘၣ်ဆၣ်ဒီးစီၤယိၤအာ်စံးဆၢစီၤပၤ, “နဲဒၣ်, တၢ်ဒိၣ်ကစၢ်စီၤပၤဧၢ, မ်ယွၤနကစၢ်ယွၤမၤအါထီၣ်ကီၢ်အံၣ်စရ့လးအပှၤဂီၢ်မုၢ်အစးတကယၤ, အါန့ၢ်ဒံးအဝဲသ့ၣ်အနီၣ်ဂံၢ်အိၣ်ခဲအံၤ, ဒီးမ်နကအိၣ်မူထံၣ်ဘၣ်အဝဲမၤတၢ်အံၤန့ၣ်တက့ၢ်. ဘၣ်ဆၣ်ဒီးဘၣ်မနုၤအဃိလၢနဲဒၣ်တၢ်ဒိၣ်ကစၢ်စီၤပၤသးအိၣ်မၤ တၢ်တမံၤအံၤန့ၣ်လဲၣ်.”
4 ဘၣ်ဆၣ်ဒီးစီၤပၤမၢစီၤယိၤအာ်ဒီးအသုးခိၣ်သုးနၢ်တဖၣ်စူၢ်အ ဝဲအကလုၢ်လီၤ. အဝဲသ့ၣ်ဟးထီၣ်လၢအမဲာ်ညါဒီးဟးထီၣ်ဝဲ ဒ်သိးအကဂံၢ်ကီၢ်အံၣ်စရ့လးအပှၤဂီၢ်မုၢ်အနီၣ်ဂံၢ်န့ၣ်လီၤ.
5 အဝဲသ့ၣ်လဲၤခီဂာ်ထံကျိယၢ်ဒ့ၣ်ဒီးသူၣ်ဒဲဖဲဝ့ၢ်ဧရိၤဧ့ၢ်, ဝ့ၢ်တဝ့ၢ်လၢအအိၣ်ဖဲတၢ်တြီၤပူၤအခၢၣ်သးလၢပှၤကးဖိအဒူၣ် အလီၢ်ကဝီၤအပူၤ, အကလံၤထံးန့ၣ်လီၤ. ဖဲန့ၣ်အဝဲသ့ၣ်လဲၤဆူကလံၤစိးဆူဝ့ၢ်ယၤစ့ၢ်,
6 ဒီးလဲၤကဒီးဝဲဆူဝ့ၢ်ကံးလဧး ဒီးဆူဝ့ၢ်ကၤဒ့ၣ်လၢပှၤဃ့ၤသးဖိအလီၢ်ကဝီၤအပူၤန့ၣ်လီၤ. အန့ၣ်ဝံၤဒီးအဝဲသ့ၣ်လဲၤဆူဝ့ၢ်ဒၣ်, ဒီးလၢဝ့ၢ်ဒၣ်န့ၣ်အဝဲသ့ၣ်လဲၤဆူမုၢ်နုာ်ဆူဝ့ၢ်စံဒိၣ်န့ၣ်လီၤ.
7 အန့ၣ်ဝံၤဒီးအဝဲသ့ၣ်လဲၤဆူကလံၤထံးဆူဝ့ၢ်ထါယၢၣ်လၢအအိၣ် ဒီးအတိာ်ခၢၣ်သနၢၣ်, လဲၤကဒီးဆူညါတုၤဆူ ကယဲၢ်ပှၤဃံၤဝံဖိဒီးပှၤကနၤဧၣ်ဖိအဝ့ၢ်ခဲလၢာ်, ဒီးလၢခံကတၢၢ်န့ၣ်တုၤဆူ ဝ့ၢ်ဘ့ၢ်ၡဘၤအိၣ်လၢကီၢ်ယူဒၤကလံၤထံးတခီန့ၣ်လီၤ.
8 လၢတၢ်န့ၣ်အဃိ, ဖဲခွံလါဒီးအသီခံဆံပှဲၤထီၣ်ဝံၤအလီၢ်ခံန့ၣ်, အဝဲသ့ၣ်က့ၤကဒါက့ၤဆူဝ့ၢ်ယရူၤၡလ့ၣ်ဖဲအလဲၤတၢ်ဝးဝဲ ကီၢ်ဒီဘ့ၣ်ညါဝံၤန့ၣ်လီၤ.
9 အဝဲသ့ၣ်ပာ်ဖျါထီၣ်န့ၢ်စီၤပၤလၢ ပှၤပိာ်ခွါခဲလၢာ်လၢအဒုးတၢ်ယၤတၢ်သ့အိၣ်ဝဲ အဂၤဃိးကလီၢ်လၢကီၢ်အံၣ်စရ့လးအပူၤဒီး ပှၤအဂၤယဲၢ်ကလီၢ်လၢကီၢ်ယူဒၤအပူၤလီၤ.
10 ဘၣ်ဆၣ်ဒီးဖဲစီၤဒၤဝံး မၤတၢ်ဂံၢ်ဒီးတၢ်ကွဲးနီၣ်ကွဲးဃါအံၤဝံၤအလီၢ်ခံန့ၣ်, အဝဲအသးလၢအသ့ၣ်ညါဒၣ်တၢ်, စးထီၣ်ဘၣ်ဒိဘၣ်ထံးဝဲ, ဒီးအဝဲစံးဘၣ်ယွၤ, “ယမၤတ့ၢ်တၢ်ဒဲးဘးလီၤပျံၤလီၤဖုးတမံၤလၢယမၤတၢ်အံၤအဃိန့ၣ်လီၤ. ဝံသးစူၤပျၢ်ယတၢ်ကမၣ်တက့ၢ်. ယမၤယသးဒ်ပှၤအမၢးတဂၤအသိးန့ၣ်လီၤ.”
11 ယွၤစံးဘၣ်စီၤကး, လၢအမ့ၢ်စီၤဒၤဝံးအဝံတဂၤန့ၣ်,
12 “လဲၤဒီးတဲဘၣ်စီၤဒၤဝံးလၢယဟ့ၣ်အီၤတၢ်သၢမံၤလၢကဃုထၢဝဲအဂီၢ်လီၤ. တၢ်တမံၤဂ့ၤတမံၤဂ့ၤလၢအဃုထၢဝဲန့ၣ်ယကမၤ ယဲဒၣ်လီၤ.” မုၢ်ဆ့ၣ်ထီၣ်တနံၤဖဲစီၤဒၤဝံးမံဂဲၤဆၢထၢၣ်လၢအလီၢ်မံပူၤ အလီၢ်ခံန့ၣ်,
13 စီၤကးလဲၤဆူစီၤဒၤဝံးအအိၣ်ဒီးတဲဘၣ်အီၤကယဲၢ်တၢ်လၢယွၤ စံးတ့ၢ်ဝဲတဖၣ်, ဒီးသံကွၢ်အီၤ, “နဃုထၢမနုၤတမံၤလဲၣ်. တၢ်သၣ်ဝံၤလီၤဒိသၢနံၣ်လၢနထံနကီၢ်အပူၤဧါ. မ့တမ့ၢ်, တၢ်ထွးထီၣ်ဃ့ၢ်လၢနဒုၣ်နဒါအမဲာ်ညါသၢလါဧါ. မ့တမၢ်တၢ်သံသတြိာ်လၢနကီၢ်ပူၤသၢသီဧါ. ခဲအံၤဆိကမိၣ်ထံ တၢ်ဂ့ၢ်အံၤတက့ၢ်. ဒီးတဲယၤယကဘၣ်က့ၤစိာ်တၢ်စံးဆၢမနုၤတမံၤဆူယွၤအအိၣ်လဲၣ်တက့ၢ်.”
14 စီၤဒၤဝံးစံးဆၢဝဲဒၣ်, “ယအိၣ်လၢတၢ်စုကတၢၢ်ခီၣ်ကတၢၢ်အပူၤလီၤ. ဘၣ်ဆၣ်ဒီးယတအဲၣ်ဒိးလၢပှၤကညီကစံၣ်ညီၣ်ယၤဘၣ်. မ်ယွၤအကစၢ်ဒၣ်ဝဲမ့ၢ်ပှၤတဂၤလၢအစံၣ်ညီၣ်ပှၤတက့ၢ်. အဂ့ၢ်ဒ်အံၤ, အဝဲပှဲၤဒီးတၢ်သူၣ်ကညီၤသးကညီၤန့ၣ်လီၤ.”
15 လၢတၢ်န့ၣ်အဃိယွၤဆှၢလီၤတၢ်သံသတြိာ်လၢကီၢ်အံၣ်စရ့လးအဖီခိၣ်, လၢအအိၣ်ယံာ်ဝဲစးထီၣ်လၢမုၢ်တဂီၤန့ၣ် တုၤလီၤလၢတၢ်ဆၢကတီၢ်လၢအဝဲဒၣ်ဃုထၢဝဲအသိးန့ၣ်လီၤ. စးထီၣ်လၢထံကီၢ်အအံၤတခီတုၤဆူထံကီၢ်အဂၤတခီန့ၣ် ပှၤအံၣ်စရ့လးဖိသံဝဲအဂၤနွံကလးန့ၣ်လီၤ.
16 ဖဲယွၤအကလူးသါကမၤဟးဂီၤကွံာ်ဝ့ၢ်ယရူၤၡလ့ၣ်အခါန့ၣ်, ယွၤဆီတလဲကွံာ်အတၢ်ပာ်သးဘၣ်ဃးဒီးတၢ်စံၣ်ညီၣ်အပှၤဂီၢ်မုၢ် န့ၣ်, ဒီးစံးဘၣ်ကလူးလၢအမၤသံအဝဲသ့ၣ်ဒ်အံၤ, “ဆိကတီၢ်တက့ၢ်.” ကလူးန့ၣ်အိၣ်ဝဲဖဲပှၤယဘူၣ်ဖိစီၤအၤရနၤ အကြဲၢ်အကပၤန့ၣ်လီၤ.
17 စီၤဒၤဝံးထံၣ်ကလူးလၢအမၤသံပှၤဂီၢ်မုၢ်န့ၣ်ဒီးစံးဘၣ်ယွၤ, “ယမ့ၢ်ပှၤတဂၤလၢအတၢ်ကမၣ်အိၣ်လီၤ. ယမ့ၢ်ပှၤတဂၤလၢအမၤကမၣ်တၢ်လီၤ. ပှၤလၢအလီၤသးကညီၤတဖၣ်အံၤ မၤတ့ၢ်တၢ်မနုၤတမံၤလဲၣ်. နကြၢးစံၣ်ညီၣ်ယၤဒီးယပှၤဟံၣ်ဖိန့ၣ်လီၤ.”
18 မုၢ်တနံၤဃီန့ၣ်, စီၤကးလဲၤဝဲဆူစီၤဒၤဝံးအအိၣ်ဒီးစံးဘၣ်အီၤ, “လဲၤထီၣ်ဆူစီၤအၤရနၤအကြဲၢ်, ဒီးမၤထီၣ်တၢ်လုၢ်လီၢ်တခါ လၢယွၤအဂီၢ်တက့ၢ်.”
19 စီၤဒၤဝံးစူၢ်ဝဲယွၤအတၢ်မၤလိာ်ဒီးလဲၤဝဲ ဒ်စီၤကးစံးတ့ၢ်အီၤလၢကဘၣ်မၤဝဲအသိးန့ၣ်လီၤ.
20 စီၤအၤရနၤကွၢ်လီၤတၢ်ဒီးထံၣ်ဘၣ် စီၤပၤဒီးအပဒိၣ်ပပှၢ်တဖၣ်ဟဲထီၣ်ဝဲဆူအဝဲအအိၣ်န့ၣ်လီၤ. အဝဲထိၣ်လီၤပှီၤအသးဆူဟီၣ်ခိၣ်လိၤလၢစီၤဒၤဝံးအမဲာ်ညါ,
21 ဒီးသံကွၢ်အီၤ, “နဲဒၣ်တၢ်ဒိၣ်ကစၢ်စီၤပၤဧၢ, ဘၣ်မနုၤနဟဲ ဖဲအံၤလဲၣ်.”
စီၤဒၤဝံးစံးဆၢအီၤ, “မ့ၢ်ဒ်သိးယကပှ့ၤနကြဲၢ်ဒီးမၤထီၣ်တၢ်လုၢ်လီၢ်တခါလၢယွၤအဂီၢ်, ဒ်သိးတၢ်သံသတြိာ်ကဘၣ်တၢ်ဆိကတီၢ်ကွံာ်အီၤအဂီၢ်န့ၣ်လီၤ.”
22 စီၤအၤရနၤစံးဝဲဒၣ်, “ဟံးန့ၢ်အီၤတက့ၢ်, တၢ်ဒိၣ်ကစၢ်စီၤပၤဧၢ. ဒီးဒ်နအဲၣ်ဒိးအသိးန့ၣ်, လုၢ်ထီၣ်တၢ်ဆူယွၤအအိၣ်တက့ၢ်. အအံၤဂီၤဖံးဖါတဖၣ်အိၣ်ဝဲလၢတၢ်ကဆူးကဲၤထီၣ်အီၤ ဒ်တၢ်လုၢ်တမံၤအသိးလၢတၢ်လုၢ်လီၢ်ဖီခိၣ်န့ၣ်လီၤ. အအံၤမ့ၢ်အနီၣ်ယိးဘိတဖၣ်ဒီးအနီၣ်တီၢ်ဘုတဖၣ် လၢတၢ်ကသူအီၤဒ်သ့ၣ်မုၢ်အသိးအဂီၢ်န့ၣ်လီၤ.”
23 စီၤအၤရနၤဟ့ၣ်လီၤတၢ်တဖၣ်န့ၣ်ခဲလၢာ် ဆူစီၤပၤအအိၣ်ဒီးစံးဘၣ်အီၤ, “မ်ယွၤ, နကစၢ်ယွၤ, တူၢ်လိာ်နတၢ်လုၢ်မၤဘူၣ်တက့ၢ်.”
24 ဘၣ်ဆၣ်ဒီးစီၤပၤစံးဆၢဝဲဒၣ်, “တမ့ၢ်ဘၣ်. ယကဟ့ၣ်နၤတၢ်အပှ့ၤလၢတၢ်န့ၣ်အဂီၢ်လီၤ. တၢ်လုၢ်တၢ်ပာ်တဖၣ်လၢ ယတဟ့ၣ်ဘၣ်အပှ့ၤနီတမံၤန့ၣ်ယတလုၢ်ထီၣ်ဘၣ်အီၤဆူယွၤ, ယကစၢ်ယွၤအအိၣ်ဘၣ်.” ဒီးအဝဲပှ့ၤန့ၢ်ကြဲၢ်ဒီးဂီၤဖံးဖါတဖၣ်န့ၣ် လၢစ့ညၣ်အဘ့ၣ်ယဲၢ်ဆံလီၤ.
25 အန့ၣ်ဝံၤဒီးအဝဲမၤထီၣ်တၢ်လုၢ်ထီၣ်တခါလၢယွၤအဂီၢ် ဒီးလုၢ်ထီၣ်တၢ်လုၢ်မ့ၣ်အူတဖၣ်ဒီး တၢ်လုၢ်မၤဃူမၤဖိးတဖၣ်န့ၣ်လီၤ. ယွၤစံးဆၢအဝဲအတၢ်ထုကဖၣ်ဒီးတၢ်သံသတြိာ် လၢကီၢ်အံၣ်စရ့လးအပူၤန့ၣ်ဆိကတီၢ်ဝဲဒၣ်လီၤ.