23
1 စီၤယံးၡဲအဖိခွါစီၤဒၤဝံးမ့ၢ်တ့ၢ်ပှၤတဂၤလၢကစၢ်ယွၤပာ်ထီၣ်ထီအီၤ, ပှၤတဂၤလၢစီၤယၤကိာ်အကစၢ်ယွၤဃုထၢတ့ၢ်အီၤလၢကကဲထီၣ်စီၤပၤ, ဒီးပှၤတဂၤလၢအထုးထီၣ်တၢ်သးဝံၣ်အမုာ်တဖၣ်လၢကီၢ်အံၣ်စရ့လးအဂီၢ်လီၤ. တၢ်လၢလံာ်အံၤတဖၣ်အံၤမ့ၢ်စီၤဒၤဝံးအတၢ်ကတိၤလၢခံကတၢၢ်တဖၣ် န့ၣ်လီၤ.
2 ယွၤအသးကတိၤတၢ်ခီဖျိယၤ,
အဝဲအတၢ်ကစီၣ်အိၣ်ဝဲလၢယထးခိၣ်န့ၣ်လီၤ.
3 ကီၢ်အံၣ်စရ့လးအကစၢ်ယွၤကတိၤလံတၢ်လံ.
ကီၢ်အံၣ်စရ့လးအပှၤဒီဒၣ်အိၣ်ပှိၤအီၤစံးဘၣ်ယၤ,
စီၤပၤလၢအပၢတၢ်လၢတၢ်စံၣ်ညီၣ်တီလၢအပၢတၢ်လၢတၢ်ယူးယီၣ်ပာ်ကဲကစၢ်ယွၤန့ၣ်,
4 လီၤဂာ်ဒ်မုၢ်လၢအကပီၤထီၣ်ဝဲဖဲမုၢ်ဆ့ၣ်ထီၣ်သီတဂီၤလၢတၢ်အၢၣ်တအိၣ်ဘၣ်အသိး,
မုၢ်တဘ့ၣ်လၢအဒုးကပြုၢ်ကပြီၤထီၣ်တပံၢ်တမါဖဲတၢ်စူၤလီၤဝံၤအလီၢ်ခံန့ၣ်လီၤ.
5 ဒီးတၢ်န့ၣ်မ့ၢ်ကစၢ်ယွၤကဆိၣ်ဂ့ၤယစၢၤယသွဲၣ်တဖၣ် ဒ်လဲၣ်ဒ်လဲၣ်အဂ့ၢ်,
မ့ၢ်လၢအဝဲမၤတ့ၢ်တၢ်အၢၣ်လီၤအီလီၤအထူအယိာ်တမံၤဒီးယၤ,
ဒီးတၢ်အၢၣ်လီၤခံခီယၢ်ခီတမံၤလၢအဟးဂီၤကွံာ်အီၤတသ့ဘၣ်, တၢ်အၢၣ်လီၤတမံၤလၢတၢ်လဲလိာ်ကွံာ်တသ့ဘၣ်န့ၣ်လီၤ.
တၢ်န့ၣ်မ့ၢ်တၢ်ခဲလၢာ်လၢယမိၢ်န့ၢ်သးလီၤအီၤန့ၣ်လီၤ.
တၢ်န့ၣ်ကမ့ၢ်ယတၢ်မၤနၢၤ,
ဒီးကစၢ်ယွၤကမၤလၢထီၣ်ပှဲၤထီၣ်အီၤသပှၢ်တၢၢ်န့ၣ်လီၤ.
6 မ့မ့ၢ်ပှၤလၢအယွၤတအိၣ်ဘၣ်တဖၣ်န့ၣ်မၤသးဒ်တၤဆှူၣ်တၤမဲ တဖၣ်လၢအဘၣ်တၢ်စူးကွံာ်အီၤ အသိးန့ၣ်လီၤ.
ပှၤထိးဘၣ်အီၤထဲလၢအစုယၢ်ခီတသ့ဘၣ် နီတဂၤဘၣ်.
7 နကဘၣ်သူထးတၢ်အပီးအလီတမံၤမ့ၢ်ဂ့ၤ ဘီတဘ့ၣ်မ့ၢ်ဂ့ၤန့ၣ်လီၤ.
အဝဲသ့ၣ်ကဘၣ်တၢ်ဆူးကဲၤကွံာ်အီၤလၢာ်လၢာ်ဆ့ဆ့န့ၣ်လီၤ.
(၁ကွဲး.၁၁:၁၀-၄၁)
8 ပှၤတဖၣ်အံၤမ့ၢ်စီၤဒၤဝံးအပှၤသုးဖိတဖၣ်လၢအမံၤဟူသၣ်ဖျါ န့ၣ်လီၤ. အခီၣ်ထံးတဂၤမ့ၢ်ဝဲ, စီၤယိစဘးဘၡဘး လၢတၤဃမိၣ်န့ၣ်လီၤ. အဝဲမ့ၢ်ပှၤအခိၣ်လၢပှၤသၢဂၤအကျါတဂၤဒီး အဝဲဒုးတၢ်ဒီးအဘီထီဒါပှၤအဂၤဃိးကယၤဒီးမၤသံကွံာ်အဝဲသ့ၣ် ခဲလၢာ်လၢတၢ်ဒုးတဘျီအပူၤန့ၣ်လီၤ.
9 ပှၤခံဂၤတဂၤလၢပှၤမံၤဟူသၣ်ဖျါသၢဂၤအကျါန့ၣ်မ့ၢ်ဝဲ စီၤဒိဒိၤအဖိခွါစီၤအလၤဧစၢ်လၢပှၤအဃိဃးဖိအဒူၣ်ထၢတခီန့ၣ်လီၤ. တနံၤန့ၣ်, အဝဲဒီးစီၤဒၤဝံးတၤတၢ်ဒီးပှၤဖလ့ၡသးဖိတဖၣ်လၢ အပာ်ဖှိၣ်ထီၣ်အသးလၢတၢ်ဒုးတၢ်ယၤအဂီၢ်န့ၣ်လီၤ. ပှၤအံၣ်စရ့လးဖိတဖၣ်ဂုၤက့ၤဆူအလီၢ်ခံ,
10 ဘၣ်ဆၣ်အဝဲဆၢထၢၣ်ဂၢၢ်ကျၢၤဝဲဒီးဒုးပှၤဖလ့ၡသးဖိတဖၣ် တုၤလၢအစုလီၤဘှါဒိၣ်မး, တုၤဒၣ်လဲာ်အစုလၣ်လၢအစှီၤဃးနးန့ၣ်အိၣ်ဃံးတံာ်အသးဒီးသလၣ် ထီၣ်က့ၤဝဲလၢကပျဲကွံာ်နးတန့ၢ်ဘၣ်လီၤ. ယွၤအိၣ်ဒီးတၢ်မၤနၢၤဖးဒိၣ်လၢမုၢ်တနံၤန့ၣ်လီၤ. တၢ်န့ၣ်ဝံၤအလီၢ်ခံ, ပှၤအံၣ်စရ့လးဖိတဖၣ်ဟဲက့ၤကဒါက့ၤဆူ တၢ်လီၢ်ဖဲစီၤအလၤဧစၢ်အိၣ်ဝဲဒီးဟံးန့ၢ်ကွံာ်ပှၤသံတဖၣ်အစုကဝဲၤန့ၣ်လီၤ.
11 ပှၤသၢဂၤတဂၤလၢပှၤမံၤဟူသၣ်ဖျါအကျါမ့ၢ်ဝဲပှၤဟရၢ်ဖိ စီၤအက့ဝ့ၢ်အဖိခွါစီၤၡးမၤန့ၣ်လီၤ. ပှၤဖလ့ၡသးဖိတဖၣ်ပာ်ဖှိၣ်ထီၣ်အသးဖဲဝ့ၢ်လ့ၤဃံဖဲပျီတဘ့ၣ် လၢအပှဲၤဒီးပထိးသၣ်အမုၢ်တဖၣ်အပူၤန့ၣ်လီၤ. ပှၤအံၣ်စရ့လးဖိတဖၣ်ထွးထီၣ်ဃ့ၢ်ကွံာ်လၢပှၤဖလ့ၡသးဖိအအိၣ်,
12 ဘၣ်ဆၣ်ဒီးစီၤၡးမၤဆၢထၢၣ်ဂၢၢ်ကျၢၤဖဲအလီၢ်လၢပျီပူၤ, တြီၤဆၢခီဆၢတၢ်ဒီးမၤသံကွံာ်ပှၤဖလ့ၡသးဖိတဖၣ်န့ၣ်လီၤ. ယွၤအိၣ်ဒီးတၢ်မၤနၢၤဖးဒိၣ်လၢမုၢ်တနံၤန့ၣ်လီၤ.
13 ဖဲအခါဘူးထီၣ်လၢကူးဘုအကတီၢ်ကစးထီၣ်န့ၣ်, ပှၤသၢဂၤလၢ ‘ပှၤအခိၣ်အဂၤသၢဆံ’ အကျါလဲၤလီၤဝဲဆူ ဧဒူးလၣ်အလ့ကအိ, လၢစီၤဒၤဝံးအိၣ်ဝဲ, ဖဲပှၤဖလ့ၡသးဖိတဖုသူၣ်ထီၣ်အဒဲ, ဖဲရၤဖၤကစၢၢ်ကဆူးအခါ န့ၣ်လီၤ.
14 အကတီၢ်ဖဲန့ၣ်, စီၤဒၤဝံးအိၣ်ဝဲလၢတိာ်ခၢၣ်သနၢၣ်တဖျၢၣ်အပူၤ ဒီးပှၤဖလ့ၡသးဖိတဖုမၤန့ၢ်ကွံာ်ဝ့ၢ်ဘ့ၤသလ့ဃ့ၣ်န့ၣ်လီၤ.
15 စီၤဒၤဝံးသးသယုၢ်ဘၣ်အအိၣ်အဆိးအလီၢ်ဒီးစံးဝဲ, “ယဆၢမးလၢပှၤတဂၤဂၤကဟဲဒၢၣ်ဒုးအီယၤထံလၢထံပူၤတပူၤ လၢအအိၣ်ဖဲဝ့ၢ်ဘ့ၤသလ့ဃ့ၣ်အကျဲစၢၤတြဲၤခီၣ်ထံးန့ၣ်လီၤ.”
16 ဒီးပှၤသုးဖိမံၤဟူသၣ်ဖျါသၢဂၤ, လဲၤနုာ်ဖျိဆူၣ်ဝဲဆူပှၤ ဖလ့ၡသးဖိတဖၣ်သူၣ်ဒဲအလီၢ်, ဒၢၣ်ထီၣ်ထံလၢထံပူၤ, ဝံၤဒီးဟဲက့ၤစိာ်ဝဲဆူစီၤဒၤဝံးအအိၣ်န့ၣ်လီၤ. ဘၣ်ဆၣ်ဒီးအဝဲတအီဝဲဘၣ်. အခိၣ်တလိာ်, အဝဲလူလီၤဝဲဒ်တၢ်လုၢ်တၢ်ပာ်တမံၤအသိးလၢယွၤအဂီၢ်,
17 ဒီးအဝဲဒၣ်စံးဝဲ, “ယွၤဧၢ, ယအီတၢ်အံၤတလီၤဘၣ်ဝဲနီတစဲး ဘၣ်. တၢ်န့ၣ်ကမၤအသးဒ်ယအီ ပှၤလၢအဟ့ၣ်လီၤအသးသမူတဖၣ်အံၤအသွံၣ်အသိးန့ၣ်လီၤ.” လၢတၢ်န့ၣ်အဃိအဝဲဂ့ၢ်လိာ်လၢကအီတၢ်န့ၣ်လီၤ.
တၢ်တဖၣ်န့ၣ်, မ့ၢ်တၢ်မၤအဒူအဃိာ်လၢပှၤသုးဖိမံၤဟူသၣ်ဖျါသၢဂၤမၤဝဲန့ၣ်လီၤ.
18 စီၤယိၤအာ်အဒီပုၢ်ဝဲခွါစီၤအဘံၡဲၤ (အဝဲသ့ၣ်အမိၢ်မ့ၢ်နီၢ်စရူယၤ) မ့ၢ်ပှၤလၢအမံၤဟူသၣ်ဖျါအဂၤသၢဆံအခိၣ်န့ၣ်လီၤ. အဝဲဒုးတၢ်ဒီးအဘီထီဒါပှၤအဂၤသၢကယၤဒီးမၤသံအဝဲသ့ၣ်, ဒီးအဝဲကဲထီၣ်ပှၤမံၤဟူသၣ်ဖျါထီၣ်လၢပှၤအခိၣ်အဂၤသၢဆံ အကျါန့ၣ်လီၤ.
19 အဝဲမ့ၢ်ပှၤမံၤဟူသၣ်ဖျါအဒိၣ်ကတၢၢ်လၢပှၤသၢဆံအကျါဒီးကဲ ထီၣ်ဝဲပှၤအခိၣ်န့ၣ်လီၤ. ဘၣ်ဆၣ်ဒီးအမံၤတဟူထဲသိးဒီးပှၤသၢဂၤန့ၣ်ဘၣ်.
20 ပှၤကၤဘစ့လးဖိစီၤယဟိၤယဒါအဖိခွါစီၤဘနါယၤမ့ၢ်ပှၤသုး ဖိအမံၤဟူသၣ်ဖျါအဂၤတဂၤန့ၣ်လီၤ. အဝဲမၤတ့ၢ်တၢ်မၤအဒူအဃိအါမး, အိၣ်ဃုာ်ဒီးတၢ်မၤသံကွံာ်ပှၤမိၤအးဖိအသုးဖိအဂ့ၤကတၢၢ်ခံဂၤန့ၣ်လီၤ. တဘျီဖဲမူခိၣ်ဖီလီၤဝဲတနံၤန့ၣ်, အဝဲလဲၤလီၤဝဲဆူတၢ်ပူၤ တပူၤဒီးမၤသံကွံာ်ခ့ယုၢ်တဒုန့ၣ်လီၤ.
21 အဝဲမၤသံကွံာ်စ့ၢ်ကီးပှၤအဲၤကူပတူးဖိတဂၤ, လၢအမ့ၢ်ပှၤတဂၤလၢအနီၢ်ကစၢ်ဖးဒိၣ်အိၣ်ဒီးအဘီတဘ့ၣ် လၢအစိာ်ဃးဝဲဒ်အစုကဝဲၤအသိးန့ၣ်လီၤ. စီၤဘနါယၤဒုးအီၤလၢအနီၣ်တီၢ်ဒီးဂုာ်န့ၢ်ဘီတဘ့ၣ်န့ၣ်ချ့သဒံး လၢပှၤအဲၤကူပတူးဖိအစုပူၤဒီးမၤသံကွံာ်အီၤလၢဘီ န့ၣ်လီၤ.
22 တၢ်တဖၣ်န့ၣ်မ့ၢ်တၢ်မၤအဒူအဃိၤတဖၣ်လၢစီၤဘနါယၤ, လၢအမ့ၢ်ပှၤအဂၤသၢဆံအကျါတဂၤမၤတ့ၢ်ဝဲန့ၣ်လီၤ.
23 အဝဲမ့ၢ်ပှၤဖျိးစိလၢအဝဲသ့ၣ်အကျါ, ဘၣ်ဆၣ်ဒီးအမံၤတဟူသၣ်တဖျါထဲသိးဒီးပှၤသၢဂၤန့ၣ်ဘၣ်. စီၤဒၤဝံးပာ်အီၤဒ်သုးဖိလၢအခိးအဝဲအသးသမူတဖၣ်အခိၣ်န့ၣ်လီၤ.
24 ပှၤအဂၤတဖၣ်လၢပှၤအခိၣ်အဂၤသၢဆံအကျါန့ၣ်အိၣ်ဃုာ်ဒီး စီၤယိၤအာ်အဒီပုၢ်ဝဲၢ်စီၤဧစၤအ့လး, ပှၤဝ့ၢ်ဘ့ၤသလ့ဃ့ၣ်ဖိစီၤဒိဒိၤအဖိခွါစီၤအ့လယၤနၣ်,
25 ပှၤဝ့ၢ်ဃရိးဖိစီၤၡမၤဒီးစီၤအလံကၤ,
26 ပှၤဝ့ၢ်ပးလတံၤဖိစီၤဃ့လ့း, ပှၤဝ့ၢ်တကိၤဖိစီၤဧံးက့ၣ်အဖိခွါစီၤဧံရၤ,
27 ပှၤဝ့ၢ်ဧၤနသိးဖိစီၤအဘံၤဧ့စၢ်, ပှၤဝ့ၢ်ဃူၡၤဖိစီၤမၤဘူနဲၤ,
28 ပှၤဝ့ၢ်အဃိဃးဖိစီၤစၤလမိၣ်, ပှၤဝ့ၢ်နတိဖၤဖိစီၤမၤဟရဲ,
29 ပှၤဝ့ၢ်နတိၤဖၤဖိစီၤဘၤနါအဖိခွါစီၤဃ့လ့ာ်, ပှၤဝ့ၢ်ကံးလဧၤဖိစီၤရံဘဲၤအဖိခွါစီၤအံတဲၤဘၣ်ဃးဒီး ပှၤဘံၣ်ယၤမံၣ်အဒူၣ်,
30 ပှၤဝ့ၢ်ပံးရသိၣ်ဖိစီၤဘနါယၤ, စီၤဟံးဒဲလၢဝ့ၢ်ကၤဧၣ်အဃၢၤတၢ်တြီၤတဖၣ်အပူၤ,
31 ပှၤဝ့ၢ်ဧၤရဘၤဖိစီၤအဘံဧၤလဘိၣ်, ပှၤဝ့ၢ်ဘၤဃူၣ်ဖိစီၤဧၤစမၤဝ့း,
32 ပှၤဝ့ၢ်ၡၤလဘိၣ်ဖိစီၤအ့လံယဘၤ, စီၤယၤၡ့ၣ်အဖိခွါတဖၣ်, စီၤယိၤနၤသၣ်,
33 ပှၤဝ့ၢ်ဟရၢ်ဖိစီၤၡးမၤ, ပှၤဝ့ၢ်ဟရၢ်ဖိစီၤၡၤရၢ်အဖိခွါစီၤအဃံအၣ်,
34 ပှၤဝ့ၢ်မၤကၤဖိစီၤအဃၤစဘဲအဖိခွါစီၤအလံၤဖ့လ့း, ပှၤဝ့ၢ်ကံလိၣ်ဖိစီၤအဃံၤသဖ့လးအဖိခွါစီၤအလံဧၣ်,
35 ပှၤဝ့ၢ်ကၤမ့လးဖိစီၤဃ့ၤစရ့, ပှၤအါရး (အၢ်ဘၤ)ဖိစီၤပရဲ,
36 ပှၤဝ့ၢ်စိဘၤဖိစီၤနၤသၣ်အဖိခွါစီၤယံးက့လး, ပှၤဝ့ၢ်ကးဖိစီၤဘၤနံ,
37 ပှၤဧၣ်မိၣ်ဖိစီၤစ့လ့း, စီၤယိၤအာ်အပှၤစိာ်စုကဝဲၤ, ပှၤဘအ့ရိးဖိစီၤနဃၤရဲ
38 ပှၤဝ့ၢ်ယံးသၣ်ဖိစီၤဧံရၤဒီးစီၤကၢ်ရ့း
39 ပှၤဃ့ၤသးဖိစီၤအူၤရံယၤတဖၣ်န့ၣ်လီၤ. ပှၤသုးဖိလၢအမံၤဟူသၣ်ဖျါခဲလၢာ်အိၣ်ဝဲသၢဆံနွံဂၤလီၤ.