လံာ်စီၤပၤအခီၣ်ထံးတဘ့ၣ်
KINGS
လံာ်စီၤပၤအခီၣ်ထံးတဘ့ၣ်မ့ၢ်တၢ်ကွဲးထွဲက့ၤပှၤအံၣ်စရ့လး ဖိအစီၤပၤအတၢ်စံၣ်စိၤတဲစိၤလၢအစးထီၣ်တ့ၢ်လံလၢလံာ်ၡၤမူၤ အ့လးတဖၣ်အပူၤန့ၣ်လီၤ. လံာ်အံၤဘၣ်တၢ်နီၤဖးအီၤသၢပတီၢ်သ့ဝဲန့ၣ်လီၤ.
၁. စီၤၡလိၤမိၤကဲထီၣ်ကီၢ်အံၣ်စရ့လးဒီးကီၢ်ယူဒၤအစီၤပၤ, ဒီးအပၢ်စီၤဒၤဝံးအတၢ်သံအဂ့ၢ်. ၂. စီၤၡလိၤမိၤအတၢ်ပၢဒီးအတၢ်မၤကဲထီၣ်လိၣ်ထီၣ်တဖၣ်, လီၤဆီဒၣ်တၢ်, တၢ်ဂ့ၢ်လၢကြၢးဘၣ်တၢ်တိၢ်နီၣ်တမံၤလၢအမ့ၢ်ဝဲ တၢ်သူၣ်ထီၣ်ယွၤအတၢ်လုၢ်ဟံၣ်လၢဝ့ၢ်ယရူၤၡလ့ၣ်ပူၤအဂ့ၢ်. ၃. တၢ်နီၤဖးပှၤကလုာ်ဆူကလံၤစိးဒီးကလံၤထံးဘီမုၢ်တဖၣ်, ဒီးတၢ်တဲဘၣ်ထွဲဒီးစီၤပၤတဖၣ်လၢအပၢအဝဲသ့ၣ်တုၤလီၤလၢ ချ.ခ.န.နံၣ်ကယၤခွံအခၢၣ်သးအကတီၢ် န့ၣ်လီၤ.
လၢလံာ်စီၤပၤခံဘ့ၣ်အပူၤအံၤပှၤပၢတၢ်တဂၤစုာ်စုာ်ဘၣ်တၢ်စံၣ် ညီၣ်အီၤဒိးသန့ၤထီၣ်အသးလၢအဝဲအတၢ်သးတီဒီးကစၢ်ယွၤအဖီ ခိၣ်, ဒီးထံကီၢ်အတၢ်လဲၤထီၣ်လဲၤထီဘၣ်တၢ်ထံၣ်အီၤဒ်အဒိးသန့ၤထီၣ် အသးလၢတၢ်သးတီအံၤအဖီခိၣ်လီၤ. လၢအဂၤတကပၤတခီ, တၢ်ဘါထီၣ်တၢ်ဂီၤတၢ်ဖီၣ်ဒီးတၢ်တစူၢ်တၢ်ဆှၢ အဝဲသ့ၣ်ဆူတၢ်တတၢးတနါ န့ၣ်လီၤ. စီၤပၤတဖၣ်လၢကလံၤစိးဘီမုၢ်ခဲလၢာ်လီၤတဲာ်ကွံာ် လၢတၢ်မၤကွၢ်အံၤအပူၤ, ဖဲတၢ်ကွဲးနီၣ်ဘၣ်ထွဲဒီးယူဒၤအစီၤပၤတဖၣ်တခီပာ်ဖျါထီၣ် တၢ်လဲၤထီၣ်လဲၤထီဒီးတၢ်တတၢးတနါအတၢ်ဃါဃုာ်အသးန့ၣ်လီၤ.
တၢ်အိၣ်ဖျါလီၤဆီဒိၣ်တဖၣ်လၢလံာ်စီၤပၤအခီၣ်ထံးတဘ့ၣ်အပူၤ မ့ၢ်ဝဲယွၤအဝံတဖၣ်အဂ့ၢ်လၢအကတိၤတၢ်ဒူဒူလၢကစၢ်ယွၤအခၢၣ် စး, လၢအဟ့ၣ်ပလီၢ်ပှၤဂီၢ်မုၢ်တဖၣ်ဒ်သိးအသု တဘူၣ်ထီၣ်ဘါထီၣ်တၢ်ဂီၤတၢ်ဖီၣ်တဖၣ်ဒီးဒ်သိးကစူၢ်ကစၢ်ယွၤန့ၣ် လီၤ. လီၤဆီဒၣ်တၢ်, တၢ်ဂ့ၢ်လၢကြၢးဘၣ်တၢ်တိၢ်နီၣ်တမံၤမ့ၢ်ဝဲဘဧၤ လးအပှၤလုၢ်တၢ်အခိၣ်တဖၣ်, အဂ့ၢ်န့ၣ်လီၤ(အဆၢဒိၣ် ၁၈).
1
1 ခဲအံၤစီၤပၤစီၤဒၤဝံးမ့ၢ်ပှၤတဂၤလၢအသးပှၢ်ဒိၣ်မး, ဒီးအခ့အပှၤတဖၣ်လုးဘၢအီၤလၢယၣ်လုးတဖၣ်ဒၣ်လဲာ်တလၢၤဘၣ်အီၤ လၢၤဘၣ်.
2 လၢတၢ်န့ၣ်အဃိအဝဲအပဒိၣ်ပပှၢ်တဖၣ်စံးဘၣ်အီၤ, “တၢ်ဒိၣ်ကစၢ်စီၤပၤဧၢ, ပျဲပဃုထံၣ်န့ၢ်နၤမုၣ်လိၤဘိသးစၢ် တဂၤလၢကအိၣ်ဒီးနၤဒီးကဟုကယာ်နၤန့ၣ်တက့ၢ်. အဝဲကမံလၢနကပၤဒီးကမၤလၢၤနၤန့ၣ်လီၤ.”
3 တၢ်ဃုထံၣ်န့ၢ်မုၣ်လိၤဘိဃံလၤတဂၤဘၣ်တၢ်မၤအီၤလၢကီၢ်အံၣ်စရ့လးဒီဘ့ၣ်ညါ, ဒီးလၢဝ့ၢ်ၡူန့ၣ်အပူၤ, အဝဲသ့ၣ်ထံၣ်န့ၢ်မုၣ်လိၤဘိဒ်န့ၣ်အသိးတဂၤလၢအမံၤမ့ၢ်ဝဲ နီၢ်အဘံၡး, ဒီးက့ၤကိးအီၤဆူစီၤပၤအအိၣ်န့ၣ်လီၤ.
4 မုၣ်လိၣ်ဘိအံၤဃံလၤဝဲဒိၣ်မး, ဒီးအဝဲအိၣ်ခိးကွၢ်စီၤပၤ ဒီးကဟုကယာ်အီၤ, ဘၣ်ဆၣ်စီၤပၤတမံဃုာ်ဒီးအီၤဘၣ်.
5 ဒီးခဲအံၤမ့ၢ်လၢစီၤအးဘၡါလိၣ်သံလံအဃိ, စီးဒၤဝံးဒီးနီၢ်ဃးကံၤအဖိခွါစီၤအဒိနံၤယၤမ့ၢ်ဖိခွါ အဒိၣ်ကတၢၢ်လၢဖိလၢအအိၣ်မူတ့ၢ်တဖၣ်အကျါန့ၣ်လီၤ. အဝဲသူၣ်ဆူၣ်သးဂဲၤလၢကကဲထီၣ်ဘၣ်စီၤပၤဒိၣ်မးလီၤ. လၢအကစၢ်ဒၣ်ဝဲအဂီၢ်, အဝဲကတဲာ်ကတီၤလ့ၣ်ကဟၣ်တဖၣ်, ကသ့ၣ်တဖၣ်ဒီးပှၤလၢအကလဲၤယုၤဒီးကဟုကယာ်အီၤယဲၢ်ဆံဂၤန့ၣ် လီၤ.
6 စီၤဒၤဝံးတသိၣ်က့ၤသီက့ၤဘၣ်အီၤဆါဆါကလဲာ်လၢကယဲၢ်တၢ်ဂ့ၢ် တမံၤလၢ်လၢ်အဃိနီတစုဘၣ်. အဝဲမ့ၢ်ပှၤတဂၤလၢအက့ၢ်ဂီၤဂ့ၤဘၣ်ဒိၣ်မး, ဒီးအိၣ်ဖျဲၣ်ဝဲလၢစီၤအးဘၡါလိၣ်အလီၢ်ခံန့ၣ်လီၤ.
7 အဝဲကတိၤတၢ်ဒီးစီၤယိၤအာ်လၢအမ့ၢ်နီၢ်စရူၤယၤအဖိခွါ, ဒီးပှၤလုၢ်တၢ်အခိၣ်စီၤအ့ဘယၤသၢ်ဘၣ်ထွဲဒီးတၢ်ဂ့ၢ်န့ၣ်, ဒီးအဝဲသ့ၣ်ဘၣ်သူၣ်ဘၣ်သးလၢကမၤစၢၤအီၤန့ၣ်လီၤ.
8 မ့မ့ၢ်ပှၤလုၢ်တၢ်အခိၣ်စီၤစၤဒိး, စီၤဘနါယၤလၢအမ့ၢ်စီၤ ယဟိၤယဒါအဖိခွါ, ဝံနၤသၣ်, စီၤၡံမံၤ, စီၤရ့ဧံၤဒီးစီၤဒၤဝံးအပှၤခိးအသးသမူသ့ၣ်တဖၣ်တအိၣ်လၢ စီၤအဒိနံၤယၤအအိၣ်တကပၤဘၣ်.
9 ဘၣ်မုၢ်တနံၤ, စီၤအဒိနံၤယၤလုၢ်ထီၣ်တၢ်လုၢ်တၢ်ပာ်လၢအမ့ၢ် သိ, ဂီၤဖံးဖါတဖၣ်, ဒီးဂီၤဖံးဖိအဘီၣ်တဖၣ်လၢလၢၢ်စိၤဃ့လ့းဖဲ ဧ့ၣ်ရိၤက့လးအထံထီၣ်ပၢၢ်အဃၢၤန့ၣ်လီၤ. ဒီးအဝဲကွဲဃီၤစီၤဒၤဝံးအဖိခွါအဂၤတဖၣ်, ဒီးစီၤပၤအပဒိၣ်ပပှၢ်တဖၣ်လၢအအိၣ်လၢကီၢ်ယူဒၤ, ဒ်သိးကဟဲဆူတၢ်လုၢ်ထီၣ်ပာ်ထီၣ်အမူးအံၤ,
10 ဘၣ်ဆၣ်အဒီပုၢ်ဝဲၢ်ခွါဒူချၢစီၤၡလိၤမိၤ, လၢအမိၢ်မ့ၢ်နီၢ်ဘၤသၡ့ဘၤမ့ၢ်ဂ့ၤ, ဝံနၤသၣ်မ့ၢ်ဂ့ၤ, စီၤဘနါယၤမ့ၢ်ဂ့ၤ, ပှၤတဖၣ်လၢအခိးစီၤပၤအသးသမူမ့ၢ်ဂ့ၤ, အဝဲတကွဲဃီၤဝဲဘၣ်.
11 တုၤနုၤတစု, စီၤနၤသၣ်လဲၤဃီၤဆူစီၤၡလိၤမိၤအမိၢ်နီၢ်ဘၤ သၡ့ဘၤအအိၣ်, ဒီးသံကွၢ်အီၤ, “မ့ၢ်နတနၢ်ဟူဘၣ်လၢနီၢ်ဃးကံၤအဖိခွါစီၤ အဒိနံၤယၤပာ်ထီၣ်လံအသးဒၣ်ဝဲလၢစီၤပၤအလီၢ်န့ၣ်ဘၣ်ဧါ. ဒီးစီၤပၤဒၤဝံးတသ့ၣ်ညါတၢ်မၤအသးအံၤနီတမံၤဘၣ်.
12 နမ့ၢ်အဲၣ်ဒိးနသးသမူဒီးနဖိခွါစီၤၡလိၤမိၤအသးသမူပူၤ ဖျဲးန့ၣ်, ယကဟ့ၣ်ကူၣ်နၤဒ်အံၤ,
13 “လဲၤတဘျီဃီဆူစီၤပၤဒၤဝံးအအိၣ်ဒီးသံကွၢ်အီၤ, တၢ်ဒိၣ်ကစၢ်စီၤပၤဧၢ, မ့ၢ်နတအၢၣ်လီၤတ့ၢ်နဲယၤသမှံၤသပှၢ်လၢ ယဖိခွါစီၤၡလိၤမိၤကကဲထီၣ်စီၤပၤလၢနလီၢ်န့ၣ်ဘၣ်ဧါ. ခဲကနံၣ်အံၤ, စီၤအဒိနံၤယၤကဲထီၣ်စီၤပၤန့ၣ်, မ့ၢ်တၢ်လဲၤအသးဒ်လဲၣ်.”
14 ဒီးစီၤနၤသၣ်စံးအါထီၣ်ကဒီးဝဲ, “ဖဲနကတိၤဒံးတၢ်ဒီးစီၤ ပၤဒၤဝံးအကတီၢ်န့ၣ်ယကဟဲနုာ်ဒီးမၤဂၢၢ်မၤကျၢၤနတၢ်ကတိၤ အဂ့ၢ်အကျိၤတဖၣ်န့ၣ်လီၤ.”
15 လၢတၢ်န့ၣ်အဃိနီၢ်ဘၤသၡ့ဘၤလဲၤဃီၤဝဲဒ်သိးကထံၣ်ဘၣ်စီၤပၤ လၢအမံဒၢးပူၤန့ၣ်လီၤ. ဒီးစီၤပၤဒၤဝံးအသးပှၢ်ဒိၣ်နီၢ်မးဒီးဘၣ်တၢ်ကွၢ်ထွဲကဟု ကယာ်အီၤလၢပှၤၡူန့ၣ်ဖိနီၢ်အဘံၡးန့ၣ်လီၤ.
16 နီၢ်ဘၤသၡ့ဘၤသကူးလီၤအသးလၢစီၤပၤအမဲာ်ညါ, ဒီးအဝဲသံကွၢ်အီၤ, “နသးလီမနုၤတမံၤန့ၣ်လဲၣ်.”
17 အဝဲစံးဆၢအီၤ, “တၢ်ဒိၣ်ကစၢ်စီၤပၤဧၢ, နမၤတ့ၢ်တၢ်အၢၣ်လီၤ သမှံၤသပှၢ်တမံၤဒီးယၤလၢယွၤနကစၢ်ယွၤအမံၤအပူၤလၢယဖိခွါ စီၤၡလိၤမိၤကကဲထီၣ်စီၤပၤလၢနလီၢ်ခံန့ၣ်လီၤ.
18 ဘၣ်ဆၣ်စီၤအဒိနံၤယၤကဲထီၣ်တ့ၢ်စီၤပၤလံန့ၣ်လီၤ. ဒီးနတသ့ၣ်ညါတၢ်နီတမံၤဘၣ်ဃးဒီးတၢ်ဂ့ၢ်အံၤဘၣ်.
19 အဝဲလုၢ်ထီၣ်တ့ၢ်လံတၢ်လုၢ်တၢ်ပာ်လၢအမ့ၢ်ဂီၤဖံးဖါတဖၣ်, သိ, ဂီၤဖံးဖိလၢအဘီၣ်အါအါကလဲာ်, ဒီးအဝဲကွဲဝဲနဖိခွါတ ဖၣ်, ဒီးပှၤလုၢ်တၢ်အခိၣ်စီၤအ့ဘယၤသၢ်, ဒီးနပှၤသုးမုၢ်အခိၣ်စီၤယိၤအာ်ဆူတၢ်အီၣ်အမူး, ဘၣ်ဆၣ်အဝဲတကွဲနဖိခွါစီၤၡလိၤမိၤန့ၣ်ဘၣ်.
20 တၢ်ဒိၣ်ကစၢ်စီၤပၤဧၢ, ကယဲၢ်ကီၢ်အံၣ်စရ့လးအပှၤဂီၢ်မုၢ်ခဲလၢာ် ကွၢ်ထီၣ်တၢ်ဆူနအိၣ်လၢနကတဲဘၣ်အဝဲသ့ၣ်လၢမ့ၢ်မတၤကကဲ ထီၣ်စီၤပၤလၢနလီၢ်လဲၣ်န့ၣ်လီၤ.
21 နမ့ၢ်တမၤဒ်န့ၣ်ဘၣ်ဒီး, တုၤမ့ၢ်နသံတဘျီဃီယဖိခွါစီၤၡလိၤ မိၤဒီးယၤန့ၣ်, ပကဘၣ်တၢ်ပာ်ပှၤဒ်ပှၤလၢအသးတတီဘၣ်ဒီးအထံအကီၢ်န့ၣ်လီၤ.”
22 ဖဲစီၤနၤသၣ်ဟဲတုၤဃီၤဆူနီပူၤန့ၣ်နီၢ်ဘၤသၡ့ဘၤစံးကတိၤ ဒံးတၢ်အဖၢမုၢ်န့ၣ်လီၤ.
23 ဒီးပှၤတဲဘၣ်စီၤပၤလၢဝံအိၣ်ဝဲဖဲန့ၣ်ဒီးစီၤနၤသၣ်လဲၤ နုာ်ဝဲဒီးသကူးလီၤအသးလၢစီၤပၤအမဲာ်ညါန့ၣ်လီၤ.
24 အန့ၣ်ဒီးအဝဲစံးဝဲ, “တၢ်ဒိၣ်ကစၢ်စီၤပၤဧၢ, မ့ၢ်နဘိးဘၣ်သ့ၣ်ညါတ့ၢ်နဲလၢစီၤအဒိနံၤယၤကကဲထီၣ်စီၤပၤ လၢနလီၢ်န့ၣ်ဧါ.
25 အအံၤတနံၤအံၤဒၣ်လဲာ်န့ၣ်အဝဲလဲၤတ့ၢ်ဝဲဒီးလုၢ်ထီၣ်တ့ၢ်တၢ် လုၢ်တၢ်ပာ်လၢအမ့ၢ်ဂီၤဖံးဖါအါအါကလဲာ်, သိဒီးဂီၤဖံးအဘီၣ်တဖၣ်အါအါကလဲာ်န့ၣ်လီၤ. အဝဲကွဲမုာ်နဖိခွါခဲလၢာ်, နပှၤသုးမုၢ်အခိၣ်စီၤယိၤအာ်, ဒီးပှၤလုၢ်တၢ်အခိၣ်စီၤအ့ဘယၤသၢ်, ဒီးခဲကနံၣ်အံၤအဝဲသ့ၣ်အီၣ်တၢ်အီတၢ်ဒီးအီၤဒီးကိးပသူထီၣ်ဝဲ, မ်စီၤပၤအဒိနံၤယၤအိၣ်မူဝဲအါနံၣ်အါလါတက့ၢ်, န့ၣ်လီၤ.
26 ဘၣ်ဆၣ်တၢ်ဒိၣ်ဧၢ, အဝဲတကွဲဝဲယၤမ့ၢ်ဂ့ၤ, ပှၤလုၢ်တၢ်အခိၣ်စီၤ စၤဒိးမ့ၢ်ဂ့ၤ, စီၤဘနါယၤမ့ၢ်ဂ့ၤ, စီၤၡလိၤမိၤမ့ၢ်ဂ့ၤန့ၣ် ဘၣ်.
27 မ့ၢ်တၢ်ဒိၣ်ကစၢ်စီၤပၤဘၣ်အသးလၢတၢ်အံၤခဲလၢာ်ဒီးတတဲဘၣ်ဒၣ် လဲာ်နပဒိၣ်ပပှၢ်တဖၣ်လၢမ့ၢ်မတၤကကဲထီၣ်စီၤပၤလၢနလီၢ်ဘၣ်န့ၣ် ဧါ.”
28 စီၤပၤဒၤဝံးစံးဝဲ, “မၢနီၢ်ဘၤသၡ့ဘၤဟဲနုာ်ကဒါက့ၤတက့ၢ်.” ဒီးအဝဲဒၣ်ဟဲက့ၤနုာ်ဝဲဒီးဆၢထၢၣ်ဝဲဒၣ်လၢစီၤပၤဒၤဝံး အမဲာ်ညါန့ၣ်လီၤ.
29 အန့ၣ်ဝံၤဒီးအဝဲစံးဘၣ်အီၤ, “ယအၢၣ်လီၤနၤလၢယွၤလၢအမူဝဲ လၢအမၤပူၤဖျဲးတ့ၢ်ယၤလၢကယဲၢ်ယတၢ်ကိၢ်တၢ်ဂီၤခဲလၢာ်တဂၤ အမံၤအပူၤ,
30 လၢတနံၤအံၤ, ယကဟံးဃာ်တၢ်အၢၣ်လီၤလၢယမၤတ့ၢ်ဒီးနၤလၢယွၤ, အံၣ်စရ့လးအကစၢ်ယွၤအမံၤအပူၤ, လၢနဖိခွါစီၤၡလိၤမိၤကကဲထီၣ်စီၤပၤလၢယလီၢ်န့ၣ်လီၤ.”
31 နီၢ်ဘၤသၡ့ဘၤသကူးလီၤအသးဒီးစံးဝဲ, “မ်ယကစၢ်စီၤပၤမူဝဲလီၤစိၤလီၤထီန့ၣ်တက့ၢ်.”
32 အန့ၣ်ဝံၤဒီး, စီၤပၤဒၤဝံးမၢပှၤကိးန့ၢ်စီၤစၤဒိး, စီၤနၤသၣ်ဒီးစီၤဘနါယၤသ့ၣ်တဖၣ်န့ၣ်လီၤ. ဒီးတုၤအဝဲသ့ၣ်ဟဲနုာ်ဝဲန့ၣ်,
33 အဝဲစံးဘၣ်အဝဲသ့ၣ်, “ကိးဃုာ်ယကွီၢ်အပဒိၣ်ပပှၢ်တဖၣ်ဒီးသု, ဒုးဒိးထီၣ်ယဖိခွါစီၤၡလိၤမိၤလၢယကသ့ၣ်လၤဒၣ်ယဲဒီးလဲၤ ယုၤဒီးကဟုကယာ်အီၤတုၤလီၤဆူထံကီၢ်အထံမူထီၣ်ပၢၢ်,
34 ဒီးဖဲန့ၣ်, စီၤစၤဒိး, ဒီးစီၤနၤသၣ်ကဘၣ်ဖှူအီၤဒ်ကီၢ်အံၣ် စရ့လးအစီၤပၤအသိးန့ၣ်လီၤ. အန့ၣ်ဝံၤဒီး, အူထီၣ်ကွဲၤဒီးကိးပသူထီၣ်, မ်စီၤပၤၡလိၤမိၤမူဝဲအါနံၣ်အါလါန့ၣ်တက့ၢ်.
35 ဟဲက့ၤပိာ်ကဒါက့ၤအခံဆူအံၤ, ဖဲအဝဲဟဲက့ၤဒ်သိးကဆ့ၣ်နီၤ လၢယလီၢ်ပစိာ်အဖီခိၣ်အဂီၢ်န့ၣ်တက့ၢ်. အဝဲကကဲထီၣ်စီၤပၤလၢယလီၢ်မ့ၢ်လၢအဝဲမ့ၢ်ပှၤတဂၤလၢယဃုထၢ တ့ၢ်လၢကကဲထီၣ်ပှၤပၢတၢ်လၢကီၢ်အံၣ်စရ့လးဒီးကီၢ်ယူဒၤအဖီ ခိၣ်အဃိန့ၣ်လီၤ.”
36 ဒီးစီၤဘနါယၤစံးဆၢဝဲ, “မ်တၢ်ကမၤအသးဒ်န့ၣ်တက့ၢ်. ဒီးမ်ယွၤနကစၢ်ယွၤပာ်ဂၢၢ်ပာ်ကျၢၤတၢ်အံၤန့ၣ်တက့ၢ်.
37 ဒ်ယွၤအိၣ်တ့ၢ်လံဒီးတၢ်ဒိၣ်ကစၢ်စီၤပၤအသိး, မ်အဝဲဒၣ်အိၣ်စ့ၢ်ကီးဒီးစီၤၡလိၤမိၤဒီးဒုးဘီၣ်ထီၣ်ညီ ထီၣ်အတၢ်ပၢတၢ်ပြးဒိၣ်န့ၢ်အါန့ၢ်ဒံးနတၢ်ပၢတၢ်ပြးန့ၣ်တ က့ၢ်.”
38 လၢတၢ်န့ၣ်အဃိစီၤစၤဒိး, စီၤနၤသၣ်, စီၤဘနါယၤဒီးစီၤပၤ အခ့အပှၤတဖၣ်ဒုးဒိးထီၣ်စီၤၡလိၤမိၤလၢစီၤပၤဒၤဝံးအကသ့ၣ် လၤဒီးလဲၤယုၤဒီးကဟုကယာ်အီၤတုၤလီၤဆူကံဃိၣ်အထံမူ ထီၣ်ပၢၢ်န့ၣ်လီၤ.
39 စီၤစၤဒိးဟံးန့ၢ်သ့ၣ်စၤယံးအသိဒၢလၢအဟဲစိာ်ဝဲလၢယွၤ အိၣ်ဝဲဆိးဝဲအဒဲစီဆှံအပူၤဒီးဖှူဝဲစီၤၡလိၤမိၤန့ၣ်လီၤ. အဝဲသ့ၣ်အူထီၣ်ကွဲၤဒီးပှၤဂီၢ်မုၢ်ခဲလၢာ်ကိးပသူထီၣ်ဝဲ, “မ်စီၤပၤၡလိၤမိၤမူဝဲအါနံၣ်အါလါန့ၣ်တက့ၢ်.”
40 အန့ၣ်ဝံၤဒီး, အဝဲသ့ၣ်ခဲလၢာ်ဟဲက့ၤပိာ်အခံ, ကိးထီၣ်လၢတၢ်သူၣ်ခုသးခုဒီးအူပံတဖၣ်တုၤဒၣ်လဲာ်ဟီၣ်ခိၣ် သထြူးဝဲလၢတၢ်သီၣ်တၢ်သဲအဃိန့ၣ်လီၤ.
41 ဖဲစီၤအဒိနံၤယၤဒီးကယဲၢ်အပှၤသမှံၤခဲလၢာ်အီၣ်တၢ်အီတၢ်ဝံၤ န့ၣ်, အဝဲသ့ၣ်နၢ်ဟူတၢ်အသီၣ်န့ၣ်လီၤ. ဒီးဖဲစီၤယိၤအာ်နၢ်ဟူဝဲကွဲၤအသီၣ်န့ၣ်သံကွၢ်ဝဲ, “ကယဲၢ်တၢ်အသီၣ်လၢဝ့ၢ်ပူၤန့ၣ်အခီပညီမ့ၢ်တၢ်မနုၤန့ၣ် လဲၣ်.”
42 တချုးလၢအကတိၤတၢ်ဝံၤဒံးဘၣ်န့ၣ်, စီၤယိၤနၤသၣ်လၢအမ့ၢ်ပှၤလုၢ်တၢ်အခိၣ်စီၤအ့ဘယၤသၢ်အဖိခွါ ဟဲတုၤဝဲဒၣ်န့ၣ်လီၤ. စီၤအဒိနံၤယၤစံးဘၣ်အီၤ, “ဟဲနုာ်တက့ၢ်. နမ့ၢ်ပှၤအဂ့ၤတဂၤလီၤ. လီၤဂာ်လၢနဟဲစိာ်တၢ်ကစီၣ်လၢအဂ့ၤန့ၣ်လီၤ.”
43 စီၤယိၤနၤသၣ်စံးဆၢဝဲ, “တမ့ၢ်ဒ်န့ၣ်ဘၣ်. တၢ်ဒိၣ်ကစၢ်စီၤပၤဒၤဝံးဒုးကဲထီၣ်စီၤၡလိၤမိၤလၢစီၤပၤ လံန့ၣ်လီၤ.
44 စီၤပၤမၢလီၤဝဲစီၤစၤဒိး, စီၤနၤသၣ်, စီၤဘနါယၤဒီးပှၤ တဖၣ်လၢအခိးစီၤပၤအသးသမူဒ်သိးကလဲၤယုၤအီၤဒီးကဟုကယာ်အီၤ အဂီၢ်န့ၣ်လီၤ. အဝဲသ့ၣ်ဒုးဒိးအီၤစီၤပၤအကသ့ၣ်လၤန့ၣ်လီၤ.
45 ဒီးစီၤစၤဒိးဒီးစီၤနၤသၣ်ဖှူအီၤဒ်စီၤပၤအသိးဖဲကံဃိၣ် အထံထီၣ်ပၢၢ်န့ၣ်လီၤ. အန့ၣ်ဝံၤအဝဲသ့ၣ်လဲၤဆူဝ့ၢ်ပူၤ, ကိးထီၣ်လၢတၢ်သးခုဒီး, ပှၤဂီၢ်မုၢ်သ့ၣ်တဖၣ်ခဲကနံၣ်အံၤ, သီၣ်တထူၣ်ဘးလီန့ၣ်လီၤ. တၢ်အသီၣ်န့ၣ်, မ့ၢ်တၢ်လၢနနၢ်ဟူတ့ၢ်န့ၣ်လီၤ.
46 ခဲကနံၣ်အံၤစီၤၡလိၤမိၤကဲထီၣ်စီၤပၤလံန့ၣ်လီၤ.
47 လၢတၢ်န့ၣ်အမဲာ်ညါ, ကွီၢ်အပဒိၣ်ပပှၢ်တဖၣ်လဲၤနုာ်ဒ်သိးကဟ့ၣ်ထီၣ် တၢ်ယူးယီၣ်ဆူတၢ်ဒိၣ်ကစၢ်စီၤပၤဒၤဝံးဒီးစံးဝဲ, မ်နကစၢ်ယွၤဒုးမၤမံၤဟူသၣ်ဖျါစီၤၡလိၤမိၤအါန့ၢ်ဒံးနၤ ဒၣ်လဲာ်, တက့ၢ်န့ၣ်လီၤ. အန့ၣ်တစု, စီၤပၤဒၤဝံးသကူးလီၤအသးဒီးဘူၣ် ထီၣ်ဘါထီၣ်တၢ်လၢအလီၢ်မံအဖီခိၣ်န့ၣ်လီၤ.
48 ဒီးဃ့ဘါထုကဖၣ်ဝဲ, မ်ပကစံးထီၣ်ပတြၢၤယွၤ, ကီၢ်အံၣ်စရ့လးအကစၢ်ယွၤလၢမုၢ်မဆါတနံၤအံၤ, ဒုးကဲထီၣ်ယစၢၤယသွဲၣ်အကျါတဂၤလၢကထီၣ်ယလီၢ်ဒ်စီၤပၤတဂၤ အသိးဒီးပျဲယအိၣ်မူလၢယကထံၣ်ဘၣ်တၢ်အံၤ, အဃိန့ၣ်တက့ၢ်, န့ၣ်လီၤ.”
49 အန့ၣ်ဝံၤဒီး, စီၤအဒိနံၤယၤအပှၤသမှံၤတဖၣ်ပျံၤတၢ်ဖုးတၢ် ဒီးအဝဲသ့ၣ်ခဲလၢာ်ဂဲၤထၢၣ်ဝဲဒီးဟးထီၣ်ကွံာ်ဝဲ, တဂၤလၢအကျဲဒၣ်ဝဲစုာ်စုာ်န့ၣ်လီၤ.
50 လၢတၢ်ပျံၤဘၣ်စီၤၡလိၤမိၤဖးဒိၣ်အပူၤန့ၣ်, စီၤအဒိၤနံၤယၤလဲၤဝဲဆူယွၤအဒဲစီဆှံလၢယွၤအိၣ်ဝဲဒီး ဟံးဃာ်ကျၢၤယွၤအတၢ်လုၢ်လီၢ်အနၢၣ်တဖၣ်န့ၣ်လီၤ.
51 စီၤပၤၡလိၤမိၤဘၣ်တၢ်တဲဘၣ်အီၤလၢစီၤအဒိနံၤယၤပျံၤအီၤ ဒီးဖီၣ်ဃးဝဲတၢ်လုၢ်လီၢ်အနၢၣ်တဖၣ်ဒီးစံးဝဲ, “အဆိကတၢၢ်န့ၣ်ယအဲၣ်ဒိးလၢစီၤပၤၡလိၤမိၤကဆိၣ်လီၤအသးဒီး ယၤလၢအသုတမၤသံယၤတဂ့ၤန့ၣ်လီၤ.”
52 စီၤၡလိၤမိၤစံးဆၢဝဲ, “အဝဲအသးမ့ၢ်တီန့ၣ်, အခိၣ်သူတဘိလၢအခိၣ်လိၤဒၣ်လဲာ်န့ၣ်တဘၣ်တၢ်ထိးအီၤဘၣ်. ဘၣ်ဆၣ်အသးမ့ၢ်တတီဘၣ်န့ၣ်ဒီးအဝဲကဘၣ်သံဝဲဒၣ်န့ၣ်လီၤ.”
53 အန့ၣ်ဒီး, စီၤပၤၡလိၤမိၤမၢပှၤလဲၤကိးစီၤအဒိနံၤယၤဒီး မၢပှၤဟဲက့ၤစိာ်လီၤက့ၤအီၤလၢတၢ်လုၢ်လီၢ်အဖီခိၣ်န့ၣ်လီၤ. စီၤအဒိနံၤယၤလဲၤဆူစီၤပၤအအိၣ်, သကူးလီၤအသးလၢစီၤပၤ အမဲာ်ညါဒီးစီၤပၤစံးဘၣ်အီၤ, “နက့ၤဆူနဟံၣ်သ့ဝဲလီၤ.”