22
(စံး.၁၈)
1 ဖဲယွၤအုၣ်က့ၤခီၣ်က့ၤစီၤဒၤဝံးလၢစီၤစီလူး ဒီးအဝဲအဒုၣ်အဒါအဂၤတဖၣ်အစုပူၤန့ၣ် စီၤဒၤဝံးအုၣ်ထါသးဝံၣ်တယုၢ်အံၤဆူ ယွၤအအိၣ်လီၤ.
2 ယွၤမ့ၢ်ယပှၤဒီဒီၣ်အိၣ်ပှိၤယၤလီၤ.
အဝဲမ့ၢ်ယတိာ်ခၢၣ်သနၢၣ်လီၤ.
3 ယကစၢ်ယွၤမ့ၢ်ယတၢ်ဒီဒၣ်အိၣ်ပှိၤ,
ဒီးဃုာ်ဒီးအီၤန့ၣ်ယပူၤဖျဲးယဲလီၤ.
အဝဲဒီဒၣ်အိၣ်ပှိၤယၤဒ်ကတီၤတဘ့ၣ်အသိး,
အဝဲဒီဒၣ်ယၤဒီးပာ်ယၤပူၤဒုၣ်ပူၤဒါန့ၣ်လီၤ.
အဝဲမ့ၢ်ပှၤအုၣ်က့ၤခီၣ်က့ၤယၤ,
အဝဲဒီဒၣ်အိၣ်ပှိၤယၤဒီးအုၣ်က့ၤခီၣ်က့ၤယၤလၢ တၢ်စုဆူၣ်ခီၣ်တကးအပူၤန့ၣ်လီၤ.
4 ယကိးထီၣ်ဆူယွၤအအိၣ်,
ဒီးအဝဲအုၣ်က့ၤခီၣ်က့ၤယၤလၢယဒုၣ်ယဒါတဖၣ် အစုပူၤန့ၣ်လီၤ.
5 တၢ်သံအလပီတဖၣ်အိၣ်ဝးတရံးယၤ,
တၢ်မၤဟးဂီၤအလပီတဖၣ်တလ့ၣ်အသးလၢ ယဖီခိၣ်လီၤ.
6 တၢ်သံအတၢ်လီၤပျံၤလီၤဖုးအိၣ်ဝးတရံးယၤ,
ဒီးတၢ်သွၣ်ခိၣ်ပာ်လီၤအထုလၢယဂီၢ်န့ၣ်လီၤ.
7 လၢယတၢ်ကိၢ်တၢ်ဂီၤအပူၤန့ၣ်ယကိးထီၣ်ယွၤ,
ယကိးထီၣ်ဆူယကစၢ်ယွၤလၢတၢ်မၤစၢၤအဂီၢ်လီၤ.
အဝဲနၢ်ဟူယကလုၢ်လၢအတၢ်လုၢ်ဟံၣ်အပူၤ,
အဝဲဒိကနၣ်ယတၢ်ကိးထီၣ်လၢတၢ်မၤစၢၤအဂီၢ် န့ၣ်လီၤ.
8 တုၤနုၤတစု, ဟီၣ်ခိၣ်ကနိးကစုာ်ဒီးဟူးဝးဆှဲးဆှိးဝဲ,
မူကပိာ်လိၤအခီၣ်ထံးတဖၣ်ဟူးဂဲၤဝဲဒီးကနိးကစုာ်ဝဲ,
မ့ၢ်လၢကစၢ်ယွၤအသးဒိၣ်အဃိန့ၣ်လီၤ.
9 မ့ၣ်အူလုၣ်ဟဲခုၣ်ထီၣ်လၢအနါဒ့တဖၣ်အပူၤ,
မ့ၣ်အူအီၣ်ဂီၤတၢ်ဒီးမ့ၣ်အူအ့ၣ်ကဲၤကဖးဟဲထီၣ်လၢအထးခိၣ် အပူၤလီၤ.
10 အဝဲမၤသကူးလီၤမူကပိာ်လိၤ, ဒီးဟဲလီၤဝဲအိၣ်ဒီးတၢ်အၢၣ်ခံးသူတလိၣ်လၢအခီၣ်အဖီလာ်န့ၣ်လီၤ.
11 အဝဲယူၤဝဲချ့ချ့ကလဲာ်လၢအခ့ရူာ်တဖၣ်အဖီခိၣ်,
အဝဲလဲၤတၢ်လၢကလံၤအဒံးဆ့တဖၣ်အလိၤန့ၣ်လီၤ.
12 အဝဲကးဘၢအသးလၢတၢ်ခံးတၢ်နၤ, တၢ်အၢၣ်ဖးတီၣ်တဖၣ်လၢအပှဲၤဒီး ထံဧိၤနိဧိၤန့ၣ်အိၣ်ဝးတရံးအီၤ,
13 မ့ၣ်အူအ့ၣ်တဖၣ်ကဲၤကပျီၤထီၣ်လၢလီဝၢ်ဒံးအပူၤလၢအဝဲအမဲာ်ညါလီၤ.
14 တုၤနုၤတစုယွၤအကလုၢ်သီၣ်ထီၣ်ဒ်လီသီၣ်အသိးလၢမူကပိာ်လိၤ ဒီးသ့တၢ်လၢာ်ကစၢ်ယွၤအကလုၢ်န့ၣ်တၢ်နၢ်ဟူဘၣ်အီၤလီၤ.
15 အဝဲခးထီၣ်အပျၢ်တဖၣ်ဒီးမၤလီၤပြံလီၤပြါကွံာ်အဒုၣ်အဒါတဖၣ် န့ၣ်လီၤ.
လၢလီဝၢ်ဒံးအတၢ်ကပြ့ၢ်တဖၣ်န့ၣ်အဝဲဒုးဃ့ၢ်ကွံာ်အဝဲသ့ၣ် လီၤ.
16 ပီၣ်လဲၣ်အခံဒးအိၣ်ဖျါထီၣ်ဝဲ,
ဒီးဟီၣ်ခိၣ်အခီၣ်ထံးတဖၣ်ဘၣ်တၢ်မၤဖျါထီၣ်အီၤ,
ဖဲယွၤသိၣ်ဃီၣ်အဒုၣ်အဒါတဖၣ်ဒီးသါသဖှိဘၣ် အဝဲသ့ၣ်
လၢတၢ်သးဒိၣ်အပူၤအခါန့ၣ်လီၤ.
17 ယွၤယူာ်လီၤအစုလၢထးတခီဒီးဟံးထီၣ်ယၤန့ၣ်လီၤ.
အဝဲထုးထီၣ်ကွံာ်ယၤလၢထံယိာ်တဖၣ်အပူၤန့ၣ်လီၤ.
18 အဝဲမၤပူၤဖျဲးယၤလၢယဒုၣ်ယဒါတဖၣ်လၢ အဂံၢ်ဆူၣ်ဘါဆူၣ်ဝဲ
ဒီးလၢကယဲၢ်ပှၤတဖၣ်လၢအသးဟ့ယၤ အစုပူၤန့ၣ်လီၤ.
အဝဲသ့ၣ်အဂံၢ်အဘါဆူၣ်ကဲၣ်ဆိးလၢယဂီၢ်လီၤ.
19 ဖဲယအိၣ်လၢတၢ်ကိၢ်တၢ်ဂီၤအပူၤန့ၣ်, အဝဲသ့ၣ်ဟဲဒုးယၤ,
ဘၣ်ဆၣ်ယွၤဒီဒၣ်အိၣ်ပှိၤယၤန့ၣ်လီၤ.
20 အဝဲမၤစၢၤယၤလၢယကပူၤဖျဲးထီၣ်လၢတၢ်လီၤပျံၤလီၤဘၣ်ယိၣ် အပူၤန့ၣ်လီၤ.
အဝဲအုၣ်က့ၤခီၣ်က့ၤယၤမ့ၢ်လၢအဝဲဘၣ်သူၣ်ဘၣ်သးယၤအဃိ န့ၣ်လီၤ.
21 ယွၤဟ့ၣ်ဘျုးဆၢယၤမ့ၢ်လၢယမၤတၢ်ဘၣ်အဃိလီၤ.
အဝဲဆိၣ်ဂ့ၤယၤမ့ၢ်လၢယတၢ်ကမၣ်တအိၣ်ဘၣ် အဃိလီၤ.
22 ယစူၢ်တ့ၢ်ယွၤအတၢ်သိၣ်တၢ်သီန့ၣ်လီၤ.
ယတဃၣ်ကွံာ်ဘၣ်ယသးလၢယကစၢ်ယွၤ အအိၣ်ဘၣ်.
23 ယဒိကနၣ်မၤထွဲကယဲၢ်ယွၤအတၢ်သိၣ်တၢ်သီ တဖၣ်န့ၣ်လီၤ.
ယတလုၢ်သ့ၣ်ခါပတာ်ဘၣ်ယွၤအတၢ်မၤလိာ် တဖၣ်ဘၣ်.
24 အဝဲသ့ၣ်ညါဝဲလၢယတၢ်ကမၣ်တအိၣ်ဘၣ်,
ဒီးလၢယပၢၤဃာ်ယသးဒ်သိးယသုတမၤကမၣ်တၢ်တဂ့ၤန့ၣ်လီၤ.
25 လၢတၢ်န့ၣ်အဃိအဝဲဟ့ၣ်ဘျုးဆၢက့ၤယၤမ့ၢ်လၢယမၤတၢ်အဘၣ်အဃိ လီၤ.
အဂ့ၢ်ဒ်အံၤ, အဝဲသ့ၣ်ညါဝဲလၢယတၢ်ကမၣ်တအိၣ်ဘၣ်.
26 အိယွၤဧၢ, နသူၣ်တီသးရၤဒီးပှၤတဖၣ်လၢအသူၣ်တီသးရၤဒီးနၤ န့ၣ်လီၤ.
ဒီးနဂ့ၤနဲလၢာ်လၢာ်ဆ့ဆ့လၢပှၤအလၢအပှဲၤတဖၣ်အဂီၢ်န့ၣ်လီၤ.
27 နကဆှီနဲလၢပှၤတဖၣ်လၢအကဆှီဝဲအဂီၢ်,
ဘၣ်ဆၣ်ဒီးနအၢနသီနဲလၢပှၤအၢပှၤသီတဖၣ် အဂီၢ်န့ၣ်လီၤ.
28 နအုၣ်က့ၤခီၣ်က့ၤပှၤတဖၣ်လၢအဆီၣ်လီၤအသး,
မ့မ့ၢ်နဆီၣ်လီၤပှၤတဖၣ်လၢအပာ်ထီၣ်ထီအသး န့ၣ်လီၤ.
29 ယွၤဧၢ, နဲဒၣ်အံၤ, နမ့ၢ်ယတၢ်ကပီၤန့ၣ်လီၤ.
နနီၣ်ကွံာ်ယတၢ်ခံးတၢ်နၤန့ၣ်လီၤ.
30 နဟ့ၣ်ယၤတၢ်ဂံၢ်တၢ်ဘါလၢယကဒုးယဒုၣ်ယဒါတဖၣ်အဂီၢ်,
ဒီးတၢ်စိကမီၤလၢယကမၤနၢၤကွံာ်အဝဲသ့ၣ်အတၢ်တြီဆၢတၢ်အလီၢ် တဖၣ်န့ၣ်လီၤ.
31 ကစၢ်ယွၤတဂၤအံၤ, အတၢ်မၤတဖၣ်လၢပှဲၤဝဲဒိၣ်မးလဲၣ်.
အတၢ်ကတိၤတဖၣ်ကဆှီဝဲဒီးလီၤနာ်န့ၢ်ဒိၣ်မးလဲၣ်.
အဝဲလီၤဂာ်ဒ်ကတီၤတဘ့ၣ်အသိး
လၢပှၤတဖၣ်လၢအဃု အဝဲအတၢ်ဒီဒၣ်အိၣ်ပှိၤအဂီၢ်န့ၣ်လီၤ.
32 ထဲယွၤတဂၤဧိၤမ့ၢ်ကစၢ်ယွၤ,
ထဲကစၢ်ယွၤတဂၤဧိၤမ့ၢ်ပှၤလၢအကဟုကယာ် ပှၤန့ၣ်လီၤ.
33 ကစၢ်ယွၤတဂၤအံၤမ့ၢ်ပတၢ်အိၣ်တဒၢအလီၢ် ခၢၣ်သနၢၣ်လီၤ.
အဝဲမၤလိၤယတၢ်လဲၤကျဲန့ၣ်လီၤ.
34 အဝဲမၤကျၢၤယခီၣ်ဒ်တၤယုၢ်တဒုအခီၣ်အသိး,
အဝဲပၢၤဃးယၤပူၤပူၤဖျဲးဖျဲးလၢကစၢၢ်တဖၣ် အဒီခိၣ်န့ၣ်လီၤ.
35 အဝဲသိၣ်လိယၤလၢတၢ်ဒုးအဂီၢ်,
ဒ်သိးယဟ့ၣ်ထီၣ်ချံၣ်လၢအဆူၣ်အကိၤကတၢၢ်ကသ့န့ၣ်လီၤ.
36 အိယွၤဧၢ, နဒီဒၣ်အိၣ်ပှိၤယၤဒီးအုၣ်က့ၤခီၣ်က့ၤယၤလီၤ.
နတၢ်မၤစၢၤဒုးမ့ၢ်ယၤလၢပှၤအဒိၣ်လီၤ.
37 နမၤလဲၢ်ထီၣ်ယခီၣ်ထွဲတၢ်အလီၢ်,
ဒီးယခီၣ်တလီၤတလံာ်နီတဘျီဘၣ်.
38 ယလူၤယဒုၣ်ယဒါတဖၣ်, ဒီးမၤနၢၤကွံာ်အဝဲသ့ၣ်လီၤ.
တချုးလၢယမၤဟးဂီၤကွံာ်ဘၣ်အဝဲသ့ၣ်န့ၣ်, ယတဆိကတီၢ်ယဲဒၣ်ဘၣ်.
39 ယကျီကွံာ်အဝဲသ့ၣ်ဒီးအဝဲသ့ၣ်ဂဲၤဆၢထၢၣ်တန့ၢ်ဘၣ်.
အဝဲသ့ၣ်လီၤဃံၤဝဲလၢယမဲာ်ညါဒ်ပှၤဃၣ်ကွံာ်တဖၣ်အသိးန့ၣ်လီၤ.
40 နဟ့ၣ်ယၤတၢ်ဂံၢ်တၢ်ဘါလၢတၢ်ဒုးတၢ်ယၤအဂီၢ်,
ဒီးနဟ့ၣ်ယၤတၢ်မၤနၢၤလၢယဒုၣ်ယဒါတဖၣ် အဖီခိၣ်လီၤ.
41 နဒုးဃ့ၢ်ကွံာ်ယဒုၣ်ယဒါတဖၣ်လၢယမဲာ်ညါ,
ယမၤဟးဂီၤကွံာ်ပှၤလၢအသးဟ့ယၤတဖၣ်လီၤ.
42 အဝဲသ့ၣ်ဃုတၢ်မၤစၢၤဘၣ်ဆၣ်ဒီးပှၤလၢကမၤပူၤဖျဲး အဝဲသ့ၣ်တအိၣ်နီတဂၤဘၣ်.
အဝဲသ့ၣ်ကိးထီၣ်ဆူယွၤအအိၣ်, ဘၣ်ဆၣ်ဒီးအဝဲတစံးဆၢဝဲဒၣ် ဘၣ်.
43 ယတီၢ်သဘှံးအဝဲသ့ၣ်, ဒီးအဝဲသ့ၣ်ကဲထီၣ်ဒ်ဖၣ်ကမူၣ်အသိးန့ၣ် လီၤ.
ယယီၢ်တံၢ်အဝဲသ့ၣ်ဒ်ကပံာ်လၢကျဲအဖီခိၣ် အသိးန့ၣ်လီၤ.
44 နအုၣ်က့ၤခီၣ်က့ၤယၤလၢယပှၤဂီၢ်မုၢ်လၢအပူထီၣ် ထီဒါယၤတဖၣ်အစုပူၤ,
ဒီးဟံးဃာ်ဂၢၢ်ကျၢၤယတၢ်ပၢလၢပှၤကလုာ်တဖၣ် အဖီခိၣ်န့ၣ်လီၤ.
ပှၤဂီၢ်မုၢ်လၢယတသ့ၣ်ညါတ့ၢ်အီၤတဖၣ်ခဲအံၤကဲထီၣ်ပှၤလၢယပၢ ဘၣ်အီၤတဖၣ်လီၤ.
45 ပှၤတခီဘီမုၢ်ဖိတဖၣ်တီၤလီၤကဒွံကျိာ်လၢယမဲာ်ညါလီၤ.
ဖဲအဝဲသ့ၣ်နၢ်ဟူယကလုၢ်န့ၣ်စူၢ်ဝဲလီၤ.
46 အဝဲသ့ၣ်အတၢ်သးဒူလီၤမၢ်ကွံာ်
ဒီးဟဲထီၣ်လၢအတိာ်တဖၣ်အပူၤအိၣ်ဒီးတၢ်ကနိးကစုာ်န့ၣ်လီၤ.
47 ယွၤမူဝဲ, မ်ပှၤလၢအကဟုကယာ်ယၤဘၣ်တၢ်စံးထီၣ်ပတြၢၤ အီၤတက့ၢ်.
ဘိးဘၣ်သ့ၣ်ညါကစၢ်ယွၤလၢအဆူၣ်ဝဲ, ယွၤလၢအအုၣ်က့ၤခီၣ်က့ၤယၤတဂၤအတၢ်ဒိၣ်တၢ်မုၢ် န့ၣ်တက့ၢ်.
48 အဝဲဟ့ၣ်ယၤတၢ်မၤနၢၤလၢယဒုၣ်ယဒါတဖၣ်အဖီခိၣ်,
အဝဲဆီၣ်လီၤပှၤကလုာ်တဖၣ်လၢယဖီလာ်လီၤ.
49 ဒီးအုၣ်က့ၤခီၣ်က့ၤယၤလၢယဒုၣ်ယဒါတဖၣ် အစုပူၤန့ၣ်လီၤ.
အိ, ယွၤဧၢ, နဟ့ၣ်ယၤတၢ်မၤနၢၤလၢယဒုၣ်ယဒါတဖၣ်အဖီခိၣ်,
ဒီးဒီဒၣ်အိၣ်ပှိၤယၤလၢပှၤစုဆူၣ်ခီၣ်တကးတဖၣ်န့ၣ်လီၤ.
50 လၢတၢ်အံၤအဃိ, ယစံးထီၣ်ပတြၢၤနၤလၢပှၤကလုာ်တဖၣ်အကျါလီၤ. ယကသးဝံၣ်စံးထီၣ်ပတြၢၤနၤလီၤ.
51 ကစၢ်ယွၤဟ့ၣ်တၢ်မၤနၢၤဖးဒိၣ်ဆူအစီၤပၤအအိၣ်,
အဝဲဒုးနဲၣ်အတၢ်အဲၣ်ဂၢၢ်ကျၢၤဆူပှၤတဂၤလၢအဃုထၢတ့ၢ်ဝဲဒၣ်,
ဆူစီၤဒၤဝံးဒီးအဝဲအစၢၤအသွဲၣ်ထီဘိတပယူာ်ဃီ န့ၣ်လီၤ.