18
1 စီၤပၤစီၤဒၤဝံးဒုးအိၣ်ဖှိၣ်ရိဖှိၣ်အပှၤတဖၣ်ဒီးနီၤဖးလီၤအီၤဆူပှၤတကထိ, ပှၤတကယၤအကရူၢ်ဖိတဖၣ်ဒီးပာ်ထီၣ်သုးခိၣ်သုးနၢ်တဖၣ် လၢအဝဲသ့ၣ်အဖီခိၣ်လီၤ.
2 အန့ၣ်ဝံၤဒီး, အဝဲဆှၢလီၤအဝဲသ့ၣ်သၢကရူၢ်အိၣ်ဒီးစီၤယိၤအာ်, စီၤယိၤအာ်အဒီပုၢ်ဝဲၢ်စီၤအဘံၡဲၤဒီးပှၤကၤသးဖိစီၤအံတဲၤ, တဂၤစုာ်စုာ်ဒ်သုးခိၣ်ဖးဒိၣ်တဖၣ်လၢကရူၢ်တဖုဘၣ်တဖုအဖီခိၣ် လီၤ. ဒီးစီၤပၤစံးဘၣ်အပှၤတဖၣ်, “ယကလဲၤဃုာ်ဒီးသုလၢယနီၢ်ကစၢ်ဒၣ်ယဲလီၤ.”
3 အဝဲသ့ၣ်စံးဆၢဝဲဒၣ်, “နတဘၣ်လဲၤဃုာ်တၢ်ဒီးပှၤဘၣ်. ပဝဲအကျါတနီၤမ့ၢ်ဃၣ်ကဒါက့ၤအသးဒီးဃ့ၢ်မ့ၢ်ဂ့ၤ, ပဝဲအကျါတဝာ်မ့ၢ်ဘၣ်တၢ်မၤသံကွံာ်အီၤမ့ၢ်ဂ့ၤန့ၣ်တမ့ၢ်ကလီၤ ဆီနီတမံၤလၢပဒုၣ်ပဒါအဂီၢ်ဘၣ်ဆၣ်, နလုၢ်ဒိၣ်ပှ့ၤဒိၣ်ထဲသိးဒီးပဝဲအဂၤတကလးညါန့ၣ်လီၤ. နမ့ၢ်အိၣ်လၢဝ့ၢ်ပူၤဖဲအံၤဒီးဆှၢလီၤန့ၢ်ပှၤတၢ်မၤစၢၤန့ၣ် ဂ့ၤဒိၣ်ဒၣ်တၢ်တက့ၢ်လီၤ.”
4 စီၤပၤစံးဆၢဝဲဒၣ်, “တၢ်တမံၤလၢ်လၢ်လၢသုဆိကမိၣ်လၢမ့ၢ် တၢ်အဂ့ၤကတၢၢ်န့ၣ်ယကမၤအီၤလီၤ.” အန့ၣ်ဝံၤဒီး, အဝဲဆၢထၢၣ်ဖဲတြဲၤကပၤဖဲအဝဲအပှၤတဖၣ်ဟးထီၣ် ဝဲဒ်ပှၤတကထိမ့ၢ်ဂ့ၤ, ပှၤတကယၤမ့ၢ်ဂ့ၤအကရူၢ်အသိး, တဖုဘၣ်တဖုအခါန့ၣ်လီၤ.
5 အဝဲဟ့ၣ်လီၤအကလုၢ်ဆူစီၤယိၤအာ်, စီၤအဘံၡဲၤဒီးစီၤအံတဲၤ အအိၣ်စံးဝဲ, “လၢတၢ်ကွၢ်မဲာ်ယၤအဃိန့ၣ်မၤဆါပှၤသးစၢ်စီၤအးဘၡါလိၣ်တဂ့ၤ.” ဒီးကယဲၢ်သုးဖိသံၣ်ဖိခဲလၢာ်နၢ်ဟူတ့ၢ် စီၤဒၤဝံးအတၢ်ဟ့ၣ်လီၤအကလုၢ်န့ၣ်, ဆူအသုးခိၣ်သုးနၢ်တဖၣ်အအိၣ်န့ၣ်လီၤ.
6 စီၤဒၤဝံးအသုးမုၢ်ဟးထီၣ်ဝဲဆူတၢ်ပျီပူၤဒီးဒုးပှၤအံၣ်စရ့လးဖိတဖၣ် လၢကီၢ်အ့ဖရဲၣ်အသ့ၣ်ပှၢ်ပူၤန့ၣ်လီၤ.
7 ပှၤအံၣ်စရ့လးဖိတဖၣ်ဘၣ်တၢ်မၤနၢၤကွံာ်အီၤလၢစီၤဒၤဝံးအပှၤတဖၣ်န့ၣ်လီၤ. တၢ်န့ၣ်မ့ၢ်တ့ၢ်ဝဲတၢ်ဃၣ်ကွံာ်လၢအလီၤပျံၤလီၤဖုးတမံၤအိၣ် ဒီးပှၤအဂၤခံကလးဘၣ်တၢ်မၤသံကွံာ်အီၤလၢနံၤအဝဲန့ၣ်လီၤ.
8 တၢ်ဒုးလိာ်ယၤလိာ်အသးရၤလီၤအသးလၢကီၢ်ဒီဘ့ၣ်ညါအပူၤဒီး ပှၤသံလၢသ့ၣ်ပှၢ်အပူၤအါန့ၢ်ဒံးပှၤဘၣ်တၢ်မၤသံအီၤလၢတၢ်ဒုးပျီအပူၤတက့ၢ်န့ၣ်လီၤ.
9 သတူၢ်ကလာ်, စီၤအးဘၡါလိၣ်ဘၣ်သဂၢၢ်လိာ်သးဒီးစီၤဒၤဝံးအပှၤတနီၤန့ၣ်လီၤ. စီၤအးဘၡါလိၣ်ဒိးဝဲကသ့ၣ်လၤတဒု, ဒီးဖဲကသ့ၣ်န့ၣ်လဲၤတၢ်လၢသ့ၣ်သ့ထိးဖးဒိၣ်တထံးအဖီလာ်အခါန့ၣ်, စီၤအးဘၡါလိၣ်အခိၣ်သူဘၣ်ဘျးဒီးသ့ၣ်ဒ့တဖၣ်လီၤ. ကသ့ၣ်လၤဃ့ၢ်ဆူညါဒီးစီၤအးဘၡါလိၣ်အိၣ်လီၤစဲၤတ့ၢ်လၢတၢ်ဖးဖီန့ၣ်လီၤ.
10 စီၤဒၤဝံးအပှၤအကျါတဂၤထံၣ်အီၤဒီးက့ၤတဲဘၣ်တၢ်ဂ့ၢ်ဆူစီၤ ယိၤအာ်ဒ်အံၤ, “တၢ်ဒိၣ်ဧၢ, ယထံၣ်ဘၢစီၤအးဘၡါလိၣ်လီၤစဲၤလၢသ့ၣ်သ့ထိးဖၣ် တထံးအခံန့ၣ်လီၤ.”
11 စီၤယိၤအာ်စံးဆၢဝဲဒၣ်, “နမ့ၢ်ထံၣ်အီၤဒီး, ဘၣ်မနုၤလၢနတမၤသံကွံာ်အီၤဖဲန့ၣ်တဘျီဃီလဲၣ်. ယနီၢ်ကစၢ်ဒၣ်ယဲယကဟ့ၣ်နၤစ့အဘ့ၣ်တဆံဃုာ်ဒီးယီၢ်တကိးတခါန့ၣ်လီၤ.”
12 ဘၣ်ဆၣ်ဒီးပှၤတဂၤန့ၣ်စံးဆၢအီၤ, “နမ့ၢ်ဟ့ၣ်ယၤစ့အဘ့ၣ်တကထိဒၣ်လဲာ်န့ၣ်ယတယူာ်ထီၣ်ဘၣ်ယစုထီ ဒါစီၤပၤအဖိခွါဘၣ်. ပဝဲကိးဂၤဒဲးပနၢ်ဟူဘၣ်စီၤပၤဟ့ၣ်လီၤအကလုၢ်ဆူနၤဒီးစီၤ အဘံၡဲၤဒီးစီၤအံတဲၤစံးဝဲလၢ, လၢတၢ်ကွၢ်မဲာ်ယၤအဃိန့ၣ် မၤဆါပှၤသးစၢ်စီၤအးဘၡါလိၣ်တဂ့ၤ, န့ၣ်လီၤ.
13 ဘၣ်ဆၣ်ဒီးယမ့ၢ်တစူၢ်ဘၣ်စီၤပၤအကလုၢ်ဒီးမၤသံကွံာ်စီၤအးဘၡါလိၣ်န့ၣ်, စီၤပၤကနၢ်ဟူဘၣ်တၢ်ဂ့ၢ်န့ၣ်, ဒီးတမ့ၢ်နကဒီဒၣ်အိၣ်ပှိၤယၤဘၣ်. အဂ့ၢ်ဒ်အံၤ, အဝဲညီနူၢ်နၢ်ဟူတၢ်ကိးမံၤဒဲးန့ၣ်လီၤ.”
14 စီၤယိၤအာ်စံးဝဲဒၣ်, “ယတမၤလၢာ်အါထီၣ်ယတၢ်ဆၢကတီၢ်ဒီးနၤနီတစဲးလၢၤဘၣ်.” အဝဲစိာ်ထီၣ်ဘီသၢဘ့ၣ်ဒီးဆဲးနုာ်အီၤဆူစီၤအးဘၡါလိၣ်အသးနါပှၢ်အပူၤ, ဖဲအဝဲမူဒံးဝဲအဖၢမုၢ်ဒီးအိၣ်လီၤစဲၤဝဲလၢသ့ၣ်သ့ထိးဖၣ် အလိၤအခါန့ၣ်လီၤ.
15 အန့ၣ်တစု, စီၤယိၤအာ်အပှၤသုးဖိအဂၤတဆံ ဟဲကဝီၤတံာ်စီၤအးဘၡါလိၣ်ဒီၤမၤသံကွံာ်အီၤန့ၣ်လီၤ.
16 စီၤယိၤအာ်မၢပှၤအူသီၣ်ထီၣ်ကွဲၤလၢတၢ်ကဆိကတီၢ်တၢ်ဒုးတၢ်ယၤအဂီၢ်, ဒီးအဝဲအပှၤသုးဖိတဖၣ်ဟဲက့ၤကဒါက့ၤလၢတၢ်လူၤဒုးပှၤအံၣ်စရ့လးဖိတဖၣ်န့ၣ်လီၤ.
17 အဝဲသ့ၣ်ဟံးထီၣ်စီၤအးဘၡါလိၣ်အစိၣ်ဒီးကွံာ်လီၤဝဲဆူ တၢ်ပူၤယိာ်တခါအပူၤလၢပှၢ်ပူၤ, ဒီးကးဘၢအီၤလၢလၢၢ်ဖးဒိၣ် ပူၣ်ထီၣ်အသးတဖၣ်န့ၣ်လီၤ. ကယဲၢ်ပှၤအံၣ်စရ့လးဖိတဖၣ်ထွးထီၣ်ဃ့ၢ်ကွံာ်ခဲလၢာ်, တဂၤက့ၤဆူအဟံၣ်ဒၣ်ဝဲစုာ်စုာ်န့ၣ်လီၤ.
18 ဖဲအဝဲအိၣ်မူဒံးအခါန့ၣ်စီၤအးဘၡါလိၣ်သူၣ်ထီၣ်တ့ၢ် တၢ်သ့ၣ်နီၣ်အလၢၢ်ထူၣ်တထူၣ်လၢအဂီၢ်ဒၣ်ဝဲလၢစီၤပၤအတၢ်တြီၤပူၤန့ၣ် လီၤ. အဂ့ၢ်ဒ်အံၤ, အဝဲတအိၣ်ဒီးအဖိခွါနီတဂၤလၢကစိာ်မူအဝဲအမံၤ အဂီၢ်န့ၣ်ဘၣ်. လၢတၢ်န့ၣ်အဃိအဝဲယုၢ်န့ၢ်လၢၢ်ထူၣ်န့ၣ်အမံၤဒ်အဝဲအမံၤဒၣ်ဝဲ ဒီးတုၤမုၢ်မဆါတနံၤအံၤန့ၣ်, လၢၢ်ထူၣ်န့ၣ်ဘၣ်တၢ်သ့ၣ်ညါအီၤဒ်တၢ်သ့ၣ်နီၣ်စီၤအးဘၡါလိၣ် အလၢၢ်ထူၣ်န့ၣ်လီၤ.
19 အန့ၣ်ဝံၤဒီး, စီၤစၤဒိးအဖိခွါစီၤအဃံမ့ၤဧးစံးဘၣ်စီၤယိၤအာ်ဒ်အံၤ, “ပျဲယဃ့ၢ်ဆူစီၤပၤအအိၣ်ဃုာ်ဒီးတၢ်ကစီၣ်အဂ့ၤလၢ, ယွၤအုၣ်က့ၤခီၣ်က့ၤလံအီၤလၢအဒုၣ်အဒါတဖၣ်အစုပူၤလံန့ၣ်တ က့ၢ်.”
20 စီၤယိၤအာ်စံးဝဲဒၣ်, “လဲၤတဂ့ၤ. တနံၤအံၤနတဘၣ်စိာ်တၢ်ကစီၣ်အဂ့ၤနီတမံၤဘၣ်. လၢမုၢ်နံၤအဂၤတနီၤနီၤန့ၣ်နမၤအီၤကသ့, ဘၣ်ဆၣ်ဒီးတမ့ၢ်ဘၣ်တနံၤအံၤဘၣ်. အဂ့ၢ်ဒ်အံၤ, စီၤပၤအဖိခွါန့ၣ်သံလံ.
21 အန့ၣ်ဝံၤဒီးအဝဲတဲဘၣ်အကုၢ်, ပှၤကူၤၡးဖိတဂၤ, “လဲၤဒီးတဲဘၣ်စီၤပၤလၢတၢ်လၢနထံၣ်တ့ၢ်နဲတက့ၢ်.” ကုၢ်န့ၣ်သကူးလီၤအသးဒီးဃ့ၢ်ထီၣ်ဝဲဒၣ်လီၤ.
22 စီၤအဃံမ့ၤဧးဃ့ဆူၣ်ဝဲသပှၢ်ပှၢ်စံးဝဲ, “တၢ်ကမၤအသးဒ်လဲၣ်ဂ့ၤဒ်လဲၣ်ဂ့ၤန့ၣ်ယတကိၢ်ဘၣ်. ဝံသးစူၤပျဲစ့ၢ်ကီးယလဲၤစိာ် တၢ်ကစီၣ်န့ၣ်တက့ၢ်.”
စီၤယိၤအာ်သံကွၢ်အီၤ, “ယဖိခွါဧၢ, ဘၣ်မနုၤအဃိနဘၣ်အဲၣ်ဒိးမၤတၢ်န့ၣ်လဲၣ်. နတမၤန့ၢ်တၢ်ဘျုးနီတမံၤလၢတၢ်န့ၣ်အဃိဘၣ်.”
23 စီၤအဃံမ့ၤဧးစံးကဒီးဝဲ, “ကွၢ်ဖဲတၢ်ကမၤအသးတက့ၢ်. ယအဲၣ်ဒိးလဲၤလီၤ.”
စီၤယိၤအာ်စံးဘၣ်အီၤ, “မ့မ့ၢ်ဒ်န့ၣ်ဒီးလဲၤတက့ၢ်.” လၢတၢ်န့ၣ်အဃိ, စီၤအဃံၤမ့ၤဧးဃ့ၢ်လီၤဝဲလၢကျဲလဲၤခီဖျိထံကျိယၢ်ဒ့ၣ် အတၢ်တြီၤပူၤဒီးတယံာ်ဘၣ်န့ၣ်အဝဲလဲၤပျံကွံာ်ကုၢ်တဂၤန့ၣ်လီၤ.
24 စီၤဒၤဝံးဆ့ၣ်နီၤဝဲဖဲတၢ်လီၢ်လီၤပျီအိၣ်ဝဲဖဲဝ့ၢ်အတြဲၤ လၢတၢ်အိပူၤဒီးတြဲၤလၢတၢ်ချၢအဘၢၣ်စၢၤန့ၣ်လီၤ. ပှၤခိးကွၢ်တၢ်ဖိတဂၤလဲၤထီၣ်ဆူဝ့ၢ်ခိၣ်ဒူ, ဒီးဆၢထၢၣ်ဝဲဖဲတိာ်လၢကျဲစၢၤအဖီခိၣ်အခိၣ်ဒုးလိၤန့ၣ်လီၤ. အဝဲကွၢ်စိဃီၤဆူတၢ်ချၢဒီးထံၣ်ဘၣ်ဝဲပှၤတဂၤဃ့ၢ်ဝဲထဲတဂၤ ဧိၤန့ၣ်လီၤ.
25 အဝဲကိးလီၤတၢ်ဒီးတဲဘၣ်စီၤပၤ, ဒီးစီၤပၤစံးဒၣ်, “အဝဲမ့ၢ်ဟဲထဲတဂၤဧိၤဒီး, အဝဲမ့ၢ်ပှၤဟဲစိာ်တၢ်ကစီၣ်အဂ့ၤလီၤ.” ပှၤဃ့ၢ်တၢ်ဖိတဂၤန့ၣ်ဟဲဘူးထီၣ်ဘူးထီၣ်ဝဲဒၣ်လီၤ.
26 အန့ၣ်ဝံၤဒီး, ပှၤခိးကွၢ်တၢ်ဖိထံၣ်ကဒီး ပှၤအဂၤတဂၤဟဲဃ့ၢ်ကဒီးထဲတဂၤဧိၤန့ၣ်လီၤ. ဒီးအဝဲကိးတဲလီၤတၢ်ဆူပှၤပၢၤတြဲၤ အအိၣ်စံးဝဲ, “ကွၢ်ကွၢ်, ပှၤဟဲဃ့ၢ်ကဒီးလၢန့ၣ်အဂၤတဂၤလီၤ.”
စီၤပၤစံးဆၢဝဲဒၣ်, “ပှၤတဂၤအံၤစ့ၢ်ကီးဟဲစိာ်တၢ်ကစီၣ်အဂ့ၤလီၤ.”
27 ပှၤခိးကွၢ်တၢ်ဖိစံးဝဲဒၣ်, “ယထံၣ်ဘၣ်လၢပှၤအခီၣ်ထံးတဂၤ ဃ့ၢ်ဝဲလီၤဂာ်ဒ်စီၤအဃံမ့ၤဧးန့ၣ်လီၤ.” စီၤပၤစံးဝဲဒၣ်, “အဝဲမ့ၢ်ဒၣ်ပှၤအဂ့ၤတဂၤလီၤ. ဒီးအဝဲဟဲစိာ်တၢ်ကစီၣ်လၢအဂ့ၤန့ၣ်လီၤ.”
28 စီၤအဃံမ့ၤဧးကိးထီၣ်တၢ်ဆၢဂ့ၤဆၢဝါဆူစီၤပၤအအိၣ်, စုးလီၤအသးလၢဟီၣ်ခိၣ်လိၤလၢစီၤပၤအမဲာ်ညါဒီးစံးဝဲဒၣ်, “စံးထီၣ်ပတြၢၤယွၤ, နကစၢ်ယွလၢအဟ့ၣ်လီၤနၤတၢ်မၤနၢၤလၢ ပှၤတဖၣ်လၢအပူထီၣ်ထီဒါနဲဒၣ်တၢ်ဒိၣ်ကစၢ်စီၤပၤန့ၣ်တက့ၢ်.”
29 စီၤပၤသံကွၢ်ဝဲဒၣ်, “မ့ၢ်ပှၤသးစၢ်စီၤအးဘၡါလိၣ်အိၣ်မုာ်ဆိးပၢၤကစီဒါဧါ”
စီၤအဃံမ့ၤဧးစံးဆၢဝဲဒၣ်, “တၢ်ဒိၣ်ဧၢ, ဖဲနသုးခိၣ်စီၤယိၤအာ်ဆှၢလီၤယၤန့ၣ်, ယထံၣ်တၢ်မၤအသးရူၢ်ရူၢ်တၢတၢဖးဒိၣ်တမံၤ, ဘၣ်ဆၣ်ဒီးတၢ်န့ၣ်မ့ၢ်မနုၤလဲၣ်န့ၣ်ယတဲတဘၣ်ဘၣ်.”
30 စီၤပၤစံးဘၣ်အီၤ, “လဲၤဆၢထၢၣ်ဖဲန့ၣ်တက့ၢ်.” ဒီးအဝဲလဲၤဖဲန့ၣ်ဒီးဆၢထၢၣ်ဝဲလီၤ.
31 အန့ၣ်တစု, ပှၤကူၤၡးကုၢ်ဖိတဂၤဟဲတုၤဝဲဒီးစံးဘၣ်စီၤပၤ, “ယအိၣ်ဒီးတၢ်ကစီၣ်အဂ့ၤလၢနဲဒၣ်တၢ်ဒိၣ်ကစၢ်စီၤပၤအဂီၢ်န့ၣ်လီၤ. တနံၤအံၤယွၤဟ့ၣ်လီၤလံနၤလၢတၢ်မၤနၢၤကွံာ်ကယဲၢ်ပှၤတဖၣ်လၢ ပူထီၣ်ထီဒါနၤခဲလၢာ်န့ၣ်လံ.”
32 စီၤပၤသံကွၢ်ဝဲ, “မ့ၢ်ပှၤသးစၢ်စီၤအးဘၡါလိၣ်အိၣ်မုာ်ဆိးပၢၤစ့ၢ်ကီးဧါ.” ကုၢ်တဂၤန့ၣ်စံးဆၢဝဲဒၣ်, “တၢ်ဒိၣ်ဧၢ, ယဆၢလၢတၢ်လၢအမၤတ့ၢ်အသးဒီးအီၤန့ၣ်ကမၤအသး ဒီးနဒုၣ်နဒါခဲလၢာ်, ဒီးကမၤအသးဒီးကယဲၢ်ပှၤလၢအပူထီၣ်ထီဒါခဲလၢာ်န့ၣ်လီၤ.”
33 တၢ်သးအုးလုၣ်ဘၢကွံာ်စီၤပၤန့ၣ်လီၤ. အဝဲလဲၤထီၣ်ဆူဒၢးလၢကျဲစၢၤအတြဲၤအဖီခိၣ်ဒီးဟီၣ်ဝဲလီၤ. ဖဲအလဲၤထီၣ်အဖၢမုၢ်န့ၣ်ဟီၣ်တၢ်ယၢၤတၢ်စံးဝဲ, “အိယဖိခွါဧၢ, ယဖိခွါစီၤအးဘၡါလိၣ်ဧၢ. စီၤအးဘၡါလိၣ်, ယဖိခွါဧၢ. ဘၣ်မနုၤယတသံတ့ၢ်လၢနလီၢ်လဲၣ် ယဖိခွါဧၢ, စီၤအးဘၡါလိၣ်, ယဖိခွါဧၢ.”