19
1 စီၤယိၤအာ်ဘၣ်တၢ်တဲအီၤလၢ စီၤပၤစီၤဒၤဝံးဟီၣ်ဝဲဒီးသူၣ်အုးသးအုးလၢစီၤအးဘၡါလိၣ်အဃိန့ၣ်လီၤ.
2 မၤသးဒ်န့ၣ်ဒီးတၢ်မၤနၢၤအတၢ်သးခုန့ၣ် ပျိာ်လဲလိာ်အသးဆူတၢ်သးအုး, လၢကယဲၢ်စီၤဒၤဝံးအသုးဖိသံၣ်ဖိတဖၣ်အဂီၢ်လၢမုၢ်တနံၤ န့ၣ်လီၤ. အဂ့ၢ်ဒ်အံၤ, အဝဲသ့ၣ်နၢ်ဟူဘၣ်လၢစီၤပၤအသူၣ်အုးသးအုးလၢအဖိခွါအဃိလီၤ.
3 အဝဲသ့ၣ်က့ၤကဒါက့ၤဆူဝ့ၢ်ပူၤကစုဒု, ဒ်ပှၤသုးဖိတဖၣ်လၢ အဘၣ်ထွးထီၣ်ဃ့ၢ်လၢတၢ်ဒုးတၢ်ယၤအပူၤဒီးအမဲာ်ဆှးအသိးန့ၣ်လီၤ.
4 စီၤပၤမၤဘၢအမဲာ်ဒီးဟီၣ်ဝဲလၢအကလုၢ်ဖးဒိၣ်စံးဝဲ, “အိယဖိခွါဧၢ, ယဖိခွါစီၤအးဘၡါလိၣ်ဧၢ. စီၤအးဘၡါလိၣ်ယဖိခွါဧၢ.”
5 စီၤယိၤအာ်လဲၤဝဲဆူစီၤပၤအဟံၣ်ဒီးစံးဘၣ်အီၤ, “တနံၤအံၤနမၤမဲာ်ဆှးကွံာ်နပှၤတဖၣ်, ပှၤတဖၣ်လၢအမၤပူၤဖျဲးနသးသမူ, ဒီးနဖိခွါတဖၣ်ဒီးဖိမုၣ်တဖၣ်အသးသမူ ဒီးနမါတဖၣ်ဒီးနသံၣ်မါတဖၣ်အသးသမူန့ၣ်လီၤ.
6 နထီဒါပှၤတဖၣ်လၢအအဲၣ်နၤ ဒီးနမၤစၢၤဆီၣ်ထွဲပှၤတဖၣ်လၢအသးဟ့နၤန့ၣ်လီၤ. နပာ်ဖျါထီၣ်လီၤတံၢ်လီၤဆဲးလၢနသုးခိၣ်သုးနၢ်တဖၣ်ဒီးနပှၤတဖၣ် တမ့ၢ်တၢ်နီတမံၤလၢနဂီၢ်ဘၣ်န့ၣ်လီၤ. ယနၢ်ပၢၢ်သ့လၢတနံၤအံၤစီၤအးဘၡါလိၣ် မ့ၢ်အိၣ်မူဒီးပဝဲခဲလၢာ်မ့ၢ်သံန့ၣ်နကသးခုနဲဒိၣ်မးလီၤ.
7 ခဲကနံၣ်အံၤလဲၤဒီးမၤခူတလ့ၢ်ထီၣ်ကဒါက့ၤနပှၤတဖၣ်အသးတက့ၢ်. ယဆိၣ်တၢ်လၢယွၤအမံၤအပူၤလၢနမ့ၢ်တမၤဒ်န့ၣ်ဘၣ်ဒီး, ခဲမုၢ်ဆ့ၣ်ဂီၤခီန့ၣ်တမ့ၢ်ပှၤကအိၣ်ဒီးနၤနီတဂၤလၢၤဘၣ်. တၢ်န့ၣ်ကမ့ၢ်တၢ်တတၢးတနါအနးကတၢၢ်လၢနတူၢ်ဘၣ်အီၤလၢနသးသမူ တစိၤအံၤအပူၤန့ၣ်လီၤ.”
8 တုၤနုၤတစု, စီၤပၤဂဲၤဆၢထၢၣ်ဒီးလဲၤဆ့ၣ်နီၤဝဲဘူးဒီး ဝ့ၢ်အတြဲၤန့ၣ်လီၤ. အပှၤတဖၣ်နၢ်ဟူဘၣ်လၢအဝဲအိၣ်ဖဲန့ၣ်, သတးဒီးအဝဲသ့ၣ်ခဲလၢာ်လဲၤပာ်ဖှိၣ်ထီၣ်အသးဝးတရံးအီၤန့ၣ်လီၤ.
အကတီၢ်ဖဲန့ၣ်, ကယဲၢ်ပှၤအံၣ်စရ့လးဖိခဲလၢာ် ဃ့ၢ်ကွံာ်ဝဲတဂၤဆူအဟံၣ်ဒၣ်ဝဲစုာ်စုာ်န့ၣ်လီၤ.
9 လၢထံကီၢ်ဒီတကီၢ်ညါန့ၣ် အဝဲသ့ၣ်ကဒဲကဒဲစးထီၣ်အ့ၣ်လိာ်အသးန့ၣ်လီၤ. အဝဲသ့ၣ်စံးလိာ်အသးတဂၤဒီးတဂၤဒ်အံၤ, “စီၤပၤဒၤဝံးမၤပူၤဖျဲးပှၤလၢပဒုၣ်ပဒါတဖၣ်အစုပူၤန့ၣ်လီၤ. အဝဲမၤပူၤဖျဲးတ့ၢ်ပှၤလၢပှၤဖလ့ၡသးဖိတဖၣ်အစုပူၤလီၤ. မ့မ့ၢ်ခဲကနံၣ်အံၤအဝဲထွးထီၣ်ဃ့ၢ်ကွံာ်လၢစီၤအးဘၡါလိၣ် အမဲာ်ညါဒီးဟးထီၣ်ကွံာ်လၢထံကီၢ်အပူၤလံ.
10 ပဖှူတ့ၢ်စီၤအးဘၡါလိၣ်ဒ်ပစီၤပၤတဂၤအသိး, ဘၣ်ဆၣ်ဒီးအဝဲဘၣ်တၢ်မၤသံကွံာ်အီၤလၢတၢ်ဒုးတၢ်ယၤအပူၤလံ. လၢတၢ်န့ၣ်အဃိဘၣ်မနုၤလၢပှၤတဂၤဂၤတကျဲးစၢးလဲၤကိးကဒါက့ၤ စီၤပၤဒၤဝံးန့ၣ်လဲၣ်.”
11 တၢ်ကစီၣ်လၢပှၤအံၣ်စရ့လးဖိတဖၣ်စံးဝဲန့ၣ် ဟူထီၣ်ဝဲဆူစီၤဒၤဝံးအအိၣ်လီၤ. မၤသးဒ်န့ၣ်ဒီး, အဝဲဒၣ်မၢလီၤပှၤလုၢ်တၢ်အခိၣ်စီၤစၤဒိးဒီး စီၤအ့ဘယၤသၢ်လၢကသံကွၢ်ပှၤယူဒၤဖိ အခိၣ်အနၢ်တဖၣ်ဒ်အံၤ, “ဘၣ်မနုၤအဃိသုကဘၣ်မ့ၢ်ပှၤလၢခံကတၢၢ်, လၢကမၤစၢၤဆှၢကဒါက့ၤစီၤပၤဆူအနီပူၤန့ၣ်လဲၣ်.
12 သုမ့ၢ်ယဘူးယတံၢ်တဖၣ်, ယသွံၣ်ယထံယဖံးယညၣ်ဒၣ်ယဲ န့ၣ်လီၤ. ဘၣ်မနုၤသုကဘၣ်မ့ၢ်ပှၤလၢခံကတၢၢ်လၢကကိးကဒါက့ၤယၤန့ၣ်လဲၣ်.”
13 စီၤဒၤဝံးတဲဘၣ်စ့ၢ်ကီးအဝဲသ့ၣ်လၢကစံးဘၣ်စီၤဧမါစၤဒ် အံၤ, “နမ့ၢ်ယဘူးယတံၢ်လီၤ. စးထီၣ်ခဲအံၤဒီးဆူညါန့ၣ်ယပာ်ထီၣ် နၤဒ်သုးခိၣ်ကျၢၢ်လၢသုးမုၢ်အဖီခိၣ်လၢစီၤယိၤအာ်အလီၢ်လီၤ. ယမ့ၢ်တမၤဒ်န့ၣ်ဘၣ်ဒီး, မ်ကစၢ်ယွၤမၤသံတက့ၢ်.”
14 စီၤဒၤဝံးအတၢ်ကတိၤတဖၣ်မၤန့ၢ်ကယဲၢ်ပှၤလၢကီၢ်ယူဒၤခဲလၢာ် အတၢ်သူၣ်တီသးရၤလၢာ်လၢာ်ဆ့ဆ့ဒီးအဝဲသ့ၣ်ဆှၢလီၤတၢ်ကစီၣ်လၢ, စီၤဒၤဝံးကဟဲက့ၤကဒါက့ၤဃုာ်ဒီးအပဒိၣ်ပပှၢ်ခဲလၢာ်န့ၣ်လီၤ.
15 လၢအတၢ်က့ၤကဒါက့ၤလၢကျဲန့ၣ်စီၤပၤဘၣ်တၢ်ဟဲသဂၢၢ်အီၤဖဲထံကျိယၢ်ဒ့ၣ်, လၢပှၤကီၢ်ယူဒၤဖိတဖၣ်လၢအဟဲဝဲလၢဝ့ၢ်ကံးလကၤလး, ဒ်သိးကကွၢ်ထွဲဒီးဆှၢအီၤလၢတၢ်ခီထံကျိအဂီၢ်န့ၣ်လီၤ.
16 တကတီၢ်ဃီန့ၣ်, ပှၤဘံၣ်ယၤမံၣ်အဒူၣ်ဖိစီၤက့ရၤအဖိခွါစီၤၡံမံၤ လၢဝ့ၢ်ဘၤဃူရံၣ်ဟဲချ့ချ့ဆူထံကျိယၢ်ဒ့ၣ်ဒ်သိးကသဂၢၢ် စီၤပၤဒၤဝံးအဂီၢ်န့ၣ်လီၤ.
17 ပှၤအဂၤတကထိလၢပှၤဘံၣ်ယၤမံၣ်အဒူၣ်ဟဲဃုာ်ဒီးအီၤစ့ၢ်ကီးလီၤ. ဒီးစီၤစီလူးအပှၤဟံၣ်ဖိဃီဖိအခ့အပှၤစီၤစံဘၤဟဲဃုာ်စ့ၢ်ကီး ဝဲဒီးအဖိခွါတဆံယဲၢ်ဂၤဒီးအခ့အပှၤအဂၤခံဆံ, ဒီးအဝဲသ့ၣ်ဟဲတုၤဝဲဖဲထံကျိယၢ်ဒ့ၣ်, တချုးလၢစီၤပၤဟဲတုၤဒံးဘၣ်န့ၣ်လီၤ.
18 အဝဲသ့ၣ်ခီဂာ်ဃီၤထံကျိယၢ်ဒ့ၣ်ဒ်သိးကကွၢ်ထွဲဒီးဆှၢဃီၤ စီၤပၤဒီးအပှၤတဖုန့ၣ်, ဒီးကမၤန့ၢ်ကယဲၢ်တၢ်တမံၤလၢ်လၢ်လၢစီၤပၤလိၣ်ဘၣ်ဝဲအဂီၢ်န့ၣ်လီၤ.
ဖဲစီၤပၤကတဲာ်ကတီၤအသးလၢကခီဂာ်ထံကျိန့ၣ်, စီၤၡံမံၤထိၣ်လီၤပှီၤအသးလၢအမဲာ်ညါ,
19 ဒီးစံးဝဲဒၣ်, “နဲဒၣ်တၢ်ဒိၣ်ကစၢ်စီၤပၤဧၢ, ဝံသးစူၤသးပ့ၤနီၣ်ကွံာ်တၢ်ကမၣ်လၢယမၤတ့ၢ်အီၤဖဲမုၢ်တနံၤ လၢနဟးထီၣ်ကွံာ်လၢဝ့ၢ်ယရူၤၡလ့ၣ်န့ၣ်တက့ၢ်. စၢဃာ်ယတၢ်ကမၣ်မ့ၢ်ဂ့ၤ, ဆိကမိၣ်လၢၤလၢအဂ့ၢ်မ့ၢ်ဂ့ၤန့ၣ်, တဂ့ၤ.
20 တၢ်ဒိၣ်ဧၢ, ယသ့ၣ်ညါလၢယမၤတ့ၢ်တၢ်ဒဲးဘးဒီးလၢတၢ်အံၤအဃိ, လၢပှၤကလံၤစိးအဒူၣ်ဖိတဖၣ်အကျါ, ယမ့ၢ်ပှၤအဆိကတၢၢ်တဂၤလၢအဟဲ ဒီးသဂၢၢ်နဲဒၣ်တၢ်ဒိၣ်ကစၢ်စီၤပၤလၢတနံၤအံၤန့ၣ်လီၤ.”
21 နီၢ်စရူယၤအဖိခွါစီၤအဘံၡဲကတိၤထီၣ်တၢ်ဒီးစံးဝဲဒၣ်, “စီၤၡံမံၤကြၢးဘၣ်တၢ်မၤသံကွံာ်အီၤလီၤ. အဂ့ၢ်ဒ်အံၤ, အဝဲဆိၣ်အၢပှၤတဂၤလၢယွၤဃုထၢထီၣ်တ့ၢ်အီၤဒ်စီၤပၤတဂၤအသိးအဃိန့ၣ်လီၤ.”
22 ဘၣ်ဆၣ်ဒီး, စီၤဒၤဝံးစံးဘၣ်စီၤအဘံၡဲၤဒီးအဒီပုၢ်ဝဲၢ်ခွါစီၤယိၤအာ်ဒ်အံၤ, “မတၤတဂၤဃ့သုတၢ်ဟ့ၣ်ကူၣ်န့ၣ်လဲၣ်. မ့ၢ်သုအဲၣ်ဒိးဟ့ၣ်ယၤတၢ်ကီတၢ်ခဲဧါ. ခဲအံၤယမ့ၢ်ပှၤတဂၤလၢ အကဲကီၢ်အံၣ်စရ့လးအစီၤပၤလီၤ. ဒီးတနံၤအံၤပှၤတဘၣ်မၤသံပှၤအံၣ်စရ့လးဖိနီတဂၤဘၣ်.”
23 ဒီးအဝဲစံးဘၣ်စီၤၡံမံၤ, “ယဆိၣ်တၢ်ဒီးနၤလၢနတဘၣ်တၢ်မၤသံ ဘၣ်နၤဘၣ်.”
24 ဒီးစီၤစီလူးအလံၤခွါစီၤမဖံဘိၤၡ့း ဟဲလီၤဝဲဒ်သိးကသဂၢၢ်စီၤပၤန့ၣ်လီၤ. အဝဲတသ့ဘၣ်အခီၣ်, တတံာ်ဃူဘၣ်အခၣ်ဆူၣ်ဒီးတဆှူၣ်ဘၣ်အကူအသိးတဖၣ် စးထီၣ်လၢစီၤပၤဟးထီၣ်လၢဝ့ၢ်ယရူၤၡလ့ၣ်အမုၢ်တနံၤန့ၣ် တုၤအဟဲက့ၤတုၤအိၣ်ဒီးတၢ်မၤနၢၤတစုန့ၣ်လီၤ.
25 ဖဲစီၤမဖံဘိၤၡ့းဟဲဝဲလၢဝ့ၢ်ယရူၤၡလ့ၣ်ဒ်သိးအကသဂၢၢ်စီၤပၤန့ၣ်, စီၤပၤစံးဘၣ်အီၤ, “စီၤမဖံဘိၤၡ့းဧၢ, နတလဲၤတ့ၢ်တၢ်ဒီးယၤဘၣ်. ဘၣ်မနုၤအဃိလဲၣ်.”
26 အဝဲစံးဝဲဒၣ်, “နဲဒၣ်တၢ်ဒိၣ်ကစၢ်စီၤပၤဧၢ, ဒ်နသ့ၣ်ညါနဲအသိးယမ့ၢ်ပှၤလၢအခီၣ်ဟးဂီၤလီၤ. ယတဲဘၣ်တ့ၢ်ယခ့ယပှၤလၢကဂီၤကၢ်ထီၣ်န့ၢ်ယၤယကသ့ၣ်ယီၤ ဒ်သိးယလဲၤတၢ်ဒီးနၤကသ့အဂီၢ်လီၤ. ဘၣ်ဆၣ်ဒီးအဝဲဒၣ်လီန့ၢ်ယၤလီၤ.
27 အဝဲတဲတၢ်တတီတလိၤဘၣ်ဃးယဂ့ၢ်လၢနဲဒၣ်တၢ်ဒိၣ်ကစၢ်စီၤပၤအမဲာ်ညါလီၤ. ဘၣ်ဆၣ်ဒီးနလီၤဂာ်မးဒ်ကစၢ်ယွၤအကလူးအသိး, အဃိဒီးမၤနဲဒ်နဆိကမိၣ်ဘၣ်ဝဲတီဝဲန့ၣ်တက့ၢ်.
28 ကယဲၢ်ယပၢ်အဒူၣ်ဖိထၢဖိခဲလၢာ်ကြၢးလၢ အဘၣ်တၢ်မၤသံကွံာ်အီၤလၢနဲဒၣ်တၢ်ဒိၣ်ကစၢ်စီၤပၤဘၣ်ဆၣ်ဒီး, နဟ့ၣ်လံယၤတၢ်ခွဲးတၢ်ယာ်လၢယကအီၣ်တၢ်လၢနစီၢ်နီၤခိၣ်လီၤ. တကြၢးလၢၤလၢယကဃ့အါထီၣ်တၢ်ကွၢ်မဲာ်လၢနဲဒၣ် တၢ်ဒိၣ်ကစၢ်စီၤပၤအအိၣ်နီတမံၤဘၣ်.”
29 စီၤပၤစံးဆၢဝဲဒၣ်, “နဃ့အါထီၣ်တၢ်အလီၢ်တအိၣ်နီတမံၤလၢၤဘၣ်. ယပာ်လီၤတ့ၢ်ယသးလၢနၤဒီးစီၤစံဘၤကနီၤဖးဟံးန့ၢ်သကိးစီၤ စီလူးအတၢ်စုလီၢ်ခီၣ်ခိၣ်န့ၣ်လီၤ.”
30 စီၤမဖံဘိၤၡ့းစံးဆၢဝဲဒၣ်, “ပျဲစီၤစံဘၤဟံးန့ၢ်တၢ်န့ၣ်ခဲလၢာ်တက့ၢ်. လၢယဂီၢ်န့ၣ်နဲဒၣ်တၢ်ဒိၣ်ကစၢ်စီၤပၤဟဲက့ၤတုၤ ပူၤပူၤဖျဲးဖျဲးန့ၣ်လၢပှဲၤဝဲဒၣ်လံ.”
31 ပှၤကီၢ်ကံးလဧးဖိစီၤဘၢ်စံးလဲဟဲလီၤစ့ၢ်ကီးဝဲလၢ ဝ့ၢ်ရိကလံၣ်ဒ်သိးကကွၢ်ထွဲဒီးဆှၢစီၤပၤအတၢ်ခီဂာ်ထံကျိယၢ်ဒ့ၣ်န့ၣ်လီၤ.
32 စီၤဘၢ်စံးလဲမ့ၢ်ပှၤသးပှၢ်ဒိၣ်မးတဂၤလၢအသးအိၣ်လံအနံၣ်ဃိး ဆံလံန့ၣ်လီၤ. အဝဲထူးတီၤဒိၣ်မးဒီးမၤစၢၤဆီၣ်ထွဲတ့ၢ် စီၤပၤလၢတၢ်အီၣ်တၢ်အီ, ဖဲအဝဲအိၣ်ဆိးလၢဝ့ၢ်မၤဃန့ၤအခါန့ၣ်လီၤ.
33 စီၤပၤစံးဘၣ်အီၤ, “ဟဲဃုာ်ဒီးယၤဆူဝ့ၢ်ယရူၤၡလ့ၣ်ဒီး ယကအံးထွဲကွၢ်ထွဲက့ၤနၤန့ၣ်လီၤ.”
34 ဘၣ်ဆၣ်ဒီးစီၤဘၢ်စံးလဲစံးဆၢဝဲဒၣ်, “ယတအိၣ်မူဘၣ်ယံာ်ယံာ်လၢၤဘၣ်. ဘၣ်မနုၤအဃိယကဘၣ်လဲၤဃုာ်ဒီးနဲဒၣ်တၢ်ဒိၣ် ကစၢ်စီၤပၤဆူဝ့ၢ်ယရူၤၡလ့ၣ်န့ၣ်လဲၣ်.
35 ယသးအိၣ်လံအနံၣ်ဃိးဆံလံ, ဒီးတၢ်လၢကဟ့ၣ်ယၤတၢ်မုာ်တၢ်လၤ တအိၣ်လၢၤဘၣ်နီတမံၤဘၣ်. တၢ်လၢယအီၣ်ယအီအီၤန့ၣ်ယတသ့ၣ်ညါအတၢ်ဝံၣ်တၢ်ဘဲလၢၤဘၣ်. ဒီးပှၤသးဝံၣ်တၢ်ဖိတဖၣ်အကလုၢ်န့ၣ်ယနၢ်ဟူတသ့လၢၤဘၣ်. ယကကဲထီၣ်ဒၣ်ထဲတၢ်ဝံဃၢယိးဃၢလၢနဲဒၣ်တၢ်ဒိၣ်ကစၢ်စီၤပၤ အဂီၢ်န့ၣ်လီၤ.
36 တကြၢးလၢယဒိးန့ၢ်ဘၣ်တၢ်ဟ့ၣ်ဘျုးဒိၣ်ဒ်န့ၣ်အသိးတမံၤဘၣ်. လၢတၢ်န့ၣ်အဃိယကလဲၤဃုာ်တၢ်ဒီးနၤထဲ တစဲးဖိဧိၤပျံကွံာ်ထံကျိယၢ်ဒ့ၣ်အဘးခီန့ၣ်လီၤ.
37 အန့ၣ်ဝံၤဒီးပျဲယဟဲက့ၤကဒါက့ၤဆူဟံၣ်ဒီးသံဘူးဒီးယမိၢ်ယပၢ်တဖၣ် အသွၣ်ခိၣ်န့ၣ်တက့ၢ်. အဝဲအံၤမ့ၢ်ယဖိခွါစီၤကံမဟၣ်လၢအကမၤတၢ်ခ့တၢ်ပှၤအတၢ်မၤလၢနဂီၢ်န့ၣ်လီၤ. နဲဒၣ်တၢ်ဒိၣ်ကစၢ်စီၤပၤဧၢ, က့ၤကိးဃုာ်အီၤဒီးနၤ, ဒီးတၢ်လၢနဆိကမိၣ်မ့ၢ်တၢ်အဂ့ၤကတၢၢ်န့ၣ်မၤလၢအဝဲအဂီၢ်တက့ၢ်.”
38 စီၤပၤစံးဆၢဝဲဒၣ်, “ယကက့ၤကိးဃုာ်အီၤဒီးယၤဒီးမၤတၢ် လၢအဂီၢ်ဒ်တၢ်တမံၤလၢ်လၢ်လၢနသးလီၤအီၤအသိးန့ၣ်လီၤ. ဒီးယကမၤတၢ်လၢနဂီၢ်ဒ်တၢ်တမံၤလၢ်လၢ်လၢနဃ့နဲအသိးန့ၣ် လီၤ.”
39 အန့ၣ်ဝံၤဒီး, စီၤဒၤဝံးဒီးကယဲၢ်အပှၤခဲလၢာ်ခီဂာ် ထံကျိယၢ်ဒ့ၣ်န့ၣ်လီၤ. အဝဲနၢမူစီၤဘၢ်စံးလဲဒီးဟ့ၣ်လီၤအီၤလၢအတၢ်ဆိၣ်ဂ့ၤဆိၣ်ဝါ ဒီးစီၤဘၢ်စံးလဲက့ၤကဒါက့ၤဆူအဟံၣ်န့ၣ်လီၤ.
40 ဖဲစီၤပၤခီဂာ်တၢ်န့ၣ်, အဝဲဘၣ်တၢ်ကွၢ်ထွဲဒီးဆှၢအီၤလၢ ပှၤခဲလၢာ်လၢကီၢ်ယူဒၤဒီးပှၤလၢကီၢ်အံၣ်စရ့လးတနီၤ, ဒီးအဝဲလဲၤဆူညါဆူဝ့ၢ်ကံးလကၤလး, ဒီးစီၤကံမဟၣ်လဲၤဃုာ်ဒီးအီၤန့ၣ်လီၤ.
41 တုၤနုၤတစုပှၤကီၢ်အံၣ်စရ့လးဖိခဲလၢာ်လဲၤဆူစီၤပၤအအိၣ် ဒီးစံးဘၣ်အီၤ, “နဲဒၣ်တၢ်ဒိၣ်ကစၢ်စီၤပၤဧၢ, ဘၣ်မနုၤအဃိပဒီပုၢ်ဝဲၢ်ပှၤယူဒၤဖိတဖၣ်ဆိကမိၣ်ဝဲလၢ အဝဲသ့ၣ်အိၣ်ဒီးတၢ်ခွဲးတၢ်ယာ်လၢကကိးထီၣ်ကွံာ်နၤမ့ၢ်ဂ့ၤကွၢ်ထွဲဒီးဆှၢက့ၤနၤ, နဒူၣ်ဖိထၢဖိဒီးနပှၤတဖၣ်မ့ၢ်ဂ့ၤလၢတၢ်ခီဂာ်ထံကျိယၢ်ဒ့ၣ်န့ၣ်လဲၣ်.”
42 ပှၤကီၢ်ယူဒၤဖိတဖၣ်စံးဆၢဝဲဒၣ်, “ပမၤတ့ၢ်တၢ်အံၤ, မ့ၢ်လၢစီၤပၤမ့ၢ်ပှၤတဂၤလၢပဘူးပတံၢ်အကျါအဃိန့ၣ်လီၤ. မၤသးဒ်န့ၣ်ဒီး, ဘၣ်မနုၤလၢတၢ်အံၤမၤသူၣ်ဒိၣ်သးဖျိးသုန့ၣ် လဲၣ်. အဝဲတဟ့ၣ်ဘၣ်တၢ်အပှ့ၤလၢပတၢ်အီၣ်အဂီၢ်မ့ၢ်ဂ့ၤ, တဟ့ၣ်တ့ၢ်ပှၤတၢ်နီတမံၤမ့ၢ်ဂ့ၤ, န့ၣ်ဘၣ်.”
43 ပှၤကီၢ်အံၣ်စရ့လးဖိတဖၣ်စံးဆၢဝဲဒၣ်, “အဝဲမ့မ့ၢ်ဒၣ်လဲာ် ပှၤတဂၤလၢသုဘူးသုတံၢ်အကျါဘၣ်ဆၣ်, ပတဲသ့လၢပတၢ်ဘၣ်ဃးဒီးစီၤပၤန့ၣ်အိၣ်ဝဲဆံဆဲၣ်ဘျီ, ဒီးအါန့ၢ်ဒံးသုလၢသုဘၣ်ဃးဒီးအီၤတက့ၢ်လီၤ. ဘၣ်မနုၤအဃိသုကွၢ်တလီၤပှၤန့ၣ်လဲၣ်. ပမ့ၢ်တ့ၢ်ပှၤအဆိကတၢၢ်လၢအကတိၤတၢ်ဘၣ်ဃး တၢ်ကိးကဒါက့ၤစီၤပၤအဂ့ၢ်လီၤန့ၣ်, သးပ့ၤနီၣ်အီၤတဂ့ၤ.”
ဘၣ်ဆၣ်ဒီး, ပှၤလၢကီၢ်ယူဒၤတဖၣ်ကတိၤတၢ်ဆူၣ်ဆူၣ်လၢအတၢ်ဘၣ်ဃး ဒီးစီၤပၤအဂ့ၢ်န့ၣ်, အါန့ၢ်ဒိၣ်န့ၢ်ဒံးပှၤလၢကီၢ်အံၣ်စရ့လးတဖၣ်တက့ၢ်န့ၣ်လီၤ.