17
1 တၢ်န့ၣ်အလီၢ်ခံတယံာ်ဘၣ်န့ၣ်, စီၤအဃံသဖ့ၤလးစံးဘၣ်စီၤအး ဘၡါလိၣ်, “ပျဲယဃုထၢထီၣ်ပှၤအဂၤတကလးခံကထိ ဒီးတနၤအံၤယကဟးထီၣ်ဒီးလူၤထွဲစီၤဒၤဝံးအခံန့ၣ်လီၤ.
2 ယကလဲၤဒုးအီၤဖဲအဝဲလီၤဘှံးလီၤတီၤဒီးအသးဟးဂီၤအဖၢမုၢ်န့ၣ်လီၤ. အဝဲကပျံၤတၢ်ဖုးတၢ်ဒီးကယဲၢ်အပှၤခဲလၢာ်က ဃ့ၢ်ကွံာ်ဝဲဒၣ်န့ၣ်လီၤ. ယကမၤသံထဲစီၤပၤတဂၤဧိၤ,
3 ဒီးဟဲက့ၤကိးကဒါက့ၤအဝဲအပှၤခဲလၢာ်ဆူနအိၣ်, ဒ်တလးမူးပိာ်မုၣ်တဂၤဟဲက့ၤဆူအဝၤအအိၣ်အသိးန့ၣ်လီၤ. နတၢ်အဲၣ်ဒိးမၤသံပှၤထဲတဂၤဧိၤန့ၣ် ကမ့ၢ်တၢ်မၤပူၤဖျဲးပှၤဂီၢ်မုၢ်အိၣ်လီၤတဲာ်အဂၤတဖၣ်န့ၣ်လီၤ.”
4 တၢ်အံၤလီၤဂာ်ဒ်တၢ်ဟ့ၣ်ကူၣ်အဂ့ၤလၢစီၤအးဘၡါလိၣ် ဒီးကယဲၢ်ပှၤအံၣ်စရ့လးဖိအခိၣ်အနၢ်တဖၣ်အဂီၢ်န့ၣ်လီၤ.
5 စီၤအးဘၡါလိၣ်စံးဝဲဒၣ်, “ခဲအံၤကိးဃီၤစီၤဃူၤၡဲဒီး မ်ပကဒိကနၣ်သကိးတၢ်လၢအဝဲကတဲဝဲတက့ၢ်.”
6 ဖဲစီၤဃူၤၡဲဟဲတုၤဖဲန့ၣ်, စီၤအးဘၡါလိၣ်စံးဘၣ်အီၤ, “တၢ်အံၤမ့ၢ်တၢ်ဟ့ၣ်ကူၣ်လၢစီၤအဃံသဖ့ၤလးဟ့ၣ်ပှၤန့ၣ်လီၤ. ပကဘၣ်မၤထွဲအီၤဧါ. မ့တမ့ၢ်ဘၣ်အဃိန့ၣ်, နဲဒၣ်တဲဘၣ်ပှၤလၢတၢ်လၢပကဘၣ်မၤအီၤတက့ၢ်.”
7 စီၤဃူၤၡဲစံးဆၢဝဲဒၣ်, “တၢ်ဟ့ၣ်ကူၣ်လၢစီၤအဃံသဖ့ၤလး ဟ့ၣ်နၤတဘျီအံၤန့ၣ်တဂ့ၤဘၣ်.
8 နသ့ၣ်ညါလၢနပၢ်စီၤဒၤဝံးဒီးအပှၤတဖၣ်န့ၣ်, မ့ၢ်ပှၤဒုးတၢ်ဆူၣ်မးတဖၣ်ဒီးအဝဲသ့ၣ်တဖၣ်န့ၣ်လီၤပျံၤလီၤဖုးမး ဒ်တၤသူမိၢ်တဒုလၢတၢ်ဂုာ်န့ၢ်ကွံာ်အဖိတဖၣ်အသိးန့ၣ်လီၤ. နပၢ်မ့ၢ်ပှၤသုးဖိတဂၤလၢအတၢ်လဲၤခီဖျိအါမးဒီးတအိၣ်ဆိးဘၣ်ဒီး အသုးဖိသံၣ်ဖိတဖၣ်လၢမုၢ်နၤအကတီၢ်န့ၣ်ဘၣ်.
9 အခါခဲအံၤဒၣ်လဲာ်န့ၣ် ဘၣ်သ့ၣ်သ့ၣ်အဝဲအိၣ်ခူသူၣ်ဝဲဒၣ်လၢလ့ကအိတဖျၢၣ်အပူၤ မ့တမ့ၢ်လၢတၢ်လီၢ်အဂၤတတီၤန့ၣ်လီၤ. တုၤစီၤဒၤဝံးဒုးနပှၤတဖၣ်တကီၢ်ခါန့ၣ်, ပှၤတဂၤလၢ်လၢ်လၢအနၢ်ဟူတၢ်ဂ့ၢ်အံၤကစံးဝဲလၢ နပှၤတဖၣ်ဘၣ်တၢ်မၤနၢၤကွံာ်အီၤလံန့ၣ်လီၤ.
10 အန့ၣ်ဒီးပှၤအဒူကတၢၢ်လၢတပျံၤဘၣ်တၢ်ဒ်ခ့ယုၢ်တဖၣ်အသိးဒၣ်လဲာ်န့ၣ်ကပျံၤတၢ်လီၤ. အဂ့ၢ်ဒ်အံၤ, ပှၤကိးဂၤဒဲးလၢကီၢ်အံၣ်စရ့လးအပူၤန့ၣ်သ့ၣ်ညါ ဝဲလၢနပၢ်န့ၣ်မ့ၢ်ပှၤသုးဖိစဲၣ်နီးတဂၤဒီးအဝဲအပှၤတဖၣ်မ့ၢ် ပှၤဒုးတၢ်ဆူၣ်မးန့ၣ်လီၤ.
11 ယတၢ်ဟ့ၣ်ကူၣ်မ့ၢ်ဝဲဒၣ်, လၢနကဘၣ်ကိးဖှိၣ်ပှၤအံၣ်စရ့လးဖိခဲလၢာ်, လၢအအါဝဲဒ်မဲးဧိၤဟီၣ်ဧိၤလၢပီၣ်လဲၣ်နံၤအသိး, စးထီၣ်လၢကီၢ်ဆၢလၢအအံၤတခီတုၤဃီၤဆူအဂၤတခီ, ဒီးနနီၢ်ကစၢ်ဒၣ်နဲဆှၢအီၤလၢတၢ်ဒုးတၢ်ယၤအပူၤန့ၣ်တက့ၢ်.
12 ပကထံၣ်န့ၢ်စီၤဒၤဝံးဖဲအဝဲအိၣ်တပူၤလၢ်လၢ်ဒီးဒုးအီၤ, တချုးအသ့ၣ်ညါထွဲဒံးတၢ်မနုၤမၤအသးလဲၣ်န့ၣ်လီၤ. အဝဲဒၣ်မ့ၢ်ဂ့ၤ, အပှၤတဂၤဂ့ၤတဂၤဂ့ၤမ့ၢ်ဂ့ၤန့ၣ်တအိၣ်မူ လီၤတဲာ်တ့ၢ်ဘၣ်ဝဲဘၣ်.
13 အဝဲမ့ၢ်ဂုၤက့ၤအလီၢ်ခံဆူဝ့ၢ်တဝ့ၢ်အပူၤဒီး, ပပှၤဂီၢ်မုၢ်ခဲလၢာ်ကဟဲစိာ်ပျံၤတဖၣ်ဒီးထုးလီၤတဲာ်ဝ့ၢ်န့ၣ် ဆူတြီၤလၢအအိၣ်လၢလာ်ခီအပူၤန့ၣ်လီၤ. လၢတၢ်လူၢ်ဒီခိၣ်န့ၣ်လၢၢ်ဖိတဖျၢၣ်ဒၣ်လဲာ်တအိၣ်လီၤတဲာ်ဘၣ်ဝဲ ဘၣ်.”
14 စီၤအးဘၡါလိၣ်ဒီးကယဲၢ်ပှၤအံၣ်စရ့လးဖိခဲလၢာ်စံးဝဲဒၣ်, “စီၤဃူၤၡဲအတၢ်ဟ့ၣ်ကူၣ်န့ၣ်ဂ့ၤဒိၣ်န့ၢ်ဒံးစီၤအဃံသဖ့ၤလး အတၢ်ဟ့ၣ်ကူၣ်တက့ၢ်လီၤ.” ယွၤပာ်လီၤတ့ၢ်လံအသးလၢစီၤအဃံသဖ့ၤလးအတၢ်ဟ့ၣ်ကူၣ်လၢအဂ့ၤန့ၣ်တၢ်သုတမၤထွဲအီၤတဂ့ၤ, ဒ်သိးတၢ်တတၢးတနါကလီၤဘၣ်လၢစီၤအးဘၡါလိၣ်အလိၤအဂီၢ်န့ၣ် လီၤ.
15 တုၤနုၤတစု, စီၤဃူၤၡဲတဲဘၣ်ပှၤလုၢ်တၢ်အခိၣ်စီၤစၤဒိးဒီး စီၤအ့ဘယၤသၢ်လၢတၢ်ဟ့ၣ်ကူၣ်လၢအဝဲဟ့ၣ်တ့ၢ်စီၤအးဘၡါလိၣ် ဒီးပှၤအံၣ်စရ့လးဖိအခိၣ်အနၢ်တဖၣ်ဒီးတၢ်ဟ့ၣ်ကူၣ်လၢ စီၤအဃံသဖ့ၤလးဟ့ၣ်ကူၣ်တ့ၢ်ဝဲအဂ့ၢ်န့ၣ်လီၤ.
16 စီၤဃူၡဲၤစံးအါထီၣ်ဝဲ, “မၤချ့ချ့တက့ၢ်. ခဲကနံၣ်အံၤဆှၢလီၤတၢ်ကစီၣ်တမံၤဆူစီၤပၤစီၤဒၤဝံးအအိၣ်, ဒ်သိးတနၤအံၤန့ၣ်အသုတမံဖဲထံကျိတဖၣ်အစိးခံလၢပှၢ်မုၢ် ကနၢအပူၤတဂ့ၤ. မ့မ့ၢ်တခီ, မၢအခီဂာ်ဆူထံကျိယၢ်ဒ့ၣ်ဘးခီန့ၣ်တဘျီဃီ, ဒ်သိးအဝဲဒီးအပှၤတဖၣ်သုတဘၣ်တၢ်ဖီၣ်န့ၢ်ဒီးမၤသံကွံာ်အီၤ တဂ့ၤန့ၣ်တက့ၢ်.”
17 စီၤအ့ဘယၤသၢ်အဖိခွါစီၤယိၤနၤသၣ်ဒီးစီၤစၤဒိးအဖိခွါ စီၤအဃံမ့ၤဧးတဖၣ်အိၣ်ခိးတၢ်ဖဲထံထီၣ်ပၢၢ်ဧ့ၢ်ရိၤက့လးလၢ ဝ့ၢ်ယရူၤၡလ့ၣ်အချၢတဘူးတယံၤန့ၣ်လီၤ. အဂ့ၢ်ဒ်အံၤ, အဝဲသ့ၣ်ဒိးဖျါအသးဒီးလဲၤနုာ်ဆူဝ့ၢ်ပူၤတဘူၣ်ဘၣ်. တဘျီဘၣ်တဘျီကုၢ်ပိာ်မုၣ်ဖိတဂၤဘၣ်လဲၤဒီးတဲဘၣ်အဝဲသ့ၣ်လၢ တၢ်မနုၤမၤအသးဒီးတၢ်န့ၣ်ဝံၤအလီၢ်ခံအဝဲသ့ၣ်ကဘၣ်လဲၤတဲစီၤ ပၤစီၤဒၤဝံးန့ၣ်လီၤ.
18 ဘၣ်ဆၣ်ဒီးဘၣ်တနံၤန့ၣ်တၢ်မၤအသးလၢဖိသၣ်ပိာ်ခွါတဂၤထံၣ်အဝဲ သ့ၣ်ဒီးအဝဲတဲဘၣ်စီၤအးဘၡါလိၣ်န့ၣ်လီၤ. လၢတၢ်န့ၣ်အဃိအဝဲသ့ၣ်ဟးထီၣ်ကွံာ်ချ့ချ့ဒ်သိးကအိၣ်ခူသူၣ်လၢ, ပှၤတဂၤလၢဝ့ၢ်ဘဃူရံၣ်အဟံၣ်ပူၤအဂီၢ်လီၤ. အဝဲအိၣ်ဒီးထံပူၤတပူၤလၢအဟံၣ်ကပၤဒီးအဝဲသ့ၣ်ဃ့ၢ်နုာ်လီၤ ဆူထံပူၤန့ၣ်လီၤ.
19 ပှၤတဂၤန့ၣ်အမါဟံးန့ၢ်, တၢ်ကျၢၢ်ဘၢထံပူၤအခိၣ်ထိးတခါဒီး သလၣ်ထီၣ်အီၤလၢထံပူၤအဖီခိၣ်ဒီးရၤလီၤဘုဧိၤဟုဧိၤလၢအလိၤ ဒ်သိးပှၤသုတသ့ၣ်ညါနီတဂၤတဂ့ၤအဂီၢ်န့ၣ်လီၤ.
20 စီၤအးဘၡါလိၣ်အသုးခိၣ်သုးနၢ်တဖၣ်ဟဲဆူဟံၣ်န့ၣ်ဒီးသံကွၢ် ပှၤပိာ်မုၣ်န့ၣ်, “စီၤယိၤနၤသၣ်ဒီးစီၤအဃံမ့ၤဧးအိၣ်ဖဲလဲၣ်.”
ပိာ်မုၣ်န့ၣ်စံးဆၢဝဲ, “အဝဲသ့ၣ်လဲၤခီဂာ်ကွံာ်ထံကျိလံ.”
ပှၤတဖၣ်န့ၣ်လူၤဃုအဝဲသ့ၣ်ဘၣ်ဆၣ်ဒီးတထံၣ်ဘၣ်ဝဲဘၣ်. လၢတၢ်န့ၣ်အဃိ, အဝဲသ့ၣ်က့ၤကဒါက့ၤဆူဝ့ၢ်ယရူၤၡလ့ၣ်န့ၣ်လီၤ.
21 တုၤအဝဲသ့ၣ်ဟးထီၣ်ကွံာ်န့ၣ်, စီၤယိၤနၤသၣ်ဒီးစီၤအဃံမ့ၤဧး ဟဲက့ၤထီၣ်လၢထံပူၤဒီးလဲၤဒီးတဲဘၣ်စီၤပၤဒၤဝံးတၢ်ဂ့ၢ်တၢ်ကျိၤန့ၣ်လီၤ. အဝဲသ့ၣ်တဲဘၣ်အီၤတၢ်ကူၣ်အၢလၢ စီၤအဃံသဖ့ၤလးကူၣ်ကျဲၤထီဒါအီၤအဂ့ၢ်ဒီးစံးဝဲဒၣ်, “မၤချ့ချ့ဒီးခီဂာ်ထံကျိန့ၣ်တက့ၢ်.”
22 လၢတၢ်န့ၣ်အဃိ, စီၤဒၤဝံးဒီးအပှၤတဖၣ်စးထီၣ်ခီဂာ် ထံကျိယၢ်ဒ့ၣ်ဒီးတုၤမုၢ်ဆ့ၣ်ထီၣ်န့ၣ်အဝဲသ့ၣ်ခဲလၢာ်တုၤဝဲဆူထံကျိဘးခီန့ၣ်လီၤ.
23 ဖဲစီၤအဃံသဖ့ၤလးထံၣ်သ့ၣ်ညါဝဲလၢအတၢ်ဟ့ၣ်ကူၣ်တဘၣ်တၢ်မၤ ထွဲအီၤန့ၣ်, အဝဲဂီၤကၢ်ထီၣ်အကသ့ၣ်ယီၤဒီးက့ၤကဒါက့ၤဆူအဝ့ၢ်ဒၣ်ဝဲန့ၣ်လီၤ. တုၤအဝဲကျဲၤလီၤအဟံၣ်အဃီ အဂ့ၢ်အကျိၤဘၣ်ဘၣ်ဝံၤအလီၢ်ခံန့ၣ်, အဝဲစၢသံလီၤက့ၤအသးန့ၣ် လီၤ. အဝဲဘၣ်တၢ်ခူၣ်လီၤကွံာ်အီၤဖဲအဒူၣ်ဖိထၢဖိအသွၣ်ခိၣ်အပူၤန့ၣ်လီၤ.
24 စီၤဒၤဝံးဟဲတုၤဝဲဆူဝ့ၢ်မၤဃန့ၤဖဲစီၤအးဘၡါလိၣ် ဒီးပှၤအံၣ်စရ့လးဖိတဖၣ်ခီဂာ်ထံကျိယၢ်ဒ့ၣ်အခါန့ၣ်လီၤ.
25 (စီၤအးဘၡါလိၣ်ပာ်ထီၣ်စီၤဧမါစၤ ဒ်သုးခိၣ်ကျၢၢ်လၢအသုးမုၢ်အဖီခိၣ်လၢစီၤယိၤအာ်အလီၢ်န့ၣ်လီၤ. စီၤဧမါစၤမ့ၢ်ပှၤယံးၡမၤအ့လးဖိစီၤယ့သ့ၢ်အဖိခွါလီၤ. အမိၢ်မ့ၢ်ဝဲနီၢ်အဘံၤကါယံးလး, စီၤနၤဃၣ်အဖိမုၣ်ဒီးစီၤယိၤအာ်အမိၢ် နီၢ်စရူၤယၤအဒီပုၢ်ဝဲၢ်မုၣ်န့ၣ်လီၤ.)
26 စီၤအးဘၡါလိၣ်ဒီးအပှၤတဖၣ်သူၣ်ဒဲဖဲကီၢ်ကံးလဧးအပူၤန့ၣ်လီၤ.
27 ဖဲစီၤဒၤဝံးဟဲတုၤဝဲဆူဝ့ၢ်မၤဃန့ၤန့ၣ်, အဝဲဘၣ်တၢ်ဟဲသဂၢၢ်အီၤလၢပှၤဧၣ်မိၣ်ဖိလၢဝ့ၢ်ရးဘးစီၤနၤဃၣ် အဖိခွါစီၤၡိဘံၤ, စီၤဧမံၤအ့လးအဖိခွါစီၤမၤကံၢ်အိၣ်လၢဝ့ၢ်လိဒဘၢ်, ဒီးစီၤဘၢ်စံးလဲလၢကီၢ်ကံးလဧးအဝ့ၢ်ရိကလံၣ်, သ့ၣ်တဖၣ်န့ၣ်လီၤ.
28 အဝဲသ့ၣ်ဟဲစိာ်လီခီဖးဒိၣ်တဖၣ်, သပၢၤဟီၣ်ခိၣ်တဖၣ်ဒီးလီၢ် မံတဖၣ်ဒီးဟဲစိာ်စ့ၢ်ကီးဝဲတၢ်အီၣ်တၢ်အီလၢစီၤဒၤဝံးဒီး အပှၤတဖၣ်အဂီၢ်န့ၣ်လီၤ.
29 တၢ်အီၣ်တၢ်အီလၢအဝဲသ့ၣ်ဟဲစိာ်န့ၣ်မ့ၢ်ဝဲဘုကၠူၣ်, ဘုမုယီၤ, ဘုဝဲာ်အသး, ပထိး, သဘ့, ကနဲစီ, တၢ်နုၢ်ထံ ကိၢ်လိၣ်, တၢ်နုၢ်ထံလီၤသကၤဒီးသိဖိတနီၤန့ၣ်လီၤ. အဝဲသ့ၣ်, သ့ၣ်ညါဝဲလၢစီၤဒၤဝံးဒီးအပှၤတဖၣ်သၣ်ဝံၤသၣ်စ့ၤ, အသးသူထံဒီးလီၤဘှံးလီၤတီၤဝဲလၢပှၢ်မုၢ်ကနၢအပူၤန့ၣ်လီၤ.