16
1 ဖဲစီၤဒၤဝံးလဲၤပျံကွံာ်တၢ်လူၢ်ဒီခိၣ်တစဲးန့ၣ်, သတူၢ်ကလာ်အဝဲဘၣ်တၢ်ဟဲသဂၢၢ်အီၤလၢစီၤမဖံဘိၤၡ့းအခ့အပှၤ စီၤစံဘၤန့ၣ်လီၤ. အဝဲအိၣ်ဒီးကသ့ၣ်ယီၤခံဒုလၢအပဒၢးထီၣ်ဝဲကိၣ်အဖျၢၣ်ခံကယၤ, စပံးသၣ်ဃ့အချံၣ်တကယၤ, သ့ၣ်သၣ်အသီကဘှဲဒဲအချံၣ်တကယၤဒီး ထၢၣ်တၢ်ဖံးတဖျၢၣ်လၢအပှဲၤဝဲဒီးစပံးထံန့ၣ်လီၤ.
2 စီၤပၤစီၤဒၤဝံးသံကွၢ်အီၤ, “တၢ်ခဲလၢာ်အံၤနကမၤတၢ်မနုၤန့ၣ်လဲၣ်.”
စီၤစံဘၤစံးဆၢဝဲဒၣ်, “ကသ့ၣ်ယီၤတဖၣ်မ့ၢ်လၢနဲဒၣ်, တၢ်ဒိၣ်ကစၢ်စီၤပၤအဟံၣ်ဖိဃီဖိတဖၣ်ကဒိးဝဲအဂီၢ်, ကိၣ်ဒီးသ့ၣ်သၣ်တဖၣ်မ့ၢ်လၢပှၤပိာ်ခွါတဖၣ်ကအီၣ်ဝဲအဂီၢ်ဒီး စပံးထံန့ၣ်မ့ၢ်လၢအဝဲသ့ၣ်ကအီဝဲဖဲအဝဲသ့ၣ်လီၤဘှံးလီၤ တီၤလၢပှၢ်မုၢ်ကနၢအပူၤအခါအဂီၢ်န့ၣ်လီၤ.”
3 စီၤပၤသံကွၢ်အီၤ, “နကစၢ်စီၤစီလူးအလံၤခွါစီၤမဖံဘိၤၡ့းအိၣ်ဖဲလဲၣ်.” စီၤစံဘၤစံးဆၢအီၤ,
“အဝဲအိၣ်ဒံးဒၣ်လၢဝ့ၢ်ယရူၤၡလ့ၣ်အပူၤမ့ၢ်လၢအဝဲနာ်ဝဲလၢ, ခဲအံၤပှၤအံၣ်စရ့လးဖိတဖၣ်န့ၣ်ကဟ့ၣ်ကဒါက့ၤအီၤအဖု စီၤစီလူးအဘီအမုၢ်အဃိန့ၣ်လီၤ.”
4 စီၤပၤစံးဘၣ်စီၤစံဘၤ, “ကယဲၢ်တၢ်ကိးမံၤဒဲးလၢအဘၣ်ဃး ဒီးစီၤမဖံဘိၤၡ့းန့ၣ်မ့ၢ်နတၢ်လီၤ.”
စီၤစံဘၤစံးဆၢဝဲဒၣ်, “ယမ့ၢ်နခ့နပှၤလီၤ. မ်ထီဘိယဒိးန့ၣ်ဘၣ်တၢ်ဒိၣ်ကစၢ်စီၤပၤအတၢ်ကွၢ်မဲာ်တက့ၢ်.”
5 ဖဲစီၤပၤစီၤဒၤဝံးဟဲတုၤဝဲလၢဝ့ၢ်ဘၤဃူရံၣ်န့ၣ်, ပှၤလၢစီၤစီလူးအဘူးအတံၢ်အကျါတဂၤ, လၢအမ့ၢ်စီၤကရၤအဖိခွါ စီၤၡံမံၤဟဲထီၣ်လၢသဂၢၢ်အီၤအဂီၢ်ဒီးဆိၣ်အၢအီၤဖဲအဟဲ ထီၣ်ဝဲအခါန့ၣ်လီၤ.
6 စီၤၡံမံၤစးထီၣ်ကွံာ်စီၤဒၤဝံးဒီးအပဒိၣ်ပပှၢ်တဖၣ်လၢလၢၢ်တဖၣ်, ဖဲစီၤဒၤဝံးဘၣ်တၢ်ကဝီၤဃာ်အီၤဒၣ်လဲာ်လၢအပှၤတဖၣ်ဒီးသုးဖိ လၢအခိးအသးသမူတဖၣ်အခါန့ၣ်လီၤ.
7 စီၤၡံမံၤဆိၣ်အၢအီၤဒီးစံးဝဲဒၣ်, “ဟးထီၣ်ကွံာ်တက့ၢ်. ဟးထီၣ်ကွံာ်တက့ၢ်. ပှၤမၤသံမၤဝီတၢ်ဧၢ, ပှၤမၤကမၣ်တၢ်ဖိဧၢ.
8 နဟံးန့ၢ်ကွံာ်စီၤစီလူးအဘီအမုၢ်, ဒီးခဲကနံၣ်အံၤယွၤစံၣ် ညီၣ်နၤ, လၢနမၤသံတ့ၢ်စီၤစီလူးအဟံၣ်ဖိဃီဖိအါအါဂီၢ်ဂီၢ်အဃိန့ၣ် လီၤ. ယွၤဟ့ၣ်လီၤလံဘီမုၢ်ဆူနဖိခွါစီၤအးဘၡါလိၣ်အစုပူၤ, ဒီးနဲဒၣ်ပှၤမၤသံမၤဝီတၢ်ဧၢ, နဟးဂီၤလံ.”
9 နီၢ်စရူယၤအဖိခွါစီၤအဘံၡဲၤစံးဘၣ်စီၤပၤ, “နဲဒၣ်တၢ်ဒိၣ်ကစၢ်စီၤပၤဧၢ, ဘၣ်မနုၤနပျဲလၢထွံၣ်တဒုအံၤ ဆိၣ်အၢနၤန့ၣ်လဲၣ်. ပျဲယလဲၤဃီၤဆူန့ၣ်ဒီးဒီၣ်တဲာ်ကွံာ်အခိၣ်တက့ၢ်.”
10 စီၤပၤစံးဘၣ်စီၤအဘံၡဲၤဒီးအဒီပုၢ်ဝဲၢ်ခွါစီၤယိၤအာ်, “တၢ်အံၤတဘၣ်ဃးဒီးသုနီတမံၤဘၣ်. အဝဲမ့ၢ်ဆိၣ်အၢယၤလၢ ယွၤတဲဘၣ်အီၤအဃိဒီး, ဘၣ်မနုၤအဝဲမၤတၢ်အံၤလဲၣ်န့ၣ်, မတၤအိၣ်ဒီးတၢ်ခွဲးတၢ်ယာ်လၢ ကသံကွၢ်ဝဲလဲၣ်.”
11 ဒီးစီၤဒၤဝံးစံးဘၣ်စီၤအဘံၡဲၤဒီးပဒိၣ်ပပှၢ်ခဲလၢာ်ဒ်အံၤ, “ယဖိခွါဒၣ်ယဲန့ၣ်ကျဲးစၢးဝဲဒ်သိးကမၤသံယၤလီၤ. လၢတၢ်န့ၣ်အဃိဘၣ်မနုၤလၢသုကဘၣ်ကမၢကမၣ်လၢပှၤဘံၣ်ယၤမံၣ်ဖိ တဂၤအံၤအဃိန့ၣ်လဲၣ်. ယွၤတဲတ့ၢ်အီၤလၢကဆိၣ်အၢတၢ်အဃိ, ပာ်တ့ၢ်အီၤထဲတဂၤဧိၤဒီးပျဲအမၤတၢ်န့ၣ်တက့ၢ်.
12 ဘၣ်သ့ၣ်သ့ၣ်ယွၤကပာ်သူၣ်ပာ်သးလၢယတၢ်ကိၢ်တၢ်ဂီၤတဖၣ်ဒီးဟ့ၣ် လီၤယၤတၢ်ဆိၣ်ဂ့ၤတနီၤလၢကဟံးန့ၢ်ကွံာ်အဝဲအတၢ်ဆိၣ်အၢ အလီၢ်န့ၣ်လီၤ.”
13 မၤသးဒ်န့ၣ်ဒီး, စီၤဒၤဝံးဒီးအပှၤတဖၣ်လဲၤဒံးဝဲဆူညါလၢ ကျဲန့ၣ်လီၤ. စီၤၡံမံၤပိာ်အဝဲသ့ၣ်အခံ, ဟးဝဲလၢတၢ်လူၢ်ကပၤန့ၣ်လီၤ. ဖဲအဝဲလဲၤတၢ်အဖၢမုၢ်န့ၣ်လဲၤတၢ်တခီခီ, ဆိၣ်အၢတၢ်တခီခီ, ကွံာ်လၢၢ်တဖၣ်ဒီးဖၣ်ကမူၣ်, တခီခီဆူစီၤဒၤဝံးဒီးအပှၤတဖၣ်အအိၣ်လီၤ.
14 စီၤပၤဒီးအပှၤခဲလၢာ်န့ၣ်လီၤဘှံးလီၤတီၤဝဲဖဲအဝဲသ့ၣ်လဲၤ တုၤဝဲဆူထံကျိယၢ်ဒ့ၣ်ဒီးဖဲန့ၣ်, အဝဲသ့ၣ်အိၣ်ဘှံးအိၣ်သါဝဲဒၣ်လီၤ.
15 စီၤအးဘၡါလိၣ်ဒီးကယဲၢ်ပှၤအံၣ်စရ့လးဖိခဲလၢာ်လၢအအိၣ်ဒီး အီၤန့ၣ်လဲၤနုာ်လီၤဆူဝ့ၢ်ယရူၤၡလ့ၣ်အပူၤဒီးစီၤအဃံသဖ့ၤလး အိၣ်ဒီးအဝဲသ့ၣ်န့ၣ်လီၤ.
16 ဖဲစီၤဒၤဝံးအတံၤသကိးလၢအနာ်န့ၢ်ဝဲစီၤဃူၡဲၤဘၣ်သဂၢၢ်ဒီး စီၤအးဘၡါလိၣ်န့ၣ်အဝဲကိးပသူထီၣ်, “မ်စီၤပၤမူဝဲတက့ၢ်. မ်စီၤပၤမူဝဲတက့ၢ်,” န့ၣ်လီၤ.
17 စီၤအးဘၡါလိၣ်သံကွၢ်အီၤ, “နတၢ်သူၣ်တီသးရၤဒီနတံၤသကိး ဒီးစီၤဒၤဝံးန့ၣ်ကဲထီၣ်အသးဒ်လဲၣ်. ဘၣ်မနုၤအဃိနတလဲၤပိာ်အဝဲခံန့ၣ်လဲၣ်.”
18 စီၤဃူၤၡဲစံးဆၢဝဲဒၣ်, “ယမၤကသ့ဒ်လဲၣ်. ယဘၣ်ဃးဒၣ်ဒီးပှၤတဂၤလၢယွၤဃုထၢအီၤ, ပှၤဂီၢ်မုၢ်အံၤဃုထၢအီၤဒီး ကယဲၢ်ပှၤအံၣ်စရ့လးဖိခဲလၢာ်ဃုထၢအီၤန့ၣ်လီၤ. ယကအိၣ်ဒၣ်ဒီးနၤလီၤ.
19 မၤကဒီးတစုမ့တမ့ၢ်ဘၣ်လၢယကစၢ်အဖိခွါအဂီၢ်ဘၣ်န့ၣ်, ယကမၤမတၤတဂၤအတၢ်န့ၣ်လဲၣ်. ဒ်ယမၤတ့ၢ်တၢ်လၢနပၢ်အဂီၢ်အသိးန့ၣ်, ခဲကနံၣ်အံၤယကမၤတၢ်လၢနဂီၢ်န့ၣ်လီၤ.”
20 အန့ၣ်ဝံၤဒီး, စီၤအးဘၡါလိၣ်ဃၣ်ဃီၤအသးဆူ စီၤအဃံသဖ့ၤလးအအိၣ်ဒီးစံးဝဲဒၣ်, “ခဲကနံၣ်အံၤမ့ၢ်လၢပအိၣ်ဖဲအံၤလံအဃိ, နကဟ့ၣ်ကူၣ်ပှၤလၢပကဘၣ်မၤတၢ်မနုၤန့ၣ်လဲၣ်.”
21 စီၤအဃံသဖ့ၤလးစံးဆၢဝဲဒၣ်, “လဲၤဒီးမံဃုာ်ဂဲၤဃုာ်ဒီး နပၢ်အသံၣ်မါတဖၣ်လၢအပာ်လီၤတဲာ်တ့ၢ်ဝဲဒ်သိးအကကွၢ်ထွဲ စီၤလိၣ်စီၤပၤအနူၢ်အစီၤအဂီၢ်န့ၣ်တက့ၢ်. တုၤနုၤတစု, ပှၤကိးဂၤဒဲးလၢကီၢ်အံၣ်စရ့လးအပူၤကသ့ၣ်ညါဝဲလၢ နပၢ်ပာ်နၤဒ်အဒုၣ်အဒါတဂၤအသိးဒီးပှၤပိာ်နခံတဖၣ်အသး အဂံၢ်အဘါကဆူၣ်ထီၣ်ဝဲလီၤ.”
22 လၢတၢ်န့ၣ်အဃိ, အဝဲသ့ၣ်ဘှီထီၣ်ဝဲဒဲတဖျၢၣ်လၢ စီၤအးဘၡါလိၣ်အဂီၢ်လၢစီၤပၤအနူၢ်အစီၤအခိၣ်ဒုးဖီခိၣ်, ဒီးလၢကယဲၢ်ပှၤကိးဂၤဒဲးအမဲာ်ညါန့ၣ်, စီၤအးဘၡါလိၣ်လဲၤ နုာ်ဝဲဆူဒဲပူၤဒီးမံဃုာ်ဂဲၤဃုာ်ဒီးအပၢ်အသံၣ်မါတဖၣ်န့ၣ်လီၤ.
23 ကယဲၢ်တၢ်ဟ့ၣ်ကူၣ်ဟ့ၣ်ဖးလၢ စီၤအဃံသဖ့ၤလးဟ့ၣ်တ့ၢ်ဝဲလၢမုၢ်နံၤတဖၣ်အပူၤန့ၣ်, ဘၣ်တၢ်တူၢ်လိာ်အီၤဒ်ကစၢ်ယွၤအကစၢ်ဒၣ် ဝဲအတၢ်ကတိၤအသိးဒီးစီၤဒၤဝံးဒီးစီၤအးဘၡါလိၣ်မၤထွဲဝဲဒၣ်ခံဂၤလိာ်န့ၣ်လီၤ.