15
1 တၢ်န့ၣ်အလီၢ်ခံ, စီၤအးဘၡါလိၣ်ကတဲာ်ကတီၤဝဲ, လ့ၣ်ကဟၣ်တဆိဒီးကသ့ၣ်တဖၣ်လၢအဂီၢ်ဒၣ်ဝဲဒီးပှၤသုးဖိအဂၤယဲၢ်ဆံ လဲၤတၢ်ဒီးအီၤဒီးကဟုကယာ်အီၤန့ၣ်လီၤ.
2 အဝဲညီနုၢ်ဂဲၤဆၢထၢၣ်ဂီၤဂီၤဒီးလဲၤဒီးဆၢထၢၣ်ဖဲကျဲမုၢ်ကပၤဖဲဝ့ၢ်အတြဲၤန့ၣ်လီၤ. တဘျီလၢ်လၢ်ဖဲပှၤတဂၤဂၤဟဲဝဲဖဲန့ၣ်အိၣ်ဒီးတၢ်ဂ့ၢ်တမံၤလၢ စီၤပၤကဘၣ်မၤဘၣ်လိာ်န့ၢ်အီၤန့ၣ်, စီၤအးဘၡါလိၣ်ကိးဃီၤအီၤဒီးသံကွၢ်အီၤလၢ, မ့ၢ်အဟဲလၢလဲၣ်လၢလဲၣ်န့ၣ်လီၤ. ဒီးဖဲပှၤတဂၤန့ၣ်စံးဘၣ်အီၤလၢ အဝဲမ့ၢ်ပှၤလၢဒူၣ်မတၤလဲၣ်ဝံၤအလီၢ်ခံန့ၣ်,
3 စီၤအးဘၡါလိၣ်ညီနူၢ်စံးဝဲ, “ကွၢ်ကွၢ်, တၢ်သိၣ်တၢ်သီန့ၣ်အိၣ်လၢနအိၣ်တတပၤလီၤ. ဘၣ်ဆၣ်ဒီးစီၤပၤအခၢၣ်စးလၢအဒိကနၣ်နကွီၢ်န့ၣ်တအိၣ်ဘၣ်နီတဂၤဘၣ်.”
4 ဒီးအဝဲတဲအါထီၣ်ဝဲ, “ယဆၢမးလၢယကမ့ၢ်စံၣ်ညီၣ်ကွီၢ်တဂၤ န့ၣ်လီၤ. အန့ၣ်တစု, ပှၤတဂၤလၢ်လၢ်လၢအအိၣ်ဒီးအကွီၢ်တမံၤမ့ၢ်ဂ့ၤ, တၢ်စံၣ်ညီၣ်အလီၢ်တမံၤမ့ၢ်ဂ့ၤန့ၣ်ဟဲဆူ ယအိၣ်သ့ဝဲဒီးယကဟ့ၣ်အီၤလၢတၢ်စံၣ်ညီၣ်တီန့ၣ်လီၤ.”
5 ဖဲပှၤတဂၤကသုးဘူးအသးဆူစီၤအးဘၡါလိၣ်အအိၣ်လၢကတီၤလီၤလၢ အမဲာ်ညါန့ၣ်, စီၤအးဘၡါလိၣ်ကယူာ်ဃီၤအစုဒီးဝံၣ်ဆၢထၢၣ်အီၤဒီးနၢမူအီၤန့ၣ်လီၤ.
6 စီၤအးဘၡါလိၣ်မၤတ့ၢ်တၢ်အံၤဆူကယဲၢ်ပှၤအံၣ်စရ့လးဖိကိးဂၤ ဒဲးလၢအဟဲဆူစီၤပၤအအိၣ်လၢတၢ်စံၣ်ညီၣ်အဂီၢ်အဃိဒီး, အဝဲမၤန့ၢ်အဝဲသ့ၣ်အတၢ်သူၣ်တီသးရၤန့ၣ်လီၤ.
7 လွံၢ်နံၣ်ဝံၤအလီၢ်ခံန့ၣ်, စီၤအးဘၡါလိၣ်စံးဘၣ်စီၤပၤစီၤ ဒၤဝံးဒ်အံၤ, “တၢ်ဒိၣ်ဧၢ, ပျဲယလဲၤဆူဝ့ၢ်ဃ့ဘြိၣ်ဒီးမၤလၢပှဲၤယတၢ်အၢၣ် လီၤအီလီၤလၢယမၤတ့ၢ်ဒီးယွၤန့ၣ်တက့ၢ်.
8 ဖဲယအိၣ်လၢကီၢ်စူၤရံအပူၤလၢဝ့ၢ်ကၡူၢ်အခါန့ၣ်, ယအၢၣ်လီၤတ့ၢ်ကစၢ်ယွၤလၢအဝဲမ့ၢ်ဆှၢကဒါက့ၤယၤဆူ ဝ့ၢ်ယရူၤၡလ့ၣ်ဒီးယကဘူၣ်ထီၣ်ဘါထီၣ်အီၤလၢဝ့ၢ်ဃ့ဘြိၣ်အပူၤန့ၣ်လီၤ.”
9 စီၤပၤစံးဝဲဒၣ်, “လဲၤမုာ်မုာ်တက့ၢ်.” မၤသးဒ်န့ၣ်ဒီး, စီၤအးဘၡါလိၣ်လဲၤဆူဝ့ၢ်ဃ့ဘြိၣ်န့ၣ်လီၤ.
10 ဘၣ်ဆၣ်ဒီးအဝဲဆှၢလီၤပှၤစိာ်တၢ်ကစီၣ်တဖၣ် ဆူကယဲၢ်ကီၢ်အံၣ်စရ့လးအဒူၣ်ခဲလၢာ်အအိၣ်ဒ်သိးအကစံးဘၣ်အဝဲသ့ၣ်လၢ, ဖဲသုနၢ်ဟူဘၣ်ကွဲၤတဖၣ်အတၢ်သီၣ်ထီၣ်န့ၣ်, ကိးပသူထီၣ်ဒီးစံး, “စီၤအးဘၡါလိၣ်ကဲထီၣ်လံဝ့ၢ်ဃ့ဘြိၣ်အစီၤပၤလံ, န့ၣ်တက့ၢ်.”
11 ပှၤအိၣ်ဝဲဒၣ်အဂၤခံကယၤ, လၢဒ်စီၤအးဘၡါလိၣ်ကွဲမုာ်အီၤအသိးန့ၣ်, ဟးထီၣ်လၢဝ့ၢ်ယရူၤၡလ့ၣ်ဒီးအီၤန့ၣ်လီၤ. အဝဲသ့ၣ်တသ့ၣ်ညါတၢ်ကူၣ်ကျဲၤအအၢအဂ့ၢ်နီတမံၤဘၣ်ဒီး လဲၤဝဲလၢတၢ်သးလိၤသးဘျၢအပူၤန့ၣ်လီၤ.
12 ဒီးဖဲအဝဲလုၢ်ထီၣ်တၢ်လုၢ်တၢ်ပာ်တဖၣ်အခါနၣ်, စီၤအးဘၡါလိၣ်မၢပှၤလဲၤကိးန့ၢ်အီၤစီၤအဃံၤသဖ့လးလၢအမ့ၢ် စီၤပၤဒၤဝံးအပှၤဟ့ၣ်ကူၣ်ဟ့ၣ်ဖးတၢ်တဖၣ်အကျါတဂၤ, လၢအအိၣ်ဝဲလၢဝ့ၢ်ကံလိၤန့ၣ်လီၤ. တၢ်ကူၣ်အၢထီဒါစီၤပၤန့ၣ်, အဂံၢ်အဘါဆူၣ်ထီၣ်ဝဲ, ဒီးပှၤပိာ်စီၤအးဘၡါလိၣ်အခံန့ၣ်အနီၣ်ဂံၢ်အါထီၣ်ဝဲဒၣ်လီၤ.
13 ပှၤစိာ်တၢ်ကစီၣ်တဂၤတဲဘၣ်စီၤဒၤဝံးဒ်အံၤ, “ပှၤအံၣ်စရ့လးဖိတဖၣ်မၤလံတၢ်သူၣ်တီသးရၤအတၢ်အၢၣ်လီၤအီလီၤဒီး စီၤအးဘၡါလိၣ်လံ.”
14 လၢတၢ်န့ၣ်အဃိ, စီၤဒၤဝံးစံးဘၣ်ကယဲၢ်အပဒိၣ်ပပှၢ်ခဲလၢာ်လၢ အအိၣ်ဒီးအီၤလၢဝ့ၢ်ယရူၤၡလ့ၣ်အပူၤန့ၣ်, “ပမ့ၢ်အဲၣ်ဒိးပူၤဖျဲးကွံာ်လၢစီၤအးဘၡါလိၣ်န့ၣ် ပကဘၣ်ဟးထီၣ်ကွံာ်တဘျီဃီန့ၣ်လီၤ. မၤချ့ချ့တက့ၢ်. မ့တမ့ၢ်ဘၣ်န့ၣ်တယံာ်ဘၣ်ဒီးအဝဲကဟဲတုၤဖဲအံၤ, ဒီးမၤနၢၤကွံာ်ပှၤဒီးမၤသံကွံာ်ကယဲၢ်ပှၤအိၣ်လၢဝ့ၢ်ပူၤခဲလၢာ်န့ၣ်လီၤ.”
15 အဝဲသ့ၣ်စံးဆၢဝဲဒၣ်, “မ့ၢ်လီၤ. နဲဒၣ်, တၢ်ဒိၣ်ကစၢ်စီၤပၤဧၢ, ပအိၣ်ကတဲာ်ကတီၤပသးလၢပကမၤကယဲၢ်တၢ်လၢ နစံးနဲန့ၣ်လီၤ.”
16 လၢတၢ်န့ၣ်အဃိစီၤပၤဟးထီၣ်ကွံာ်ဝဲဃုာ်ဒီးအဟံၣ်ဖိဃီဖိခဲ လၢာ်ဒီးအပဒိၣ်ပပှၢ်တဖၣ်, အိၣ်တ့ၢ်ထဲအသံၣ်မါအဂၤတဆံ, လၢအဝဲပာ်လီၤတဲာ်တ့ၢ်ဝဲဒ်သိးကအံးထွဲကွၢ်ထွဲစီၤပၤအနူၢ်အစီၤန့ၣ်လီၤ.
17 တုၤစီၤပၤဒီးကယဲၢ်အပှၤခဲလၢာ်ဟးထီၣ်လၢဝ့ၢ်ပူၤန့ၣ်အဝဲသ့ၣ် အိၣ်ကတီၢ်ဝဲဖဲဟံၣ်လၢခံကတၢၢ်တဖျၢၣ်န့ၣ်လီၤ.
18 ကယဲၢ်အပဒိၣ်ပပှၢ်ခဲလၢာ်ဆၢထၢၣ်ဖဲအဝဲအဃၢၤ, ဖဲပှၤခိးစီၤပၤအသးသမူတဖၣ်လဲၤခီဂာ်တၢ်လၢအဝဲအမဲာ်ညါအခါန့ၣ်လီၤ. ပှၤသုးဖိအဂၤဃုကယၤလၢအပိာ်တ့ၢ်အဝဲအခံ လၢဝ့ၢ်ကၤသးအပူၤန့ၣ်လဲၤခီဂာ်စ့ၢ်ကီးတၢ်,
19 ဒီးစီၤပၤစံးဘၣ်အဝဲသ့ၣ်အပှၤအခိၣ်စီၤအံတဲၤ, “ဘၣ်မနုၤအဃိနလဲၤဃုာ်တၢ်ဒီးပှၤန့ၣ်လဲၣ်. က့ၤကဒါက့ၤဒီးအိၣ်နဲဒီးစီၤပၤအသီတဂၤန့ၣ်တက့ၢ်. နမ့ၢ်ပှၤတခီဘီမုၢ်ဖိတဂၤ, ပှၤဃ့ၢ်ပူၤဖျဲးအသးတဂၤလၢအအိၣ် ယံၤဒီးအထံအကီၢ်ဒၣ်ဝဲန့ၣ်လီၤ.
20 နအိၣ်တ့ၢ်ဖဲအံၤထဲတစိၢ်တလီၢ်ဒံးလီၤ. လၢတၢ်န့ၣ်အဃိဘၣ်မ နုၤယကဘၣ်ဒုးကဲထီၣ်နၤလၢပှၤဟးဝ့ၤဝီၤဃုာ်ဒီးယၤန့ၣ်လဲၣ်. ယကလဲၤဆူလဲၣ်န့ၣ်ယတသ့ၣ်ညါဒၣ်လဲာ်ယဲဘၣ်. က့ၤကဒါက့ၤဒီးက့ၤကိးဃုာ်နထံဖိကီၢ်ဖိကဒဲကဒဲတဖၣ်ဒီးနၤတက့ၢ်. ဒီးမ်ယွၤသးကညီၤသုဒီးတီဒီးသုတက့ၢ်.”
21 ဘၣ်ဆၣ်ဒီးစီၤအံတဲၤစံးဆၢဝဲဒၣ်, “နဲဒၣ်, တၢ်ဒိၣ်ကစၢ်စီၤပၤဧၢ, ယဆိၣ်တၢ်ဒီးနၤလၢယွၤအမံၤအပူၤလၢထီဘိယကလဲၤတၢ်ဒီးနၤဖဲ နလဲၤတၢ်တပူၤလၢ်လၢ်, လၢတၢ်မူအပူၤမ့ၢ်ဂ့ၤ, လၢတၢ်သံအပူၤမ့ၢ်ဂ့ၤန့ၣ်လီၤ.”
22 စီၤဒၤဝံးစံးဝဲဒၣ်, “ဂ့ၤလံလဲၤထီၣ်ဆူညါတက့ၢ်.” လၢတၢ်န့ၣ်အဃိစီၤအံတဲၤလဲၤဆူညါဃုာ်ဒီးအပှၤခဲလၢာ်ဒီးပှၤ လၢအသန့ၤအသးဒီးအဝဲသ့ၣ်တဖၣ်န့ၣ်လီၤ.
23 ဖဲပှၤပိာ်စီၤဒၤဝံးအခံတဖၣ်ဟးထီၣ်ကွံာ်ဝဲန့ၣ်, ပှၤဂီၢ်မုၢ်ဟီၣ်ပသူထီၣ်ဖးဒိၣ်လီၤ. စီၤပၤလဲၤခီဂာ်ကွံာ်ထံ ကျိဖိကံဒြိၣ်ဒီးအပှၤခဲလၢာ်ပိာ်ထီၣ်အခံ, ဒီးအဝဲသ့ၣ်ဟးထီၣ်ဒီးလဲၤသကိးဝဲဆူပှၢ်မုၢ်ကနၢန့ၣ်လီၤ.
24 ပှၤလုၢ်တၢ်အခိၣ်စီၤစၤဒိးအိၣ်ဝဲဖဲန့ၣ်ဒီးပှၤလ့ၤဝံဖိတဖၣ် အိၣ်စ့ၢ်ကီးဒီးအီၤ, စိာ်ဝဲယွၤအတၢ်အၢၣ်လီၤအီလီၤအတလါစီဆှံန့ၣ်လီၤ. အဝဲသ့ၣ်ပာ်လီၤအီၤဒီးတချုးဒံးဘၣ်လၢပှၤဂီၢ်မုၢ်ခဲလၢာ် ဟးထီၣ်ကွံာ်လၢဝ့ၢ်ပူၤဘၣ်န့ၣ်အဝဲသ့ၣ်တစိာ်ထီၣ်ကဒီးအီၤဘၣ်. ပှၤလုၢ်တၢ်အခိၣ်စီၤအ့ဘယၤသၢ်အိၣ်စ့ၢ်ကီးဖဲန့ၣ်လီၤ.
25 တုၤနုၤတစု, စီၤပၤစံးဘၣ်စီၤစၤဒိး, “က့ၤစိာ်ကဒါက့ၤ ယွၤအတၢ်အၢၣ်လီၤအီလီၤအတလါစီဆှံဆူဝ့ၢ်ပူၤတက့ၢ်. ယွၤမ့ၢ်ဘၣ်သူၣ်ဘၣ်သးလၢယၤဒီး, မုၢ်တနံၤန့ၣ်အဝဲကပျဲ ယဟဲက့ၤကဒါက့ၤလၢယကထံၣ်ဘၣ်အီၤဃုာ်ဒီးတၢ်လီၢ်ဖဲတၢ်ပာ်အီၤ န့ၣ်လီၤ.
26 မ့မ့ၢ်အဝဲမ့ၢ်တဘၣ်သူၣ်ဘၣ်သးယၤဘၣ်ဒီး, ဂ့ၤလံ, အန့ၣ်တစုပျဲအဝဲမၤယၤဒ်အတၢ်ဘၣ်အသးအသိးန့ၣ်တက့ၢ်.”
27 ဒီးအဝဲစံးဘၣ်အါထီၣ်ကဒီးစီၤစၤဒိး, “ကွၢ်ကွၢ်, နၤဒီးစီၤအဘ့ဘယၤသၢ်န့ၣ်က့ၤကဒါက့ၤမုာ်မုာ်ဆူဝ့ၢ်ပူၤ, ဒီးက့ၤကိးစ့ၢ်ကီးနဖိခွါစီၤအဃံမ့ၤဧးဒီးစီၤအ့ဘယၤသၢ် အဖိခွါ, စီၤယိၤနၤသၣ်တက့ၢ်.
28 ဖဲဆၢကတီၢ်အပူၤအတ့ၤအံၤန့ၣ်, ယကခိးတၢ်လၢထံကျိ စိးခံတဖၣ်ဖဲပှၢ်မုၢ်ကနၢအပူၤ, တုၤယဒိးန့ၢ်တၢ်ကစီၣ်လၢသု အိၣ်န့ၣ်လီၤ.”
29 လၢတၢ်န့ၣ်အဃိစီၤစၤဒိးဒီးစီၤအ့ဘယၤသၢ်က့ၤစိာ်ကဒါက့ၤ ယွၤအတၢ်အၢၣ်လီၤအီလီၤအတလါစီဆှံဆူဝ့ၢ်ယရူၤၡလ့ၣ်အပူၤ ဒီးအိၣ်ဆိးဖဲန့ၣ်လီၤ.
30 စီၤဒၤဝံးလဲၤထီၣ်ဝဲဆူညါဆူကစၢၢ်သ့ၣ်စၤယံးအလိၤဒီးဟီၣ်ဝဲယၢၤဝဲလီၤ. လဲၤတၢ်လၢအခီၣ်ညါသးဒီးကးဘၢအခိၣ်ဒ်တၢ်သးအုၣ်အပနီၣ်အသိး န့ၣ်လီၤ. ပှၤခဲလၢာ်လၢအပိာ်အခံစ့ၢ်ကီးကးဘၢအခိၣ်ဒီးဟီၣ်ဝဲဒၣ်န့ၣ် လီၤ.
31 ဖဲစီၤဒၤဝံးဘၣ်တၢ်တဲအီၤလၢစီၤအဃံသဖ့ၤလးမၤသကိးလံ တၢ်လၢစီၤအးဘၡါလိၣ်အတၢ်ပူထီၣ်ထီထီၣ်အပူၤလံန့ၣ်, အဝဲဘါထုကဖၣ်ဝဲဒ်အံၤ, “ယွၤဧၢ, ဝံသးစူၤဘိးကဒါကွံာ်စီၤအဃံသဖ့ၤလး အတၢ်ဟ့ၣ်ကူၣ်ဆူတၢ်လၢအခီပညီတအိၣ်ဘၣ်န့ၣ်တက့ၢ်.”
32 ဖဲစီၤဒၤဝံးလဲၤထီၣ်တုၤဆူတၢ်လူၢ်ဒီခိၣ်, ဖဲတၢ်ဘူၣ်ထီၣ်ဘါထီၣ်ယွၤအလီၢ်တပူၤန့ၣ်, အဝဲအတံၤသကိးလၢအနာ် န့ၢ်ဝဲပှၤအၤကးဖိစီၤဃူၤၡဲဟဲသဂၢၢ်အီၤဃုာ်ဒီးအတၢ်ကူ တၢ်သိးယာ်မုၢ်ယာ်ဖျ့ဒီးဖၣ်ကမူၣ်ဖၣ်ဆါအိၣ်လၢအခိၣ်လိၤန့ၣ်လီၤ.
33 စီၤဒၤဝံးစံးဘၣ်အီၤ, “နမ့ၢ်ဟဲဃုာ်ဒီးယၤဒီးနမၤစၢၤယၤ တသ့ဘၣ်နီတမံၤဘၣ်.
34 ဘၣ်ဆၣ်ဒီးနမ့ၢ်က့ၤကဒါက့ၤဆူဝ့ၢ်ပူၤန့ၣ်, နမၤစၢၤယၤသ့ဝဲခီဖျိတၢ်တဲဘၣ်စီၤအးဘၡါလိၣ်လၢခဲအံၤ နကမၤအခ့အပှၤအတၢ်မၤလၢတၢ်သူၣ်တီသးရၤအပူၤဒ်နမၤတ့ၢ်တၢ် အခ့အပှၤအတၢ်မၤလၢအဝဲအပၢ်အဂီၢ်အသိးန့ၣ်လီၤ. ဒီးမၤတၢ်လၢနမၤအီၤသ့ခဲလၢာ်လၢနကကတိၤထီဒါစီၤအဃံသဖ့ၤ လးအတၢ်ဟ့ၣ်ကူၣ်ဟ့ၣ်ဖးတမံၤလၢ်လၢ်န့ၣ်တက့ၢ်.
35 ပှၤလုၢ်တၢ်အခိၣ်စီၤစၤဒိးဒီးစီၤအ့ဘယၤသၢ်ကအိၣ်ဖဲန့ၣ်လီၤ. တဲဘၣ်အဝဲသ့ၣ်ကယဲၢ်တၢ်ကိးမံၤဒဲးလၢနနၢ်ဟူလၢစီၤပၤအနူၢ်ပူၤစီၤပၤန့ၣ်တက့ၢ်.
36 အဝဲသ့ၣ်အိၣ်ဒီးအဖိခွါတဖၣ်လၢအမ့ၢ်, စီၤအဃံမ့ၤဧးဒီးစီၤယိၤနၤသၣ်လၢအသကိးန့ၣ်လီၤ. ဒီးနဆှၢလီၤအဝဲသ့ၣ်ဆူယအိၣ်ဃုာ်ဒီးတၢ်ကစီၣ်လၢနဃုသ့ၣ်ညါပာ်ဖှိၣ်အီၤသ့ဝဲန့ၣ်လီၤ.”
37 မၤသးဒ်န့ၣ်ဒီး, စီၤဒၤဝံးအတံၤသကိးစီၤဃူၤၡဲက့ၤကဒါက့ၤ ဆူဝ့ၢ်ပူၤဖဲစီၤအးဘၡါလိၣ်ဟဲတုၤဝဲအကတီၢ်ဖိန့ၣ်လီၤ.