9
1 ပှၤအိၣ်ဝဲတဂၤလၢအမ့ၢ်ပှၤထူးပှၤတီၤဒီးမ့ၢ်ပှၤအစိကမီၤအိၣ် လၢပှၤဂၤအဖီခိၣ်ဒီးအမံၤမ့ၢ်ဝဲ စီၤကံၣ်လၢစီၤဘံၣ်ယၤမံၣ်အဒူၣ်ပူၤန့ၣ်လီၤ. အဝဲမ့ၢ်စီၤစရိာ်အလံၤခွါ, စီၤအဘိၤအ့လးအဖိခွါ, ဒီးဘၣ်ထွဲဒီးစီၤအဖံၤအဒူၣ်ထၢအကျါဒူၣ်ထၢဖိတဒူၣ်လၢအမ့ၢ်စီၤဘကိရး အဟံၣ်ဖိဃီဖိန့ၣ်လီၤ.
2 အဝဲအိၣ်ဒီးအဖိခွါတဂၤလၢအမံၤမ့ၢ်ဝဲစီၤစီလူး, ပှၤဒိၣ်တၢ်ဂ့ၤဖဲအဒိၣ်တုာ်ခိၣ်ပှဲၤဂ့ၤအကတီၢ်န့ၣ်လီၤ. စီၤစီလူးမ့ၢ်ပှၤအဂီၤထီန့ၣ်ပှၤအဂၤခဲလၢာ်လၢကီၢ်အံၣ်စရ့လးအပူၤ, ခိၣ်တဖျၢၣ်ဒီးဒိၣ်တၢ်ဂ့ၤန့ၣ်ပှၤအဂၤစ့ၢ်ကီးလီၤ.
3 စီၤကံၣ်အကသ့ၣ်ယီၤတနီၤဟးဖျိးကျဲအဃိအဝဲစံးဘၣ်စီၤစီလူး, “ကိးန့ၣ်ကုၢ်တဖၣ်အကျါတဂၤဃုာ်ဒီးနၤဒီးလဲၤဃုထံၣ်က့ၤ ကသ့ၣ်ယီၤတဖၣ်တက့ၢ်.”
4 အဝဲသ့ၣ်လဲၤသကုၤအကစၢၢ်ကလိကီၢ်အ့ဖရဲၣ်ဒီဘ့ၣ်ဒီးဆူကီၢ်ၡၤ လံၡၤအလီၢ်ကဝီၤဘၣ်ဆၣ်ဒီးတထံၣ်က့ၤဝဲဘၣ်. မၤသးဒ်န့ၣ်ဒီးလဲၤဆူညါဆူကီၢ်ၡၤလံၣ်လီၤ. ဘၣ်ဆၣ်ဒီးကသ့ၣ်ယီၤတဖၣ်တအိၣ်ဖဲန့ၣ်ဘၣ်. အန့ၣ်ဝံၤဒီးအဝဲသ့ၣ်လဲၤခီဂာ်ဘံၣ်ယၤမံၣ်အလီၢ်ကဝီၤဘၣ်ဆၣ် တထံၣ်ဒံးအဝဲသ့ၣ်ဘၣ်.
5 ဖဲအဝဲသ့ၣ်ဟဲတုၤလၢကီၢ်စူာ်န့ၣ်စီၤစီလူးစံးဘၣ်အကုၢ်, “မ်ပက့ၤကဒါက့ၤဆူဟံၣ်တက့ၢ်. မ့တမ့ၢ်ဘၣ်ဒီးယပၢ် ကဆိကတီၢ် တၢ်ဆိကမိၣ်ဘၣ်ဃးကသ့ၣ်ယီၤအဂ့ၢ်ဒီးကစးထီၣ်ကိၢ်တၢ်ဂီၤ တၢ်လၢပဂီၢ်လီၤ.”
6 ဒီးအကုၢ်စံးဆၢအီၤ, “အိၣ်ခိးဒၣ်ကလိာ်တက့ၢ်. လၢဝ့ၢ်အံၤအပူၤန့ၣ်ပှၤစီဆှံ လၢအဘၣ်တၢ်ပာ်ကဲအီၤဒိၣ်မးလၢအလၢကယဲၢ်အတၢ်ကတိၤကိးထံၣ်ဒဲး လၢထီၣ်ပှဲၤထီၣ်န့ၣ်, အိၣ်တဂၤလီၤ. မ်ပလဲၤသကိးဆူအအိၣ်တက့ၢ်. ဘၣ်သ့ၣ်သ့ၣ်အဝဲတဲပှၤလၢပထံၣ်က့ၤကသ့ၣ်ယီၤတဖၣ်ကသ့ဝဲ ဖဲလဲၣ်န့ၣ်လီၤ.”
7 စီၤစီလူးသံကွၢ်ဝဲ, “ပမ့ၢ်လဲၤဆူအအိၣ်ဒီး, ပဟ့ၣ်အီၤတၢ်မနုၤကန့ၢ်လဲၣ်. ပထၢၣ်ပူၤတၢ်အီၣ်တၢ်အီတအိၣ်လၢၤဘၣ်. ဒီးတၢ်တအိၣ်ဒီးပှၤနီတမံၤလၢပကဟ့ၣ်အီၤဘၣ်န့ၣ်တမ့ၢ်ဘၣ်ဧါ.”
8 အကုၢ်အပှၤစံးဘၣ်အီၤ, “ယအိၣ်ဒီးစ့နီၣ်ဆံးဆံးဖိတဘ့ၣ်လီၤ. ယဟ့ၣ်အီၤတၢ်န့ၣ်သ့ဝဲလီၤ. အန့ၣ်ဝံၤဒီးအဝဲကတဲပှၤလၢပဃု ထံၣ်က့ၤကသ့ၣ်ယီၤကသ့ဝဲလီၤ.”
9 စီၤစီလူးစံးဆၢဝဲ, “မ့ၢ်တၢ်ဆိကမိၣ်အဂ့ၤလီၤ. မ်ပလဲၤသကိးတက့ၢ်.” မၤသးဒ်န့ၣ်ဒီး, အဝဲသ့ၣ်လဲၤဆူဝ့ၢ်ဖိလၢပှၤစီဆှံတဂၤအိၣ် ဆိးဝဲန့ၣ်လီၤ.
10 ဖဲအဝဲသ့ၣ်လဲၤထီၣ်ဆူဝ့ၢ်လၢအအိၣ်လၢတၢ်လူၢ်ခိၣ်န့ၣ်, အဝဲသ့ၣ်ထံၣ်ဘၣ်ပိာ်မုၣ်ဖိတနီၤလၢအဟဲထီၣ်ဒ်သိးအကဒၢၣ်ထံ အဂီၢ်လီၤ.
11 အဝဲသ့ၣ်သံကွၢ်ပိာ်မုၣ်ဖိတဖၣ်န့ၣ်, “မ့ၢ်ပှၤထံၣ်တၢ်တဂၤန့ၣ်အိၣ်လၢဝ့ၢ်ပူၤဧါ.”
(အကတီၢ်ဖဲန့ၣ်တၢ်လၢဝံတဂၤန့ၣ်ဘၣ်တၢ်ကိးအီၤလၢပှၤထံၣ်တၢ်, ဒီးလၢတၢ်န့ၣ်အဃိဖဲပှၤတဂၤဂၤသးအိၣ်သံကွၢ်ကစၢ်ယွၤတၢ်သံ ကွၢ်တထံၣ်ဒီးအဝဲကစံးဝဲ, “မ်ပလဲၤဆူပှၤထံၣ်တၢ်အအိၣ်တက့ၢ်.” န့ၣ်လီၤ.)
12 ပိာ်မုၣ်ဖိတဖၣ်စံးဝဲ, “မ့ၢ်, အိၣ်ဝဲဒၣ်လီၤ. နီၢ်နီၢ်န့ၣ်အဝဲအိၣ်ဒၣ်ဖဲသုမဲာ်ညါတစဲးန့ၣ်လီၤ. သုမ့ၢ်လဲၤချ့ချ့ဒီးသုကချုးန့ၢ်အီၤန့ၣ်လီၤ.
13 သုမ့ၢ်လဲၤနုာ်ဆူဝ့ၢ်ပူၤတဘျီဃီဒီးသုကထံၣ်အီၤလီၤ. အဝဲဟဲတုၤလၢဝ့ၢ်ပူၤတနံၤအံၤန့ၣ်လီၤ. အဂ့ၢ်ဒ်အံၤပှၤဂီၢ်မုၢ်ကလုၢ်ထီၣ်တၢ်လုၢ်တၢ်ပာ်တမံၤလၢတၢ်လုၢ် လီၢ်အဖီခိၣ်လၢအအိၣ်လၢတၢ်လူၢ်ဒီခိၣ်န့ၣ်လီၤ. တချုးဒံးလၢအဝဲဟဲတုၤဒံးဖဲန့ၣ်ဘၣ်ဒီးပှၤဂီၢ်မုၢ်လၢတၢ် ကွဲမုာ်အီၤတဖၣ်တစးထီၣ်အီၣ်တၢ်ဘၣ်. မ့ၢ်လၢအဝဲကဘၣ်ဆိၣ်ဂ့ၤတၢ်လုၢ်တၢ်ပာ်လၢအဆိအဃိန့ၣ်လီၤ. သုမ့ၢ်လဲၤခဲအံၤဒီးသုကထံၣ်အီၤတချုးဒံးဘၣ်လၢ အဝဲလဲၤထီၣ်ဆူကစၢၢ်ဒီခိၣ်ဒ်သိးကအီၣ်တၢ်န့ၣ်လီၤ.”
14 မၤသးဒ်န့ၣ်ဒီး, စီၤစီလူးဒီးအကုၢ်န့ၣ်လဲၤဆူညါဆူဝ့ၢ်ပူၤ န့ၣ်လီၤ. ဒီးဖဲအဝဲသ့ၣ်လဲၤနုာ်ဝဲန့ၣ်, အဝဲသ့ၣ်ထံၣ်စီၤၡမူၤအ့လးဟဲ ထီၣ်လိၤလိၤဆူအဝဲသ့ၣ်အအိၣ်လၢအတၢ်လဲၤကျဲ, ဆူတၢ်ဘူၣ်ထီၣ်ဘါထီၣ်အလီၢ်န့ၣ်လီၤ.
15 ဒီးခဲကနံၣ်အံၤ, လၢအပူၤကွံာ်တနံၤန့ၣ်ယွၤစံးဘၣ်တ့ၢ်စီၤၡမူၤအ့လး,
16 “ခဲမုၢ်ဆ့ၣ်လၢအဆၢကတီၢ်ဒ်အံၤန့ၣ်, ယကဆှၢလီၤပှၤတဂၤလၢစီၤ ဘံၣ်ယၤမံၣ်အဒူၣ်ဆူနအိၣ်လီၤ. ဖှူအီၤဒ်ယပှၤဂီၢ်မုၢ်အံၣ်စရ့လးအပှၤပၢတၢ်တက့ၢ်. ဒီးအဝဲဒၣ်ကအုၣ်က့ၤခီၣ်က့ၤအဝဲသ့ၣ်လၢပှၤဖလ့ၡသးဖိတဖၣ်အစု ပူၤလီၤ. ယထံၣ်ဘၣ်တ့ၢ်ယပှၤဂီၢ်မုၢ်အတၢ်နးတၢ်ဖှီၣ်ဒီးနၢ်ဟူ တ့ၢ်အဝဲသ့ၣ်အတၢ်ကိးထီၣ်လၢတၢ်မၤစၢၤအဂီၢ်လီၤ.”
17 ဖဲစီၤၡမူၤအ့လးထံၣ်စီၤစီလူးန့ၣ်, ယွၤစံးဘၣ်အီၤ, “အဝဲအံၤမ့ၢ်ပှၤတဂၤလၢယတဲနၤလၢအဂ့ၢ်န့ၣ်လီၤ. အဝဲကပၢယပှၤဂီၢ်မုၢ်လီၤ.”
18 ဖဲန့ၣ်အခါ, စီၤစီလူးလဲၤဃီၤဆူစီၤၡမူၤအ့လးအအိၣ်ဖဲ အအိၣ်ဝဲဘူးဒီးကျဲစၢၤန့ၣ်ဒီးသံကွၢ်ဝဲ, “တဲဘၣ်ယၤ, မ့ၢ်ပှၤထံၣ်တၢ်တဂၤအိၣ်ဖဲလဲၣ်န့ၣ်တက့ၢ်.”
19 စီၤၡမူၤအ့လးစံးဆၢအီၤ, “ယမ့ၢ်ပှၤထံၣ်တၢ်န့ၣ်လီၤ. လဲၤဆိပာ်လၢယမဲာ်ညါဆူတၢ်ဘူၣ်တၢ်ဘါအလီၢ်တက့ၢ်. သုဝဲခံဂၤလိာ်သုကဘၣ်အိၣ်ဒီးယၤလၢတနံၤညါအံၤန့ၣ်လီၤ. ခဲမုၢ်ဆ့ၣ်ဂီၤခီန့ၣ်ယကစံးဆၢကယဲၢ်သုတၢ်သံကွၢ်တဖၣ်ဒီးဆှၢ သုဆူသုကျဲအဖီခိၣ်န့ၣ်လီၤ.
20 မ့မ့ၢ်လၢကသ့ၣ်ယီၤတဖၣ်လၢအဟါမၢ်တ့ၢ်ဝဲလၢအပူၤကွံာ်သၢသီ အဂီၢ်န့ၣ်, ဘၣ်ကိၢ်ဘၣ်ဂီၤလၢအဂ့ၢ်တဂ့ၤ. အဝဲသ့ၣ်ဘၣ်တၢ်ထံၣ်န့ၢ်က့ၤအီၤလံ. ဘၣ်ဆၣ်ဒီးပှၤတဂၤလၢကီၢ်အံၣ်စရ့လးအပှၤဂီၢ်မုၢ်လိၣ်ဘၣ်အီၤ အါအါကလဲာ်န့ၣ်မ့ၢ်မတၤလဲၣ်. အဝဲန့ၣ်မ့ၢ်နၤ, နၤဒီးနပၢ်အပှၤဟံၣ်ဖိလီၤ.”
21 စီၤစီလူးစံးဆၢဝဲဒၣ်, “ယဘၣ်ဃးဒီးစီၤဘံၣ်ယၤမံၣ်အဒူၣ် လၢအမ့ၢ်ပှၤအဒူၣ်အဆံးကတၢၢ်လၢကီၢ်အံၣ်စရ့လးအပူၤဒီးယဟံၣ်ဖိဃီဖိန့ၣ် မ့ၢ်ပှၤတၢ်အကါဒိၣ်အစှၤကတၢၢ်လၢဒူၣ်တဒူၣ်အပူၤလီၤ. ဘၣ်မနုၤအဃိနကတိၤတၢ်ဒီးယၤဒ်သိးအံၤန့ၣ်လဲၣ်.”
22 အန့ၣ်ဝံၤဒီး, စီၤၡမူၤအ့လးဆှၢစီၤစီလူးဒီးအကုၢ်ဆူဒၢးတဒၢးဖးဒိၣ်အပူၤဒီး ဟ့ၣ်အီၤတၢ်လီၢ်တတီၤလၢစီၢ်နီၤခိၣ်အခိၣ်ထိး ဖဲပှၤသမှံၤကအိၣ်ဝဲခဲလၢာ်အဂၤသၢဆံဃၣ်ဃၣ်ဆ့ၣ်နီၤဝဲအလီၢ်န့ၣ်လီၤ.
23 စီၤၡမူၤအ့လးစံးဘၣ်ပှၤဖီတၢ်အီၣ်တၢ်အီ, “ဟဲစိာ်တၢ်ဖံးတၢ်ညၣ်တလိၣ်လၢယဟ့ၣ်နၤဒ်သိးနကပာ်လီၤဆီ အီၤန့ၣ်တက့ၢ်.”
24 မၤသးဒ်န့ၣ်ဒီး, ပှၤဖီတၢ်အီၣ်တၢ်အီန့ၣ်ဟဲစိာ်ထီၣ်တၢ်ညၣ်တလိၣ် လၢတၢ်ဃုထၢပာ်လီၤဆီဆီအီၤလၢအခီၣ်တကပၤဒီးပာ်အီၤလၢစီၤ စီလူးအမဲာ်ညါလီၤ. စီၤၡမူၤအ့လးစံးဝဲ, “ကွၢ်ကွၢ်, အဝဲအံၤမ့ၢ်တၢ်ညၣ်လၢအဘၣ်တၢ်ပာ်ဃးအီၤလၢနဂီၢ်န့ၣ်လီၤ. အီၣ်အီၤတက့ၢ်. ယပာ်ဃးအီၤလၢနဂီၢ်လၢနကအီၣ်အီၤတဘျီ အံၤဃုာ်ဒီးပှၤဂီၢ်မုၢ်လၢယကွဲတ့ၢ်အီၤတဖၣ်န့ၣ်လီၤ.” မၤသးဒ်န့ၣ်ဒီး, စီၤစီလူးအီၣ်သကိးတၢ်ဒီးစီၤၡမူၤအ့လးလၢ မုၢ်တနံၤန့ၣ်လီၤ.
25 ဖဲအဝဲသ့ၣ်က့ၤလီၤလၢတၢ်ဘူၣ်တၢ်ဘါအလီၢ်ဆူ ဝ့ၢ်ပူၤဒီးအဝဲသ့ၣ်မၤန့ၢ်လီၢ်မံခးတခါလၢစီၤစီလူးအဂီၢ် လၢဟံၣ်ခိၣ်ဒုးအဖီခိၣ်လီၤ. ဒီးမံဝဲဖဲန့ၣ်လီၤ.
26 လၢမုၢ်ဆ့ၣ်ထီၣ်ဂီၤဂီၤတၢ်ခံးဒံးန့ၣ်စီၤၡမူၤအ့လးကိးစီၤ စီလူးလၢဟံၣ်ခိၣ်ဒုးအလိၤန့ၣ်, “ဂဲၤထၢၣ်တက့ၢ်. ယကဆှၢနၤဆူနကျဲအဖီခိၣ်လီၤ.” စီၤစီလူးဂဲၤထၢၣ်ဒီးအဝဲဒၣ်ဒီးစီၤၡမူၤအ့လးလဲၤထီၣ် သကိးဆူကျဲမုၢ်လိၤန့ၣ်လီၤ.
27 ဖဲအဝဲသ့ၣ်တုၤဃီၤဆူဝ့ၢ်အထိးနါန့ၣ်စီၤၡမူၤအ့လးစံးဘၣ် စီၤစီလူး, “တဲဘၣ်ကုၢ်န့ၣ်ဒ်သိးကလဲၤပာ်လၢပမဲာ်ညါတက့ၢ်.” ကုၢ်တဂၤန့ၣ်လဲၤတၢ်ဒီးစီၤၡမူၤအ့လးစံးကဒီးဝဲဆူညါ, “အိၣ်ဖဲအံၤတစိၢ်ဒီးယကတဲဘၣ်နၤတၢ်လၢကစၢ်ယွၤစံးတ့ၢ်ဝဲ ဒၣ်န့ၣ်လီၤ.”