8
1 ဒီးတုၤစီၤၡမူၤအ့လးအသးပှၢ်ထီၣ်န့ၣ်, အဝဲဒုးကဲထီၣ်အဖိခွါတဖၣ် လၢပှၤစံၣ်ညီၣ်ကွီၢ်တဖၣ်လၢကီၢ်အံၣ်စရ့လးအပူၤလီၤ.
2 အဖိခွါအဒိၣ်တဂၤန့ၣ်အမံၤမ့ၢ်ဝဲစီၤယိၤအ့လးဒီးအဆံးတဂၤ မ့ၢ်စီၤအဘံယၤလီၤ. အဝဲသ့ၣ်မ့ၢ်ပှၤစံၣ်ညီၣ်ကွီၢ်တဖၣ်လၢဝ့ၢ်ဘ့ၢ်ၡဘၤအပူၤန့ၣ်လီၤ.
3 ဘၣ်ဆၣ်ဒီး, အဝဲသ့ၣ်တမၤထွဲအပၢ်အဒိအတဲာ်ဘၣ်. အဝဲသ့ၣ်အသးစဲဒၣ်ထဲလၢကမၤန့ၢ်တိၢ်ဧိၤစ့ဧိၤန့ၣ်လီၤ. လၢတၢ်န့ၣ်အဃိအဝဲသ့ၣ်တူၢ်လိာ်ခိၣ်ဖးလာ်ဆှိးတဖၣ်ဒီးတစံၣ် ညီၣ်တဲာ်တၢ်ဂ့ၢ်တၢ်ကျိၤတဖၣ်လၢတၢ်သူၣ်တီသးလိၤအပူၤဘၣ်လီၤ.
4 တုၤနုၤတစုကယဲၢ်ကီၢ်အံၣ်စရ့လးဖိအခိၣ်အနၢ်တဖၣ်ထံၣ်လိာ်ပာ်ဖှိၣ်ထီၣ်သး ဒီးလဲၤဆူစီၤၡမူၤအ့လးအအိၣ်လၢဝ့ၢ်ရၤမါအ ပူၤ,
5 ဒီးစံးဘၣ်အီၤ, “ကွၢ်ကွၢ်, နသးပှၢ်ထီၣ်လံ. ဒီးနဖိခွါတဖၣ်န့ၣ်တမၤထွဲနဒိနတဲာ်ဘၣ်. လၢတၢ်န့ၣ်အဃိခဲအံၤန့ၣ်, ဃုထၢပာ်လီၤန့ၢ်ပှၤစီၤပၤတဂၤလၢ ကပၢတၢ်လၢပဖီခိၣ်, ဒ်သိးပကအိၣ်ဒီးစီၤပၤတဂၤဒ်ထံကီၢ်အဂၤတဖၣ်အသိးန့ၣ်တက့ၢ်.”
6 စီၤၡမူၤအ့လးတဘၣ်သူၣ်ဘၣ်သးလၢအဝဲသ့ၣ်အတၢ်ဃ့န့ၢ်စီၤပၤ တဂၤအဂီၢ်န့ၣ်ဘၣ်. အဃိဒီး, အဝဲဘါထုကဖၣ်တၢ်ဆူ ယွၤအအိၣ်လီၤ.
7 ဒီးယွၤစံးဘၣ်အီၤ, “ဒိကနၣ်တၢ်ကိးမံၤဒဲးလၢပှၤဂီၢ်မုၢ် စံးဘၣ်နၤတက့ၢ်. ပှၤတဂၤလၢအဝဲသ့ၣ်သမၢဂ့ၢ်လိာ်အီၤန့ၣ်တမ့ၢ်နၤဘၣ်. ယမ့ၢ်ပှၤတဂၤလၢအဝဲသ့ၣ်သမၢဂ့ၢ်လိာ်အီၤဒ်အစီၤပၤအသိးန့ၣ် လီၤ.
8 စးထီၣ်လၢယထုးထီၣ်ကွံာ်အဝဲသ့ၣ်လၢကီၢ်အဲၤကူပတူးအပူၤလံၤ လံၤန့ၣ်အဝဲသ့ၣ်ဃၣ်ကွံာ်အသးလၢယအိၣ်ဒီးဘူၣ်ထီၣ်ဘါထီၣ်ကစၢ် အဂၤတဖၣ်, ဒီးခဲအံၤအဝဲသ့ၣ်မၤဘၣ်နၤဒ်အမၤတ့ၢ်ယၤထီဘိ အသိးန့ၣ်လီၤ.
9 မၤသးဒ်န့ၣ်ဒီးခဲအံၤ, ဒိကနၣ်အဝဲသ့ၣ်တက့ၢ်. ဘၣ်ဆၣ်ဒီးဟ့ၣ်ပလီၢ်ပဒီအဝဲသ့ၣ်အသးဃံးဃံးဒီး တဲနၢ်ပၢၢ်အဝဲသ့ၣ်လၢအစီၤပၤတဖၣ်ကမၤအီၤဒ်လဲၣ်အဂ့ၢ်တက့ၢ်.”
10 စီၤၡမူၤအ့လးတဲဘၣ်ပှၤဂီၢ်မုၢ်လၢအဃ့အီၤစီၤပၤတဂၤန့ၣ် ကယဲၢ်တၢ်ကိးမံၤဒဲးလၢယွၤစံးဘၣ်တ့ၢ်အီၤန့ၣ်လီၤ.
11 စီၤၡမူၤအ့လးစံးဝဲ, “အအံၤမ့ၢ်တၢ်လၢသုစီၤပၤကမၤဘၣ်သု န့ၣ်လီၤ. အဝဲကဒုးကဲထီၣ်သုဖိခွါတဖၣ်လၢအသုးဖိတဖၣ်, တနီၤကမၤတၢ်လၢအဝဲအလ့ၣ်ကဟၣ်ဒုးသုးတဖၣ်အဂီၢ်ဒီးပှၤအဂၤတဖၣ် ကဃ့ၢ်လၢအဝဲအလ့ၣ်ကဟၣ်ဒုးသုးတဖၣ်အမဲာ်ညါလီၤ.
12 အဝဲကဒုးကဲထီၣ်အီၤတနီၤလၢပှၤအဂၤတကထိအခိၣ်ဒီးတနီၤလၢပှၤ အဂၤယဲၢ်ဆံအခိၣ်လီၤ. သုဖိခွါတဖၣ်ကဘၣ်ထူန့ၢ်အဝဲအစံာ်တဖၣ်, ကူးန့ၢ်က့ၤအဘုဧိၤဟုဧိၤ, ဒီးဘှီန့ၢ်အစုကဝဲၤဒီးတၢ်အပီးအလီလၢအလ့ၣ်ကဟၣ်ဒုးသုးတဖၣ် အဂီၢ်န့ၣ်လီၤ.
13 သုဖိမုၣ်တဖၣ်ကဘၣ်မၤဃါဃုာ်တၢ်နၢမူအသိလၢအဝဲအဂီၢ်ဒီးမၤ တၢ်ဒ်အပှၤဖီမ့ၤဖိတဖၣ်ဒီးအပှၤဘၢကိၣ်တဖၣ်လီၤ.
14 အဝဲကဟံးန့ၢ်ကွံာ်သုစံာ်ဧိၤပှဲၤဧိၤ, စပံးလီၢ်လၢအဂ့ၤကတၢၢ်, သ့ၣ်စၤယံးအထံးတဖၣ်ဒီးဟ့ၣ်အီၤဆူ အပှၤခိၣ်ပှၤနၢ်တဖၣ်အအိၣ်လီၤ.
15 အဝဲကဟံးန့ၢ်ကွံာ်သုဘုဧိၤဟုဧိၤဒီးစပံးသၣ်တဖၣ်ဆံဆဲၣ်ပူတပူလၢ အနူၢ်ဧိၤစီၤဧိၤအပဒိၣ်ပပှၢ်တဖၣ်ဒီးပဒိၣ်ပပှၢ်အဂၤတဖၣ် အဂီၢ်လီၤ.
16 အဝဲကဟံးန့ၢ်ကွံာ်သုကုၢ်သုပှၤတဖၣ်ဒီးသုဂီၤဘုၣ်ဂီၤဖံး တဖၣ်ဒီးကသ့ၣ်ယီၤအဂ့ၤကတၢၢ်တဖၣ်ဒီးကမၢအမၤတၢ်လၢအဂီၢ်န့ၣ် လီၤ.
17 အဝဲကဟံးန့ၢ်ကွံာ်သုသိအဖုအဂီၢ်တဖၣ်ဆံဆဲၣ်ပူတပူလီၤ. ဒီးသုနီၢ်ကစၢ်ဒၣ်ဝဲသုကကဲထီၣ်အကုၢ်အပှၤတဖၣ်န့ၣ်လီၤ.
18 ဖဲအဆၢကတီၢ်န့ၣ်တုၤဃီၤဒီး, သုက, ကဒူးကဒ့ၣ်တၢ်ခၣ်ဟ့သးလၢ သုစီၤပၤ, စီၤပၤလၢသုနီၢ်ကစၢ်ဒၣ်ဝဲဃုထၢတ့ၢ်အီၤအဃိလီၤ. ဘၣ်ဆၣ်ယွၤတဒိကနၣ်ဘၣ်သုတၢ်ကဒူးကဒ့ၣ်တဖၣ်ဘၣ်.”
19 ပှၤဂီၢ်မုၢ်တကနၣ်ဃုာ်စီၤၡမူၤအ့လးနီတစဲးဘၣ်. မ့မ့ၢ်အဝဲသ့ၣ်စံးဝဲ, “အတွးတအိၣ်ဘၣ်. ပသးလီစီၤပၤတဂၤ,
20 ဒ်သိးပကလီၤဂာ်ဒ်ထံကီၢ်အဂၤတဖၣ်အသိး, အိၣ်ဒီးပစီၤပၤဒၣ်ပဝဲလၢအပၢဘၣ်ပှၤဒီးဆှၢပှၤဆူတၢ်ဒုးပျီ ပူၤလၢပကဒုးပတၢ်ဒုးတဖၣ်အဂီၢ်န့ၣ်လီၤ.
21 စီၤၡမူၤအ့လးကနၣ်တၢ်ကိးမံၤဒဲးလၢအဝဲသ့ၣ်စံးဝဲဝံၤဒီး, လဲၤတဲဘၣ်က့ၤတၢ်န့ၣ်ဆူယွၤအအိၣ်လီၤ.
22 ယွၤစံးဆၢဝဲဒၣ်, “မၤဒ်အဝဲသ့ၣ်သးလီဝဲအသိးဒီးဟ့ၣ်အီၤ လၢစီၤပၤတဂၤတက့ၢ်.” တုၤနုၤတစုစီၤၡမူၤအ့လးတဲဘၣ်ပှၤကိးဂၤဒဲးလၢ ကီၢ်အံၣ်စရ့လးအပူၤလၢအကက့ၤဆူအဟံၣ်န့ၣ်လီၤ.