10
1 တုၤနုၤတစုစီၤၡမူၤအ့လးဟံးန့ၢ်သ့ၣ်စၤယံးအသိတကိဒီးလူ လီၤအီၤလၢစီၤစီလူးအခိၣ်လိၤဒီးနၢမူအီၤလီၤ. ဒီးစံးဝဲဒၣ်, “ယွၤဖှူနၤဒ်အပှၤဂီၢ်မုၢ်ကီၢ်အံၣ်စရ့လးအပှၤပၢတၢ်တဂၤ အသိးန့ၣ်လီၤ. နကဘၣ်ပၢအဝဲအပှၤဂီၢ်မုၢ်ဒီးဒီဒၣ်အိၣ်ပှိၤအီၤလၢ ကယဲၢ်အဒုၣ်အဒါတဖၣ်ခဲလၢာ်လီၤ. ဒီးအဝဲအံၤမ့ၢ်တၢ်အုၣ်အသးတမံၤလၢယွၤဃုထၢတ့ၢ်နၤ, လၢနကကဲထီၣ်ပှၤပၢဘၣ်အပှၤဂီၢ်မုၢ်န့ၣ်လီၤ.
2 တုၤနဟးထီၣ်လၢယအိၣ်တနံၤအံၤန့ၣ်, နကထံၣ်လိာ်နသးဒီးပှၤပိာ်ခွါခံဂၤ ဖဲနီၢ်ရၤဃ့လးအသွၣ်ခိၣ်အကပၤလၢဝ့ၢ်စ့လစၤလၢ ဘံၣ်ယၤမံၣ်အလီၢ်ကဝီၤအပူၤန့ၣ်လီၤ. အဝဲသ့ၣ်ကတဲဘၣ်နၤလၢကသ့ၣ်ယီၤတဖၣ်လၢနဃုအီၤန့ၣ်ဘၣ်တၢ်ထံၣ် န့ၣ်က့ၤအီၤလံ, အဃိနပၢ်တသူၣ်ကိၢ်သးဂီၤလၢအဝဲသ့ၣ်အဃိလၢၤဘၣ်. မ့မ့ၢ်အသးကိၢ်တၢ်လၢနဂီၢ်ဒီးသံကွၢ်တၢ်တထံၣ်ဃီ, တၢ်လၢယဖိခွါအဂ့ၢ်န့ၣ်ယကဘၣ်မၤတၢ်ဒ်လဲၣ်.
3 နကလဲၤတၢ်ဖဲန့ၣ်တုၤလၢနဟဲတုၤဆူသ့ၣ်စီဆှံလၢဝ့ၢ်တၤဘိၣ် ဖဲနကဘၣ်သဂၢၢ်ဒီးပှၤသၢဂၤလၢအလဲၤတၢ်ဒ်သိးကလုၢ်ထီၣ်တၢ်လုၢ်တၢ်ပာ်တမံၤ ဆူယွၤအအိၣ်လၢဝ့ၢ်ဘ့ၤသ့လးန့ၣ်လီၤ. လၢအကျါတဂၤန့ၣ်ကဆှၢမဲာ်တဲးလဲးသးစၢ်ဖိသၢဒု, အဂၤတဂၤန့ၣ်ကစိာ်ကိၣ်သၢဖျၢၣ်ဒီးသၢဂၤတဂၤန့ၣ်ကအိၣ်ဒီးထၢၣ် တၢ်ဖံးပှဲၤဒီးစပံးထံတထၢၣ်လီၤ.
4 အဝဲသ့ၣ်ကဟံးစုကွၢ်မဲာ်နၤဒီးဟ့ၣ်နၤလၢကိၣ်ခံလိၣ်လၢနကဘၣ် တူၢ်လိာ်အီၤန့ၣ်လီၤ.
5 အန့ၣ်ဝံၤဒီးနကလဲၤဆူကစၢ်ယွၤအကစၢၢ်အအိၣ်လၢဝ့ၢ်ကံးဘဧးအပူၤ ဖဲပှၤဖလ့ၡသးဖိတဖၣ်သူၣ်ဒဲအလီၢ်အိၣ်ဝဲတတီၤန့ၣ်လီၤ. ဖဲတၢ်လဲၤနုာ်လီၤဆူဝ့ၢ်အကျဲစၢၤန့ၣ်နကထံၣ်လိာ်ဒီးဝံတဖု ဟဲလီၤလၢတၢ်လုၢ်လီၢ်အိၣ်လၢကစၢၢ်လိၤန့ၣ်ဒ့ဒီးသီတူၢ်တဖၣ်, ပှီၢ်ဒၢတဖၣ်, အူပံတဖၣ်ဒီးမၤသီၣ်စှၢၢ်စှံးတဖၣ်န့ၣ်လီၤ. အဝဲသ့ၣ်ကဂဲၤကလံာ်ဒီးကိးပသူဝဲလီၤ.
6 သတူၢ်ကလာ်န့ၣ်ယွၤအသးကဟဲလီၤလၢနလိၤဒီးပၢၤနၤဒီးနကဂဲၤ ကလံာ်ဃုာ်လၢအဝဲသ့ၣ်အတၢ်ဘူၣ်တၢ်ဘါအတၢ်ဂဲၤကလံာ်အပူၤဒီးကိး ပသူထီၣ်ဒီးနကကဲထီၣ်ပှၤလီၤဆီတဂၤန့ၣ်လီၤ.
7 ဖဲတၢ်တဖၣ်အံၤမၤအသးန့ၣ်, မၤဒ်ကယဲၢ်တၢ်လၢကစၢ်ယွၤဆှၢနၤလၢ နကမၤအီၤန့ၣ်တက့ၢ်.
8 နကလဲၤဆိလၢယမဲာ်ညါဆူဝ့ၢ်ကံးလကၤလးဖဲယကထံၣ်လိာ်နၤဒီး လုၢ်ထီၣ်တၢ်လုၢ်မ့ၣ်အူတဖၣ်ဒီးတၢ်လုၢ်မၤဃူမၤဖိးတၢ်တဖၣ်န့ၣ် လီၤ. အိၣ်ခိးဖဲန့ၣ်နွံသီတုၤလၢယဟဲဒီးတဲနၤတၢ်လၢနကဘၣ်မၤတဖၣ် န့ၣ်တက့ၢ်.”
9 ဖဲစီၤစီလူးဃၣ်အသးလၢကဟးထီၣ်လၢစီၤၡမူၤအ့လးအအိၣ်ဒီး ကစၢ်ယွၤဟ့ၣ်စီၤစီလူးအသးအသီတကလုာ်လီၤ. ဒီးတၢ်ကိးမံၤဒဲးလၢစီၤၡမူၤအ့လးစံးတ့ၢ်အီၤန့ၣ်မၤအသး လၢမုၢ်တနံၤန့ၣ်လီၤ.
10 ဖဲစီၤစီလူးဒီးအကုၢ်လဲၤတုၤဆူဝ့ၢ်ကံးဘဧၤန့ၣ်, ဝံတဖုဟဲသဂၢၢ်အီၤန့ၣ်လီၤ. သတူၢ်ကလာ်န့ၣ်ကစၢ်ယွၤအသးပၢၤဃာ် အီၤဒီးအဝဲနုာ်လီၤဆူဝံတဖၣ်အတၢ်ဘူၣ်တၢ်ဘါအတၢ်ဂဲၤကလံာ်ဒီး တၢ်ကိးပသူန့ၣ်လီၤ.
11 ပှၤဂီၢ်မုၢ်လၢအသ့ၣ်ညါတ့ၢ်အီၤလၢညါတဖၣ်ထံၣ်အမၤတၢ်အံၤဒီး သံကွၢ်လိာ်အသးတဂၤဒီးတဂၤ, “တၢ်မၤအသးဒီးစီၤကံၣ်အဖိခွါဒ်လဲၣ်. မ့ၢ်စီၤစီလူးကဲထီၣ်ဝံတဂၤလံဧါ.”
12 ပှၤအိၣ်ဖဲန့ၣ်တဂၤသံကွၢ်ဝဲ, “ဝံအဂၤတဖၣ်အံၤမ့ၢ်တၢ်ဒ်လဲၣ်. သုဆိကမိၣ်အဝဲသ့ၣ်အပၢ်မ့ၢ်မတၤတဖၣ်န့ၣ်ဒ်လဲၣ်.” တၢ်အံၤန့ၣ်မ့ၢ်တၢ်ကတိၤ, “စီၤစီလူးဒၣ်လဲာ်ကဲထီၣ်ဝံတဂၤ လံဧါ,” အိၣ်ထီၣ်အခီၣ်ထံးန့ၣ်လီၤ.
13 ဖဲစီၤစီလူးအတၢ်ဂဲၤကလံာ်ဒီးတၢ်ကိးပသူလၢတၢ်သူၣ်ဂဲၤသး ဂဲၤဖးဒိၣ်အပူၤဝံၤန့ၣ်အဝဲလဲၤဆူတၢ်လုၢ်လီၢ်လၢတၢ်လူၢ်ဖီ ခိၣ်လီၤ.
14 စီၤစီလူးအဖါတံၢ်ထံၣ်အီၤဒီးအကုၢ်ဒီးသံကွၢ်အဝဲသ့ၣ်, “သုလဲၤတုၤဆူလဲၣ်.”
ဒီးစီၤစီလူးစံးဆၢဝဲ, “ပဟးဃုကသ့ၣ်ယီၤတဖၣ်လီၤ. တုၤမ့ၢ်ပတထံၣ်အီၤဘၣ်ဒီးပလဲၤထံၣ်လိာ်စီၤၡမူၤအ့လးလီၤ.”
15 စီၤစီလူးအဖါတံၢ်သံကွၢ်အီၤ, “ဒီးအဝဲတဲနၤတၢ်မနုၤ လဲၣ်.”
16 စီၤစီလူးစံးဆၢဝဲ, “အဝဲတဲပှၤလၢဆၣ်ဖိကီၢ်ဖိတဖၣ်န့ၣ် ဘၣ်တၢ်ထံၣ်က့ၤအီၤလံန့ၣ်လီၤ.” ဘၣ်ဆၣ်ဒီးအဝဲတတဲဘၣ်အဖါတံၢ်လၢစီၤၡမူၤအ့လးတဲ တၢ်ဘၣ်ဃးအဝဲကကဲထီၣ်စီၤပၤအဂ့ၢ်န့ၣ်ဘၣ်.
17 စီၤၡမူၤအ့လးကိးပှၤဂီၢ်မုၢ်လၢကပာ်ဖှိၣ်ထီၣ်အသးလၢတၢ်ဘူၣ် တၢ်ဘါအတၢ်ရ့လိာ်မုာ်လိာ်တမံၤအဂီၢ်ဖဲဝ့ၢ်မံးစပၤ,
18 ဒီးစံးဘၣ်အဝဲသ့ၣ်, “ယွၤ, ကီၢ်အံၣ်စရ့လးအကစၢ်ယွၤစံးဝဲ ဒၣ်, ယထုးထီၣ်တ့ၢ်သုလၢကီၢ်အဲၤကူပတူးဒီးအုၣ်က့ၤခီၣ်က့ၤသုလၢ ပှၤအဲၤကူပတူးဖိတဖၣ်အစုပူၤဒီးလၢကယဲၢ်ပှၤဂီၢ်မုၢ်အဂၤတဖၣ် လၢအမၤနးမၤဖှီၣ်သုန့ၣ်လီၤ.
19 ယမ့ၢ်သုကစၢ်ယွၤ, ပှၤတဂၤလၢအအုၣ်က့ၤခီၣ်က့ၤသုလၢကယဲၢ်သုတၢ်ကိၢ်တၢ်ဂီၤဒီး တၢ်ကီတၢ်ခဲတဖၣ်အပူၤန့ၣ်လီၤ. ဘၣ်ဆၣ်တနံၤအံၤသုညိကွံာ်ယၤဒီးဃ့တ့ၢ်ယၤလၢယကဟ့ၣ်သု စီၤပၤတဂၤလီၤ. ဂ့ၤလံ. မ့မ့ၢ်ဒ်န့ၣ်ဒီး, ပာ်ဖှိၣ်ထီၣ်သုသး လၢယွၤအမဲာ်ညါဒ်ဒူၣ်, တဒူၣ်ဘၣ်တဒူၣ်ဒီးဒူၣ်ထၢတဒူၣ်တထၢဘၣ် တဒူၣ်တထၢအသိးတက့ၢ်.”
20 အန့ၣ်ဝံၤဒီးစီၤၡမူၤအ့လးမၢဒူၣ်တဒူၣ်ဘၣ်တဒူၣ်ဟဲထီၣ်ဆူတၢ်မဲာ်ညါ ဒီးယွၤဃုထၢထီၣ်စီၤဘံၣ်ယၤမံၣ်အဒူၣ်လီၤ.
21 ဒီးစီၤၡမူၤအ့လးမၢဟံၣ်ဖိဃီဖိတဖၣ်လၢစီၤဘံၣ်ယၤမံၣ် အဒူၣ်အပူၤဟဲထီၣ်ဆူညါဒီးစီၤမၤတြံၤအဟံၣ်ဖိဃီဖိတဖၣ်ဘၣ် တၢ်ဃုထၢထီၣ်အီၤလီၤ. ဝံၤဒီးပိာ်ခွါတဖၣ်လၢစီၤမၤတြံၤအဟံၣ်ဖိဃီဖိအပူၤဟဲထီၣ်ဆူညါ ဒီးစီၤကံၣ်အဖိခွါစီၤစီလူးဘၣ်တၢ်ဃုထၢထီၣ်အီၤလီၤ. အဝဲသ့ၣ်ဃုဝဲအီၤဘၣ်ဆၣ်ဒီးဖဲအဝဲ သ့ၣ်ဃုအီၤတဘၣ်ဘၣ်န့ၣ်,
22 အဝဲသ့ၣ်သံကွၢ်ယွၤ, “မ့ၢ်ပှၤအဂၤအိၣ်တဂၤဂၤဒံးဧါ.” ယွၤစံးဆၢဝဲဒၣ်, “စီၤစီလူးအိၣ်ဖဲန့ၣ်ဒီးအိၣ်ခူသူၣ်လၢ တၢ်ဖိတၢ်လံၤအကျါလီၤ.”
23 မၤသးဒ်န့ၣ်ဒီး, အဝဲသ့ၣ်လဲၤဃ့ၢ်ဒီးဟဲကိးထီၣ်စီၤစီလူးလၢ ပှၤဂီၢ်မုၢ်အမဲာ်ညါ, ဒီးအဝဲသ့ၣ်ထံၣ်ဘၣ်ဝဲလၢအဝဲဒၣ်အဂီၤထီ န့ၣ်ပှၤအဂၤကိးဂၤဒဲးခိၣ်တဖျၢၣ်န့ၣ်လီၤ.
24 စီၤၡမူၤအ့လးစံးဘၣ်ပှၤဂီၢ်မုၢ်, “အဝဲအံၤ, မ့ၢ်ပှၤတဂၤလၢယွၤဃုထၢထီၣ်အီၤန့ၣ်လီၤ. လၢပဝဲဒၣ်ခဲလၢာ်အကျါပှၤလီၤဂာ်ဒီးအီၤတအိၣ်ဘၣ်နီတဂၤဘၣ်.”
ဒီးကယဲၢ်ပှၤဂီၢ်မုၢ်ခဲလၢာ်ကိးထီၣ်ဝဲ, “မ်ပကစၢ်စီၤပၤအိၣ်ကၢအိၣ်ခိးတက့ၢ်.”
25 စီၤၡမူၤအ့လးတဲနၢ်ပၢၢ်ပှၤဂီၢ်မုၢ်လၢ စီၤပၤတဂၤအခွဲးအယာ်တဖၣ်ဒီးအမူအဒါတဖၣ်, ဝံၤဒီးကွဲးလီၤအီၤလၢလံာ်တဘ့ၣ်အပူၤ, လံာ်လၢအဘၣ်တၢ်ပာ်အီၤလၢတၢ်လီၢ်စီဆှံတတီၤန့ၣ်လီၤ. အန့ၣ်ဝံၤဒီးအဝဲမၢပှၤကိးဂၤဒဲးက့ၤဆူအဟံၣ်လီၤ.
26 စီၤစီလူးစ့ၢ်ကီးက့ၤဆူအဟံၣ်လၢဝ့ၢ်ကံးဘဧၤအပူၤလီၤ. ပှၤပိာ်ခွါတနီၤလၢအဂံၢ်ဆူၣ်ဘါဆူၣ်လၢကစၢ်ယွၤထိးဘၣ်အသးန့ၣ် က့ၤဃုာ်ဒီးအီၤလီၤ.
27 ဘၣ်ဆၣ်ဒီးပှၤကလီကလီတနီၤစံးဝဲဒၣ်, ပှၤတဂၤအံၤမၤတၢ်ဂ့ၤလၢ ပဂီၢ်တမံၤမံၤကသ့ဝဲမနုၤလဲၣ်. အဝဲသ့ၣ်တကနၣ်ဃုာ်စီၤစီလူးဒီးတဟဲစိာ်န့ၢ်အီၤလၢ တၢ်ဟ့ၣ်ကနၢၤနီတမံၤဘၣ်.