1 ဖဲစီၤစီလူးဟဲက့ၤလၢတၢ်ဒုးပှၤဖလ့ၡသးဖိတဖၣ်န့ၣ်, ဘၣ်တၢ်တဲအီၤလၢစီၤဒၤဝံးအိၣ်လၢပှၢ်မုၢ်ကနၢပူၤဘူးဒီးထံ ထီၣ်ပၢၢ်ဧ့ၣ်က့ဒံၤန့ၣ်လီၤ. 2 စီၤစီလူးကိးန့ၣ်ပှၤသုးဖိအဂ့ၤကတၢၢ်အကျါပှၤအဂၤသၢကထိ လၢကီၢ်အံၣ်စရ့လးအပူၤဒီးလဲၤဃုစီၤဒၤဝံးဒီးအပှၤတဖၣ်လၢ လ့မဲာ်တဲးလဲးမံၤအမုၢ်ထီၣ်န့ၣ်လီၤ. 3 အဝဲတုၤဃီၤဖဲလ့ကအိတခါ ဘူးဒီးသိအကရၢတဖၣ်လၢကျဲအကပၤ ဒီးလဲၤနုာ်ဆူလ့ကအိအပူၤဒ်သိးအကမၤဖှံထီၣ်အတၢ်ဝံတၢ်ယိးလီၤ. တၢ်န့ၣ်ဘၣ်အတီၤလၢအမ့ၢ်လ့ကအိတခါဃီဖဲစီၤဒၤဝံး ဒီးအပှၤတဖၣ်အိၣ်ခူသူၣ်ဝဲလၢလ့ကအိအလီၢ်ခံကတၢၢ်န့ၣ်လီၤ. 4 ပှၤတဖၣ်စံးဘၣ်အီၤ, “တၢ်အံၤမ့ၢ်နခွဲးနယာ်လီၤ. ယွၤစံးတ့ၢ်ဝဲလၢကပာ်နဒုၣ်နဒါလၢနစိကမီၤအဖီလာ်ဒီးနမၤအီၤ ဒ်နသးအိၣ်မၤအီၤအသိးန့ၣ်သ့ဝဲဒၣ်လီၤ.” စီၤဒၤဝံးလဲၤစွါဝဲဒီးကူးတဲာ်န့ၣ်စီၤစီလူးအဆ့ကၤဖးထီတက့လီၤ. တၢ်န့ၣ်စီၤစီလူးတသ့ၣ်ညါဝဲဘၣ်. 5 ဘၣ်ဆၣ်ဒီးစးထီၣ်ဖဲန့ၣ်, စီၤဒၤဝံးအခီၣ်ၡ့ၣ်စးထီၣ်မၤတံာ်တာ်အီၤ, 6 ဒီးအဝဲစံးဘၣ်အပှၤတဖၣ်, “မ်ယွၤပၢၤဃးယၤလၢတၢ်မၤဆါဘၣ် ယကစၢ်, လၢယွၤဃုထၢအီၤဒ်စီၤပၤတဂၤအသိးန့ၣ်တက့ၢ်. တစဲးဖိဒၣ်လဲာ်ယတဘၣ်မၤဆါဘၣ်အီၤဘၣ်. အဂ့ၢ်ဒ်အံၤ, အဝဲမ့ၢ်စီၤပၤလၢအဘၣ်တၢ်ဃုထၢအီၤလၢယွၤလီၤ.” 7 မၤသးဒ်န့ၣ်ဒီး, စီၤဒၤဝံးတဲနၢ်ပၢၢ်အပှၤတဖၣ်ဒ်သိးအဝဲသ့ၣ် သုတမၤအၢစီၤစီလူးတဂ့ၤလီၤ. စီၤစီလူးဂဲၤဆၢထၢၣ်ဒီးဟးထီၣ်လၢလၢၢ်ကအိပူၤဒီးစးထီၣ် အတၢ်လဲၤန့ၣ်လီၤ. 8 အန့ၣ်ဝံၤဒီးစီၤဒၤဝံးဟးထီၣ်လၢအလီၢ်ဒီးကိးအီၤလီၤ, “နဲဒၣ်စီၤပၤဖးဒိၣ်ဧၢ” ဒီးစီၤစီလူးဃၣ်တရံးအသးဒီး စီၤဒၤဝံးတီၤလီၤဆူဟီၣ်ခိၣ်လိၤအိၣ်ဒီးတၢ်ယူးယီၣ်, 9 ဒီးစံး, “ဘၣ်မနုၤလၢနဒိကနၣ်ပှၤဂီၢ်မုၢ်လၢအစံးဝဲလၢ ယကျဲးစၢးမၤဆါနၤန့ၣ်လဲၣ်. 10 ခဲအံၤအတီၢ်ပူၤဖိဒၣ်လဲာ်ယွၤပာ်နၤလၢယတၢ်စိကမီၤအဖီလာ်န့ၣ် နထံၣ်ဘၣ်အီၤလၢနနီၢ်ကစၢ်ဒၣ်နဲသ့လီၤ. ယပှၤတနီၤစံးယၤလၢယကမၤသံနၤဘၣ်ဆၣ်ဒီးယသးအုးလၢနဂီၢ်ဒီး စံးလၢယတမၤဆါနၤထဲတစဲးဖိဧိၤဘၣ်. အဂ့ၢ်ဒ်အံၤ, နမ့ၢ်ပှၤတဂၤလၢယွၤဃုထၢအီၤဒ်သိးနကကဲထီၣ်စီၤပၤလီၤ. 11 ကွၢ်တက့ၢ်, ယပၢ်ဧၢ, ကွၢ်ဃီၤနဆ့ကၤဖးထီအက့တက့လၢယဖီၣ်ဃး အီၤအံၤတက့ၢ်. ယမၤသံနၤသ့လီၤ. ဘၣ်ဆၣ်ဒီး, အခိၣ်တလိာ်န့ၣ်, ယကူးတဲာ်ထဲတၢ်အံၤဧိၤလီၤ. တၢ်အံၤဒုးနၢ်ပၢၢ်လီၤတံၢ်နၤလၢယတအိၣ်ဒၣ်လဲာ်ဒီးတၢ်ဆိကမိၣ် လၢတၢ်ပူထီၣ်ထီဒါနၤမ့ၢ်ဂ့ၤမၤဆါနၤမ့ၢ်ဂ့ၤဘၣ်. နလူၤဖီၣ်န့ၢ်ယၤလၢနကမၤသံယၤအဂီၢ်ဖဲယတမၤကမၣ်ဘၣ်နၤနီတမံၤ ဘၣ်ဒၣ်လဲာ်န့ၣ်လီၤ. 12 မ်ယွၤစံၣ်ညီၣ်တဲာ်တၢ်လၢနၤဒီးယၤအံၤမ့ၢ်မတၤတဂၤကမၣ်လဲၣ် န့ၣ်တက့ၢ်. မ်အဝဲသိၣ်ဃီၣ်နၤလၢနတၢ်မၤထီဒါယၤအဃိတက့ၢ်. အဂ့ၢ်ဒ်အံၤ, တမ့ၢ်ယကမၤဆါနၤဆံးကိာ်ဖိဒၣ်လဲာ်ဘၣ်. 13 နသ့ၣ်ညါတၢ်ကတိၤဒိလၢပျၢၤ, တၢ်အၢတၢ်သီန့ၣ် ဘၣ်တၢ်မၤဒၣ်အီၤလၢပှၤအၢပှၤသီလီၤ. လၢတၢ်န့ၣ်အဃိဒီးယတမၤဆါနၤဘၣ်. 14 ကွၢ်ဃီၤတၢ်လၢကီၢ်အံၣ်စရ့လးအစီၤပၤကျဲးစၢးမၤဝဲဒ်သိးကမၤ သံဝဲန့ၣ်တဖၣ်တက့ၢ်. ကွၢ်တၢ်လၢအလူၤဖီၣ်န့ၢ်ဝဲတက့ၢ်. မ့ၢ်ထွံၣ်အသံတဒု, ထွံၣ်အကျံတဘ့ၣ်လီၤ. 15 ယွၤကစံၣ်ညီၣ်တၢ်လီၤ. ဒီးအဝဲကနီၤဖးတၢ်လၢနၤဒီးယၤအံၤ မ့ၢ်မတၤကမၣ်လဲၣ်န့ၣ်လီၤ. မ်အကွၢ်နုာ်ဃီၤဆူတၢ်ဂ့ၢ်ပူၤ, ဒီဒၣ်အိၣ်ပှိၤယၤဒီးအုၣ်က့ၤခီၣ်က့ၤယၤလၢနစုပူၤတက့ၢ်.” 16 ဖဲစီၤဒၤဝံးမၤဝံၤအတၢ်ကတိၤန့ၣ်စီၤစီလူးစံးဝဲ, “တၢ်န့ၣ်မ့ၢ်နၤသပှၢ်တၢၢ်ဧါ. အိ, စီၤဒၤဝံး, ယဖိခွါဧၢ,” ဒီးအဝဲစးထီၣ်ဟီၣ်ဝဲလီၤ. 17 အန့ၣ်ဝံၤဒီးအဝဲစံးဘၣ်စီၤဒၤဝံး, “နတၢ်ဘၣ်ဒီးယတၢ်ကမၣ် လီၤ. နဂ့ၤလၢယဖီခိၣ်ဒိၣ်မး, ဖဲယမၤတ့ၢ်တၢ်ကမၣ်လၢနဖီခိၣ်ဒ်န့ၣ် အသိးအခါလီၤ. 18 တနံၤအံၤ, နပာ်ဖျါတ့ၢ်နမၤဂ့ၤတၢ်လၢယဂီၢ်ဆံးအါဆံးအါအဂ့ၢ် န့ၣ်လီၤ. အဂ့ၢ်ဒ်အံၤ, ယွၤပာ်ယၤလၢနတၢ်စိတၢ်က မီၤအဖီလာ်ဒၣ်လဲာ်န့ၣ်နတမၤသံတ့ၢ်ဘၣ်ယၤဘၣ်. 19 ပှၤတဂၤကဖီၣ်န့ၢ်အဒုၣ်အဒါဒီးပျဲအဟးထီၣ်ပူၤဖျဲးကွံာ်တအိၣ် ဒီးတၢ်မၤဘၣ်အီၤန့ၣ်ကသ့ဧါ. မ်ယွၤဆိၣ်ဂ့ၤနၤလၢတၢ်လၢနမၤဘၣ်ယၤတနံၤအံၤ, အဃိန့ၣ်တက့ၢ်. 20 ခဲကနံၣ်အံၤ, ယသ့ၣ်ညါသပှၢ်ကတၢၢ်လၢနကကဲထီၣ်ဘၣ်အံၣ်စရ့လးအစီၤပၤဒီး ဘီမုၢ်ကအိၣ်ဂၢၢ်ဆိးကျၢၤလၢ နတၢ်ပၢအပူၤလီၤ. 21 ဘၣ်ဆၣ်ဒီးအၢၣ်လီၤယၤလၢယွၤအမံၤလၢနကပျဲပူၤယစၢၤယသွဲၣ်တဖၣ် ဒ်သိးဒီးယမံၤဒီးယဒူၣ်ဖိထၢဖိအမံၤ အသုတဘၣ်တၢ်သးပ့ၤနီၣ်ကွံာ်အီၤတဂ့ၤန့ၣ်တက့ၢ်.” 22 စီၤဒၤဝံးအၢၣ်လီၤဝဲလီၤ. အန့ၣ်ဝံၤဒီးစီၤစီလူးက့ၤကဒါ က့ၤဆူအဟံၣ်ဒီးစီၤဒၤဝံးဒီးအပှၤတဖၣ်က့ၤကဒါက့ၤဆူ အတၢ်အိၣ်ခူသူၣ်အလီၢ်န့ၣ်လီၤ.