25
1 စီၤၡမူၤအ့လးသံဝဲဒီးကယဲၢ်ပှၤအံၣ်စရ့လးဖိတဖၣ်ဟဲသကိး ဒီးဟီၣ်တၢ်ယၢၤတၢ်လၢအဃိလီၤ. အန့ၣ်ဝံၤဒီးအဝဲသ့ၣ်ခူၣ်လီၤအီၤလၢအဟံၣ်လၢဝ့ၢ်ရၤမါအပူၤ န့ၣ်လီၤ.
2 တၢ်န့ၣ်အလီၢ်ခံစီၤဒၤဝံးလဲၤဆူပှၢ်မုၢ်ကနၢပၤရၣ်လီၤ.
3 ပှၤအိၣ်ဝဲတဂၤလၢစီၤကၤလ့းအဒူၣ်ထၢပူၤဒီးအမံၤမ့ၢ်စီၤနၤ ဘလး, ပှၤအိၣ်လၢဝ့ၢ်မၤဧိၣ်ဒီးမ့ၢ်ပှၤအိၣ်ဒီးဟီၣ်ခိၣ်ကဝီၤဘူးဒီး ဝ့ၢ်ကၤမ့လးလီၤ. အဝဲမ့ၢ်ပှၤထူးပှၤတီၤဖးဒိၣ်တဂၤလၢ အမ့ၢ်ပှၤအိၣ်ဒီးသိအဒုသၢကထိဒီးမဲာ်တဲးလဲးအဒုတကထိလီၤ. အမါနီၢ်အဘံၤကယံးလးမ့ၢ်ပှၤဒိၣ်တၢ်ဃံလၤဒီးအသူၣ်ဆးအသးဆး တဂၤလီၤ. မ့မ့ၢ်အဝဲဒၣ်မ့ၢ်ပှၤအသူၣ်အၢပှၤအသးသီ ဒီးပှၤကတိၤတၢ်ဆူၣ်ဆူၣ်ကိၤကိၤတဂၤလီၤ.
စီၤနၤဘလးတံာ်အသိအဆူၣ်လၢဝ့ၢ်ကၤမ့လးအပူၤ,
4 ဒီးစီၤဒၤဝံးအိၣ်လၢပှၢ်မုၢ်ကနၢအပူၤန့ၣ်နၢ်ဟူတၢ်ဂ့ၢ်န့ၣ်လီၤ.
5 မၤသးဒ်န့ၣ်ဒီးအဝဲဆှၢလီၤပှၤသးစၢ်အဂၤတဆံဃုာ်ဒီးတၢ်ကလုၢ် လၢကလဲၤဆူဝ့ၢ်ကၤမ့လး, ဒီးဃုထံၣ်စီၤနၤဘလးဒီးတဲဘၣ်အီၤလၢအဝဲအတၢ်ဆၢဂ့ၤဆၢဝါ န့ၣ်လီၤ.
6 အဝဲမၤလိာ်ပှၤသးစၢ်တဖၣ်လၢကတဲဘၣ်စီၤနၤဘလး, “ယတံၤသကိးဧၢ, စီၤဒၤဝံးဆှၢလီၤန့ၢ်နၤတၢ်ဆၢဂ့ၤဆၢဝါတ ဖၣ်, အိၣ်ဒီးအတၢ်ဆၢဂ့ၤဆၢဝါအဂ့ၤကတၢၢ်တဖၣ်လၢနဂီၢ်, နဟံၣ်ဖိဃီဖိအဂီၢ်ဒီးကယဲၢ်ပှၤဘၣ်ဃးဒီးနၤခဲလၢာ်အဂီၢ်လီၤ.
7 အဝဲနၢ်ဟူတ့ၢ်ဝဲလၢနတံာ်နသိအဆူၣ်ဒီးအဝဲအဲၣ်ဒိးနသ့ၣ်ညါဝဲလၢ, နပှၤကွၢ်သိတဖၣ်အိၣ်ဒီးပှၤဒီးပတမၤဆါဘၣ်အဝဲသ့ၣ်ဘၣ်န့ၣ်လီၤ. တၢ်လၢအဘၣ်ဃးဒီးအဝဲသ့ၣ်န့ၣ်, ဖဲအဝဲသ့ၣ်အိၣ်ဖဲဝ့ၢ်ကၤမ့လး ဒီတကတီၢ်န့ၣ်, တဘၣ်တၢ်ဟုၣ်န့ၣ်အီၤနီတမံၤဘၣ်.
8 ထဲဒၣ်သံကွၢ်ကွၢ်အဝဲသ့ၣ်, ဒီးအဝဲသ့ၣ်ကတဲနၤလီၤ. ပဟဲပဝဲဒၣ်လၢမူးဖးဒိၣ်အမုၢ်တနံၤ, ဒီးစီၤဒၤဝံးဃ့ကညး နၤလၢနကတူၢ်လိာ်ပဝဲသ့ၣ်တဖၣ်လၢတၢ်သူၣ်အိၣ်သးအိၣ်လီၤ. ဝံသးစူၤဟ့ၣ်ပှၤတၢ်လၢနဟ့ၣ်နခ့နပှၤပဝဲဒၣ်ဒီးနတံၤသကိးစီၤ ဒၤဝံးသ့ဝဲဒၣ်တဖၣ်တက့ၢ်.”
9 စီၤဒၤဝံးအပှၤတဖၣ်ဟ့ၣ်လီၤတၢ်ကစီၣ်အံၤဆူစီၤနၤဘလးအအိၣ်လၢ စီၤဒၤဝံးအမံၤန့ၣ်လီၤ. ဝံၤဒီးအဝဲသ့ၣ်အိၣ်ခိးဝဲဖဲန့ၣ်လီၤ.
10 ဒီးလၢခံကတၢၢ်န့ၣ်, စီၤနၤဘလးစံးဆၢဝဲဒၣ်, “စီၤဒၤဝံး, အဝဲမ့ၢ်မတၤလဲၣ်ယတနၢ်ဟူအဂ့ၢ်နီတစုဘၣ်. ထံကီၢ်အံၤပှဲၤဝဲဒၣ်ဒီးကုၢ်တဖၣ်လၢအဃ့ၢ်ဟးထီၣ်လၢအကစၢ်အအိၣ် လၢမုၢ်နံၤတဖၣ်အံၤအပူၤလီၤ.
11 ယတဟံးန့ၢ်ဘၣ်ယကိၣ်, ဒီးထံ, ဒီးဆၣ်ဖိကီၢ်ဖိတဖၣ်လၢယမၤသံ အီၤလၢယပှၤတံာ်ယယသိအဆူၣ်တဖၣ်အဂီၢ်, ဒီးဟ့ၣ်လီၤအီၤဆူပှၤတဖၣ်လၢအဟဲလၢလဲၣ်လၢယတသ့ၣ်ညါဘၣ်အီၤ အဂီၢ်န့ၣ်ဘၣ်.”
12 စီၤဒၤဝံးအပှၤတဖၣ်က့ၤကဒါက့ၤဆူအအိၣ်ဒီးတဲဘၣ်အီၤတၢ်လၢ စီၤနၤဘလးစံးဘၣ်တ့ၢ်အဝဲသ့ၣ်တဖၣ်န့ၣ်လီၤ.
13 စီၤဒၤဝံးဟ့ၣ်လီၤအကလုၢ်စံးဝဲ, “ကံာ်ထီၣ်သုနးတဖၣ်တ က့ၢ်.” ဒီးအဝဲသ့ၣ်မၤဝဲလီၤ. စီၤဒၤဝံးစ့ၢ်ကီးကံာ်ထီၣ်အနးဒီး ဟးထီၣ်ဃုာ်ဒီးအပှၤအဂၤလွံၢ်ကယၤဃၣ်ဃၣ်ဒီးပာ်တ့ၢ်ဝဲပှၤအဂၤ ခံကယၤလၢလီၢ်ခံဒ်သိးကဆှၢထီၣ်တၢ်အီၣ်တၢ်အီ တၢ်ဖိတၢ်လံၤ တဖၣ်အဂီၢ်လီၤ.
14 စီၤနၤဘလးအခ့အပှၤတဖၣ်အကျါတဂၤစံးဘၣ်စီၤနၤဘလးအမါနီၢ် အဘံၤကယံးလး, “နနၢ်ဟူလံဧါ. စီၤဒၤဝံးဆှၢလီၤပှၤစိာ်တၢ်ကစီၣ် တနီၤလၢပှၢ်မုၢ်ကနၢအပူၤဃုာ်ဒီးအတၢ်ဆၢဂ့ၤဆၢဝါတဖၣ်လၢ ပကစၢ်အဂီၢ်လီၤ. ဘၣ်ဆၣ်ဒီးအဝဲကတိၤတရီတပါအဝဲသ့ၣ်တဖၣ်န့ၣ်လီၤ.
15 ဘၣ်ဆၣ်သနာ်က့အဝဲသ့ၣ်ဂ့ၤလၢပဖီခိၣ်ဒိၣ်မးလီၤ. အဝဲသ့ၣ်တမၤတံာ်တာ်ပှၤဘၣ်နီတစုဘၣ်. ဒီးဖဲပအိၣ်ဒီးအဝဲသ့ၣ်ဒီတကတီၢ်ညါလၢပျီပူၤန့ၣ်, တၢ်ဘၣ်ဃးဒီးပှၤတဖၣ်တဘၣ်တၢ်ဟုၣ်န့ၢ်အီၤနီတမံၤဘၣ်.
16 အဝဲသ့ၣ်ဒီဒၣ်အိၣ်ပှိၤပှၤမုၢ်နၤနၤမုၢ်ဆါဆါဒီကတီၢ်ညါဖဲ ပအိၣ်ဒီးအဝဲသ့ၣ်, ဒီးအံးထွဲကွၢ်ထွဲစၢၤပသိတဖၣ်န့ၣ်လီၤ.
17 ဆိကမိၣ်ကွၢ်တၢ်အံၤဒီးစံၣ်ညီၣ်တဲာ်တၢ်လၢနကဘၣ်မၤအီၤတက့ၢ်. တၢ်အံၤကဲထီၣ်တၢ်တတၢးတနါလၢပကစၢ်အဂီၢ်ဒီးအဒူၣ်ဖိ ထၢဖိခဲလၢာ်အဂီၢ်သ့ဝဲလီၤ. အဝဲဒၣ်အခိၣ်ကိၤအၢသီတုၤဒၣ်လဲာ်တကနၣ်ဘၣ်ပှၤနီတဂၤဘၣ်န့ၣ်လီၤ.”
18 နီၢ်အဘံၤကါယံးလးမၤချ့ချ့ဒီးဟံးန့ၢ်ကိၣ်အဖျၢၣ်ခံကယၤ, ထၢၣ်တၢ်ဖံးခံဖျၢၣ်ပှဲၤဒီးစပံးထံ, သိယဲၢ်ဒုအညၣ်ဖီမံတ့ၢ် အသး, ဘုဧိၤဟုဧိၤဝဲာ်မံဃာ်အသးခံနာ်, ဒီးစပံးသၣ်ဆၢအဃ့အကူၤတကယၤဒီး ကိၣ်လၢတၢ်မၤအီၤလၢချၢၣ်ဒၢသၣ်အဃ့အဖျၢၣ်တကယၤ, ဒီးပာ်ထီၣ်အီၤလၢကသ့ၣ်ယီၤတဖၣ်အလိၤန့ၣ်လီၤ.
19 အန့ၣ်ဝံၤဒီးအဝဲစံးဘၣ်အခ့အပှၤတဖၣ်, “လဲၤပာ်သုဝဲလၢညါဒီးယကပိာ်ထီၣ်သုခံလီၤ.” မ့မ့ၢ်အဝၤန့ၣ်တတဲဘၣ်ဝဲတၢ်နီတမံၤဘၣ်.
20 နီၢ်အဘံၤကါယံးလးဒိးထီၣ်အကသ့ၣ်ယီၤလၢကျဲလဲၤတရံးအသး တတီၤလၢတၢ်လူၢ်တဖျၢၣ်အကပၤဖဲသတူၢ်ကလာ်သဂၢၢ်လိာ်အသးဒီးစီၤ ဒၤဝံးဒီးအပှၤတဖၣ်လၢအဟဲလိၤလိၤဆူအအိၣ်န့ၣ်လီၤ.
21 စီၤဒၤဝံးဆိကမိၣ်တ့ၢ်ဝဲ, “ဘၣ်မနုၤယဒီဒၣ်အိၣ်ပှိၤတ့ၢ်ပှၤတဂၤန့ၣ် အတၢ်စုလီၢ်ခီၣ်ခိၣ်လၢပှၢ်မုၢ်ကနၢအပူၤအံၤထီဘိန့ၣ်လဲၣ်. တၢ်ဘၣ်ဃးဒီးအီၤတဘၣ်တၢ်ဟုၣ်အီၤနီတမံၤမံၤဘၣ်. ဒီးတၢ်အံၤမ့ၢ်တၢ်အဘူးအလဲလၢအဟ့ၣ်ဆၢက့ၤဝဲလၢတၢ်မၤစၢၤလၢ ယဟ့ၣ်တ့ၢ်အီၤအဂီၢ်န့ၣ်ဧါ.
22 တချုးမုၢ်ဆ့ၣ်ထီၣ်အံၤန့ၣ်ယမ့ၢ်တမၤသံဘၣ်ပှၤပိာ်ခွါတဖၣ်အံၤ တုၤလၢအလီၢ်ခံကတၢၢ်တဂၤဘၣ်ဒီး မ်ကစၢ်ယွၤတီၢ်ယၤတုၤယသံတက့ၢ်.”
23 ဖဲနီၢ်အဘံၤကါယံးလးထံၣ်ဘၣ်စီၤဒၤဝံးန့ၣ် အဝဲစံၣ်လီၤဝဲချ့ချ့ဒီးကွံာ်လီၤအသးလၢဟီၣ်ခိၣ်လိၤ.
24 ဖဲစီၤဒၤဝံးအခီၣ်ထံးဒီးစံးဘၣ်အီၤ, “တၢ်ဒိၣ်ဧၢ, ဝံသးစူၤဒိကနၣ်လၢ်ယၤတက့ၢ်. မ်ယဒိးဘၣ်တၢ်ပာ်ဒ့ၣ်ပာ်ကမၣ်တက့ၢ်.
25 ဝံသးစူၤပာ်သူၣ်ပာ်သးဒီးကနၣ်ဃုာ်စီၤနၤဘလးန့ၣ်တဂ့ၤ. အဝဲတဂ့ၤလၢတၢ်နီတမံၤအဂီၢ်ဘၣ်. ဒ်အမံၤအခီပညီလၢအမ့ၢ်တၢ်ပျုၢ်အသိးန့ၣ်အဝဲမ့ၢ်နီၢ်နီၢ်ပှၤ အမၢးတဂၤလီၤ. တၢ်ဒိၣ်ဧၢ, ဖဲနခ့နပှၤတဖၣ်ဟဲတုၤန့ၣ်ယတအိၣ်ဘၣ်ဖဲန့ၣ်ဘၣ်.
26 ပှၤလၢအပၢၤဃာ်နၤလၢတၢ်ဟ့ၣ်ကၣ်က့ၤဒီးမၤသံကွံာ်နဒုၣ်နဒါ တဖၣ်န့ၣ်မ့ၢ်ယွၤလီၤ. ဒီးခဲအံၤယဆိၣ်တၢ်ဒီးနၤလၢယွၤလၢအမူဝဲတဂၤအမံၤအပူၤ, လၢနဒုၣ်နဒါတဖၣ်ဒီးကယဲၢ်ပှၤသးအိၣ်မၤအၢမၤသီနၤဒ်စီၤနၤ ဘလးအသိးန့ၣ်, မ်အဘၣ်တၢ်စံၣ်ညီၣ်တက့ၢ်.
27 တၢ်ဒိၣ်ဧၢ, ဝံသးစူၤတူၢ်လိာ်တၢ်ဟ့ၣ်ကနၢၤလၢယဟဲစိာ်ဆူန အိၣ်, ဒီးဟ့ၣ်လီၤနပှၤတဖၣ်တက့ၢ်.
28 တၢ်ဒိၣ်ဧၢ, ဝံသးစူၤပျၢ်ကယဲၢ်တၢ်လၢယမၤကမၣ်ဘၣ်တ့ၢ်အီၤတမံၤလၢ်လၢ်န့ၣ်တက့ၢ်. ယွၤကဒုးကဲထီၣ်နၤဒီးနစၢၤနသွဲၣ်တဖၣ်စ့ၢ်ကီးလၢစီၤပၤလီၤ. အဂ့ၢ်ဒ်အံၤ, နဒုးအတၢ်ဒုးတဖၣ်ဒီးလၢနအိၣ်မူဒံးအမုၢ်နံၤတဖၣ် န့ၣ်နတဘၣ်မၤတၢ်အၢတၢ်သီနီတမံၤဘၣ်လီၤ.
29 ပှၤတဂၤဂၤမ့ၢ်ကဘၣ်ဒုးနၤဒီးကျဲးစၢးလၢကမၤသံနၤန့ၣ်ယွၤ, နကစၢ်ယွၤကမၤပူၤဖျဲးနၤ, ဒ်ပှၤတဂၤကဟုကယာ်တၢ်စုလီၢ်ခီၣ်ခိၣ် လုၢ်ဒိၣ်ပှ့ၤဒိၣ်တမံၤအသိးန့ၣ်လီၤ. ဘၣ်ဆၣ်ဒီးလၢနဒုၣ်နဒါတဖၣ်အဂီၢ်န့ၣ်, ယွၤကစူးကွံာ်အဝဲသ့ၣ်ဆူအယံၤ, ဒ်ပှၤတဂၤဘျုးထီၣ်ကွံာ်လၢၢ်တဖၣ်လၢအနီၣ်ဘျုးအသိးန့ၣ်လီၤ.
30 ဒီးဖဲယွၤမၤတ့ၢ်ကယဲၢ်တၢ်အဂ့ၤခဲလၢာ်လၢအအၢၣ်လီၤတ့ၢ်နၤဒီး ဒုးကဲထီၣ်နၤလၢကီၢ်အံၣ်စရ့လးအစီၤပၤန့ၣ်,
31 အန့ၣ်တစု, တၢ်ဒိၣ်ဧၢ, နတဘၣ်ပီၢ်ယၢ်လီၤက့ၤနသးမ့ၢ်ဂ့ၤ, သးတမုာ်မ့ၢ်ဂ့ၤလၢနတမၤသံဘၣ်ပှၤလၢတၢ်ဂ့ၢ်တၢ်ကျိၤတအိၣ်ဘၣ် မ့ၢ်ဂ့ၤ, လၢတၢ်ဟ့ၣ်ကၣ်က့ၤတၢ်လၢနနီၣ်ကစၢ်ဒၣ်နဲအဂီၢ်မ့ၢ်ဂ့ၤအဃိန့ၣ်ဘၣ်. ဒီးဖဲယွၤဆိၣ်ဂ့ၤတ့ၢ်နၤန့ၣ်, တၢ်ဒိၣ်ဧၢ, ဝံသးစူၤသးပ့ၤနီၣ်ယၤတဂ့ၤ.”
32 စီၤဒၤဝံးစံးဘၣ်အီၤ, “မ်ယွၤ, ကီၢ်အံၣ်စရ့လးအကစၢ်ယွၤလၢ အဆှၢလီၤနၤဒ်သိးနကထံၣ်လိာ်ဒီးယၤန့ၣ် ဘၣ်တၢ်စံးထီၣ်ပတြၢၤအီၤတက့ၢ်.
33 ယစံးဘျုးယွၤလၢနအိၣ်ဒီးတၢ်သးဆးဂ့ၤဒီးလၢတၢ်လၢနမၤတ့ၢ်အီၤတနံၤအံၤ ဒ်သိးကတြီဃာ်ယၤလၢတၢ်မၤသံတၢ်အတၢ်ကမၣ်ဒီးလၢ ယကဟ့ၣ်ကၣ်က့ၤတၢ်လၢယကစၢ်ဒၣ်ယဲအဂီၢ်န့ၣ်လီၤ.
34 ယွၤတြီဃာ်ယၤလၢတၢ်မၤဆါဘၣ်သုလီၤ. ဘၣ်ဆၣ်ဒီးယဆိၣ်တၢ်လၢ ကီၢ်အံၣ်စရ့လးအကစၢ်ယွၤလၢအမူဝဲတဂၤအမံၤလၢနမ့ၢ်တမၤတ့ၢ် နဲချ့ချ့လၢနကထံၣ်လိာ်ယၤဘၣ်ဒီးကယဲၢ်စီၤနၤဘလးအပှၤပိာ် ခွါတဖၣ်န့ၣ်တုၤမုၢ်ဆ့ၣ်ထီၣ်ဒီးကသံဝဲကိးဂၤဒဲးလီၤ.”
35 အန့ၣ်ဝံၤဒီးစီၤဒၤဝံးတူၢ်လိာ်တၢ်လၢပိာ်မုၣ်န့ၣ်ဟဲစိာ်န့ၢ်အီၤ ဒီးစံးဘၣ်ပိာ်မုၣ်န့ၣ်, “က့ၤဆူဟံၣ်ဒီးဘၣ်ကိၢ်ဘၣ်ဂီၤတဂ့ၤ. ယကမၤတၢ်လၢနသးလီအီၤန့ၣ်လီၤ.”
36 နီၢ်အဘံၤကါယံးလးက့ၤဆူစီၤနၤဘလးအအိၣ်, ဖဲအမၤတၢ်အီၣ်အမူးဖးဒိၣ်ကြၢးဝဲလၢစီၤပၤတဂၤအဂီၢ်လၢအဟံၣ်န့ၣ်လီၤ. အဝဲအီမူၤအသးလၢသံးဒီးအိၣ်လၢတၢ်သးဖှံအပူၤလီၤ. လၢတၢ်န့ၣ်အဃိတချုးတုၤလၢမုၢ်ဆ့ၣ်ထီၣ်တနံၤဒံးဘၣ်ဒီးပိာ်မုၣ်န့ၣ် တတဲဘၣ်အီၤလၢတၢ်နီတမံၤဘၣ်န့ၣ်လီၤ.
37 အန့ၣ်ဝံၤဒီး, ဖဲအအိၣ်ဘၣ်လီၢ်ဘၣ်စးက့ၤဝဲန့ၣ်နီၢ်အဘံၤကါ ယံးလးတဲဘၣ်အီၤတၢ်ကိးမံၤဒဲးန့ၣ်လီၤ. အဝဲဘၣ်န့ၢ်ကလံၤဒိဘၣ်အီၤအတၢ်ဆါဒီးအနီၢ်ခိဟူးဂဲၤတန့ၣ်လၢၤနီတစဲးဘၣ်န့ၣ်လီၤ.
38 လၢခံဆံဆဲၣ်သီဃၣ်ဃၣ်အလီၢ်ခံန့ၣ်ယွၤတီၢ်စီၤနၤဘလးဒီး အဝဲဒၣ်သံကွံာ်ဝဲလီၤ.
39 တုၤစီၤဒၤဝံးနၢ်ဟူဘၣ်ဝဲလၢစီၤနၤဘလးသံန့ၣ်, အဝဲစံးဝဲ, “စံးထီၣ်ပတြၢၤယွၤတက့ၢ်. အဝဲဟ့ၣ်ကၣ်က့ၤလံ စီၤနၤဘလးလၢအမၤမဲာ်ဆှးယၤအဃိ, ဒီးပၢၤဃာ်ယၤလၢအမ့ၢ်အခ့ အပှၤ, လၢတၢ်မၤကမၣ်န့ၣ်လီၤ. ယွၤစံၣ်ညီၣ်လံစီၤနၤဘလးလၢအတၢ် အၢတၢ်သီအဃိလီၤ.”
40 အခ့အပှၤတဖၣ်လဲၤဆူနီၢ်အဘံၤကါယံးလးအအိၣ်လၢဝ့ၢ်ကၤမ့လး ဒီးစံးဘၣ်အီၤ,
အန့ၣ်ဒီးစီၤဒၤဝံးဆှၢလီၤပှၤဒ်သိးပကက့ၤကိးနၤဆူအအိၣ်လၢ နကကဲထီၣ်အမါလီၤ.”
41 နီၢ်အဘံၤကါယံးလးဆုးလီၤအခိၣ်ဆူဟီၣ်ခိၣ်ဒီးစံးဝဲ, “ယမ့ၢ်အခ့အပှၤလီၤ. ယအိၣ်ကတဲာ်ကတီၤယသးဒ်သိးယကသ့ အခ့အပှၤတဖၣ်အခီၣ်အဂီၢ်လီၤ.”
42 ပိာ်မုၣ်န့ၣ်ဂဲၤဆၢထၢၣ်ချ့ချ့ဒီးကတဲာ်ကတီၤအကသ့ၣ်ယီၤန့ၣ် လီၤ. အဝဲပိာ်ထီၣ်စီၤဒၤဝံးအခ့အပှၤတဖၣ်အခံဃုာ်ဒီးအကုၢ်ပိာ်မုၣ် ယဲၢ်ဂၤဒီးအဝဲကဲထီၣ်စီၤဒၤဝံးအမါန့ၣ်လီၤ.
43 စီၤဒၤဝံးထီၣ်ပှၢ်တ့ၢ်ဒီးနီၢ်အဃံနိၣ်လၢဝ့ၢ်ယံးစရ့လးဒီး ခဲအံၤနီၢ်အဘံၤကါယံးလးစ့ၢ်ကီးကဲထီၣ်အမါလီၤ.
44 ဖဲတၢ်ဆၢကတီၢ်အံၤအပူၤန့ၣ်, စီၤစီလူးဟ့ၣ်တ့ၢ်လံဝဲအဖိမုၣ် နီၢ်မံကၤလးလၢအမ့ၢ်တ့ၢ်စီၤဒၤဝံးအမါန့ၣ်ဆူစီၤလ့ၡ့ၣ် အဖိခွါစီၤဖးလတံၤလၢအအိၣ်လၢဝ့ၢ်ကးလံၣ်န့ၣ်လီၤ.