22
1 စီၤဒၤဝံးဃ့ၢ်ထီၣ်ကွံာ်လၢကီၢ်ကၤသးအဝ့ၢ်ပူၤဒီးလဲၤဆူ လ့ကအိတခါလၢအဘူးဒီးဝ့ၢ်ဧးဒူးလၣ်လီၤ. ဖဲအဒီပုၢ်ဝဲၢ်တဖၣ်ဒီးအဟံၣ်ဖိဃီဖိလၢအအိၣ်လီၤတဲာ်တဖၣ်နၢ်ဟူလၢအအိၣ်ဖဲန့ၣ်ဒီးအဝဲသ့ၣ်လဲၤမၤသကိးတၢ်ဒီးအီၤန့ၣ်လီၤ.
2 ပှၤဂီၢ်မုၢ်လၢဘၣ်တၢ်မၤနးမၤဖှီၣ်အီၤတဖၣ်မ့ၢ်ဂ့ၤ, အဒ့ၣ်ကမၣ်အိၣ်မ့ၢ်ဂ့ၤ, အသးတမံတဖၣ်မ့ၢ်ဂ့ၤလဲၤဆူအအိၣ်, ပှၤခဲလၢာ်အဂၤလွံၢ်ကယၤဃၣ်ဃၣ်ဒီးအဝဲကဲထီၣ်အဝဲသ့ၣ်အခိၣ်အနၢ် လီၤ.
3 စီၤဒၤဝံးဟးထီၣ်ဆူညါစးထီၣ်ဖဲန့ၣ်တုၤလၢဝ့ၢ်မံးစပၤလၢ ကီၢ်မိၤအးအပူၤဒီးစံးဘၣ်ကီၢ်မိၤအးအစီၤပၤ, “ဝံသးစူၤပျဲယမိၢ်ယပၢ်ဟဲအိၣ်ဒီးနၤတုၤလၢယထံၣ်တၢ်လၢကစၢ် ယွၤကမၤဝဲလၢယဂီၢ်န့ၣ်တက့ၢ်.”
4 လၢတၢ်န့ၣ်အဃိ, စီၤဒၤဝံးပာ်တ့ၢ်အမိၢ်အပၢ်ဒီးကီၢ်မိၤအး အစီၤပၤဒီးအဝဲသ့ၣ်အိၣ်ဖဲန့ၣ်ဖဲလၢစီၤဒၤဝံးအိၣ်ခူသူၣ် လၢလ့ကအိအပူၤအဆၢကတီၢ်တဖၣ်အခါန့ၣ်လီၤ.
5 တုၤနုၤတစုဝံစီၤကးဟဲဆူစီၤဒၤဝံးအအိၣ်ဒီးစံး, “အိၣ်ဖဲအံၤတဂ့ၤ. လဲၤတဘျီဃီဆူကီၢ်ယူဒၤအပူၤတက့ၢ်.” မၤသးဒ်န့ၣ်ဒီး, စီၤဒၤဝံးဟးထီၣ်ဖဲန့ၣ်ဒီးလဲၤဆူဃ့ၤရ့း အပှၢ်လၢ်ကျါန့ၣ်လီၤ.
6 ဘၣ်မုၢ်တနံၤန့ၣ်စီၤစီလူးအိၣ်လၢဝ့ၢ်ကံဘဧၤဒီးဆ့ၣ်နီၤလၢ သ့ၣ်ဒိၣ်ဃံဒိၣ်ကမီာ်ဖိတထံးအဖီလာ်လၢတၢ်လူၢ်ဒီခိၣ်ဒီးစိာ် ဃာ်ဝဲဘီလၢအစုပူၤဒီးအသုးခိၣ်သုးနၢ်တဖၣ်ဆၢထၢၣ်ဝးတရံး အီၤန့ၣ်လီၤ. အဝဲဘၣ်တၢ်တဲဘၣ်အီၤလၢစီၤဒၤဝံး ဒီးအပှၤတဖၣ်ဘၣ်တၢ်ထံၣ်န့ၢ်အီၤလံန့ၣ်လီၤ.
7 ဒီးအဝဲစံးဘၣ်အသုးနၢ်တဖၣ်, “ဒိကနၣ်တၢ်တက့ၢ်, စီၤဘံၣ်ယၤမံၣ်အပှၤကညီဧၢ, မ့ၢ်သုဆိကမိၣ်လၢစီၤဒၤဝံး ကဟ့ၣ်စံၣ်ပျီဒီးစပံးအလီၢ်တဖၣ် ဆူသုဝဲခဲလၢာ်အအိၣ်ဒီးဒုးကဲသု လၢသုးခိၣ်သုးနၢ်လၢအသုးမုၢ်ပူၤန့ၣ်ဧါ.
8 တၢ်န့ၣ်မ့ၢ်တၢ်ဂ့ၢ်လၢသုကူၣ်ထီၣ်ဖးလီၤထီဒါယၤန့ၣ်ဧါ. ယဖိခွါဒၣ်ယဲမၤတၢ်ဒီသိၣ်ဒီမှံၤဒီးစီၤဒၤဝံးန့ၣ် သုတတဲဘၣ်ယၤ နီတဂၤဘၣ်. ပှၤတသူၣ်အိၣ်သးအိၣ်ယၤမ့ၢ်ဂ့ၤ, တဲဘၣ်ယၤလၢစီၤဒၤဝံး, ပှၤလၢယပှၤဒၣ်ယဲအကျါတဂၤန့ၣ်ခဲအံၤဃုတၢ်အခွဲးအယာ်ဒ်သိး ကမၤသံယၤဒီးယဖိခွါဟ့ၣ်ဂံၢ်ဟ့ၣ်ဘါအီၤအဂ့ၢ်မ့ၢ်ဂ့ၤန့ၣ် နီတဂၤဘၣ်.”
9 စီၤဒိအ့းအိၣ်ဆၢထၢၣ်ဖဲန့ၣ်ဃုာ်ဒီးစီၤစီလူးအသုးခိၣ်သုး နၢ်တဖၣ်ဒီးစံးဝဲ, “ယထံၣ်တ့ၢ်စီၤဒၤဝံးဖဲအလဲၤဆူစီၤအဃံးတူာ် အဖိခွါစီၤအဃံၤမ့လ့းလၢအအိၣ်လၢဝ့ၢ်နိဘးန့ၣ်လီၤ.
10 စီၤအဃံၤမ့လ့းသံကွၢ်ယွၤလၢစီၤဒၤဝံး ကြၢးမၤတၢ်မနုၤဝံၤဒီးဟ့ၣ်လီၤစီၤဒၤဝံးလၢတၢ်အီၣ်တနီၤ ဒီးပှၤဖလ့ၡသးဖိစီၤကၤလယးအနးန့ၣ်လီၤ.”
11 မၤသးဒ်န့ၣ်ဒီး, စီၤစီလူးမၢပှၤကိးန့ၢ်အီၤလၢပှၤလုၢ်တၢ် အခိၣ်စီၤအဃံၤမ့လ့းဒီးအဘူးအတံၢ်ခဲလၢာ်လၢအအိၣ်စ့ၢ်ကီးလၢ ဝ့ၢ်နိဘးအပူၤဒီးအဝဲသ့ၣ်ဟဲဝဲဆူအအိၣ်လီၤ.
12 စီၤစီလူးစံးဘၣ်စီၤအဃံၤမ့လ့း, “စီၤအဃံၤမ့လ့းဧၢ, ဒိကနၣ်တက့ၢ်.”
စီၤအဃံၤမ့လ့းစံးဆၢဝဲ, “တၢ်ဒိၣ်ဧၢ, ယမ့ၢ်နခ့နပှလီၤ.”
13 စီၤစီလူးသံကွၢ်အီၤ, “ဘၣ်မနုၤလၢနၤဒီးစီၤဒၤဝံးကူၣ် ထီၣ်ဖးလီၤတၢ်ထီဒါယၤန့ၣ်လဲၣ်. ဘၣ်မနုၤလၢနဟ့ၣ်အီၤတၢ်အီၣ်တနီၤဒီးနးတဘ့ၣ်ဒီးသံကွၢ်တၢ်လၢ ကစၢ်ယွၤလၢအဂီၢ်န့ၣ်လဲၣ်. ခဲအံၤအဝဲဃၣ်အသးထီဒါယၤဒီးအိၣ်ခိးဝဲတၢ်အခွဲးဂ့ၤယာ်ဘၣ် လၢကမၤသံယၤလီၤ.”
14 စီၤအဃံၤမ့လ့းစံးဆၢဝဲဒၣ်, “စီၤဒၤဝံးမ့ၢ်သုးခိၣ်သုး နၢ်တဂၤလၢအသူၣ်တီသးလိၤဒီးနၤလၢနဒိးန့ၢ်ဘၣ်အီၤန့ၣ်လီၤ. အဝဲမ့ၢ်နမာ်ဒၣ်နဲဒီးပှၤပၢၤနသးသမူတဖၣ်အခိၣ်, ဒီးဘၣ်တၢ်ပာ်ကဲအီၤဒိၣ်မးလၢပှၤကိးဂၤလၢအအိၣ်လၢစီၤပၤအနူၢ်ပူၤစီၤပူၤလီၤ.
15 မ့ၢ်လီၤ. ယသံကွၢ်တၢ်ဒီးကစၢ်ယွၤလၢအဝဲအဂီၢ်, ဒီးတၢ်န့ၣ်တမ့ၢ်အဆိကတၢၢ်တဘျီဘၣ်. လၢတၢ်ကူၣ်ထီၣ်ဖးလီၤထီဒါနၤ အဂ့ၢ်န့ၣ်, တၢ်ဒိၣ်စီၤပၤဖးဒိၣ်တကြၢးဆှိးကမၣ်ယၤမ့ၢ်ဂ့ၤ, ပှၤအဂၤလၢယဟံၣ်ဖိဃီဖိအပူၤမ့ၢ်ဂ့ၤနီတဂၤဘၣ်. ဘၣ်ဃးဒီးတၢ်ဂ့ၢ်အံၤန့ၣ်ယတသ့ၣ်ညါတ့ၢ်တၢ်နီတမံၤဘၣ်.”
16 စီၤပၤစံးဝဲဒၣ်, “စီၤအဃံၤမ့လ့းဧၢ, နၤဒီးနဘူးနတံၢ်ခဲလၢာ်ကဘၣ်သံဝဲလီၤ.”
17 အန့ၣ်ဝံၤဒီးစီၤစီလူးစံးဘၣ်ပှၤပၢၤအသးသမူတဖၣ်လၢအဆၢထၢၣ် ဖဲအဃၢၤန့ၣ်, “မၤသံကွံာ်ယွၤအပှၤလုၢ်တၢ်အခိၣ်တဖၣ်တက့ၢ်. အဝဲသ့ၣ်ကူၣ်ထီၣ်ဖးလီၤသကိးတၢ်အၢတမံၤဃီဒီးစီၤဒၤဝံးဒီး သ့ၣ်ညါဝဲတၢ်ဂ့ၢ်ခဲလၢာ်ဘၣ်ဆၣ်ဒီး တတဲဘၣ်ယၤလၢအဝဲထွးထီၣ်ဃ့ၢ် အဂ့ၢ်န့ၣ်ဘၣ်.” ဘၣ်ဆၣ်ဒီးပှၤပၢၤအသးသမူတဖၣ် ဂ့ၢ်လိာ်ဝဲလၢကယူာ်ထီၣ်အစုဒ်သိးကမၤသံ ယွၤအပှၤလုၢ်တၢ်အခိၣ်တဖၣ် န့ၣ်လီၤ.
18 မၤသးဒ်န့ၣ်ဒီး, စီၤစီလူးစံးဘၣ်စီၤဒိအ့း, “မၤသံကွံာ်အဝဲသ့ၣ်တဖၣ်, နဲဒၣ်တက့ၢ်.” ဒီးစီၤဒိအ့းမၤသံကွံာ်အဝဲသ့ၣ်ခဲလၢာ်လီၤ. လၢမုၢ်နံၤအဝဲန့ၣ်အပူၤ, အဝဲမၤသံကွံာ်ပှၤလုၢ်တၢ်အခိၣ်တဖၣ်လၢအထီၣ်ဘးဝဲလၢ ကသိးအ့ဖိးတဖၣ်န့ၣ်ခဲလၢာ်ဃိးဆံယဲၢ်ဂၤန့ၣ်လီၤ.
19 စီၤစီလူးဟ့ၣ်လီၤစ့ၢ်ကီးအကလုၢ်လၢပှၤမၤသံစ့ၢ်ကီးကယဲၢ်ပှၤတဖၣ်လၢ အအိၣ်ဝဲဆိးဝဲလၢပှၤလုၢ်တၢ်အခိၣ်အဝ့ၢ်, ဝ့ၢ်နိဘးအပူၤ, ပိာ်ခွါတဖၣ်, ပိာ်မုၣ်တဖၣ်, ဖိသၣ်တဖၣ်, ဖိသၣ်အီၣ်နူၢ်တဖၣ်, ဂီၤဘုၣ်ဂီၤဖံးတဖၣ်, ကသ့ၣ်ယီၤတဖၣ်, ခဲလၢာ်န့ၣ်လီၤ. ဒီးသိဖိတဖၣ်အဝဲသ့ၣ်ခဲလၢာ်ဘၣ်တၢ်မၤသံကွံာ်အီၤန့ၣ်လီၤ.
20 ဘၣ်ဆၣ်ဒီးစီၤအဃံၤမ့လ့းအဖိခွါတဖၣ်အကျါတဂၤ, စီၤအ့ဘယၤသၣ်ပူၤဖျဲးဝဲဒီးလဲၤပာ်ဖှိၣ်အသးဒီးစီၤဒၤဝံး န့ၣ်လီၤ.
21 အဝဲတဲဘၣ်စီၤဒၤဝံးလၢစီၤစီလူးမၤသံကွံာ်ယွၤအပှၤလုၢ်တၢ် အခိၣ်တဖၣ်ဒ်လဲၣ်အဂ့ၢ်န့ၣ်လီၤ.
22 စီၤဒၤဝံးစံးဘၣ်အီၤ, “ဖဲယထံၣ်စီၤဒိအ့းဖဲန့ၣ်လၢမုၢ် တနံၤန့ၣ်ယသ့ၣ်ညါလၢအဝဲကက့ၤတဲစီၤစီလူးသပှၢ်ကတၢၢ်န့ၣ်လီၤ. မၤသးဒ်န့ၣ်ဒီးယမူယဒါအိၣ်လၢနဘူးနတံၢ်တဖၣ်အတၢ်သံအဂ့ၢ်န့ၣ်လီၤ.
23 အိၣ်ဒီးယၤဒီးဘၣ်ယိာ်ဘၣ်ဘီတၢ်တဂ့ၤ. စီၤစီလူးအဲၣ်ဒိးမၤသံယၤဒီးနၤ, ပဝဲခံဂၤလိာ်လီၤ. ဘၣ်ဆၣ်ဒီးနကပူၤဖျဲးဃုာ်ဒီးယၤလီၤ.”