21
1 စီၤဒၤဝံးလဲၤဆူပှၤလုၢ်တၢ်အခိၣ်စီၤအဃံၤမ့လ့းအအိၣ်လၢဝ့ၢ်နိၤအးအပူၤလီၤ. စီၤအဃံၤမ့လးဟဲထီၣ်လၢတၢ်ကနိးကစုာ်အပူၤဒ်သိးအကထံၣ်လိာ် အီၤဒီးသံကွၢ်အီၤ, “ဘၣ်မနုၤလၢနဟဲဆူအံၤထဲနၤတဂၤဧိၤန့ၣ်လဲၣ်.”
2 စီၤဒၤဝံးစံးဆၢဝဲ, “ယဟဲဖဲအံၤလၢစီၤပၤအတၢ်ဖံးတၢ်မၤ အဂ့ၢ်လီၤ. အဝဲတဲယၤဒ်သိးတၢ်လၢအဝဲမၢလီၤယၤလၢယကမၤအံၤ, ယသုတပျဲပှၤသ့ၣ်ညါနီတဂၤတဂ့ၤလီၤ. မ့မ့ၢ်ယပှၤတဖၣ်န့ၣ်ယမၤလိာ်တ့ၢ်အဝဲသ့ၣ်လၢကထံၣ်လိာ်ယၤဖဲ တၢ်လီၢ်လီၤဆီတပူၤန့ၣ်လီၤ.
3 ခဲအံၤ, တၢ်အီၣ်တၢ်အီမနုၤအိၣ်ဒီးနၤလဲၣ်. ဟ့ၣ်ယၤကိၣ်ယဲၢ်ဖျၢၣ်မ့တမ့ၢ်တၢ်ဂၤတမံၤမံၤလၢအအိၣ်ဒီးနၤတက့ၢ်.”
4 ပှၤလုၢ်တၢ်အခိၣ်စံးဝဲ, “ယတအိၣ်ဒီးကိၣ်မုၢ်ဆ့ၣ်မုၢ်ဂီၤနီတဖျၢၣ်ဘၣ်. အိၣ်ထဲကိၣ်စီဆှံဧိၤလီၤ. နပှၤတဖၣ်န့ၣ်မ့ၢ်တမံဃုာ်ဂဲၤဃုာ် ဒီးပိာ်မုၣ်ဖဲအပူၤကွံာ်တစဲးဘၣ်ဒီးနဟံးန့ၢ်အီၤသ့လီၤ.”
5 စီၤဒၤဝံးစံးဆၢဝဲ, “မ့ၢ်လီၤ, အဝဲသ့ၣ်တမၤဝဲဘၣ်. ယပှၤတဖၣ်န့ၣ်ပာ်ကဆှီအသးဒ်တၢ်ဘူၣ်တၢ်ဘါအလုၢ်အလၢ်အသိး, ဖဲလၢပဟးထီၣ်လၢတၢ်ဖံးတၢ်မၤမုၢ်ဆ့ၣ်မုၢ်ဂီၤအဂီၢ်ဒၣ်လဲာ် န့ၣ်လီၤ. မ့မ့ၢ်လၢပအိၣ်ဒီးမူဒါလီၤဆီဒ်အံၤတကလုာ်န့ၣ်ကပာ်ကဆှီအသး ဒိၣ်န့ၢ်အန့ၣ်တက့ၢ်ဆံးအါလဲၣ်.”
6 မၤသးဒ်န့ၣ်ဒီး, ပှၤလုၢ်တၢ်အခိၣ်ဟ့ၣ်လီၤစီၤဒၤဝံးလၢကိၣ်စီဆှံလီၤ. အဂ့ၢ်ဒ်အံၤ, ကိၣ်လၢအအိၣ်ဒီးအီၤန့ၣ် မ့ၢ်ဒၣ်ထဲကိၣ်လၢဘၣ်တၢ်လုၢ်ထီၣ်အီၤဆူကစၢ်ယွၤအအိၣ်, လၢအဘၣ်တၢ်သုးကွံာ်လံအီၤလၢစီၢ်နီၤခိၣ်စီဆှံအလိၤဒီးလၢ အလီၢ်န့ၣ်ကိၣ်အသီဘၣ်တၢ်ပာ်ထီၣ်အီၤလံန့ၣ်လီၤ.
7 (စီၤစီလူးအပှၤကွၢ်ဂီၤဖံးတဖၣ်အခိၣ်စီၤဒိအ့းလၢအမ့ၢ်ပှၤကီၢ်အဒိၣ်ဖိ, လဲၤတုၤဖဲန့ၣ်သတူၢ်ကလာ်လၢအနံၤဝဲန့ၣ်လီၤ. အဂ့ၢ်ဒ်အံၤ, အဝဲကဘၣ်မၤပှဲၤတၢ်ဘူၣ်တၢ်ဘါအမူအဒါအိၣ်ဝဲတမံၤလီၤ.)
8 စီၤဒၤဝံးစံးဘၣ်စီၤအဃံၤမ့လ့း, “နအိၣ်ဒီးနးမ့ၢ်ဂ့ၤ ဘီမ့ၢ်ဂ့ၤတခါခါလၢနဟ့ၣ်ယၤကသ့ဧါ. စီၤပၤအကလုၢ်လီၤဝဲတုၤဒၣ်လဲာ်ယဘၣ်ဟးထီၣ်လၢအချ့ဒီးတၢ်ဆၢကတီၢ်လၢ ယကဟံးန့ၣ်ယနးမ့ၢ်ဂ့ၤတၢ်စုကဝဲၤအဂၤတမံၤမံၤမ့ၢ် ဂ့ၤတအိၣ်ဘၣ်န့ၣ်လီၤ.”
9 စီၤအဃံၤမ့လ့းစံးဆၢဝဲ, “ယအိၣ်ဒီးပှၤဖလ့ၡသးဖိစီၤကၤလယး လၢနမၤသံတ့ၢ်အီၤလၢအ့လၤတၢ်တြီၤန့ၣ်အနးလီၤ. အိၣ်လၢအ့ဖိးအလီၢ်ခံ, တၢ်ဘိၣ်ဘံဃးအီၤလၢတၢ်ကံးယာ်လီၤ. နမ့ၢ်သးလီအီၤဒီးဟံးန့ၢ်တက့ၢ်. တၢ်န့ၣ်မ့ၢ်တၢ်စုကဝဲၤထဲတမံၤဧိၤ လၢအအိၣ်ဖဲအံၤန့ၣ်လီၤ.”
စီၤဒၤဝံးစံးဝဲ, “ဟ့ၣ်ယၤတၢ်န့ၣ်တက့ၢ်. နးလၢဂ့ၤဒိၣ်န့ၢ်ဒံးနးအဝဲအံၤတအိၣ်လၢတၢ်လီၢ်နီတပူၤဘၣ်.”
10 မၤသးဒ်န့ၣ်ဒီး, စီၤဒၤဝံးထွးထီၣ်ဃ့ၢ်လၢစီၤစီလူးအအိၣ် ဒီးလဲၤဆူဝ့ၢ်ကၤသးအစီၤပၤစီၤအၤကံၣ်အအိၣ်လီၤ.
11 စီၤပၤအသုးခိၣ်သုးနၢ်တဖၣ်တဲဘၣ်စီၤအၤကံၣ်, “တၢ်အံၤတမ့ၢ်စီၤဒၤဝံး, စီၤပၤတဂၤလၢအထံအကီၢ်န့ၣ်ဘၣ်ဧါ. ပှၤတဂၤအံၤမ့ၢ်ပှၤလၢပိာ်မုၣ်တဖၣ်သးဝံၣ်တၢ်လၢအဂ့ၢ်, ဖဲအဂဲၤကလံာ်အခါဒီးစံး, စီၤစီလူးမၤသံတ့ၢ်ပှၤအကထိတဖၣ် လီၤ. မ့မ့ၢ်စီၤဒၤဝံးမၤသံတ့ၢ်ပှၤအကလးတဖၣ်လီၤ.”
12 အဝဲသ့ၣ်အတၢ်ကတိၤအိၣ်စဲထီမးလၢစီၤဒၤဝံးအသးပူၤဒီး အဝဲပျံၤဘၣ်စီၤပၤအၤကံၣ်ဒိၣ်မးလီၤ.
13 လၢတၢ်န့ၣ်အဃိဖဲစီၤဒၤဝံးအိၣ်လၢအဝဲသ့ၣ်အကျါန့ၣ်ပာ်မၤ အသးဒ်ပှၤအသးတထံဘၣ်ဒီးဖဲအဝဲသ့ၣ်သါကဖီၣ်အီၤန့ၣ်မၤအသးဒ် ပှၤအပျုၢ်တဂၤအသိးလီၤ. အဝဲကွဲးတၢ်လၢနူၢ်ဧိၤစီၤဧိၤအတြဲၤတဖၣ်အလိၤဒီးဒုးယွၤ လီၤအထူၣ်ပျ့ၤထံလၢအခၣ်ဆူၣ်အလိၤလီၤ.
14 မၤသးဒ်န့ၣ်ဒီးစီၤအၤကံၣ်စံးဘၣ်အပဒိၣ်ပပှၢ်တဖၣ်, “ကွၢ်တက့ၢ်. ပှၤတဂၤအံၤမ့ၢ်တၢ်ပျုၢ်လီၤ. ဘၣ်မနုၤသုဟဲကိးအီၤဆူယအိၣ်လဲၣ်.
15 တၢ်ပျုၢ်တဖၣ်လၢအအိၣ်ပာ်စၢၤဒီးယၤန့ၣ်တလၢဒံးဘၣ်ဧါ. ဘၣ်မနုၤအဃိတၢ်ပျုၢ်အဂၤတဂၤဘၣ်တၢ်ဟဲကိးအီၤလၢကမၤတံာ်တာ်ယၤ ဒီးအတၢ်သးတထံတဆးအတၢ်မၤတဖၣ်ဖဲအံၤလၢယကစၢ်ဒၣ်ယဲအဟံၣ် ပူၤန့ၣ်လဲၣ်.”