20
1 တုၤနုၤတစုစီၤဒၤဝံးထွးထီၣ်ဃ့ၢ်လၢနၤဝိးလၢဝ့ၢ်ရၤမါ ဒီးလဲၤဆူစီၤယိနၤသၣ်အအိၣ်လီၤ. စီၤဒၤဝံးသံကွၢ်ဝဲ, “မ့ၢ်ယမၤတ့ၢ်တၢ်မနုၤလဲၣ်. ယမၤတ့ၢ်တၢ်ကမၣ်ခီပတာ်တၢ်သိၣ်တၢ် သီမနုၤလဲၣ်. ယမၤကမၣ်ဘၣ်တ့ၢ်နပၢ်တုၤလၢအကဘၣ်အဲၣ်ဒီးမၤသံယၤန့ၣ်လၢမနုၤ တမံၤလဲၣ်.”
2 စီၤယိၤနၤသၣ်စံးဆၢဝဲ, “ကစၢ်ယွၤတြီတၢ်လၢနကဘၣ်သံအဂ့ၢ် လီၤ. ယပၢ်တဲဘၣ်ယၤတၢ်အကါဒိၣ်မ့ၢ်ဂ့ၤတၢ်အကါတဒိၣ်မ့ၢ်ဂ့ၤကိးမံၤ ဒဲးလၢအမၤဝဲဒီးတပာ်ခူသူၣ်ဝဲလၢယၤဘၣ်. တၢ်န့ၣ်တမ့ၢ်ဒ်န့ၣ်အသိးဘၣ်.”
3 ဘၣ်ဆၣ်ဒီးစီၤဒၤဝံးဆိၣ်တၢ်ဒီးစံးဝဲဒၣ်, “နပၢ်သ့ၣ်ညါဝဲဂ့ၤဂ့ၤကလဲာ်လၢနအဲၣ်ယၤထဲလဲၣ်ထဲလဲၣ်အဂ့ၢ်လီၤ. ဒီးအဝဲပာ်လီၤအသးလၢအတပျဲဒုးသ့ၣ်ညါနၤအတၢ်တိာ်ကျဲၤလၢ ကမၤဝဲအဂ့ၢ်န့ၣ်ဘၣ်. အဂ့ၢ်ဒ်အံၤ, ကမၤဘၣ်ဒိဘၣ်ထံးနသးဒိၣ်မးအဃိလီၤ. ယဆိၣ်တၢ်လၢနၤလၢယွၤလၢအမူဝဲတဂၤအမဲာ်ညါလၢယပူၤဖျဲးဒီး တၢ်သံထဲခီၣ်ကါတခါဧိၤန့ၣ်လီၤ.”
4 စီၤယိနၤသၣ်စံးဝဲ, “ယကမၤတၢ်တမံၤဂ့ၤတမံၤဂ့ၤလၢနအဲၣ် ဒိးလီၤ.”
5 စီၤဒၤဝံးစံးဝဲ, “ခဲမုၢ်ဆ့ၣ်န့ၣ်မ့ၢ်လါထီၣ်သီအမူးဒီး ယကဘၣ်အီၣ်တၢ်ဒီးစီၤပၤလီၤ. ဘၣ်ဆၣ်ဒီးမ့ၢ်ဘၣ်သူၣ်ဘၣ်သးနၤန့ၣ်, ယကလဲၤအိၣ်ခူသူၣ်လၢပျီပူၤတုၤလၢခဲတဆ့ၣ်တနံၤမုၢ်ဟါလီၤန့ၣ်လီၤ.
6 နပၢ်မ့ၢ်ပာ်သူၣ်ပာ်သးလၢယတအိၣ်လၢစီၢ်နီၤခိၣ်အဃၢၤဘၣ်ဒီးတဲ ဘၣ်အီၤလၢယဃ့နၤတၢ်ပျဲဒ်သိးယကက့ၤဆူဟံၣ်ချ့ချ့လၢ ဝ့ၢ်ဘ့ၤသလ့ဃ့ၣ် န့ၣ်တက့ၢ်. မ့ၢ်ဝဲတၢ်ဆၢကတီၢ်လၢတနံၣ်တဘျီ တၢ်လုၢ်တၢ်ပာ်အကတီၢ်လၢပဝဲဒူၣ်ဖိထၢဖိဒီဒူၣ်ညါအဂီၢ်န့ၣ်လီၤ.
7 အဝဲမ့ၢ်စံးဝဲလၢဂ့ၤလံဒီးယကပူၤဖျဲးလီၤ. အဝဲမ့ၢ်သးဒိၣ်ထီၣ်ဒီးနကသ့ၣ်ညါလၢအဝဲပာ်လီၤအသးလီၤတံၢ်လီၤဆဲး လၢကမၤဆါယၤလီၤ.
8 ဝံသးစူၤမၤဘျုးယၤလၢတၢ်တမံၤအံၤဒီးဟံးဃာ်တၢ်အၢၣ်လီၤစီဆှံလၢနမၤအီၤဒီးယၤတက့ၢ်. ဘၣ်ဆၣ်ဒီး, ယတၢ်ကမၣ်မ့ၢ်အိၣ်န့ၣ်မၤသံကွံာ်ယၤလၢနနီၢ်ကစၢ်ဒၣ်နဲတက့ၢ်. ဘၣ်မနုၤနကဘၣ်လဲၤကိးယၤဆူနပၢ်အအိၣ်ဒ်သိးကမၤသံယၤန့ၣ် လဲၣ်.”
9 စီၤယိနၤသၣ်စံးဆၢဝဲ, “ဆိကမိၣ်ဒၣ်လဲာ်တၢ်ဒ်န့ၣ်အသိးတမံၤန့ၣ်တဂ့ၤ. ယမ့ၢ်သ့ၣ်ညါလီၤတံၢ်လၢယပၢ်ပာ်လီၤအသးလၢကမၤဆါနၤဒီး, ယတတဲဘၣ်နၤဘၣ်ဧါ.”
10 တုၤနုၤတစုစီၤဒၤဝံးသံကွၢ်ဝဲ, “မတၤကဒုးသ့ၣ်ညါယၤဘၣ် ဃးဒီးနပၢ်အတၢ်စံးဆၢနၤလၢတၢ်သးဒိၣ်အပူၤန့ၣ်လဲၣ်.”
11 စီၤယိနၤသၣ်စံးဆၢဝဲ, “မ်ပလဲၤသကိးဆူပျီပူၤတက့ၢ်.” ဒီးအဝဲသ့ၣ်လဲၤဝဲလီၤ.
12 စီၤယိနၤသၣ်စံးဘၣ်စီၤဒၤဝံး, “မ်ယွၤ, ကစၢ်ယွၤကဲထီၣ်နၤဒီးယၤအပှၤအုၣ်အသးတက့ၢ်. ခဲမုၢ်ဆ့ၣ်, အဆၢကတီၢ်ဒ်အံၤဒီးပိာ်ထီၣ်အခံလၢခံတနံၤန့ၣ်, ယကသံကွၢ်ယပၢ်လီၤ. အတၢ်ပာ်သူၣ်ပာ်သးလၢနဖီခိၣ်မ့ၢ်ဂ့ၤဝဲ ဒီးယကဆှၢလီၤတၢ်ကတိၤလီၤ.
13 အဝဲမ့ၢ်တိာ်သူၣ်ပာ်သးလၢကမၤဆါနၤဒီး, ယမ့ၢ်တဒုးသ့ၣ်ညါနၤလၢတၢ်ဂ့ၢ်အံၤဒီးမၤပူၤဖျဲးနၤန့ၣ်, မ်ယွၤတီၢ်သံကွံာ်ယၤတက့ၢ်. မ်ယွၤအိၣ်ဒီးနၤဒ်အအိၣ်တ့ၢ် လံဒီးယပၢ်အသိးန့ၣ်တက့ၢ်.
14 ဒီးယမ့ၢ်အိၣ်မူဘၣ်ဒံးယဲဒီးဝံသးစူၤဟံးဃာ်နတၢ်အၢၣ်လီၤ စီဆှံဒီးတီဒီးယၤတက့ၢ်. ဘၣ်ဆၣ်ဒီးယမ့ၢ်သံန့ၣ်,
15 ဒုးနဲၣ်နတၢ်သးအိၣ်တၢ်ပာ်ကဲဒီးနတၢ်သူၣ်တီသးလိၤတမံၤဃီ ဆူယဟံၣ်ဖိဃီဖိအအိၣ်တဘိယူၢ်ဃီတက့ၢ်. ဒီးဖဲယွၤမၤဟးဂီၤကွံာ်ကယဲၢ်နဒုၣ်နဒါလၢလၢပှဲၤပှဲၤန့ၣ်,
16 မ်ပတၢ်အၢၣ်လီၤလိာ်ပသးတဂၤဒီးတဂၤကကျၢၤဒံးဒၣ်ဝဲတက့ၢ်. တၢ်န့ၣ်မ့ၢ်ဟးဂီၤကွံာ်ဒီးယွၤကစံၣ်ညီၣ်နၤလီၤ.”
17 မၤကဒီးတစု, စီၤယိနၤသၣ်မၢစီၤဒၤဝံးမၤတၢ်အၢၣ်လီၤအီ လီၤလၢကအဲၣ်အီၤလီၤ. အဂ့ၢ်ဒ်အံၤစီၤယိနၤသးအဲၣ်စီၤဒၤဝံးဒ်အအဲၣ်လီၤအသးဒၣ်ဝဲ အသိးလီၤ.
18 အန့ၣ်ဝံၤဒီးစီၤယိနၤသၣ်စံးဘၣ်အီၤ, “ခဲမုၢ်ဆ့ၣ်တနံၤန့ၣ် ဒ်အမ့ၢ်လါထီၣ်သီအမူးအသိးန့ၣ် နမ့ၢ်တအိၣ်ဘၣ်လၢတၢ်အီၣ်သကိး အီသကိးအပူၤဘၣ်န့ၣ်တၢ်ကပာ်သူၣ်ပာ်သးအီၤန့ၣ်လီၤ.
19 ခဲတဆ့ၣ်တနံၤန့ၣ်ကဘၣ်တၢ်ပာ်သူၣ်ပာ်သးအီၤဒိၣ်န့ၢ်အန့ၣ်တက့ၢ်လီၤ. မၤသးဒ်န့ၣ်ဒီး, လဲၤဆူတၢ်လီၢ်ဖဲနအိၣ်ခူသူၣ်လၢညါတဘျီ အလီၢ်န့ၣ်ဒီးပာ်ခူသူၣ်နသးလၢလၢၢ်အၤစ့းန့ၣ်တက့ၢ်.
20 ဒီးယကခးဃီၤပျၢ်သၢဘ့ၣ်ဆူန့ၣ်ဒ်တၢ်ပညိၣ်အလီၢ်အသိးန့ၣ်လီၤ.
21 အန့ၣ်ဝံၤဒီးယကမၢယခ့ယပှၤလဲၤဃုန့ၢ်က့ၤအီၤန့ၣ်လီၤ. ဒီးယမ့ၢ်တဲအီၤ, ကွၢ်, ပျၢ်တဖၣ်န့ၣ်အိၣ်လၢနကပၤလၢအံၤတခီ, ဟံးန့ၣ်အီၤတက့ၢ်, န့ၣ်ဒီးအခီပညီမ့ၢ်ဝဲနပူၤဖျဲးဒီးနဟဲ က့ၤဟးထီၣ်သ့ဝဲလီၤ. ယဆိၣ်တၢ်လၢယွၤအမူဝဲတဂၤအမံၤအပူၤလၢတၢ်ပျံၤတၢ်ဖုးအလီၢ် တအိၣ်ဘၣ်နီတမံၤဘၣ်လီၤ.
22 ဘၣ်ဆၣ်ဒီးယမ့ၢ်တဲအီၤ, ပျၢ်တဖၣ်န့ၣ်အိၣ်လၢနအိၣ်လၢဘးခီ တခီလီၤန့ၣ်ဒီး, အန့ၣ်တစုဟးထီၣ်ကွံာ်ဖဲန့ၣ်တက့ၢ်. အဂ့ၢ်ဒ်အံၤ, ယွၤဆှၢနၤဆူအယံၤလီၤ.
23 ဘၣ်ဃးလၢတၢ်အၢၣ်လီၤလၢပမၤတ့ၢ်အီၤတဂၤဒီးတဂၤအံၤန့ၣ်ယွၤ ကမၤလီၤတံၢ်အီၤလၢပကဟံးဃာ်အီၤအထူအယိာ်အဂီၢ်န့ၣ်လီၤ.”
24 မၤသးဒ်န့ၣ်ဒီး, စီၤဒၤဝံးလဲၤအိၣ်ခူသူၣ်လၢပျီပူၤလီၤ. လၢလါထီၣ်သီအမူးန့ၣ်စီၤပၤစီၤစီလူးဟဲဆူတၢ်အီၣ်အလီၢ်လီၤ.
25 ဒီးဆ့ၣ်နီၤဝဲဖဲအဆ့ၣ်နီၤညီနုၢ်ဝဲအလီၢ်လၢဂီၤပၤအကပၤန့ၣ် လီၤ. စီၤအဘံန့ၢ်ဆ့ၣ်နီၤဘူးဒီးအီၤဒီးစီၤယိနၤသၣ်ဆ့ၣ်နီၤလၢ စီၢ်နီၤခိၣ်အဘးခီတကပၤသဃီၤဒီးအီၤန့ၣ်လီၤ. စီၤဒၤဝံးအလီၢ်န့ၣ်လီၤဟိဝဲ,
26 ဘၣ်ဆၣ်ဒီးအနံၤဝဲန့ၣ်စီၤစီလူးတတဲတၢ်နီတမံၤဘၣ်. အဂ့ၢ်ဒ်အံၤဆိကမိၣ်ဝဲ, “တၢ်မၤအသးဒီးအီၤတမံၤမံၤဒီး တကဆှီဝဲဒ်တၢ်ဘူၣ်တၢ်ဘါအလုၢ်အလၢ်အသိးဘၣ်အဃိလီၤ.”
27 လၢခံတနံၤ, ဖဲလါထီၣ်သီအမူးဝံၤဝဲန့ၣ်, စီၤဒၤဝံးအလီၢ်လီၤဟိဒံးဝဲဒီးစီၤစီလူးသံကွၢ်စီၤယိ နၤသၣ်, “ဘၣ်မနုၤလၢစီၤဒၤဝံးတဟဲဘၣ်ဆူတၢ်အီၣ်သကိးလၢမဟါတနံၤ ဒီးတနံၤညါအံၤန့ၣ်လဲၣ်.”
28 စီၤယိနၤသၣ်စံးဆၢအီၤ, “အဝဲဃ့ကညးယၤလၢယကပျဲအီၤဒ်သိးအကက့ၤဆူဝ့ၢ်ဘ့ၤသလ့ဃ့ၣ်လီၤ.
29 အဝဲစံးဝဲ, ဝံသးစူၤပျဲယလဲၤတက့ၢ်. အဂ့ၢ်ဒ်အံၤ, ပဒူၣ်ဖိထၢဖိမၤတၢ်လုၢ်တၢ်ပာ်, ဘူၣ်တၢ်ဘါတၢ်လၢဝ့ၢ်ပူၤဒီးယဝဲၢ်မၤလိာ်ယၤလၢယကဘၣ်အိၣ်ဖဲန့ၣ်လီၤ. လၢတၢ်န့ၣ်အဃိဒီးနမ့မ့ၢ်ယတံၤသကိးဒီးပျဲယလဲၤဒီးထံၣ်ဘၣ် ယဘူးယတံၢ်တဖၣ်တက့ၢ်. မၤသးဒ်န့ၣ်ဒီး, အဝဲတအိၣ်ဘၣ်လၢအလီၢ်လၢနစီၢ်နီၤခိၣ်ဘၣ်န့ၣ်လီၤ.”
30 စီၤစီလူးသးဒိၣ်ထီၣ်လၢစီၤယိနၤသၣ်အဖီခိၣ်နးနးကလဲာ်ဒီး စံးဘၣ်အီၤ, “နဲဒၣ်ပှၤလၢအဘိးကဒါကွံာ်တၢ်မ့ၢ်တၢ်တီဒီးပူထီၣ်တၢ်တဂၤဧၢ, ခဲအံၤယသ့ၣ်ညါလၢနအိၣ်လၢစီၤဒၤဝံးအအိၣ်တခီဒီးနမၤဟးဂီၤ နသူးနသ့ၣ်ဒီးနမိၢ်ဒၣ်နဲအလၤကပီၤလီၤ.”
31 စီၤယိနၤသၣ်စံးဝဲ,
32 “ဘၣ်မနုၤအဃိအဝဲကဘၣ်သံန့ၣ်လဲၣ်. အဝဲမၤတ့ၢ်တၢ်မနုၤလဲၣ်.”
33 အန့ၣ်ဒီး, စီၤစီလူးကွံာ်ဆဲးအဘီလၢစီၤယိနၤသၣ်ဒ်သိးအကမၤသံကွံာ်အီၤလီၤ. ဒီးစီၤယိနၤသၣ်သ့ၣ်ညါနၢ်ပၢၢ်ဝဲလၢအပၢ်န့ၣ် ပာ်လီၤအသးသပှၢ်ကတၢၢ်လၢကမၤသံစီၤဒၤဝံးန့ၣ်လီၤ.
34 စီၤယိနၤသၣ်ဆၢထၢၣ်လၢစီၢ်နီၤခိၣ်လၢတၢ်သးဒိၣ်အပူၤဒီး တအီၣ်တၢ်နီတမံၤဘၣ်လၢမုၢ်နံၤအဝဲန့ၣ်လၢလါထီၣ်သီအမူး ခံသီတသီအနံၤန့ၣ်လီၤ. အဝဲအသးဘၣ်ဒိဘၣ်ထံးဒိၣ်မးလၢစီၤဒၤဝံးအဂီၢ်လီၤ. အဂ့ၢ်ဒ်အံၤ, စီၤစီလူးမၤမဲာ်ဆှးအီၤန့ၣ်လီၤ.
35 မုၢ်ဆ့ၣ်ထီၣ်တနံၤန့ၣ်, စီၤယိနၤသၣ်လဲၤဆူပျီပူၤလၢကထံၣ် လိာ်ဒီးစီၤဒၤဝံးအဂီၢ်ဒ်အဝဲသ့ၣ်အၢၣ်လီၤလိာ်အသးယၢ်ခီယၢ်ခီ အသိးန့ၣ်လီၤ. အဝဲလဲၤကိးဃုာ်သးစၢ်ဖိတဂၤဃုာ်ဒီးအီၤလီၤ.
36 ဒီးစံးဘၣ်အီၤ, “ဃ့ၢ်ဒီးဃုထံၣ်က့ၤယပျၢ်လၢယကခးအီၤန့ၣ်တက့ၢ်.” ပှၤသးစၢ်ဖိဃ့ၢ်ဒီးစီၤယိနၤသၣ်ခးထီၣ်အပျၢ်တဘ့ၣ်ပူၤကွံာ် အီၤန့ၣ်လီၤ.
37 ဖဲပှၤသးစၢ်ဖိတုၤတၢ်လီၢ်ဖဲပျၢ်လီၤတဲာ်ဝဲအလီၢ်န့ၣ်, စီၤယိနၤသၣ်ကိးတဲဘၣ်အီၤ, “ပျၢ်န့ၣ်အိၣ်လၢမဲာ်ညါတစဲးလီၤ.
38 အိၣ်ဆၢထၢၣ်ဖဲန့ၣ်တဂ့ၤ. မၤချ့ချ့တက့ၢ်.” ပှၤသးစၢ်ဖိထၢထီၣ်ပျၢ်ဒီးဟဲက့ၤဆူအကစၢ်အိၣ်လီၤ.
39 တသ့ၣ်ညါဝဲတၢ်န့ၣ်အခီပညီဘၣ်. ထဲစီၤယိၤနၤသၣ်ဒီးစီၤဒၤ ဝံးတဖၣ်ဧိၤသ့ၣ်ညါဝဲလီၤ.
40 စီၤယိနၤသၣ်ဟ့ၣ်လီၤအစုကဝဲၤတဖၣ်ဆူပှၤသးစၢ်ဖိအအိၣ်ဒီးတဲ အီၤလၢကက့ၤစိာ်ဆူဝ့ၢ်ပူၤလီၤ.
41 ဖဲပှၤသးစၢ်ဖိက့ၤဝဲန့ၣ်, စီၤဒၤဝံးဂဲၤဆၢထၢၣ်လၢလၢၢ်အၤစ့းဒီးတီၤလီၤဝဲလၢအခီၣ်လ့ၢ်ခိၣ်ဒီးပိာ်လီၤအမဲာ်သၣ်လၢ ဟီၣ်ခိၣ်သၢစုလီၤ. စီၤဒၤဝံးဒီးစီၤယိနၤသၣ်ခံဂၤလိာ်ဟီၣ်ဝဲဖဲအနၢမူလိာ် အသးအခါန့ၣ်လီၤ. စီၤဒၤဝံးအတၢ်သးအုးဒိၣ်န့ၢ်ဒံးစီၤယိနၤသၣ်တက့ၢ်န့ၣ်လီၤ.
42 အန့ၣ်ဝံၤဒီးစီၤယိနၤသၣ်စံးဘၣ်စီၤဒၤဝံး, “ကစၢ်ယွၤအိၣ်ဒီးနၤလီၤ. ယွၤကမၤလီၤတံၢ်ဝဲလၢနၤဒီးယၤ, ဒီးနစၢၤနသွဲၣ်ဒီး, ယစၢၤယသွဲၣ်တဖၣ်ကဟံးဃာ်အတၢ်အၢၣ်လီၤစီ ဆှံလၢပမၤတ့ၢ်အီၤယၢ်ခီယၢ်ခီန့ၣ်လီၤ.” အန့ၣ်ဝံၤဒီးစီၤဒၤဝံးဟးထီၣ်ဝဲဒီး စီၤယိနၤသၣ်က့ၤကဒါက့ၤဆူဝ့ၢ်ပူၤန့ၣ်လီၤ.