17
1 ပှၤဖလ့ၡသးဖိတဖၣ်ပာ်ဖှိၣ်ထီၣ်အသးဖဲဝ့ၢ်ၡိကိၤ, ဝ့ၢ်တဝ့ၢ်လၢအအိၣ်လၢကီၢ်ယူဒၤအပူၤန့ၣ်လီၤ. အဝဲသ့ၣ်သူၣ်ထီၣ်အဒဲဖဲတၢ်လီၢ်ကိးဝဲလၢအ့ဖ့းစဒးမံၣ်လၢ အအိၣ်ဖဲၡိကိၤဒီးဝ့ၢ်ဧစ့ကၤအဘၢၣ်စၢၤန့ၣ်လီၤ.
2 စီၤစီလူးဒီးပှၤအံၣ်စရ့လးဖိတဖၣ်ပာ်ဖှိၣ်ထီၣ်အသးဒီးသူၣ် ထီၣ်အဒဲလၢအ့လ:အတၢ်တြီၤအပူၤဖဲအကတဲာ်ကတီၤအသးလၢကဒုး ပှၤဖလ့ၡသးဖိတဖၣ်အဂီၢ်န့ၣ်လီၤ.
3 ပှၤဖလ့ၡသးဖိတဖၣ်ရဲၣ်လီၤအသးလၢတၢ်လူၢ်တဖျၢၣ်အလိၤ, ဒီးပှၤအံၣ်စရ့လးဖိတဖၣ်လၢတၢ်လူၢ်အဂၤတဖျၢၣ်အလိၤလီၤ. အဝဲသ့ၣ်ခံခီယၢ်ခီအဘၢၣ်စၢၤန့ၣ်တၢ်တြီၤအိၣ်ဝဲဒၣ်တခါလီၤ.
4 ပှၤလၢအမံၤမ့ၢ်စီၤကၤလယးလၢဝ့ၢ်ကၤသးတဂၤန့ၣ်ဟဲထီၣ်လၢပှၤ ဖလ့ၡသးဖိတဖၣ်အသူၣ်ဒဲအလီၢ်ပူၤဒ်သိးကတၤပှၤအံၣ်စရ့လးဖိ တဖၣ်န့ၣ်လီၤ. အဝဲအဂီၤအထီအိၣ်ဝဲဃုပျၢ်အဘျဲၣ်,
5 ဒီးသိးဃာ်ဝဲဆ့ကၤဒုးသုးလၢတၢ်ဘှီအီၤလၢတိၢ်ဘီဒီး အတယၢၣ်အိၣ်ဝဲၡက့လးယဲၢ်ကထိဒီးသုးအခိၣ်သလုးတိၢ်ဘီ တဖျၢၣ်န့ၣ်လီၤ.
6 အခီၣ်တဖၣ်စ့ၢ်ကီးဘၣ်တၢ်ဒီဒၣ်အိၣ်ပှိၤဃာ်အီၤလၢသဃိးတိၢ်ဘီ, ဒီးအဝဲစိာ်ဘီတိၢ်ဘီတဘိလၢအဖံဘၣ်ခိၣ်လီၤ.
7 အဘီန့ၣ်တီၢ်ထဲသိးပှၤထါထၣ်ဖိအထၣ်နီၣ်ဘိဒီးအကနၣ်ထးန့ၣ် အတယၢၣ်အိၣ်ဝဲၡက့လးဃုကယၤလီၤ. ပှၤသုးဖိတဂၤလဲၤတၢ်အမဲာ်ညါဒီးစိာ်န့ၢ်အီၤအကတီၤတဘ့ၣ်န့ၣ် လီၤ.
8 စီၤကၤလယးဂဲၤထၢၣ်ဒီးကိးပသူထီၣ်ဆူပှၤအံၣ်စရ့လးဖိ တဖၣ်အအိၣ်စံးဝဲ, “သုမၤတၢ်မနုၤဖဲန့ၣ်ဒီးရဲၣ်လီၤသုသး လၢတၢ်ဒုးတၢ်ယၤအဂီၢ်န့ၣ်လဲၣ်. ယမ့ၢ်ပှၤဖလ့ၡသးဖိတဂၤလီၤ. သုဝဲစီၤစီလူးအကုၢ်အပှၤသ့ၣ်တဖၣ်ဧၢ, ဃုထၢထီၣ်ပှၤတဂၤလၢသုပှၤပိာ်ခွါအကျါလၢကဒုးယၤအဂီၢ်တက့ၢ်.
9 အဝဲမ့ၢ်မၤနၢၤတၢ်ဒီးမၤသံယၤန့ၣ်, ပကကဲထီၣ်သုကုၢ်သုပှၤတဖၣ်လီၤ. ဘၣ်ဆၣ်ယမ့ၢ်နၢၤတၢ်ဒီးမၤသံအီၤန့ၣ်သုကကဲထီၣ်ပကုၢ်ပပှၤတဖၣ်လီၤ.
10 ဖဲအံၤယတၤပှၤအံၣ်စရ့လးဖိအသုးမုၢ်ခဲအံၤန့ၣ်လီၤ. သုဃုထၢပှၤတဂၤန့ၣ်ယဒုးအီၤဘူၣ်ယဲလီၤ.”
11 ဖဲစီၤစီလူးဒီးအပှၤတဖၣ်နၢ်ဟူတၢ်အံၤန့ၣ်အဝဲသ့ၣ်ပျံၤတၢ် နးနးကလဲာ်လီၤ.
12 စီၤဒၤဝံးမ့ၢ်, ပှၤအ့ဖရၤသးဖိလၢဝ့ၢ်ဘ့ၤသလ့ဃ့ၣ်, ကီၢ်ယူဒၤအပူၤ, စီၤယံးၡဲအဖိခွါန့ၣ်လီၤ. စီၤယံးၡဲအဖိခွါအိၣ်ဃိးဂၤဒီးဖဲစီၤစီလူးကဲစီၤပၤ န့ၣ်, စီၤယံးၡဲမ့ၢ်ပှၤသးပှၢ်တဂၤလံန့ၣ်လီၤ.
13 အဖိခွါအဒိၣ်ကတၢၢ်သၢဂၤန့ၣ်ပိာ်စီၤစီလူးအခံဆူတၢ်ဒုး အပူၤလီၤ. အဖိခွါအဒိၣ်ကတၢၢ်တဂၤအမံၤမ့ၢ်စီၤအ့လံအာ်, လၢခံတဂၤမ့ၢ်စီၤအဘံနဒာ်ဒီးပှၤသၢဂၤတဂၤမ့ၢ်စီၤၡးမၤလီၤ.
14 စီၤဒၤဝံးမ့ၢ်ပှၤသးစၢ်ကတၢၢ်ဒီးဖဲအဝဲၢ်အဒိၣ်ကတၢၢ်သၢဂၤအိၣ် ဒီးစီၤစီလူးအခါန့ၣ်,
15 စီၤဒၤဝံးက့ၤဆူဝ့ၢ်ဘ့ၤသလ့ဃ့ၣ်တဘျီတဘျီဒ်သိးအကကွၢ်ထွဲ အပၢ်အသိဖိတဖၣ်လီၤ.
16 စီၤကၤလယးတၤပှၤအံၣ်စရ့လးဖိတဖၣ်ကိးမုၢ်ဂီၤဒဲးကိးမုၢ် ဟါဒဲးလၢအသီလွံၢ်ဆံအတီၢ်ပူၤန့ၣ်လီၤ.
17 တနံၤန့ၣ်စီၤယံးၡဲစံးဘၣ်စီၤဒၤဝံး, “ဟံးန့ၢ်ဘုဝဲာ်ဃးအသးတအ့ဖးဒီးကိၣ်အဖျၢၣ်တဆံအံၤဒီး လဲၤစိာ်အီၤချ့ချ့ဆူနဝဲၢ်တဖၣ်အအိၣ်လၢတၢ်သူၣ်ဒဲအလီၢ်ပူၤ န့ၣ်တက့ၢ်.
18 ဒီးလဲၤစိာ်တၢ်နုၢ်ထံလီၤသကၤအလိၣ်တဆံအံၤဆူသုးခိၣ်ဖးဒိၣ် အအိၣ်တက့ၢ်. ဃုသ့ၣ်ညါနဝဲၢ်တဖၣ်မ့ၢ်အအိၣ်မၤသးဒ်လဲၣ်ဒီးဟဲက့ၤစိာ်တၢ် တမံၤလၢကဒုးနဲၣ်တၢ်လၢနထံၣ်တ့ၢ်အဝဲသ့ၣ်ဒီးလၢအဝဲသ့ၣ်အိၣ် ဆူၣ်အိၣ်ချ့အဂ့ၢ်န့ၣ်တက့ၢ်.
19 စီၤပၤစီၤစီလူးဒီးနဝဲၢ်တဖၣ်ဒီးပှၤအံၣ်စရ့လးဖိတဖၣ်အိၣ် လၢတၢ်တြီၤအ့လၤဒီးဒုးပှၤဖလ့ၡသးဖိတဖၣ်လီၤ.
20 စီၤဒၤဝံးဂဲၤဆၢထၢၣ်လၢမုၢ်ဆ့ၣ်ထီၣ်တနံၤန့ၣ်ဂီၤဂီၤ, ပာ်တ့ၢ်ပှၤတဂၤလၢကဟံးန့ၢ်မူဒါဒီးကွၢ်ထွဲသိတဖၣ်, ဟံးထီၣ်တၢ်အီၣ်တၢ်အီဒီးလဲၤတၢ်ဒ်စီၤယံးၡဲစံးတ့ၢ်အီၤ အသိးလီၤ. အဝဲလဲၤတုၤဆူတၢ်သူၣ်ထီၣ်ဒဲအလီၢ်ဖဲပှၤအံၣ်စရ့လးဖိ တဖၣ်လဲၤထီၣ်ဆူတၢ်ဒုးတၢ်ယၤအလီၢ်, ကိးထီၣ်တၢ်ဒုးတၢ်ယၤ အကလုၢ်အကတီၢ်န့ၣ်လီၤ.
21 ပှၤဖလ့ၡသးဖိဒီးပှၤအံၣ်စရ့လးဖိအသုးမုၢ်တဖၣ်ဟံးန့ၢ်တၢ်လီၢ်တၢ်ကျဲလၢ ကဒုးတၢ်ယၤတၢ်အဂီၢ်ဒီးကွၢ်ဆၢၣ်မဲာ်လိာ်အသး လီၤ.
22 စီၤဒၤဝံးပာ်တ့ၢ်တၢ်အီၣ်တၢ်အီတဖၣ်လၢသုးခိၣ်ဘၣ်မူဘၣ်ဒါလၢ အဆှၢထီၣ်တၢ်အီၣ်တၢ်အီတဖၣ်အအိၣ်ဒီး လဲၤဃ့ၢ်ဝဲဆူတၢ်ဒုးတၢ်ယၤအလီၢ်, လဲၤဆူအဝဲၢ်တဖၣ်အအိၣ်, ဒီးသံကွၢ်အဝဲသ့ၣ် မ့ၢ်အအိၣ်မၤသးဒ်လဲၣ်အဂ့ၢ်န့ၣ်လီၤ.
23 ဖဲအကတိၤတၢ်ဒီးအဝဲသ့ၣ်အဖၢမုၢ်န့ၣ်စီၤကၤလယးဟဲထီၣ်ဆူညါ ဒီးတၤပှၤအံၣ်စရ့လးဖိတဖၣ်ဒ်အမၤတ့ၢ်ဝဲလၢညါအသိးန့ၣ် လီၤ. ဒီးစီၤဒၤဝံးနၢ်ဟူအီၤလီၤ.
24 ဖဲပှၤအံၣ်စရ့လးဖိတဖၣ်ထံၣ်စီၤကၤလယးန့ၣ်အဝဲသ့ၣ်ဃ့ၢ်ကွံာ် လၢတၢ်ပျံၤဖးဒိၣ်အပူၤလီၤ.
25 အဝဲသ့ၣ်စံးလိာ်အသးတဂၤဒီးတဂၤ, “ကွၢ်အီၤတက့ၢ်. ကနၣ်အဝဲတၤတၢ်အတၢ်ကတိၤတက့ၢ်. စီၤပၤစီၤစီလူးအၢၣ်လီၤတၢ်လၢကဟ့ၣ်ခိၣ်ဖးဒိၣ်ဒိၣ်ကလဲာ်ဆူ ပှၤတဂၤလၢအမၤသံအီၤလီၤ. စီၤပၤကဟ့ၣ်အီၤစ့ၢ်ကီးလၢအဖိမုၣ်ဒ်သိးကဖျီအသးဒီးအပၢ် အဒူၣ်ဖိထၢဖိကဘၣ်ဟ့ၣ်တၢ်အခိအသွဲအလီၢ်တအိၣ်ဘၣ်န့ၣ်လီၤ.”
26 စီၤဒၤဝံးသံကွၢ်ပှၤတဖၣ်လၢအအိၣ်ဘူးဒီးအီၤ, “ပှၤတဂၤလၢအမၤသံပှၤဖလ့ၡသးဖိတဂၤန့ၣ်ဒီးမၤသဘျ့ထီၣ် ပှၤအံၣ်စရ့လးဖိလၢတၢ်ဒုၣ်ဒွဲၣ်အံၤန့ၣ်ကမၤန့ၢ်တၢ်မနုၤ လဲၣ်. ဝံၤဒီးပှၤဖလ့ၡသးဖိလၢအတစူၢ်တနာ်ယွၤဒီးထီဒါကစၢ်ယွၤလၢ အမူဝဲတဂၤအသုးမုၢ်န့ၣ်မ့ၢ်မတၤတဂၤလဲၣ်.”
27 အဝဲသ့ၣ်တဲဘၣ်အီၤတၢ်ဘၣ်ဃးပှၤလၢအမၤသံစီၤကၤလယးကဘၣ်တၢ်မၤ န့ၣ်အီၤမနုၤတမံၤအဂ့ၢ်န့ၣ်လီၤ.
28 စီၤအ့လံအာ်လၢအမ့ၢ်စီၤဒၤဝံးအဝဲၢ်အဒိၣ်ကတၢၢ်နၢ်ဟူ စီၤဒၤဝံးကတိၤတၢ်ဒီးပှၤတဖၣ်န့ၣ်လီၤ. အဝဲအသးဒိၣ်ထီၣ်ဘၣ်စီၤဒၤဝံးဒီးစံးဝဲ, “နမၤတၢ်မနုၤတမံၤဖဲအံၤန့ၣ်လဲၣ်. မတၤတဂၤအံးထွဲ ကွၢ်ထွဲနသိဖိတဖၣ်လၢပှၢ်မုၢ်ကနၢအပူၤန့ၣ်လဲၣ်. နၤအံၤနမၤသးဒ်ဖိသၣ်လၢတပာ်လ့ၢ်ပာ်ကါတၢ်အသိးလီၤ. နဟဲနဲဒ်သိးနကကွၢ်ကီတၢ်ဒုးတၢ်ယၤတမ့ၢ်ဘၣ်ဧါ.”
29 စီၤဒၤဝံးစံးဝဲဒၣ်, “ခဲအံၤယမၤတၢ်မနုၤတမံၤလဲၣ်. ယသံကွၢ်တၢ်ထဲတဘီဧိၤတသ့ဘၣ်ဧါ.”
30 အဝဲဃၣ်ကဒါအသးဆူပှၤတဂၤအအိၣ်ဒီးသံကွၢ်တၢ်တမံၤဃီ န့ၣ်လီၤ. ဒီးကိးဘျီဒဲးဖဲအသံကွၢ်တၢ်န့ၣ်, မၤန့ၢ်တၢ်စံးဆၢတမံၤဃီန့ၣ်လီၤ.
31 ပှၤတနီၤနီၤနၢ်ဟူတၢ်လၢစီၤဒၤဝံးစံးတ့ၢ်ဝဲဒီးအဝဲသ့ၣ်တဲ ဘၣ်စီၤစီလူး, ဒီးစီၤစီလူးမၢပှၤလဲၤကိးန့ၢ်အီၤစီၤဒၤဝံးန့ၣ်လီၤ.
32 စီၤဒၤဝံးစံးဘၣ်စီၤစီလူး, “တၢ်ဒိၣ်စီၤပၤဖးဒိၣ်ဧၢ, တကြၢးလၢပှၤကပျံၤဘၣ်ပှၤဖလ့ၡသးဖိတဂၤအံၤနီတစဲးဘၣ်. ယကလဲၤဒီးဒုးအီၤလီၤ.”
33 စီၤစီလူးစံးဆၢဝဲဒၣ်, “တသ့ဝဲဘၣ်. နဒုးအီၤကသ့ဒ်လဲၣ်. နမ့ၢ်ဒံးဒၣ်ဖိသၣ်တဂၤ, ဒီးအဝဲမ့ၢ်တ့ၢ်ပှၤသုးဖိတဂၤလၢအသးသမူဒီစိၤညါန့ၣ်လီၤ.”
34 စီၤဒၤဝံးစံးဝဲ, “တၢ်ဒိၣ်, စီၤပၤဖးဒိၣ်ဧၢ, ယအံးထွဲကွၢ်ထွဲ ယပၢ်အသိတဖၣ်လီၤ. တဘျီလၢ်လၢ်ဖဲခ့ယုၢ်တဒုမ့ၢ်ဂ့ၤ တၤသူတဒုမ့ၢ်ဂ့ၤ စိာ်ကွံာ်ယသိဖိတဒုဒီး,
35 ယလူၤထွဲအခံ, ဒုးအီၤ, ဒီးမၤပူၤဖျဲးသိဖိန့ၣ်လီၤ. ဒီးခ့ယုၢ်မ့ၢ်ဂ့ၤတၤသူမ့ၢ်ဂ့ၤမ့ၢ်ဃၣ်အသးလၢကမၤဒၢၣ်ယၤဒီး, ယစှီၤအီၤလၢအကိာ်ယူၢ်ဒီးတီၢ်အီၤတုၤအသံလီၤ.
36 ယမၤသံတ့ၢ်ခ့ယုၢ်တဖၣ်, တၤသူတဖၣ်ဒီးယကမၤတၢ်တမံၤဃီလၢပှၤ တစူၢ်တနာ်တၢ်ပှၤဖလ့ၡသးဖိတဂၤအံၤလၢအခီၣ်ဆၢ ကစၢ်ယွၤလၢအမူဝဲတဂၤအသုးမုၢ်န့ၣ်လီၤ.”
37 ယွၤအုၣ်က့ၤခီၣ်က့ၤတ့ၢ်ယၤလၢခ့ယုၢ်တဖၣ်ဒီးတၤသူတဖၣ်သတးဒီး အဝဲကအုၣ်က့ၤခီၣ်က့ၤယၤလၢပှၤဖလ့ၡသးဖိတဂၤအံၤအစုပူၤ န့ၣ်လီၤ. စီၤစီလူးစံးဝဲဒၣ်, “ဂ့ၤလံ, လဲၤဒီးမ်ယွၤအိၣ်ဒီးနၤတက့ၢ်.”
38 အဝဲဟ့ၣ်လီၤအကစၢ်ဒၣ်ဝဲအတၢ်ဒုးသုးအကူအသိးလၢစီၤဒၤဝံး အဂီၢ်ဒ်သိးအကသိးထီၣ်ဝဲဒၣ်လီၤ. ဒုးကၢၢ်ထီၣ်ဝဲခိၣ်ဖျီၣ်သုးတိၢ်လၢစီၤဒၤဝံးအခိၣ်လိၤဒီး ဒုးကၤထီၣ်အီၤလၢတၢ်ဒုးအဆ့ကၤဖးဒိၣ်တဘ့ၣ်လီၤ.
39 စီၤဒၤဝံးစၢထီၣ်စီၤစီလူးအနးလၢသဃိးအဖီခိၣ်ဒီးကျဲး စၢးဒ်သိးကဟးဝဲဒၣ်လီၤ. ဘၣ်ဆၣ်ဒီးဟးဝဲတန့ၢ်ဘၣ်အဂ့ၢ်ဒ်အံၤ, တသိးညီနုၢ်ဘၣ်ဝဲအဃိလီၤ. အဝဲစံးဘၣ်စီၤစီလူး, “ယဒုးတၢ်လၢတၢ်တဖၣ်အံၤတန့ၢ်ဘၣ်. ယတမၤညီနုၢ်အီၤဘၣ်.” လၢတၢ်န့ၣ်အဃိဘ့ၣ်လီၤကွံာ်ဝဲခဲလၢာ်လီၤ.
40 အဝဲစိာ်အပှၤကွၢ်သိအနီၣ်ထိးဘိဝံၤဒီးထၢထီၣ်ဝဲလၢၢ်အဘျ့ယဲၢ်ဖျၢၣ်လၢ ထံကျိဖိဒီးဒၢနုာ်အီၤလၢအထၢၣ်ပူၤလီၤ. အဝဲကတဲာ်ကတီၤထီၣ်အနီၣ်ဘျုးဝံၤဒီးလဲၤထီၣ်ဝဲဒ်သိးကထံၣ်လိာ် ဒီးစီၤကၤလယးအဂီၢ်န့ၣ်လီၤ.
41 ပှၤဖလ့ၡသးဖိတဂၤန့ၣ်စးထီၣ်ဟဲဃီၤဆူစီၤဒၤဝံးအအိၣ်, ဃုာ်ဒီးအပှၤစိာ်အကတီၤလၢအဟးလၢအမဲာ်ညါန့ၣ်လီၤ. အဝဲဟဲဃီၤဘူးထီၣ်ဘူးထီၣ်,
42 ဒီးဖဲအထံၣ်ဘၣ်စီၤဒၤဝံးဂ့ၤဂ့ၤလံန့ၣ်, အဝဲပှဲၤဒီးတၢ်ကတိၤနံၤဘၣ်ဖၣ်လဲ, ဒုၣ်ဒွဲၣ်အီၤ, မ့ၢ်လၢ, အဝဲမ့ၢ်ဒံးဒၣ်ဖိသၣ်ပိာ်ခွါတဂၤလၢဘၣ်ဖဲနကွၢ်အီၤ ဂ့ၤန့ၣ်လီၤ.
43 အဝဲစံးဘၣ်စီၤဒၤဝံး, “နီၣ်က့တဘိန့ၣ်မ့ၢ်လၢမနုၤအဂီၢ်လဲၣ်. နဆိကမိၣ်ယမ့ၢ်ထွံၣ်တဒုဧါ.” ဒီးအဝဲဆိၣ်အၢစီၤဒၤဝံးလၢအဝဲအကစၢ်တဖၣ်အမံၤလီၤ.
44 အဝဲတၤစီၤဒၤဝံးစံးဝဲ, “ဟဲဃီၤ, ယကဒုးအီၣ်နညၣ်လၢထိၣ် တဖၣ်ဒီးဆၣ်ဖိကီၢ်ဖိတဖၣ်လီၤ.”
45 စီၤဒၤဝံးစံးဆၢဝဲဒၣ်, “နဟဲထီဒါယၤလၢနး, ဘီဒီးဘီဖိတဖၣ်လီၤ. မ့မ့ၢ်ယဟဲထီဒါနၤလၢပှၤအံၣ်စရ့လး ဖိအသုးမုၢ်အကစၢ်ယွၤ, ယွၤသ့တၢ်လၢာ်, လၢနမၤတရီတပါအီၤတဂၤန့ၣ်အမံၤလီၤ.
46 တနံၤဃီအံၤန့ၣ်ယွၤကပာ်နၤလၢယစိကမီၤအဖီလာ်လီၤ. ယကမၤနၢၤကွံာ်နၤဒီးကျီတဲာ်နခိၣ်လီၤ. ဒီးယကဟ့ၣ်လီၤပှၤဖလ့ၡသးဖိအသုးမုၢ်တဖၣ်အနီၢ်ခိဆူ ထိၣ်ဖိလံာ်ဖိဒီးဆၣ်ဖိကီၢ်ဖိတဖၣ်ကအီၣ်တၢ်အဂီၢ်လီၤ. တုၤနုၤတစု, ဟီၣ်ခိၣ်ဒီဘ့ၣ်ညါကသ့ၣ်ညါလၢကီၢ်အံၣ်စရ့လး အိၣ်ဒီးကစၢ်ယွၤတဂၤလီၤ.
47 ဒီးပှၤအိၣ်ဖဲအံၤကိးဂၤကထံၣ်ဝဲလၢယွၤတလိၣ်ဘၣ်နးတဖၣ်မ့ၢ် ဂ့ၤဘီတဖၣ်မ့ၢ်ဂ့ၤလၢကအုၣ်က့ၤခီၣ်က့ၤအပှၤဂီၢ်မုၢ်အဂီၢ်ဘၣ် န့ၣ်လီၤ. အဝဲမၤန့ၢ်မၤနၢၤတၢ်လၢတၢ်ဒုးတၢ်ယၤအပူၤ, ဒီးအဝဲကပာ်လီၤသုလၢပစိကမီၤအဖီလာ်လီၤ.”
48 စီၤကၤလယးစးထီၣ်ဟဲကဒီးဆူစီၤဒၤဝံးအအိၣ်, ဒီးစီၤဒၤဝံးဃ့ၢ်ထီၣ်ချ့သဒံးလိၤလိၤဆူပှၤဖလ့ၡသးဖိအတၢ်ဒုးအလီၢ် ဒ်သိးကဒုးအီၤလီၤ.
49 အဝဲဘုးနုာ်အစုဆူအထၢၣ်ပူၤဒီးထုးထီၣ်လၢၢ်တဖျၢၣ်ဒီးဘျုး ဃီၤစီၤကၤလယးလၢနီၣ်ဘျုးန့ၣ်လီၤ. လၢၢ်န့ၣ်ဘၣ်စီၤကၤလယးဖဲအခိၣ်တိသၣ်ဒီးအခိၣ်ကုကၢၢ်ဝဲ, ဒီးစီၤကၤလယးလီၤဃံၤအီထီလာ်လၢဟီၣ်ခိၣ်လိၤန့ၣ်လီၤ.
50 မၤသးဒ်န့ၣ်ဒီး, စီၤဒၤဝံးမၤနၢၤဒီးမၤသံကွံာ်စီၤကၤလယး လၢနီၣ်ဘျုးတခါဒီးလၢၢ်တဖျၢၣ်, တအိၣ်ဒီးနးတဘ့ၣ်ဘၣ်န့ၣ်လီၤ.
51 အဝဲဃ့ၢ်ဆူစီၤကၤလယးအအိၣ်, ဆၢထၢၣ်လၢအဖီခိၣ်, ဟံးန့ၢ်အနးလၢအတြိးပူၤဒီး ကျီတဲာ်ကွံာ်ဝဲအခိၣ်ဒီးမၤသံကွံာ်အီၤန့ၣ်လီၤ. ဖဲပှၤဖလ့ၡသးဖိတဖၣ်ထံၣ်ဘၣ်ဝဲလၢအဝဲသ့ၣ်အပှၤဒူပှၤဃိၤသံ လံန့ၣ်, ထွးထီၣ်ဃ့ၢ်ကွံာ်ဝဲလီၤ.
52 ကီၢ်အံၣ်စရ့လးဒီးကီၢ်ယူဒၤအပှၤတဖၣ်ကိးပသူထီၣ်ဒီးလူၤထွဲ အဝဲသ့ၣ်အခံ, ဖီၣ်အီၤမၤဒၢၣ်အီၤလၢကျဲဒီဘိညါဆူဝ့ၢ်ကၤသးဒီး ဆူဝ့ၢ်ဧ့ကြိၣ်အကျဲစၢၤတဖၣ်န့ၣ်လီၤ. ပှၤဖလ့ၡသးဖိတဖၣ်ဘၣ်ဒိဘၣ်ထံးလီၤဃံၤလၢကျဲလဲၤဆူဝ့ၢ်ၡၤရဲၣ်ဒီဘိညါ ဒီးတုၤဒၣ်လဲာ်ဆူဝ့ၢ်ဧ့ကြိၣ်ဒီး ဝ့ၢ်ကၤသးန့ၣ်လီၤ.
53 ဖဲပှၤအံၣ်စရ့လးဖိတဖၣ်ဟဲက့ၤလၢအတၢ်လူၤကျီပှၤဖလ့ၡသးဖိ တဖၣ်န့ၣ်, အဝဲသ့ၣ်ဂုာ်န့ၢ်ပှၤဖလ့ၡသးဖိအသူၣ်ဒဲလီၢ်န့ၣ်လီၤ.
54 စီၤဒၤဝံးဟံးထီၣ်စီၤကၤလယးအခိၣ်ဒီးဟဲက့ၤစိာ်အီၤဆူဝ့ၢ်ယရူၤၡလ့ၣ်လီၤ. မ့မ့ၢ်စီၤကၤလယးအစုကဝဲၤတဖၣ်န့ၣ်ပာ်ဃးဝဲလၢအဒဲပူၤန့ၣ်လီၤ.
55 ဖဲစီၤစီလူးထံၣ်စီၤဒၤဝံးလဲၤထီၣ်ဒ်သိးကဒုးစီၤကၤလယး န့ၣ်အဝဲသံကွၢ်အသုးခိၣ်ကျၢၢ်စီၤအဘံန့ၢ်, “စီၤအဘံန့ၢ်ဧၢ, အဝဲမ့ၢ်မတၤအဖိခွါလဲၣ်.” စီၤအဘံန့ၢ်စံးဆၢဝဲ, “တၢ်ဒိၣ်စီၤပၤဖးဒိၣ်ဧၢ, ယတသ့ၣ်ညါဘၣ်.”
56 စီၤစီလူးဟ့ၣ်လီၤအကလုၢ်, “မ့မ့ၢ်ဒ်န့ၣ်ဒီးလဲၤဃုသ့ၣ်ညါ အီၤတက့ၢ်.”
57 မၤသးဒ်န့ၣ်ဒီး, ဖဲစီၤဒၤဝံးမၤသံစီၤကၤလယးဝံၤဒီးဟဲက့ၤဆူသူၣ်ဒဲအလီၢ်န့ၣ် စီၤအဘံန့ၢ်က့ၤကိးအီၤဆူစီၤစီလူးအအိၣ် လီၤ. စီၤဒၤဝံးစိာ်ဃးဒံးစီၤကၤလယးအခိၣ်အဖၢမုၢ်လီၤ.
58 စီၤစီလူးသံကွၢ်အီၤ, “ပှၤသးစၢ်ဧၢ, နမ့ၢ်မတၤအဖိခွါ လဲၣ်.” စီၤဒၤဝံးစံးဆၢဝဲဒၣ်, “ယမ့ၢ်နခ့နပှၤစီၤယံးၡဲလၢဝ့ၢ်ဘ့ၤသလ့ဃ့ၣ်တခီအဖိခွါလီၤ.”