16
1 ယွၤစံးဘၣ်စီၤၡမူၤအ့လး, “မ့ၢ်နကသးအုးလၢစီၤစီလူးအဃိ ဆူညါဆံးယံာ်လဲၣ်. ယညိကွံာ်တ့ၢ်အီၤဒ်ကီၢ်အံၣ်စရ့လး အစီၤပၤတဂၤအသိးလံ. မ့မ့ၢ်ခဲကနံၣ်အံၤဟံးန့ၢ်သ့ၣ်စၤယံးအသိတနီၤဒီးလဲၤဆူ ဝ့ၢ်ဘ့ၤသလ့ဃ့ၣ်ဆူပှၤတဂၤလၢအမံၤမ့ၢ် စီၤယံးၡဲအအိၣ်တက့ၢ်. အဂ့ၢ်ဒ်အံၤ, ယဃုထၢတ့ၢ်အဖိခွါတဖၣ်အကျါတဂၤလၢအကကဲထီၣ်စီၤပၤလီၤ.”
2 စီၤၡမူၤအ့လးသံကွၢ်ဝဲ, “ယကမၤတၢ်န့ၣ်ဒ်လဲၣ်. စီၤစီလူးမ့ၢ်နၢ်ဟူတၢ်ဂ့ၢ်န့ၣ်ဒီးအဝဲကမၤသံယၤလီၤ.” ယွၤစံးဆၢအီၤ, “ဟံးန့ၢ်ကျီၢ်ဖိတဒုဒီးစံးလၢ, နကလဲၤဖဲန့ၣ်ဒ်သိးနကလုၢ်ထီၣ်တၢ်လုၢ်တၢ်ပာ်တမံၤဆူယွၤအအိၣ်တက့ၢ်.
3 ကွဲမုာ်စီၤယံးၡဲဆူတၢ်လုၢ်တၢ်ပာ်န့ၣ်ဒီးယကတဲနၤတၢ်လၢ နကဘၣ်မၤနဲလီၤ. ပှၤတဂၤလၢယကတဲနၤန့ၣ်နကဘၣ်ဖှူအီၤဒ်စီၤပၤတဂၤအသိးလီၤ.”
4 စီၤၡမူၤအ့လးမၤတ့ၢ်ဝဲဒ်ယွၤစံးဘၣ်အီၤအသိး, ဒီးလဲၤဝဲဆူဝ့ၢ်ဘ့ၤသလ့ဃ့ၣ်ဖဲ, ဝ့ၢ်အခိၣ်အနၢ်တဖၣ်ထံၣ်ဘၣ်အီၤဒီးကနိး ကစုာ်ဝဲ, ဒီးသံကွၢ်အီၤ, “ပှၤထံၣ်တၢ်ဧၢ, အအံၤမ့ၢ်ဝဲတၢ်ဟဲအိၣ်သကိး လၢတၢ်ဃူတၢ်မုာ်ဧါ.”
5 စီၤၡမူၤအ့လးစံးဆၢဝဲ, “မ့ၢ်လီၤ. ယဟဲဒ်သိးယကလုၢ်ထီၣ်တၢ် လုၢ်တၢ်ပာ်တမံၤဆူယွၤအအိၣ်လီၤ. မၤကဆှီသုသးဒီးဟဲပိာ်ယခံတက့ၢ်.” အဝဲတဲဘၣ်စ့ၢ်ကီးစီၤယံးၡဲဒီးအဖိခွါတဖၣ်လၢကမၤကဆှီ အသးဒီးကွဲမုာ်အဝဲသ့ၣ်တဖၣ်ဆူတၢ်လုၢ်တၢ်ပာ်န့ၣ်လီၤ.
6 ဖဲအဝဲသ့ၣ်ဟဲတုၤဃီၤဝဲန့ၣ်, စီၤၡမူၤအ့လးထံၣ်ဘၣ်စီၤယံးၡဲအဖိခွါစီၤအလံအာ် ဒီးစံးလီၤအသး, “ပှၤတဂၤအံၤလၢအဆၢထၢၣ်ဖဲအံၤလၢယွၤအမဲာ်ညါန့ၣ် မ့ၢ်သပှၢ်ကတၢၢ်ပှၤတဂၤလၢယွၤဃုထၢထီၣ်အီၤန့ၣ်လီၤ.”
7 ဘၣ်ဆၣ်ဒီးယွၤစံးဘၣ်အီၤ, “ကနၣ်ဃုာ်အဂီၤထီဒီးဒိၣ်တၢ်ဂ့ၤ ဆံးအါဆံးအါန့ၣ်တဂ့ၤ. ယညိကွံာ်အီၤလီၤ. အဂ့ၢ်ဒ်အံၤ, ယတစံၣ်ညီၣ်တၢ်ဒ်ပှၤကညီစံၣ်ညီၣ်တၢ်အသိးဘၣ်. ပှၤကညီကွၢ်တၢ်အက့ၢ်အဂီၤလၢခိလီၤ. မ့မ့ၢ်ယကွၢ်အသူၣ်အသးန့ၣ်လီၤ.”
8 အန့ၣ်တစု, စီၤယံးၡဲကိးအဖိခွါစီၤအဘံနဒာ်ဒီးဆှၢအီၤဆူ စီၤၡမူၤအ့လးအအိၣ်လီၤ. ဘၣ်ဆၣ်ဒီး, စီၤၡမူၤအ့လးစံးဝဲ, “တမ့ၢ်ဘၣ်, ယွၤတဃုထၢစ့ၢ်ကီးအီၤဘၣ်.”
9 အန့ၣ်ဒီး, စီၤယံးၡဲဟဲကိးစီၤၡးမၤလီၤ. စီၤၡမူၤအ့လးစံးဝဲ, “တမ့ၢ်ဘၣ်. ယွၤတဃုထၢစ့ၢ်ကီးအီၤဘၣ်.”
10 လၢကျဲဒ်အံၤန့ၣ်စီၤယံးၡဲဟဲကိးအဖိခွါခဲလၢာ်နွံဂၤဆူ စီၤၡမူၤအ့လးအအိၣ်လီၤ. ဒီးစီၤၡမူၤအ့လးစံးဘၣ်အီၤ, “တမ့ၢ်ဘၣ်. ယွၤတဃုထၢဘၣ်ပှၤတဖၣ်အံၤနီတဂၤဂၤဘၣ်.”
11 အန့ၣ်ဝံၤဒီးစီၤၡမူၤအ့လးသံကွၢ်အီၤ, “နဖိခွါအဂၤအိၣ် ဒံးဧါ.” စီၤယံးၡဲစံးဆၢဝဲ, “အိၣ်တ့ၢ်ဒံးအဆံးကတၢၢ် တဂၤလီၤဘၣ်ဆၣ်အဝဲလဲၤဆူတၢ်ချၢဒ်သိး ကဒုးအီၣ်အသိတဖၣ်အဆၣ်လီၤ.” စီၤၡမူၤအ့လးစံးဘၣ်အီၤ, “တဲဘၣ်အီၤလၢကဟဲဆူတၢ်လီၢ်အံၤတက့ၢ်. အဝဲမ့ၢ်တဟဲတုၤဒံးဘၣ်ဒီးပတလုၢ်ထီၣ်ပာ်ထီၣ် တၢ်ဒံးဘၣ်.”
12 မၤသးဒ်န့ၣ်ဒီး, စီၤယံးၡဲမၢပှၤလဲၤကိးအီၤလီၤ. အဝဲမ့ၢ်ပှၤဒိၣ်တၢ်ဂ့ၤ, ပှၤသးစၢ်လၢအအိၣ်ဆူၣ်အိၣ်ချ့ ဒီးအမဲာ်ချံတဖၣ်ကပြုၢ်ကပြီၤဝဲလီၤ. ယွၤစံးဘၣ်စီၤၡမူၤအ့လး, “အဝဲအံၤမ့ၢ်ပှၤတဂၤန့ၣ်လီၤ. ဖှူအီၤတက့ၢ်.”
13 စီၤၡမူၤအ့လးဟံးန့ၢ်သ့ၣ်စၤယံးအသိဒီးဖှူစီၤဒၤဝံးလၢ အဒီပုၢ်ဝဲၢ်ခွါတဖၣ်အမဲာ်ညါလီၤ. သတူၢ်ကလာ်န့ၣ်ယွၤအသးမုၢ်စီဆှံပၢၤဃးစီၤဒၤဝံးဒီးအိၣ် ဒီးအီၤစးထီၣ်လၢမုၢ်တနံၤန့ၣ်လီၤ. အန့ၣ်ဝံၤဒီးစီၤၡမူၤအ့လးက့ၤကဒါက့ၤဆူဝ့ၢ်ရၤမါန့ၣ်လီၤ.
14 ယွၤအသးမုၢ်စီဆှံဟးထီၣ်ကွံာ်လၢစီၤစီလူးအအိၣ်ဒီးသးအအၢ တဖျၢၣ်လၢအဘၣ်တၢ်ဆှၢလီၤအီၤလၢယွၤန့ၣ်မၤနးမၤဖှီၣ်အီၤ လီၤ.
15 အခ့အပှၤတဖၣ်စံးဘၣ်အီၤ, “ပသ့ၣ်ညါလၢသးအအၢတဖျၢၣ်လၢအဘၣ်တၢ် ဆှၢလီၤအီၤလၢယွၤန့ၣ်မၤနးမၤဖှီၣ်နၤလီၤ.
16 မၤသးဒ်န့ၣ်ဒီးတၢ်ဒိၣ်ဧၢ, ဟ့ၣ်လီၤပှၤလၢနကလုၢ်ဒီးပကဃုန့ၢ်နၤ ပှၤတဂၤလၢအနၢ်ပၢၢ်တၢ်ဒ့တနၢ်လီၤ. အန့ၣ်တစုဖဲသးအအၢဟဲလီၤလၢနလိၤန့ၣ်, ပှၤတဂၤန့ၣ်ကဒ့အတနၢ်, ဒီးနအိၣ်ကဘၣ်လီၢ်ဘၣ်စးကဒီးလီၤ.”
17 စီၤစီလူးဟ့ၣ်လီၤအကလုၢ်ဆူအဝဲသ့ၣ်, အအိၣ် “ဃုန့ၢ်ယၤပှၤတဂၤလၢအဒ့တၢ်သ့ဂ့ၤဂ့ၤဒီးဟဲကိးအီၤဆူ ယအိၣ်တက့ၢ်.”
18 အခ့အပှၤအကျါတဂၤစံးဝဲဒၣ်, “စီၤယံးၡဲအိၣ်လၢဝ့ၢ်ဘ့ၤသလ့ဃ့ၣ်န့ၣ် အိၣ်ဒီးအဖိခွါတဂၤလၢအမ့ၢ်ပှၤဒ့တနၢ်သ့ဂ့ၤဂ့ၤလီၤ. အဝဲမ့ၢ်စ့ၢ်ကီးပှၤအဒူအဃိၤဒီးပှၤဒိၣ်တၢ်ဂ့ၤတဂၤ, မ့ၢ်ပှၤသုးဖိလၢအဂ့ၤတဂၤဒီးပှၤကလုၢ်သ့ကတိၤဘၣ်တဂၤလီၤ. ယွၤအိၣ်ဒီးအီၤလီၤ.”
19 မၤသးဒ်န့ၣ်ဒီး, စီၤစီလူးဆှၢလီၤပှၤစိာ်တၢ်ကစီၣ်တဖၣ်ဆူစီၤ ယံးၡဲအအိၣ်လၢကစံးဘၣ်အီၤ, “ဆှၢလီၤန့ၢ်ယၤနဖိခွါစီၤဒၤဝံး, ပှၤတဂၤလၢအကွၢ်သိတဖၣ်န့ၣ်တက့ၢ်.”
20 စီၤယံးၡဲဆှၢလီၤစီၤဒၤဝံးဆူစီၤစီလူးအအိၣ်ဃုာ်ဒီးမဲာ် တဲးလဲးသးစၢ်ဖိတဒု, ကသ့ၣ်ယီၤတဒုလၢအဘၣ်တၢ်ပဒၢးထီၣ်အီၤဒီးကိၣ်တဖၣ်, ဒီးထၢၣ်တၢ်ဖံးတဖျၢၣ်လၢအပှဲၤဒီးစပံးထံန့ၣ်လီၤ.
21 စီၤဒၤဝံးဟဲဆူစီၤစီလူးအအိၣ်ဒီးနုာ်လီၤတၢ်ဖံးတၢ်မၤလၢ အအိၣ်လီၤ. စီၤစီလူးဘၣ်သူၣ်ဘၣ်သးအီၤဒိၣ်မးဒီးဃုထၢအီၤဒ်ပှၤ တဂၤလၢကစိာ်အတၢ်စုကဝဲၤတဖၣ်န့ၣ်လီၤ.
22 အန့ၣ်ဝံၤဒီးစီၤစီလူးဆှၢလီၤတၢ်ကစီၣ်တမံၤဆူစီၤယံးၡဲအအိၣ်, “ယဘၣ်သူၣ်ဘၣ်သးလၢစီၤဒၤဝံးလီၤ. ပျဲအအိၣ်ဖဲအံၤလၢယတၢ်ဖံးတၢ်မၤအပူၤတက့ၢ်.”
23 စးထီၣ်ဖဲန့ၣ်ဒီးဆူညါန့ၣ်, တဘျီလၢ်လၢ်ဖဲသးအၢလၢဘၣ်တၢ် ဆှၢလီၤအီၤလၢကစၢ်ယွၤဟဲလီၤလၢစီၤစီလူးအလိၤန့ၣ်, စီၤဒၤဝံးဟံးထီၣ်အတနၢ်ဒီးဒ့ထီၣ်အီၤလီၤ. သးအၢဟးထီၣ်ကွံာ်ဝဲဒီးစီၤစီလူးအိၣ်မုာ်က့ၤဝဲဒီးဘၣ်လီၢ်ဘၣ်စးက့ၤကဒီးန့ၣ်လီၤ.