18
1 စီၤစီလူးဒီးစီၤဒၤဝံးမၤဝံၤအတၢ်ကတိၤသကိးန့ၣ်လီၤ. တၢ်န့ၣ်အလီၢ်ခံစီၤစီလူးအဖိခွါစီၤယိၤနသၣ်ဘၣ်သူၣ်ဘၣ်သး လၢစီၤဒၤဝံးဒိၣ်မးဒီးအဲၣ်ဘၣ်အီၤဒ်အအဲၣ်လီၤအသးဒၣ်ဝဲ အသိးန့ၣ်လီၤ.
2 စးထီၣ်လၢမုၢ်တနံၤန့ၣ်စီၤစီလူးကိးဃာ်စီၤဒၤဝံး ဒီးတပျဲ အက့ၤကဒါက့ၤဆူအဟံၣ်ဘၣ်.
3 စီၤယိနၤသၣ်မၤတၢ်ရ့လိာ်မုာ်လိာ်အထူအယိာ်အတၢ်ဆိၣ်ဒီးစီၤဒၤဝံး လၢအအဲၣ်ဘၣ်အီၤဒိၣ်နီၢ်မးအဃိန့ၣ်လီၤ.
4 အဝဲဘ့ၣ်လီၤအဆ့ကၤဖးထီလၢအသိးဃာ်ဝဲဒီးဟ့ၣ်လီၤအီၤဆူ စီၤဒၤဝံး, ဃုာ်ဒီးအသဃိးဒီးအနး, အချံၣ်, ဒီးအယီၢ်တကိးစ့ၢ်ကီးလီၤ.
5 စီၤဒၤဝံးမၤန့ၢ်မၤနၢၤတၢ်လၢကယဲၢ်တၢ်ဖံးတၢ်မၤတဖၣ်လၢစီၤစီလူး မၢလီၤအီၤန့ၣ်လီၤ. မၤသးဒ်န့ၣ်ဒီး, စီၤစီလူးဒုးကဲထီၣ်အီၤလၢသုးခိၣ်တဂၤလၢ သုးမုၢ်အပူၤန့ၣ်လီၤ. တၢ်အံၤဘၣ်သူၣ်ဘၣ်သးကယဲၢ်စီၤစီလူးအသုးခိၣ်သုးနၢ်တဖၣ်ဒီး ပှၤသုးဖိတဖၣ်န့ၣ်လီၤ.
6 ဖဲစီၤဒၤဝံးဟဲက့ၤလၢအတၢ်မၤသံစီၤကၤလယးဝံၤဒီး, ဒီးပှၤသုးဖိတဖၣ်ဟဲက့ၤဆူဟံၣ်န့ၣ်, ပိာ်မုၣ်တဖၣ်လၢဝ့ၢ်ကိးဝ့ၢ်ဒဲး အိၣ်လၢကီၢ်အံၣ်စရ့လးအပူၤဟဲထီၣ်ဒ်သိးကသဂၢၢ်စီၤပၤ စီၤစီလူးလီၤ. အဝဲသ့ၣ်သူၣ်ဝံၣ်သးဆၢတၢ်သးခု အတၢ်သးဝံၣ်တဖၣ်, ဂဲၤကလံာ်ဝဲဒီးဆ့လ့, ဒီးသီတူၢ်တဖၣ်လီၤ.
7 လၢတၢ်သဂၢၢ်မၤလၤကပီၤအမူးန့ၣ်ပိာ်မုၣ်တဖၣ်သးဝံၣ်ထီၣ်ဝဲ, “စီၤစီလူးမၤသံတ့ၢ်ပှၤအကထိတဖၣ်, မ့မ့ၢ်စီၤဒၤဝံးမၤသံ ပှၤအကလးတဖၣ်လီၤ.”
8 စီၤစီလူးတဘၣ်အသးလၢတၢ်အံၤဘၣ်. ဒီးအသးဒိၣ်ထီၣ်ဝဲဖးဒိၣ်လီၤ. အဝဲဒၣ်စံး, “လၢစီၤဒၤဝံးအဂီၢ်န့ၣ်အဝဲသ့ၣ်ကိးထီၣ်ဝဲပှၤ အကလးဘၣ်ဆၣ်ဒီးလၢယဂီၢ်န့ၣ်ပှၤအကထိတဖၣ်ဧိၤလီၤ. လၢခံန့ၣ်အဝဲသ့ၣ်ကဒုးကဲထီၣ်အီၤလၢစီၤပၤလီၤ.”
9 မၤသးဒ်န့ၣ်ဒီး, စးထီၣ်လၢမုၢ်တနံၤန့ၣ်, အဝဲဒၣ်အသးက့ၣ်သးကါဒီးသးဒ့ဒီလၢစီၤဒၤဝံးအဖီခိၣ်န့ၣ်လီၤ.
10 လၢမုၢ်ဆ့ၣ်ထီၣ်တနံၤန့ၣ်, သးအအၢအသီတဖျၢၣ်လၢအဟဲလၢကစၢ်ယွၤ ဟဲလီၤဒီးပၢၤဃာ်စီၤစီလူးသတူၢ်ကလာ်လီၤ. ဒီးအဝဲဒၣ်ကတိၤကလီကလီတၢ်ဒ်တၢ်ပျုၢ်တဂၤအသိးလၢအဟံၣ်ပူၤ န့ၣ်လီၤ. စီၤဒၤဝံးတခီဒ့တနၢ်ဒ်ညီနုၢ်မၤဝဲကိးမုၢ်နံၤအသိးန့ၣ် လီၤ. စီၤစီလူးဟံးဃးဘီတဘ့ၣ်လၢအစုပူၤ,
11 ဒီးစံးလီၤအသး, “ယကဆဲးတ့ၢ်အီၤလၢဂီၤပၤအလိၤလီၤ.” ဒီးကွံာ်ဝဲဘီန့ၣ်ဆူစီၤဒၤဝံးအအိၣ်ခံဘျီဘၣ်ဆၣ်ဒီးစီၤ ဒၤဝံးပဒ့ၣ်အသးပူၤတဘျီဘၣ်တဘျီလီၤ.
12 စီၤစီလူးပျံၤဘၣ်စီၤဒၤဝံးလီၤ. အဂ့ၢ်ဒ်အံၤ, ယွၤအိၣ်ဒီးစီၤဒၤဝံးဘၣ်ဆၣ်ဒီးမ့မ့ၢ်အဝဲဒၣ်တခီယွၤညိ ကွံာ်တ့ၢ်အီၤအဃိလီၤ.
13 မၤသးဒ်န့ၣ်ဒီး, စီၤစီလူးသုးကွံာ်အီၤဆူတၢ်လီၢ်အယံၤဒီး ပာ်အီၤလၢပှၤတကထိအသုးခိၣ်အလီၢ်လီၤ. စီၤဒၤဝံးပၢဆှၢအပှၤတဖၣ်လၢတၢ်ဒုးတၢ်ယၤအပူၤ
14 ဒီးအဝဲမၤနၢၤတၢ်လၢကယဲၢ်အတၢ်မၤခဲလၢာ်အပူၤလီၤ. အဂ့ၢ်ဒ်အံၤ, ယွၤအိၣ်ဒီးအီၤလီၤ.
15 စီၤစီလူးပာ်သူၣ်ပာ်သးလၢစီၤဒၤဝံးအတၢ်မၤနၢၤဒီးကဲထီၣ် ပှၤပျံၤဘၣ်အီၤဒိၣ်န့ၢ်အလီၢ်တက့ၢ်လီၤ.
16 ဘၣ်ဆၣ်ဒီးပှၤကိးဂၤဒဲးလၢကီၢ်အံၣ်စရ့လးဒီးကီၢ်ယူဒၤအပူၤ န့ၣ်အဲၣ်စီၤဒၤဝံးလီၤ. အဂ့ၢ်ဒ်အံၤ, အဝဲမ့ၢ်ခိၣ်နၢ်လၢအမၤန့ၢ်မၤနၢၤတၢ်ဒ်န့ၣ်တဂၤအဃိ န့ၣ်လီၤ.
17 တုၤနုၤတစု, စီၤစီလူးစံးဘၣ်စီၤဒၤဝံး, “အဝဲအံၤမ့ၢ်ယဖိမုၣ်အဒိၣ်ကတၢၢ်နီၢ်မ့ရ့ာ်လီၤ. ယကဟ့ၣ်အီၤလၢနၤဒ်နမါလၢနမ့ၢ်ယခ့ယပှၤလၢအဒူဒီးပှၤသုးဖိ လၢအသးတီဒီးယၤဒီးဒုးယွၤအတၢ်ဒုးတဖၣ်အဃိန့ၣ်လီၤ.” (စီၤစီလူးဆိကမိၣ်ဝဲလၢ, လၢကျဲဒ်အံၤန့ၣ်ပှၤဖလ့ၡသးဖိတဖၣ် ကမၤသံစီၤဒၤဝံးဒီးအလီၢ်တအိၣ်ဘၣ်လၢအဝဲအနီၢ်ကစၢ်ဒၣ်ဝဲ ကမၤသံဘၣ်စီၤဒၤဝံးဘၣ်န့ၣ်လီၤ.)
18 စီၤဒၤဝံးစံးဆၢဝဲဒၣ်, “ယမ့ၢ်မတၤတဂၤဒီးယဟံၣ်ဖိဃီဖိ မ့ၢ်မတၤလၢယကဘၣ်ကဲထီၣ်စီၤပၤအမာ်တဂၤန့ၣ်လဲၣ်.”
19 ဘၣ်ဆၣ်ဒီးဖဲတၢ်ဆၢကတီၢ်တုၤဃီၤဝဲန့ၣ်လၢနီၢ်မ့ရ့ာ်ကဘၣ်တၢ် ဟ့ၣ်လီၤအီၤဆူစီၤဒၤဝံးအလီၢ်န့ၣ်, အဝဲဘၣ်တၢ်ဟ့ၣ်လီၤအီၤဆူပှၤတဂၤအမံၤမ့ၢ်ဝဲစီၤဧ့ဒြၤအ့လး အိၣ်လၢဝ့ၢ်အဃိလၤန့ၣ်လီၤ.
20 မ့ၢ်နာ်သက့ဒ်န့ၣ်ဒီး, စီၤစီလူးအဖိမုၣ်နီၢ်မံကၤလးအဲၣ်လိာ် သးဒီးစီၤဒၤဝံးလီၤ. တုၤစီၤစီလူးနၢ်ဟူတၢ်ဂ့ၢ်အံၤန့ၣ်အသးခုဝဲလီၤ.
21 အဝဲစံးလီၤအသး, “ယကဟ့ၣ်နီၢ်မံကၤလးဆူစီၤဒၤဝံးဒီး ယကသူအီၤဒ်ထုအသိးလၢစီၤဒၤဝံးကဘၣ်တၢ်မၤသံကွံာ်အီၤလၢပှၤ ဖလ့ၡသးဖိတဖၣ်န့ၣ်လီၤ.” မၤသးဒ်န့ၣ်ဒီးစီၤစီလူးစံးဘၣ်စီၤဒၤဝံးခံစုတစု, “နကဘၣ်ကဲထီၣ်ယမာ်လီၤ.”
22 အဝဲမၤလိာ်အသုးခိၣ်သုးနၢ်တဖၣ်လၢကကတိၤခူသူၣ်တၢ်ဒီးစီၤဒၤ ဝံးဒီးစံးဘၣ်အီၤ, “စီၤပၤန့ၣ်ဘၣ်သူၣ်ဘၣ်သးလၢနၤဒီးကယဲၢ်အသုးခိၣ်သုးနၢ်တဖၣ် ဘၣ်သူၣ်ဘၣ်သးနၤလီၤ. ခဲအံၤမ့ၢ်တၢ်ဆၢကတီၢ်အဂ့ၤအဘၣ်လၢနကဖျီနသးဒီးအဖိမုၣ်လီၤ.”
23 မၤသးဒ်န့ၣ်ဒီး, အဝဲသ့ၣ်တဲဘၣ်စီၤဒၤဝံးလၢတၢ်ဂ့ၢ်အံၤဒီးအဝဲ စံးဆၢဝဲဒၣ်, “တၢ်ကဲထီၣ်ဘၣ်စီၤပၤအမာ်န့ၣ်မ့ၢ်တၢ်လၤကပီၤ ဖးဒိၣ်တမံၤ, မ့ၢ်တၢ်ဒိၣ်ကဲာ်ဆိးလၢပှၤဒ်သိးယၤတဂၤလၢအဖှီၣ်ဒီးတလီၤပာ် ဒိၣ်ပာ်ကဲဘၣ်အဂီၢ်န့ၣ်လီၤ.”
24 သုးခိၣ်သုးနၢ်တဖၣ်တဲဘၣ်စီၤစီလူးလၢတၢ်လၢစီၤဒၤဝံးစံး တ့ၢ်အဝဲသ့ၣ်န့ၣ်လီၤ.
25 ဒီးစီၤစီလူးမၤလိာ်အဝဲသ့ၣ်လၢကတဲဘၣ်စီၤဒၤဝံး, “ကယဲၢ်တၢ်လၢစီၤပၤသးလီလၢနအိၣ်ဒ်တၢ်အပှ့ၤလၢတလးမူးပိာ် မုၣ်အဂီၢ်န့ၣ်မ့ၢ်ပှၤဖလ့ၡသးဖိအဂၤတကယၤလၢအသံဝဲအတၢ်အခိၣ် ဖံး, လၢတၢ်ဟ့ၣ်ကၣ်က့ၤအဒုၣ်အဒါတဖၣ်အဂီၢ်န့ၣ်လီၤ.” (တၢ်အံၤမ့ၢ်စီၤစီလူးအတၢ်ကူၣ်ကျဲၤလၢစီၤဒၤဝံးကဘၣ်တၢ်မၤ သံအီၤလၢပှၤဖလ့ၡသးဖိတဖၣ်ဒ်လဲၣ်အဂ့ၢ်န့ၣ်လီၤ.)
26 စီၤစီလူးအသုးခိၣ်သုးနၢ်တဖၣ်က့ၤတဲဘၣ်စီၤဒၤဝံးတၢ်လၢ စီၤစီလူးစံးတ့ၢ်ဝဲတဖၣ်န့ၣ်လီၤ. ဒီးစီၤဒၤဝံးအသးခုလၢအဆိကမိၣ်ထီၣ်လၢကကဲထီၣ်ဘၣ်စီၤပၤ အမာ်အဃိန့ၣ်လီၤ. တချုးတၢ်သ့ၣ်ပာ်မုၢ်နံၤမုၢ်သီလၢတၢ်တ့တၢ်ဖျီအဂီၢ်န့ၣ်,
27 စီၤဒၤဝံးဒီးအပှၤသုးဖိတဖၣ်လဲၤမၤသံပှၤဖလ့ၡသးဖိအဂၤခံ ကယၤလီၤ. အဝဲဟဲက့ၤစိာ်အတၢ်ခိၣ်ဖံးတဖၣ်ဆူစီၤပၤအအိၣ်ဒီးဂံၢ်အီၤခဲ လၢာ်လၢအမဲာ်ညါဒ်သိးကကဲထီၣ်ဝဲအမာ်န့ၣ်လီၤ. မၤသးဒ်န့ၣ်ဒီး, စီၤစီလူးဘၣ်ဟ့ၣ်လီၤအဖိမုၣ်နီၢ်မံကၤလး ဆူစီၤဒၤဝံးအအိၣ်လၢကတ့ကဖျီအသးအဂီၢ်န့ၣ်လီၤ.
28 စီၤစီလူးသ့ၣ်ညါလီၤတံၢ်လီၤဆဲးလၢယွၤအိၣ်ဒီးစီၤဒၤဝံး ဒီးအဖိမုၣ်နီၢ်မံကၤလးစ့ၢ်ကီးအဲၣ်အီၤလီၤ.
29 မၤသးဒ်န့ၣ်ဒီး, တၢ်ပျံၤတၢ်ဖုးလီၤဘၣ်အါထီၣ်အီၤလၢစီၤဒၤဝံးအဃိ, ဒီးစီၤဒၤဝံးကဲထီၣ်အဒုၣ်အဒါလၢအသးသမူတစိၤဒၣ်အီၤန့ၣ် လီၤ.
30 ပှၤဖလ့ၡသးဖိအသုးမုၢ်တဖၣ်ဟဲဒီးဒုးတၢ်, ဘၣ်ဆၣ်ဒီး, လၢတၢ်ဒုးကိးဘျီအပူၤန့ၣ်စီၤဒၤဝံးမၤန့ၢ်မၤနၢၤတၢ်အါန့ၢ်ဒိၣ်န့ၢ်ဒံး စီၤစီလူးအသုးခိၣ်သုးနၢ်အဂၤတဖၣ်တက့ၢ်န့ၣ် လီၤ. လၢတၢ်န့ၣ်အဃိစီၤဒၤဝံးအမံၤဟူထီသါလီၤဒိၣ်ဒိၣ်ကလဲာ်လီၤ.