14
1 ဘၣ်တနံၤန့ၣ်, စီၤယိနၤသၣ်စံးဘၣ်ပှၤသးစၢ်ပိာ်ခွါတဂၤလၢ အစိာ်အစုကဝဲၤတဖၣ်န့ၣ်, “မ်ပကလဲၤခီသကိးဆူပှၤဖလ့ၡသးဖိ တဖၣ်အသူၣ်ဒဲလီၢ်တက့ၢ်.” ဘၣ်ဆၣ်ဒီးစီၤယိနသၣ်တတဲဘၣ်တ့ၢ်အပၢ်စီၤစီလူး,
2 လၢအသူၣ်အဒဲလၢသ့ၣ်သလဲသၣ်တထံးအဖီလာ်အိၣ်လၢဝ့ၢ်မံးကြိၣ် တဘူးတယံၤဒီးဝ့ၢ်ကံးဘဧၤန့ၣ်ဘၣ်. အဝဲအိၣ်ဒီးပှၤသုးဖိအဂၤဃုကယၤလၢအသိးလီၤ.
3 (ပှၤလုၢ်တၢ်အခိၣ်လၢသိးဝဲဒီးအ့ဖိးန့ၣ်မ့ၢ်ဝဲယွၤအပှၤလုၢ် တၢ်အခိၣ်လၢဝ့ၢ်ၡံလိၤအပူၤ, စီၤဧ့လံၤအလံၤခွါဒီးစီၤအဃံးတူာ်အဒီပုၢ်ဝဲၢ်စီၤအံကဘိး အဖိခွါစီၤအဃံယၤန့ၣ်လီၤ.) စီၤယိနၤသၣ်ဟးထီၣ်န့ၣ်ပှၤတဖၣ်တသ့ၣ်ညါဘၣ်ဝဲဘၣ်.
4 လၢဝ့ၢ်မံးကမၣ်အကျဲဖဲစီၤယိနၤသၣ်ကဘၣ်လဲၤခီဖျိ ဝဲဒ်သိးကတုၤဆူပှၤဖလ့ၡသးဖိအသူၣ်ဒဲအလီၢ်န့ၣ်လ့ခိၣ်စူခံဖျၢၣ် အိၣ်လၢကျဲတခီတကပၤန့ၣ်လီၤ. လ့တဖျၢၣ်န့ၣ်အမံၤမ့ၢ်ဘိစ့းဒီးအဂၤတဖျၢၣ်န့ၣ်မ့ၢ်ဝဲစ့နၤလီၤ.
5 လ့တဖျၢၣ်န့ၣ်အိၣ်လၢကျဲအကလံၤစိးဒီးကွၢ်အမဲာ်ဆူ ဝ့ၢ်မံးကမၣ်ဒီးအဂၤတဖျၢၣ်န့ၣ်အိၣ်လၢကလံၤထံးတကပၤဒီးကွၢ်အမဲာ်ဆူ ဝ့ၢ်ကံဘၤလီၤ.
6 စီၤယိနၤသၣ်စံးဘၣ်ပှၤသးစၢ်ပိာ်ခွါတဂၤန့ၣ်, “မ်ပလဲၤခီဃီၤဆူပှၤတစူၢ်တနာ်ယွၤ, ပှၤဖလ့ၡသးဖိတဖၣ် အသူၣ်ဒဲလီၢ်တက့ၢ်. ဘၣ်သ့ၣ်သ့ၣ်ယွၤကမၤစၢၤပှၤလီၤ. အဝဲမ့ၢ်မၤစၢၤပှၤဒီးဖဲန့ၣ်ပမ့ၢ်အိၣ်စှၤဂၤသနာ်က့, တၢ်လၢအကတြီအီၤ ဒ်သိးကဟ့ၣ်ပှၤတၢ်မၤနၢၤန့ၣ်တအိၣ်ဘၣ်နီတမံၤဘၣ်.”
7 ပှၤသးစၢ်ပိာ်ခွါန့ၣ်စံးဆၢအီၤ, “ကွၢ်ဖဲနကမၤတမံၤလၢ်လၢ်န့ၣ်, ယအိၣ်ဒီးနၤလီၤ.”
8 စီၤယိနၤသၣ်စံးဘၣ်အီၤ, “ဂ့ၤလံ, ပကလဲၤခီဂာ်တၢ်ဒီးပျဲ ပှၤဖလ့ၡသးဖိတဖၣ်ထံၣ်ပှၤန့ၣ်လီၤ.
9 အဝဲသ့ၣ်မ့ၢ်တဲပှၤလၢပကအိၣ်ခိးဒ်သိးအကဟဲဆူပအိၣ်န့ၣ်, ပကအိၣ်ဒၣ်ဖဲပလီၢ်န့ၣ်လီၤ.
10 ဘၣ်ဆၣ်ဒီးအဝဲသ့ၣ်မ့ၢ်မၢပလဲၤဆူအဝဲသ့ၣ်အအိၣ်န့ၣ်, အန့ၣ်တစုပကလဲၤလီၤ. အဂ့ၢ်ဒ်အံၤ, တၢ်န့ၣ်ကမ့ၢ်တၢ်ပနီၣ်တမံၤလၢ ယွၤဟ့ၣ်ပှၤတၢ်မၤနၢၤလၢအဝဲသ့ၣ်အဖီခိၣ်လီၤ.”
11 မၤသးဒ်န့ၣ်ဒီး, အဝဲသ့ၣ်ပျဲပှၤဖလ့ၡသးဖိတဖၣ်ထံၣ်အဝဲသ့ၣ် ဒီးပှၤဖလ့ၡသးဖိတဖၣ်စံး, “ကွၢ်လၢန့ၣ်တက့ၢ်. ပှၤဧ့ၤဘြံၤ ဖိတနီၤဟဲထွးထီၣ်လၢတၢ် ပူၤဖဲအအိၣ်ခူသူၣ်ဝဲဒၣ်လီၤ.”
12 အန့ၣ်ဝံၤဒီးအဝဲသ့ၣ်ကိးထီၣ်ဆူစီၤယိနၤသၣ်ဒီးပှၤသးစၢ် ပိာ်ခွါန့ၣ်အအိၣ်, “ဟဲထီၣ်ဆူအံၤတက့ၢ်. ပအိၣ်ဒီးတၢ်ဂ့ၢ်တနီၤလၢပအဲၣ်ဒိးတဲဘၣ်သုလီၤ.”
စီၤယိၤနၤသၣ်စံးဘၣ်ပှၤသးစၢ်ပိာ်ခွါန့ၣ်, “ပိာ်ယခံတက့ၢ်. ယွၤဟ့ၣ်လီၤကီၢ်အံၣ်စရ့လးတၢ်မၤနၢၤလၢအဝဲသ့ၣ်အဖီခိၣ်လံ.”
13 စီၤယိနၤသၣ်စွါထီၣ်ဆူကျဲဖီခိၣ်လၢအစုဒီးအခီၣ်လ့ၢ်ခိၣ် တဖၣ်ဒီးပှၤသးစၢ်ပိာ်ခွါန့ၣ်ပိာ်အခံလီၤ. စီၤယိနၤသၣ်ဒုးပှၤဖလ့ၡသးဖိတဖၣ်ဒီးမၤလီၤဃံၤကွံာ်အဝဲ သ့ၣ်ဒီးပှၤသးစၢ်န့ၣ်မၤသံကွံာ်အဝဲသ့ၣ်လီၤ.
14 လၢတၢ်မၤသံတဘျီန့ၣ်, စီၤယိနၤသၣ်မၤသံကွံာ်ပှၤအဂၤခံဆံ ဃၣ်ဃၣ်လၢဟီၣ်ခိၣ်ကဝီၤအ့ကၢၢ်တဝာ်ဃၣ်ဃၣ်အပူၤန့ၣ်လီၤ.
15 ကယဲၢ်ပှၤဖလ့ၡသးဖိအိၣ်လၢဝ့ၢ်အဃၢၤန့ၣ်ပျံၤတၢ်ဖုးတၢ်နးနးကလဲာ်လီၤ. ပှၤဂုာ်ဆူၣ်တၢ်တဖၣ်ဒီးပှၤသုးဖိတဖၣ်လၢသူၣ်ဒဲအလီၢ်န့ၣ် ကနိးကစုာ်လၢတၢ်ပျံၤတၢ်ဖုးအပူၤလီၤ. ဟီၣ်ခိၣ်ဟူးဝဲဒီးတၢ်ပျံၤတၢ်ဖုးဖးဒိၣ်အိၣ်ထီၣ်ဝဲလီၤ.
16 စီၤစီလူးအပှၤတဖၣ်အိၣ်ခိးကွၢ်တၢ်ဖဲဝ့ၢ်ကံးဘဧၤလၢအအိၣ်လၢ ပှၤဘံၣ်ယၤမံၣ်ဖိတဖၣ်အလီၢ်ကဝီၤအပူၤဒီးထံၣ်ဘၣ်ဝဲ ပှၤဖလ့ၡသးဖိတဖၣ်ဃ့ၢ်ကွံာ်လၢတၢ်သဘံၣ်ဘုၣ်အပူၤလီၤ.
17 မၤသးဒ်န့ၣ်ဒီး, စီၤစီလူးစံးဘၣ်အပှၤတဖၣ်, “ဂံၢ်ကွၢ်ပှၤသုးဖိတဖၣ်ဒီးဃုထံၣ်လၢမတၤတဖၣ်တအိၣ်လဲၣ်တ က့ၢ်.” တုၤအဝဲသ့ၣ်မၤဝဲဒ်န့ၣ်ဒီးသ့ၣ်ညါဝဲလၢစီၤယိနၤသၣ်ဒီးပှၤ သးစၢ်ပိာ်ခွါတဂၤလၢအစိာ်အစုကဝဲၤတဖၣ်န့ၣ်တအိၣ်ဘၣ်လီၤ.
18 စီၤစီလူးစံးဘၣ်ပှၤလုၢ်တၢ်အခိၣ်စီၤအဃံယၤ, “ဟဲစိာ်အ့ဖိးဆူအံၤတက့ၢ်.” (လၢမုၢ်နံၤအဝဲန့ၣ်န့ၣ်, စီၤအဃံယၤစိာ်အ့ဖိးန့ၣ်လၢကီၢ်အံၣ်စရ့လးအပှၤဂီၢ်မုၢ်အမဲာ်ညါလီၤ.)
19 ဖဲစီၤစီလူးကတိၤတၢ်ဒီးပှၤလုၢ်တၢ်အခိၣ်အခါန့ၣ်, တၢ်သဘံၣ်ဘုၣ်မၤအသးလၢပှၤဖလ့ၡသးဖိတဖၣ်အဒဲပူၤန့ၣ်ဆူၣ်ထီၣ် အါထီၣ်ဝဲအဃိဒီးစီၤစီလူးစံးဘၣ်အီၤ, “တၢ်ဆၢကတီၢ်လၢပကသံကွၢ်ယွၤအတၢ်အဂီၢ်န့ၣ်တအိၣ်လၢၤဘၣ်.”
20 အန့ၣ်တစုစီၤစီလူးဒီးအပှၤတဖၣ်လဲၤထီၣ်ဆူတၢ်ဒုးဒီးထီဒါ ပှၤဖလ့ၡသးဖိတဖၣ်လၢအဒုးလိာ်ယၤလိာ်အသးလၢတၢ်သဘံၣ်ဘုၣ်နး နးကလဲာ်အပူၤန့ၣ်လီၤ.
21 ပှၤဧ့ၤဘြံၤဖိတနီၤလၢအအိၣ်လၢပှၤဖလ့ၡသးဖိအအိၣ်တကပၤဒီး လဲၤသကိးဒီးအဝဲသ့ၣ်ဆူတၢ်ဒုးအလီၢ်န့ၣ်ယိးကဒါဘီ, ဃၣ်က့ၤအသးဒီးပာ်ဖှိၣ်က့ၤအသးဒီးစီၤစီလူးဒီးစီၤယိနၤသၣ်လီၤ.
22 ပှၤအဂၤလၢအပာ်ခူသူၣ်အသးလၢကီၢ်အ့ဖရဲၣ်အတၢ်လူၢ်ဒီခိၣ်တဖၣ် နၢ်ဟူလၢပှၤဖလ့ၡသးဖိတဖၣ်ထွးထီၣ်ဃ့ၢ်သတးဒီးအဝဲ သ့ၣ်စ့ၢ်ကီးပာ်ဖှိၣ်ဃုာ်အသးဒီးစီၤစီလူးဒီးဒုးတၢ်ထီဒါ ပှၤဖလ့ၡသးဖိတဖၣ်န့ၣ်လီၤ.
23 အဝဲသ့ၣ်ဒုးတၢ်ကျဲဒီဘိဖျိကွံာ်ဝ့ၢ်ဘ့ၤသအၤဝ့ၣ်လီၤ. ယွၤအုၣ်က့ၤခီၣ်က့ၤကီၢ်အံၣ်စရ့လးလၢမုၢ်နံၤအဝဲန့ၣ်လီၤ.
24 ပှၤအံၣ်စရ့လးဖိတဖၣ်အဂံၢ်အဘါစၢ်လၢမုၢ်နံၤအဝဲန့ၣ်မ့ၢ်လၢ တၢ်သၣ်ဝံၤအသးအဃိလီၤ. အဂ့ၢ်ဒ်အံၤ, စီၤစီလူးမၤတၢ်ဆိၣ်သမှံၤသပှၢ်တမံၤဒီးဟ့ၣ်လီၤ အကလုၢ်လၢ, “တချုးလၢယဟ့ၣ်ကၣ်ဒံးဘၣ်ယဒုၣ်ယဒါတဖၣ်အမုၢ်တနံၤန့ၣ်ပှၤတဂၤ လၢ်လၢ်လၢအအီၣ်တၢ်အီၣ်တမံၤမံၤန့ၣ်တၢ်ဆိၣ်အၢတမံၤကအိၣ်လၢ အလိၤလီၤ.” မၤသးဒ်န့ၣ်ဒီးလၢမုၢ်နံၤအဝဲန့ၣ်ဒီနံၤညါန့ၣ်, ပှၤတအီၣ်တၢ်နီတမံၤနီတဂၤဘၣ်.
25 အဝဲသ့ၣ်ခဲလၢာ်ဟဲတုၤလၢသ့ၣ်ပှၢ်တပှၢ်အလီၢ်တတီၤဒီးထံၣ်ကနဲစီ ကိးတၢ်လီၢ်အပူၤဒဲးလီၤ.
26 သ့ၣ်ပှၢ်န့ၣ်ပှဲၤဒီးကနဲစီလီၤ. ဘၣ်ဆၣ်ဒီးပှၤတအီၣ်ကနဲစီန့ၣ် နီတစဲးဘၣ်. အဂ့ၢ်ဒ်အံၤ, အဝဲသ့ၣ်ပျံၤစီၤစီလူးအတၢ်ဆိၣ်အၢအဃိလီၤ.
27 ဘၣ်ဆၣ်ဒီးစီၤယိနၤသၣ်တနၢ်ဟူတ့ၢ်အပၢ်အတၢ်မၤပျံၤမၤဖုးပှၤ ဂီၢ်မုၢ်န့ၣ်အဃိဒီးအဝဲဆဲးနုာ်နီၣ်ထိးဘိလၢအစိာ်ဝဲလၢအစု ပူၤန့ၣ်ဆူကနဲအဒၢပူၤဒီးအီၣ်ကနဲစီတစဲးလီၤ. တဘျီဃီန့ၣ်အဝဲအိၣ်အသးမုာ်ထီၣ်ဝဲလီၤ.
28 ဘၣ်ဆၣ်ဒီးလၢပှၤဂီၢ်မုၢ်အကျါတဂၤစံးဘၣ်အီၤ, “ပဝဲကိးဂၤဒဲးပဂံၢ်ပဘါစၢ်လၢတၢ်သၣ်ဝံၤပသးအဃိလီၤ. ဘၣ်ဆၣ်ဒီးနပၢ်မၤပျံၤမၤဖုးပှၤဒီးစံးလၢပှၤတဂၤလၢ်လၢ်လၢ အအီၣ်တၢ်အီၣ်တမံၤမံၤန့ၣ်တၢ်ဆိၣ်အၢတမံၤကအိၣ်လၢအလိၤတနံၤ အံၤလီၤ.”
29 စီၤယိၤနၤသၣ်စံးဆၢဝဲ, “ယပၢ်မၤတၢ်တမံၤအံၤလၢပပှၤဂီၢ် မုၢ်အလိၤအံၤကီဒိၣ်မးနးလဲၣ်. ကွၢ်, လၢယအီၣ်ကနဲစီတစဲးအဃိယအိၣ်ယသးမုာ်ထီၣ်ထဲလဲၣ်တက့ၢ်.
30 ပပှၤဂီၢ်မုၢ်တဖၣ်မ့ၢ်အီၣ်တၢ်အီၣ်လၢအဟဲစိာ်ဝဲန့ၣ်လၢတနံၤအံၤ ဖဲအမၤနၢၤကွံာ်အဒုၣ်အဒါန့ၣ်ကဂ့ၤဒိၣ်ဝဲဆံးဒိၣ်လဲၣ်. ထဲဆိကမိၣ်ကွၢ်လၢအဝဲသ့ၣ်မၤသံကွံာ်ပှၤဖလ့ၡသးဖိကန့ၢ်အါ န့ၣ်အလီၢ်ဆံးဒိၣ်လဲၣ်န့ၣ်တက့ၢ်.”
31 မုၢ်နံၤအဝဲန့ၣ်ပှၤအံၣ်စရ့လးဖိတဖၣ်မၤနၢၤကွံာ်ပှၤဖလ့ၡသး ဖိတဖၣ်လၢအဒုးတၢ်ကျဲဒီဘိညါစးထီၣ်လၢဝ့ၢ်မံးကမၣ်တုၤဆူ ဝ့ၢ်အၤယလိၣ်လီၤ. တုၤအဆၢကတီၢ်အံၤန့ၣ်ပှၤအံၣ်စရ့လးဖိတဖၣ်အဂံၢ်အဘါစၢ်ဒိၣ်မး လၢတၢ်သူၣ်ဝံၤသၣ်စ့ၤအသးအဃိလီၤ.
32 မၤသးဒ်န့ၣ်ဒီး, အဝဲသ့ၣ်ဃ့ၢ်သဖှိဃီၤဆူတၢ်လၢအဖီၣ်န့ၢ်ဝဲ တဖၣ်လၢအဒုၣ်အဒါအစုပူၤ, ဟံးန့ၢ်သိဒီးဂီၤဘုၣ်ဂီၤဖံးဒီးမၤသံ ဝဲတဘျီဃီဖဲန့ၣ်ဒီးအီၣ်တၢ်ညၣ်လၢအအိၣ်ဒံးဒီးတၢ်သွံၣ်န့ၣ်လီၤ.
33 စီၤစီလူးဘၣ်တၢ်တဲဘၣ်အီၤ, “ကွၢ်, နပှၤဂီၢ်မုၢ်မၤတၢ်ဒဲးဘး ထီဒါယွၤခီဖျိအီၣ်ဝဲတၢ်ညၣ်အိၣ်ဒီးတၢ်သွံၣ်လၢအပူၤန့ၣ်တက့ၢ်.” စီၤစီလူးကိးပသူထီၣ်ဝဲ,
“သုမ့ၢ်ပှၤမၤတၢ်ကဘျံးကဘျၣ်တဖၣ်လီၤ. ဟဲတလ့ၣ်ဃီၤလၢၢ်ဖး ဒိၣ်တဖျၢၣ်ဆူယအိၣ်အံၤတက့ၢ်.”
34 အန့ၣ်ဝံၤဒီးအဝဲခါလီၤကလုၢ်လၢခံတဘီစံးဝဲ, “လဲၤဆူပှၤဂီၢ်မုၢ်အကျါဒီးတဲဘၣ်အဝဲသ့ၣ်လၢကဟဲစိာ်အသိ ဒီးဂီၤဘုၣ်ဂီၤဖံးဖဲအံၤတက့ၢ်. အဝဲသ့ၣ်ကဘၣ်မၤသံဒီးအီၣ်ဝဲဖဲအံၤလီၤ. အဝဲသ့ၣ်တဘၣ်မၤတၢ်ဒဲးဘးထီဒါယွၤဒီးအီၣ်တၢ်ဖံးတၢ်ညၣ်ဃုာ် ဒီးတၢ်သွံၣ်လၢအပူၤဘၣ်.” မၤသးဒ်န့ၣ်ဒီး, လၢမုၢ်နၤအဝဲန့ၣ်အဝဲသ့ၣ်ဟဲစိာ်အဂီၤဘုၣ် ဂီၤဖံးဒီးမၤသံဝဲဖဲန့ၣ်လီၤ.
35 စီၤစီလူးဘှီထီၣ်တၢ်လုၢ်လီၢ်တခါဆူယွၤအအိၣ်ဒီးတၢ်န့ၣ်မ့ၢ် တၢ်လုၢ်လီၢ်အခီၣ်ထံးကတၢၢ်တခါလၢအဘှီထီၣ်ဝဲဒၣ်န့ၣ်လီၤ.
36 စီၤစီလူးစံးဘၣ်အပှၤတဖၣ်န့ၣ်, “မ်ပကလဲၤဒီးဒုးပှၤဖလ့ ၡသးဖိတဖၣ်လၢမုၢ်နၤ, ဂုာ်ဆူၣ်ပျီဆူၣ်ကွံာ်အဝဲသ့ၣ်တုၤလၢမုၢ်ဂီၤ ထီၣ်သီဒီးမၤသံကွံာ်အီၤကိးဂၤဒဲးတက့ၢ်.”
အဝဲသ့ၣ်စံးဝဲ, “မၤဒ်နဆိကမိၣ်အဂ့ၤကတၢၢ်အသိးတက့ၢ်.”
ဘၣ်ဆၣ်ဒီးပှၤလုၢ်တၢ်အခိၣ်စံးဝဲ, “မ်ပကူၣ်လိာ်ဆိတၢ်ဒီး ကစၢ်ယွၤတက့ၢ်.”
37 မၤသးဒ်န့ၣ်ဒီး, စီၤစီလူးသံကွၢ်ကစၢ်ယွၤ, “မ့ၢ်ယဘၣ်ဒုးပှၤဖလ့ၡသးဖိတဖၣ်ဧါ. မ့ၢ်နကဟ့ၣ်ပှၤတၢ်မၤနၢၤဧါ.” ဘၣ်ဆၣ်ဒီးလၢမုၢ်နံၤအဝဲန့ၣ်ကစၢ်ယွၤတစံးဆၢတၢ်နီတမံၤဘၣ်.
38 တုၤနုၤတစု, စီၤစီလူးစံးဘၣ်ပှၤဂီၢ်မုၢ်အခိၣ်အနၢ်တဖၣ်, “ဟဲဆူအံၤဒီးဃုထံၣ်တၢ်ဒဲးဘးမနုၤဘၣ်တၢ်မၤတ့ၢ်အီၤလဲၣ် န့ၣ်တက့ၢ်.
39 ယအၢၣ်လီၤတ့ၢ်တၢ်လၢယွၤလၢအမူဝဲတဂၤလၢအဟ့ၣ်ကီၢ်အံၣ်စရ့လး လၢတၢ်မၤနၢၤအမံၤအပူၤ, လၢပှၤလၢအတၢ်ကမၣ်အိၣ်တဂၤန့ၣ်အဝဲမ့မ့ၢ်ဒၣ်လဲာ် ယဖိခွါစီၤယိနၤသၣ်န့ၣ်ကဘၣ်တၢ်မၤသံကွံာ်အီၤလီၤ.” ဘၣ်ဆၣ်ဒီးပှၤတစံးဘၣ်တၢ်နီတဂၤဘၣ်.
40 အန့ၣ်ဝံၤဒီးစီၤစီလူးစံးဘၣ်အဝဲသ့ၣ်, “သုဝဲခဲလၢာ်ဆၢထၢၣ်ဖဲန့ၣ်ဒီးယၤ ဒီးစီၤယိနၤသၣ်ပကဆၢထၢၣ်ဖဲအံၤလီၤ.”
အဝဲသ့ၣ်စံးဝဲ, “မၤဒ်နဆိကမိၣ်အဂ့ၤကတၢၢ်န့ၣ်တက့ၢ်.”
41 စီၤစီလူးစံးဘၣ်ယွၤ, ကီၢ်အံၣ်စရ့လးအကစၢ်ယွၤ, “ယွၤဧၢ, ဘၣ်မနုၤလၢနတစံးဆၢဘၣ်ယၤလၢတနံၤအံၤန့ၣ်လဲၣ်. ယွၤ, ကီၢ်အံၣ်စရ့လးအကစၢ်ယွၤဧၢ, စံးဆၢယၤခီဖျိလၢၢ်စီဆှံတဖၣ်အံၤတက့ၢ်. တၢ်န့ၣ်မ့မ့ၢ်စီၤယိနၤသၣ်မ့ၢ်ဂ့ၤယၤမ့ၢ်ဂ့ၤပတၢ်ကမၣ်ဒီး, စံးဆၢပှၤလၢအူရံၣ်တက့ၢ်. ဘၣ်ဆၣ်ဒီးမ့မ့ၢ်တၢ်လၢအဘၣ်ဃး ဒီးနကီၢ်အံၣ်စရ့လးအပှၤဂီၢ်မုၢ်ဒီးစံးဆၢပှၤခီဖျိတူမံၣ် တက့ၢ်.” တၢ်စံးဆၢဒုးနဲၣ်ဝဲလၢစီၤယိနၤသၣ်ဒီးစီၤစီလူးန့ၣ်လီၤ. ဒီးပှၤဂီၢ်မုၢ်ပူၤဖျဲးဝဲလီၤ.
42 အန့ၣ်ဝံၤဒီးစီၤစီလူးစံးဝဲ, “စံၣ်ညီၣ်တဲာ်တၢ်လၢယဖိခွါ စီၤယိနၤသၣ်ဒီးယၤအဘၢၣ်စၢၤတက့ၢ်. ဒီးတၢ်ဒုးနဲၣ်ဖျါထီၣ်လၢစီၤယိနၤသၣ်လီၤ.”
43 တုၤနုၤတစု, စီၤစီလူးသံကွၢ်စီၤယိနၤသၣ်, “နမၤတ့ၢ်တၢ်မ နုၤလဲၣ်.” ဒီးစီၤယိနၤသၣ်စံးဆၢဝဲ, “ယအီၣ်ဘၣ်ကနဲစီ တစဲးလီၤ. ကွၢ်ကွၢ်, ယၤလီၤ. ယအိၣ်ကတဲာ်ကတီၤယသးလၢတၢ်သံအဂီၢ်လီၤ.”
44 စီၤစီလူးစံးဘၣ်အီၤ, “နမ့ၢ်တဘၣ်တၢ်မၤသံနၤဒီးမ်ကစၢ် ယွၤတီၢ်ယၤတုၤယသံတက့ၢ်.”
45 ဘၣ်ဆၣ်ဒီးပှၤဂီၢ်မုၢ်စံးဘၣ်စီၤစီလူး, “မ့ၢ်စီၤယိနၤသၣ် လၢအမၤန့ၢ်တၢ်မၤနၢၤလၢကီၢ်အံၣ်စရ့လးအဂီၢ်ကဘၣ်တၢ်မၤသံ အီၤဧါ. တသ့ဘၣ်. ပအၢၣ်လီၤတၢ်လၢယွၤလၢအမူဝဲတဂၤအ မံၤအပူၤ, လၢအဝဲအခိၣ်သူဖိတဘိဒၣ်လဲာ်တဘၣ်လီၤမၢ်ကွံာ်ဘၣ်. တၢ်လၢအမၤတ့ၢ်ဝဲတနံၤအံၤန့ၣ်, မ့ၢ်တၢ်မၤတ့ၢ်အသးဃုာ်ဒီးကစၢ် ယွၤအတၢ်မၤစၢၤန့ၣ်လီၤ.” မၤသးဒ်န့ၣ်ဒီး, ပှၤဂီၢ်မုၢ်အုၣ်က့ၤခီၣ်က့ၤစီၤယိနၤသၣ်လၢ ကဘၣ်တၢ်မၤသံကွံာ်အီၤန့ၣ်လီၤ.
46 တၢ်န့ၣ်အလီၢ်ခံ, စီၤစီလူးဆိကတီၢ်ကွံာ်တၢ်လူၤပှၤဖလ့ၡသးဖိတဖၣ်ဒီး, အဝဲသ့ၣ်က့ၤကဒါက့ၤဆူအလီၢ်ကဝီၤဒၣ်ဝဲအပူၤလီၤ.
47 ဖဲစီၤစီလူးကဲထီၣ်ကီၢ်အံၣ်စရ့လးအစီၤပၤဝံၤအလီၢ်ခံန့ၣ်, အဝဲဒုးကယဲၢ်အဒုၣ်အဒါခဲလၢာ်လၢတၢ်လီၢ်ကိးပူၤဒဲး, လၢအမ့ၢ်ပှၤဂီၢ်မုၢ်လၢကီၢ်မိၤအး, ကီၣ်ဧၣ်မိၣ်, ဒီးကီၢ်အဒိၣ်, ဒီးစီၤပၤတဖၣ်လၢဝ့ၢ်စိဘၤ, ဒီးပှၤဖလ့ၡသးဖိ တဖၣ်န့ၣ်လီၤ. ဖဲအဒုးတၢ်တပူၤလၢ်လၢ်န့ၣ်မၤနၢၤတၢ်လီၤ.
48 အဝဲဒုးတၢ်ဒူဒူဃိၤဃိၤဒီးမၤနၢၤကွံာ်ဒၣ်လဲာ်ကီၢ်ဧမၤလ့း အပှၤဂီၢ်မုၢ်န့ၣ်လီၤ. အဝဲမၤပူၤမၤဖျဲးပှၤအံၣ်စရ့လးဖိတဖၣ်လၢကယဲၢ်တၢ်ဒုးတၢ်ယၤ ထီဒါတၢ်တဖၣ်အပူၤန့ၣ်လီၤ.
49 စီၤစီလူးအဖိခွါတဖၣ်မ့ၢ်ဝဲ, စီၤယိနၤသၣ်, စီၤယံးၡဝံ, ဒီးစီၤမးလကံၡူၤန့ၣ်လီၤ. အဝဲအဖိမုၣ်လၢအဒိၣ်တဂၤန့ၣ်ဘၣ်တၢ်ကိးအမံၤလၢနီၢ်မ့ရ့ာ်, ဒီးအဖိမုၣ်အဆံးတဂၤမ့ၢ်နီၢ်မံၤကၤလးလီၤ.
50 အဝဲအမါမ့ၢ်ဝဲ, စီၤအဃံမဧးအဖိမုၣ်နီၢ်အဃံနိၣ်လီၤ. အဝဲအသုးမုၢ်အသုးခိၣ်ကျၢၢ်မ့ၢ်ဝဲအတခွါလၢအမ့ၢ်ဝဲ အဖါတံၢ်စီၤန့ၢ်အဖိခွါစီၤအဘံန့ၢ်လီၤ.
51 စီၤစီလူးအပၢ်စီၤကံၣ်ဒီးစီၤအဘံန့ၢ်အပၢ်စီၤန့ၢ်တဖၣ်န့ၣ် မ့ၢ်စီၤအဘံၤအ့လးအဖိခွါတဖၣ်လီၤ.
52 စီၤစီလူးဘၣ်ဒုးတၢ်ထီဒါပှၤဖလ့ၡသးဖိတဖၣ်ဆူၣ်ဆူၣ်ကလဲာ်လၢ အသးသမူတစိၤန့ၣ်လီၤ. မၤသးဒ်န့ၣ်ဒီးဖဲအထံၣ်န့ၢ်ကယဲၢ်ပှၤတဂၤလၢ်လၢ်လၢအဒူဒီး အဂံၢ်အဘါဆူၣ်န့ၣ်, အဝဲကိးနုာ်အီၤဆူအသုးမုၢ်အပူၤန့ၣ်လီၤ.