13
1 စီၤစီလူးအသးပှၢ်ဖဲအကဲထီၣ်စီၤပၤဒီးအဝဲကဲကီၢ်အံၣ်စရ့လးအစီၤပၤခံနံၣ်န့ၣ်လီၤ.
2 စီၤစီလူးဃုထၢထီၣ်ပှၤပိာ်ခွါအဂၤသၢကထိဒီးပာ်ဝဲပှၤအဂၤခံကထိဃုာ်ဒီးအီၤ ဖဲဝ့ၢ်မံးကမၣ်ဒီးလၢကစၢၢ်ကလိအဝ့ၢ်ဘ့ၤသ့လးအပူၤလီၤ. ပှၤတကထိန့ၣ်ဆှၢဝဲဆူဝ့ၢ်ကံးဘဧးအိၣ်လၢပှၤဘံၣ်ယၤမံၣ်အဒူၣ်အကီၢ်ပူၤလီၤ. ပှၤအဂၤအိၣ်လီၤတဲာ်တဖၣ်န့ၣ်စီၤစီလူးဆှၢက့ၤဆူအဟံၣ်လီၤ.
3 စီၤယိနၤသၣ်မၤသံကွံာ်ပှၤဖလ့ၡသးဖိအသုးခိၣ်ဖးဒိၣ်လၢဝ့ၢ်က့ဘၤ, ဒီးကယဲၢ်ပှၤဖလ့ၡသးဖိကိးဂၤနၢ်ဟူတၢ်ဂ့ၢ်န့ၣ်လီၤ. အန့ၣ်ဝံၤဒီးစီၤစီလူးဆှၢလီၤပှၤစိာ်တၢ်ကစီၣ်ဒ်သိးကကိး ဖှိၣ်ပှၤဧ့ၤဘြံၤဖိဆူတၢ်ဒုးတၢ်ယၤခီဖျိတၢ်အူထီၣ်ကွဲၤတဖျၢၣ် သကုၤကီၢ်ဒီဘ့ၣ်ညါန့ၣ်လီၤ.
4 ကယဲၢ်ပှၤအံၣ်စရ့လးဖိတဖၣ်ဘၣ်တၢ်တဲဘၣ်အီၤလၢစီၤစီလူးမၤသံကွံာ် ပှၤဖလ့ၡသးဖိအသုးခိၣ်ဒိၣ်ဒီးလၢပှၤဖလ့ၡသးဖိ တဖၣ်သးဟ့အဝဲသ့ၣ်အဂ့ၢ်န့ၣ်လီၤ. လၢတၢ်န့ၣ်အဃိပှၤဂီၢ်မုၢ်စံးဆၢတၢ်ကိးဒ်သိးကပာ်ဖှိၣ်အသး ဃုာ်ဒီးစီၤစီလူးဖဲဝ့ၢ်ကံးလကၤလးန့ၣ်လီၤ.
5 ပှၤဖလ့ၡသးဖိတဖၣ်အိၣ်ဖှိၣ်ရိဖှိၣ်ဒ်သိးကဒုးပှၤအံၣ်စရ့လး ဖိတဖၣ်လီၤ. အဝဲသ့ၣ်အိၣ်ဒီးလ့ၣ်ကဟၣ်ဒုးသုးသၢကလး, ပှၤဒိးကသ့ၣ်သုးမုၢ်အဂၤဃုကထိ ဒီးပှၤသုးဖိအါထဲသိးမဲးဧိၤဟီၣ်ဧိၤလၢပီၣ်လဲၣ်အနံၤလီၤ. အဝဲသ့ၣ်လဲၤဆူဝ့ၢ်မံးကမၣ်အိၣ်လၢ ဝ့ၢ်ဘ့ၤသအၤဝ့ၣ်အမုၢ်ထီၣ်န့ၣ်ဒီးသူၣ်ထီၣ်အဒဲဖဲန့ၣ်လီၤ.
6 အန့ၣ်ဝံၤဒီးအဝဲသ့ၣ်ဒုးတၢ်ထီဒါပှၤအံၣ်စရ့လးဖိတဖၣ်လၢတၢ် ဒုးဆူၣ်ဆူၣ်ကိၤကိၤတခါဒီးဒုးကဲထီၣ် တၢ်လီၤပျံၤလီၤဖုးဖးဒိၣ်တမံၤလၢအဝဲသ့ၣ်အဂီၢ်လီၤ. ပှၤအံၣ်စရ့လးဖိတနီၤပာ်ခူသူၣ်အသးလၢလၢၢ်ကအိဒီးတၢ်ပူၤ တဖၣ်အပူၤမ့ၢ်ဂ့ၤ, လၢလ့ကျါမ့ၢ်ဂ့ၤ, တၢ်ပူၤဖိတဖၣ်အပူၤ, ဒီးထံပူၤတဖၣ်အပူၤမ့ၢ်ဂ့ၤလီၤ.
7 ပှၤအဂၤခီဂာ်ထံကျိယၢ်ဒ့ၣ်ဆူဝ့ၢ်ကးဒီးဝ့ၢ်ကံးလကၤလးအတၢ်ပၢအပူၤလီၤ.
စီၤစီလူးအိၣ်ဒံးဝဲလၢဝ့ၢ်ကံးလကၤလးဒီးပှၤဂီၢ်မုၢ်အိၣ် ဒီးအီၤတဖၣ်ကနိးကစုာ်လၢတၢ်ပျံၤတၢ်ဖုးအဃိလီၤ.
8 အဝဲအိၣ်ခိးတ့ၢ်စီၤၡမူၤအ့လးနွံသီ, ဒ်စီၤၡမိၤအ့လး မၤလိာ်တ့ၢ်ဝဲအသိးလီၤ. ဘၣ်ဆၣ်ဒီးစီၤၡမူၤအ့လးတဟဲဆူဝ့ၢ်ကံးလကၤလးဒံးဘၣ်. ပှၤဂီၢ်မုၢ်စးထီၣ်ဟးဖးဒီးစီၤစီလူးလီၤ.
9 မၤသးဒ်န့ၣ်ဒီး, စီၤစီလူးစံးဘၣ်အဝဲသ့ၣ်, “ဟဲစိာ်န့ၢ်ယၤတၢ်လုၢ်မ့ၣ်အူတဖၣ်ဒီးတၢ်လုၢ်မၤဃူမၤဖိး တဖၣ်တက့ၢ်.” အဝဲလုၢ်ထီၣ်တၢ်လုၢ်မ့ၣ်အူတခါ,
10 ဒီးဖဲအလုၢ်တၢ်ဝံၤသီသီန့ၣ်စီၤၡမူၤအ့လးဟဲတုၤဝဲလီၤ. စီၤစီလူးလဲၤထီၣ်ဒ်သိးကသဂၢၢ်အီၤဒီးတူၢ်လိာ်မုာ်အီၤလီၤ.
11 ဘၣ်ဆၣ်ဒီးစီၤၡမူၤအ့လးစံးဝဲ, “နမၤတ့ၢ်တၢ်မနုၤလဲၣ်.” စီၤစီလူးစံးဆၢဝဲဒၣ်, “ပှၤဂီၢ်မုၢ်စးထီၣ်ဟးသဒၣ်ယၤဒီး ဒ်နစံးတ့ၢ်လၢနကဟဲန့ၣ်နတဟဲပၢၢ်ထီၣ်ဘၣ်. လၢန့ၣ်အမဲာ်ညါပှၤဖလ့ၡသးဖိတဖၣ်ပာ်ဖှိၣ်ထီၣ်အသးလၢဝ့ၢ်မံး ကမၣ်လီၤ.
12 လၢတၢ်န့ၣ်အဃိယဆိကမိၣ်ထီၣ်ယဲ, “ပှၤဖလ့ၡသးဖိတဖၣ်န့ၣ်ကဟဲ ဒုးယၤဖဲအံၤလၢဝ့ၢ်ကံးလကၤလးအပူၤဒီးယတကျဲးစၢးမၤန့ၢ်ဒံး ယွၤအတၢ်ကွၢ်မဲာ်ဘၣ်. လၢတၢ်န့ၣ်အဃိ, တၢ်လီၤဂာ်ဘၣ်ယၤဒ်ယကဘၣ်လုၢ်ထီၣ်တၢ်လုၢ်တၢ်ပာ်တမံၤလီၤ.”
13 စီၤၡမူၤအ့လးစံးဆၢဝဲဒၣ်, “တၢ်န့ၣ်မ့ၢ်တၢ်မၢးအတၢ်မၤ တမံၤလၢတၢ်ကမၤအီၤအဂီၢ်လီၤ. နတစူၢ်တ့ၢ်ယွၤအတၢ်မၤလိာ်လၢနကစၢ်ယွၤဟ့ၣ်လီၤတ့ၢ်နၤန့ၣ်ဘၣ်. နမ့ၢ်စူၢ်ဒီးအဝဲကပျဲနၤဒီးနစၢၤနသွဲၣ်တဖၣ်ပၢဘၣ် ကီၢ်အံၣ်စရ့လး လီၤထူလီၤယိာ်လီၤ.
14 မ့မ့ၢ်ခဲကနံၣ်အံၤနတၢ်ပၢတၢ်ပြးတလဲၤဆူညါတပယူာ်ဃီဘၣ်. အဂ့ၢ်ဒ်အံၤနတစူၢ်အီၤဘၣ်အဃိလီၤ. ယွၤကဃုန့ၢ်ပှၤတဂၤလၢအဝဲသးလီဝဲဒီးဒုးကဲထီၣ်အီၤလၢပှၤပၢဘၣ်အပှၤဂီၢ်မုၢ်လီၤ.”
15 စီၤၡမူၤအ့လးဟးထီၣ်လၢဝ့ၢ်ကံးလကၤလးဒီးလဲၤအကျဲဒၣ်ဝဲလီၤ. ပှၤဂီၢ်မုၢ်အိၣ်လီၤတဲာ်တဖၣ်ပိာ်ထီၣ်စီၤစီလူး အခံဖဲလၢ အဝဲလဲၤပာ်ဖှိၣ်အသးဒီးအသုးမုၢ်န့ၣ်လီၤ. အဝဲသ့ၣ်လဲၤလၢဝ့ၢ်ကံးလကၤလးဆူဝ့ၢ်ကံးဘဧၤလၢအအိၣ်ဝဲလၢ ပှၤဘံၣ်ယၤမံၣ်အလီၢ်ကဝီၤအပူၤန့ၣ်လီၤ. စီၤစီလူးသမံသမိးအသုးမုၢ်သံၣ်ဘိတဖၣ်ဒီးပှၤပိာ်ခွါအိၣ်ဝဲ အဂၤဃုကယၤအကပိာ်ကပၤန့ၣ်လီၤ.
16 စီၤစီလူး, အဖိခွါစီၤယိနၤသၣ်ဒီးအပှၤတဖၣ်သူၣ်ထီၣ်အဒဲ ဖဲဝ့ၢ်ကံဘၤလၢပှၤဘံၣ်ယၤမံၣ်ဖိအကီၢ်ပူၤန့ၣ်လီၤ. ပှၤဖလ့ၡသးဖိတဖၣ်အသူၣ်ဒဲအလီၢ်အိၣ်ဖဲဝ့ၢ်မံးကမၣ်လီၤ.
17 ပှၤဖလ့ၡသးအသုးဖိတဖၣ်ဟးထီၣ်လၢအသူၣ်ဒဲအလီၢ်လၢကဂုာ်ဆူၣ် ပျိဆူၣ်တၢ်အဂီၢ်သၢဖုလီၤ. တဖုန့ၣ်လဲၤဆူဝ့ၢ်ဧိးဖြၤလၢကီၢ်ၡူဧၤလးအပူၤ,
18 အဂၤတဖုလဲၤဆူဝ့ၢ်ဘ့ၤသဃိရၣ်ဒီးအဂၤတဖုလဲၤဆူကီၢ်ဆၢလၢ အကွၢ်စိဃီၤစဘိဧံၣ်အတၢ်တြီၤဒီးပှၢ်မုၢ်ကနၢန့ၣ်လီၤ.
19 လၢကီၢ်အံၣ်စရ့လးအပူၤန့ၣ်ပှၤပိာ်ထးတဖၣ်တအိၣ်ဘၣ်. အဂ့ၢ်ဒ်အံၤ, ပှၤဖလ့ၡသးဖိတဖၣ်ပာ်လီၤအသးလၢကမၤဝဲ ဒ်သိးပှၤဧ့ၤဘြံၤဖိတဖၣ်ဘှီနးဒီးဘီတဖၣ်အသုတသ့အဂီၢ်န့ၣ်လီၤ.
20 (ပှၤအံၣ်စရ့လးဖိတဖၣ်ဘၣ်လဲၤဆူပှၤဖလ့ၡသးဖိတဖၣ်အအိၣ်လၢ ကကျ့အ့ၣ်ထီၣ်ထဲၣ်ကနၣ်, တပူာ်, ကွါဖိဒီးထါဂဲာ်တဖၣ်အဂီၢ်န့ၣ်လီၤ.
21 တၢ်အပှ့ၤတခီ, လၢတၢ်ကျ့အ့ၣ်ထီၣ်ကွါတဖၣ်ဒီးဘှီဂ့ၤက့ၤနီၣ်ဆဲးဂီၤဖံးအဂီၢ် မ့ၢ်ဝဲစ့ညၣ်တဘ့ၣ်ဒီးလၢတၢ်ကျ့အ့ၣ်ထီၣ်ထဲၣ် ကနၣ်ဒီးတပူာ်အဂီၢ်န့ၣ်မ့ၢ်ဝဲစ့ညၣ်ခံဘ့ၣ်န့ၣ်လီၤ.)
22 မၤသးဒ်န့ၣ်ဒီးလၢတၢ်ဒုးတၢ်ယၤအမုၢ်နံၤန့ၣ်, မ့တမ့ၢ်ဘၣ်လၢစီၤစီလူးဒီးအဖိခွါစီၤယိနၤသၣ်န့ၣ်, ပှၤအံၣ်စရ့လးသုးဖိတဖၣ်တအိၣ်ဒီးနးတဖၣ်မ့ၢ်ဂ့ၤ ဘီတဖၣ်မ့ၢ်ဂ့ၤဘၣ်.
23 ပှၤဖလ့ၡသးဖိတဖၣ်ဆှၢလီၤပှၤသုးဖိတဖုလၢကဒီဒၣ်အိၣ်ပှိၤ ဝ့ၢ်မံးကမၣ်အကျဲန့ၣ်လီၤ.