11
1 လၢခံပူၤကွံာ်တလါဃၣ်ဃၣ်န့ၣ်, ကီၢ်ဧၣ်မိၣ်အစီၤပၤစီၤနၤဃၣ် ဆှၢထီၣ်အသုးမုၢ်ထီဒါဝ့ၢ်ယၤဘ့ၣ်အိၣ်လၢကီၢ်ကံးလဧးအလီၢ် ကဝီၤအပူၤန့ၣ်ဒီးကဝီၤဃးအီၤန့ၣ်လီၤ. ပှၤပိာ်ခွါတဖၣ်လၢအအိၣ်လၢဝ့ၢ်ယၤဘ့ၣ်အပူၤစံးဘၣ်စီၤနၤဃၣ်, “မၤတၢ်အၢၣ်လီၤအီလီၤတမံၤဒီးပှၤတက့ၢ်. ဒီးပကတူၢ်လိာ်နၤဒ်ပှၤတဂၤလၢအပၢဘၣ်ပှၤအသိးန့ၣ်လီၤ.”
2 စီၤနၤဃၣ်စံးဆၢဝဲဒၣ်, “ယကမၤတၢ်အၢၣ်လီၤအီလီၤတမံၤဒီး သုလၢတၢ်ဂ့ၢ်တမံၤအဖီခိၣ်လီၤ. ယကထုးထီၣ်ကွံာ်ပှၤကိးဂၤဒဲးအမဲာ်ချံလၢအထွဲတခီဒီး, ဒုးလီၤဘၣ်တၢ်မဲာ်ဆှးလၢကီၢ်အံၣ်စရ့လးဒီဘ့ၣ်အလိၤန့ၣ်လီၤ.”
3 ဝ့ၢ်ယၤဘ့ၣ်အခိၣ်အနၢ်တဖၣ်စံးဝဲဒၣ်, “ဟ့ၣ်ပှၤတၢ်ဆၢကတီၢ်နွံသီ ဒ်သိးပကဆှၢလီၤပှၤစိာ်တၢ်ကစီၣ်တဖၣ်သကုၤကီၢ်အံၣ်စရ့လးဒီ ဘ့ၣ်န့ၣ်တက့ၢ်. ပှၤမ့ၢ်တမၤစၢၤပှၤနီတဂၤဘၣ်ဒီးပကဟ့ၣ်လီၤ ပသးလၢနစုပူၤလီၤ.”
4 ပှၤစိာ်တၢ်ကစီၣ်တဖၣ်ဟဲတုၤဝဲလၢဝ့ၢ်ကံးဘဧၤဖဲစီၤစီလူး အိၣ်ဆိးဝဲဒီးဖဲအဝဲသ့ၣ်တဲဘၣ်တၢ်ကစီၣ်န့ၣ်, ပှၤဂီၢ်မုၢ်စးထီၣ်ဟီၣ်ဝဲ ယၢၤဝဲလၢတၢ်သးဟးဂီၤအပူၤလီၤ.
5 ဖဲအကတီၢ်အဝဲန့ၣ်စီၤစီလူးဟဲက့ၤလၢစံာ်ပျီဃုာ်ဒီးအဂီၤ ဖံးဖါတဖၣ်ဒီးအဝဲသံကွၢ်ဝဲ, “တၢ်လဲၤကမၣ်အသးဒ်လဲၣ်. ဘၣ်မနုၤလၢပှၤကိးဂၤဒဲးဟီၣ်ဝဲယၢၤဝဲန့ၣ်လဲၣ်.” အဝဲသ့ၣ်တဲဘၣ်အီၤတၢ်လၢပှၤစိာ်တၢ်ကစီၣ်တဖၣ်လၢဝ့ၢ်ယၤဘ့ၣ်ပာ် ဖျါတ့ၢ်ဝဲန့ၣ်လီၤ.
6 ဖဲစီၤစီလူးနၢ်ဟူတၢ်အံၤဒီးကစၢ်ယွၤအသးလီၤဘၣ်လၢအလိၤ ဒီးအဝဲအသးဒိၣ်ထီၣ်လီၤ.
7 အဝဲဟံးန့ၢ်ဂီၤဖံးဖါခံဒုဒီးဒီၣ်တဲာ်အီၤတကူာ်တကူာ်ဒီး မၢပှၤစိာ်တၢ်ကစီၣ်တဖၣ်စိာ်တၢ်ညၣ်အကူာ်တဖၣ်န့ၣ်သကုၤကီၢ်အံၣ် စရ့လးဒီဘ့ၣ်ဃုာ်ဒီးတၢ်ဟ့ၣ်ပလီၢ်အံၤန့ၣ်လီၤ. “ပှၤတဂၤလၢ်လၢ်လၢအတပိာ်ဘၣ်စီၤစီလူးဒီးစီၤၡမူအ့လးအခံ ဆူတၢ်ဒုးအပူၤန့ၣ်, အဂီၤဖံးဖါတဖၣ်ကဘၣ်တၢ်မၤအီၤဒ်အံၤလီၤ. ကီၢ်အံၣ်စရ့လးအပှၤဂီၢ်မုၢ်ပျံၤတၢ်လၢယွၤကမၤဝဲ, ဒီးဟဲထီၣ်သကိးဝဲခဲလၢာ်တအိၣ်ဒီးတၢ်လီၤတိၢ်ဘၣ်လီၤ.
8 စီၤစီလူးပာ်ဖှိၣ်ထီၣ်အဝဲသ့ၣ်ဖဲဝ့ၢ်ဘ့စ့းဒီးပှၤအိၣ်ဝဲ လၢကီၢ်အံၣ်စရ့လးအပူၤအဂၤသၢကလီၢ်ဒီးပှၤအဂၤသၢကလး လၢကီၢ်ယူဒၤအပူၤန့ၣ်လီၤ.
9 အဝဲသ့ၣ်စံးဘၣ်ပှၤစိာ်တၢ်ကစီၣ်တဖၣ်လၢဝ့ၢ်ယၤဘ့ၣ်န့ၣ်, “တဲဘၣ်သုပှၤဂီၢ်မုၢ်လၢတချုးခဲမုၢ်ဆ့ၣ်မုၢ်ထူၣ်န့ၣ်, အဝဲသ့ၣ်ကဘၣ်တၢ်အုၣ်က့ၤခီၣ်က့ၤအီၤန့ၣ်တက့ၢ်. ဖဲပှၤဂီၢ်မုၢ်လၢဝ့ၢ်ယၤဘ့ၣ်ဒိးန့ၢ်တၢ်ကစီၣ်အံၤန့ၣ်အဝဲသ့ၣ် ပှဲၤလုၣ်ကွံာ်ဒီးတၢ်သူၣ်ခုသးခုဒီး,
10 စံးဘၣ်စီၤနၤဃၣ်, “ခဲမုၢ်ဆ့ၣ်န့ၣ်ပကဟ့ၣ်လီၤပသးဆူနစုပူၤ ဒီးတၢ်လၢနသးအိၣ်မၤတမံၤလၢ်လၢ်ဒီးပှၤန့ၣ်နမၤအီၤသ့ဝဲလီၤ.”
11 မုၢ်ဆ့ၣ်ထီၣ်တနံၤဂီၤဂီၤန့ၣ်စီၤစီလူးနီၤဖးအပှၤပိာ်ခွါ တဖၣ်သၢဖုဒီးဖဲမုၢ်ဆ့ၣ်ထီၣ်လၢဂီၤဂီၤတၢ်ခံးဒံးန့ၣ်, အဝဲသ့ၣ်ဃ့ၢ်သဖှိဃီၤဆူဒုၣ်ဒါအသူၣ်လီၤဒဲအလီၢ်န့ၣ်ဒီးဒုးတၢ်ထီဒါ ပှၤဧၣ်မိၣ်ဖိတဖၣ်လီၤ. တုၤမုၢ်ထူၣ်ဒီးအဝဲသ့ၣ်ကျီသံကွံာ်ပှၤဧၣ်မိၣ်ဖိတဖၣ်န့ၣ်လီၤ. ပှၤအိၣ်မူတ့ၢ်တဖၣ်န့ၣ်လီၤမုၢ်ပြံပြါဝဲဒီးပှၤတဂၤစုာ်စုာ် န့ၣ်ဃ့ၢ်ဝဲဒၣ်ထဲအနီၢ်ကစၢ်ဒၣ်ဝဲဧိၤန့ၣ်လီၤ.
12 အန့ၣ်ဝံၤဒီးကီၢ်အံၣ်စရ့လးအပှၤဂီၢ်မုၢ်စံးဘၣ်စီၤၡမူၤအ့လး, “ပှၤလၢအစံးတ့ၢ်ဝဲလၢစီၤစီလူးတကြၢးကဲထီၣ်ဘၣ်ပစီၤပၤ ဘၣ်န့ၣ်အိၣ်ဖဲလဲၣ်. ဟ့ၣ်လီၤအဝဲသ့ၣ်လၢပစုပူၤတက့ၢ်. ဒီးပကမၤသံကွံာ်အဝဲသ့ၣ်န့ၣ်လီၤ.”
13 ဘၣ်ဆၣ်ဒီးစီၤစီလူးစံးဝဲ, “တနံၤအံၤတၢ်တဘၣ်မၤသံကွံာ် ကွံာ်ပှၤနီတဂၤဘၣ်. အဂ့ၢ်ဒ်အံၤ, အဝဲအံၤမ့ၢ်မုၢ်တနံၤလၢယွၤအုၣ်က့ၤခီၣ်က့ၤကီၢ် အံၣ်စရ့လးန့ၣ်လီၤ.”
14 ဒီးစီၤၡမူၤအ့လးစံးဘၣ်အဝဲသ့ၣ်, “မ်ပဝဲခဲလၢာ်ပလဲၤသကိးကဒီးတဘျီဆူဝ့ၢ်ကံးလကၤလး ဒီးဘိးဘၣ်သ့ၣ်ညါတၢ်လၢစီၤစီလူးမ့ၢ်ပစီၤပၤန့ၣ်တက့ၢ်.”
15 မၤသးဒ်န့ၣ်ဒီး, အဝဲသ့ၣ်ခဲလၢာ်လဲၤဆူဝ့ၢ်ကံလကၤလးဒီးဖဲ တၢ်လီၢ်စီဆှံန့ၣ်, အဝဲသ့ၣ်ဘိးဘၣ်သ့ၣ်ညါထီၣ်လၢစီၤစီလူး မ့ၢ်စီၤပၤန့ၣ်လီၤ. အဝဲသ့ၣ်လုၢ်ထီၣ်တၢ်လုၢ်မၤဃူမၤဖိးအတၢ်လုၢ်တၢ်ပာ်တဖၣ်ဒီး စီၤစီလူးဒီးကယဲၢ်ကီၢ်အံၣ်စရ့လးအပှၤဂီၢ်မုၢ် မၤတၢ်သူၣ်ခုသးခုအမူးဘၣ်ဃးဒီးတၢ်မၤအသးဖဲန့ၣ်လီၤ.