9
(၁စီၤပၤ ၁၀:၁-၁၃)
1 ကီၢ်ၡဘၤအနီၢ်ပၤမုၣ်နၢ်ဟူတ့ၢ်ဝဲစီၤပၤၡလိၤမိၤအတၢ်မံၤဟူ သၣ်ဖျါဒီးအဝဲလဲၤဝဲဆူဝ့ၢ်ယရူၤၡလ့ၣ်ဒ်သိးအကမၤကွၢ်စီၤ ၡလိၤမိၤလၢတၢ်သံကွၢ်အကီအခဲတဖၣ်န့ၣ်လီၤ. အဝဲဟဲကိးဃုာ်အခ့အပှၤအါအါဂီၢ်ဂီၢ်, ဃုာ်ဒီးကီၤလးအူး တဖၣ်လၢပဒၢးထီၣ်ဝဲဒီးတၢ်နၢမူတဖၣ်, လၢၢ်လုၢ်ဒိၣ်ပှ့ၤဒိၣ်တဖၣ်ဒီးထူအါအါဂီၢ်ဂီၢ်န့ၣ်လီၤ. တုၤအဝဲဒီးစီၤၡလိၤမိၤထံၣ်လိာ်အသးန့ၣ်, အဝဲသံကွၢ်အီၤလၢကယဲၢ်တၢ်သံကွၢ်တဖၣ်လၢအအိၣ်လၢအတၢ်ဆိကမိၣ် အပူၤန့ၣ်လီၤ.
2 စီၤၡလိၤမိၤစံးဆၢကယဲၢ်တၢ်သံကွၢ်ခဲလၢာ်န့ၣ်လီၤ. တၢ်ကီကဲာ်ဆိးလၢအဝဲကတဲဖျါၡဲအီၤန့ၣ်, တအိၣ်လၢအဂီၢ်နီ တမံၤဘၣ်.
3 ကီၢ်ၡဘၤအနီၢ်ပၤမုၣ်နၢ်ဟူဘၣ်စီၤၡလိၤမိၤအတၢ်ကူၣ်သ့ဒီးထံၣ် ဘၣ်ဝဲနီလၢအဝဲသူၣ်ထီၣ်တ့ၢ်ဝဲဒၣ်န့ၣ်လီၤ.
4 အဝဲထံၣ်ဘၣ်တၢ်အီၣ်တၢ်အီလၢအဘၣ်တၢ်ပာ်လီၤအီၤလၢစီၤၡလိၤမိၤ အစီၢ်နီၤခိၣ်အလိၤ, အပဒိၣ်ပပှၢ်တဖၣ်အတၢ်အိၣ်တၢ်ဆိးအလီၢ်, တၢ်ကရၢကရိထီၣ်ပှၤမၤတၢ်လၢနီပူၤတဖၣ်ဒီးတၢ်ကူ တၢ်သိးလၢအဒ်သိးသိးလၢအဝဲသ့ၣ်ကူသိးဝဲ, တၢ်ခ့တၢ်ပှၤတဖၣ်လၢအပာ်လီၤတၢ်အီၣ်ဖဲအဝဲအတၢ်အီၣ်အမူးတဖၣ် အကူအသိး, ဒီးတၢ်လုၢ်တၢ်ပာ်တဖၣ်လၢအဝဲလုၢ်ထီၣ်ဝဲ လၢယွၤအတၢ်လုၢ်ဟံၣ်အပူၤန့ၣ်လီၤ. တၢ်အံၤဒုးကမၢကမၣ်အီၤတုၤဒၣ်လဲာ်အသးလီၤကတုၤဘၣ်မးအသး န့ၣ်လီၤ.
5 အဝဲစံးဘၣ်စီၤပၤ, “တၢ်လၢယနၢ်ဟူဘၣ်တ့ၢ်လၢယထံယကီၢ်ဒၣ်ယဲ အပူၤဘၣ်ဃးဒီးနဂ့ၢ်ဒီးနတၢ်ကူၣ်ဘၣ်ကူၣ်သ့န့ၣ်မ့ၢ်ဝဲတီဝဲလီၤ.
6 တချုးဒံးဘၣ်လၢယဟဲတုၤဒီးထံၣ်ဘၣ်လၢယနီၢ်ကစၢ်ဒၣ်ယဲန့ၣ်တၢ် လၢအဝဲသ့ၣ်တဲဘၣ်တ့ၢ်ယၤန့ၣ်, ယတနာ်အီၤဘၣ်. နတၢ်ကူၣ်သ့အဂ့ၢ်တဝာ်ဒၣ်လဲာ်န့ၣ်, ယတနၢ်ဟူတ့ၢ်အီၤဘၣ်. နကူၣ်သ့ဒိၣ်န့ၢ်ဒၣ်လဲာ်တၢ်လၢပှၤဂီၢ်မုၢ်စံးဝဲန့ၣ်လီၤ.
7 ပှၤတဖၣ်လၢအမၤန့ၢ်နၤတၢ်, ပှၤတဖၣ်လၢထီဘိအိၣ်လၢနမဲာ်ညါ, ဒီးအိၣ်ဒီးတၢ်ခွဲးတၢ်ယာ်လၢကနၢ်ဟူဘၣ်နတၢ်ကူၣ်သ့အတၢ်ကတိၤ တဖၣ်န့ၣ်, အဘူၣ်အတီၢ်ဂ့ၤမးလဲၣ်.
8 မ်ယွၤ, နကစၢ်ယွၤဘၣ်တၢ်စံးထီၣ်ပတြၢၤအီၤတက့ၢ်. အဝဲဒုးနဲၣ်ဖျါထီၣ်အတၢ်ဘၣ်သူၣ်ဘၣ်သးနၤထဲလဲၣ်ခီဖျိအဒုး ကဲထီၣ်နၤလၢစီၤပၤဒ်သိးကပၢတၢ်လၢအမံၤအပူၤန့ၣ်လီၤ. အဂ့ၢ်ဒ်အံၤ, အဝဲအဲၣ်အပှၤဂီၢ်မုၢ်အံၣ်စရ့လးဒီးကတီၤဃာ်အီၤ လီၤစိၤလီၤထီအဃိ, အဝဲဒုးကဲထီၣ်နၤလၢအဝဲသ့ၣ်အစီၤပၤဒ်သိး, နဟံးဃာ်တၢ်သိၣ်တၢ်သီဘၣ်ထွဲဒီးတၢ်စူၢ်တၢ်နာ်ဒီးတၢ်စံၣ်ညီၣ် တီကသ့ဝဲန့ၣ်လီၤ.
9 အဝဲဟ့ၣ်ကနၢၤဃီၤစီၤပၤၡလိၤမိၤလၢတၢ်ဟ့ၣ်တဖၣ်လၢအဝဲ ဟဲစိာ်တ့ၢ်ဝဲန့ၣ်လီၤ. တၢ်ဟ့ၣ်တဖၣ်မ့ၢ်ဝဲ, ထူလီၤတယၢၢ်အကံကၢ်တကယၤခံဆံဒီးတၢ်နၢမူအါအါကလဲာ်ဒီး လၢၢ်လုၢ်ဒိၣ်ပှ့ၤဒိၣ်တဖၣ်န့ၣ်လီၤ. တၢ်နၢမူအဂၤတဖၣ်လၢအကဂ့ၤဒ်သိးတၢ်လၢကီၢ်ၡဘၤအနီၢ်ပၤမုၣ်ဟဲ ဟ့ၣ်ဝဲစီၤပၤၡလိၤမိၤန့ၣ်, တအိၣ်ဘၣ်ဝဲနီတစုဘၣ်.
10 (စီၤပၤဃံရၣ်အပှၤတဖၣ်ဒီးစီၤပၤၡလိၤမိၤအပှၤတဖၣ်လၢအဟဲစိာ် ထူလၢကီၢ်အိဖ့ၢ်န့ၣ်, ဟဲစိာ်စ့ၢ်ကီးသ့ၣ်အလၤမူးဒီးလၢၢ်လုၢ်ဒိၣ်ပှ့ၤဒိၣ်တဖၣ်န့ၣ် လီၤ.
11 စီၤၡလိၤမိၤသူတ့ၢ်သ့ၣ်န့ၣ်လၢကမၤဃီသွါတဖၣ်လၢယွၤအတၢ်လုၢ် ဟံၣ်အဂီၢ်ဒီးလၢအနီအဂီၢ်, ဒီးလၢကမၤသီတူၢ်တဖၣ်ဒီးတနၢ်တဖၣ်လၢပှၤသးဝံၣ်တၢ်ဖိအဂီၢ် န့ၣ်လီၤ. လၢကီၢ်ယူဒၤအပူၤန့ၣ်, တၢ်ဒ်န့ၣ်အသိးတဘၣ်တၢ်ထံၣ်ဘၣ်အီၤလၢညါ, နီတစုဘၣ်.)
12 စီၤပၤၡလိၤမိၤဟ့ၣ်လီၤကီၢ်ၡဘၤအနီၢ်ပၤမုၣ်လၢကယဲၢ်တၢ်တမံၤ လၢ်လၢ်လၢအဃ့ဝဲန့ၣ်လီၤ. တၢ်အံၤမ့ၢ်တၢ်ဟ့ၣ်တဖၣ်လၢအဝဲဟ့ၣ်အါထီၣ်ဝဲဒ်တၢ်လဲလိာ်တၢ်ဟ့ၣ် ကနၢၤလၢတၢ်ဟ့ၣ်တဖၣ်လၢကီၢ်ၡဘၤအနီၢ်ပၤမုၣ်ဟဲစိာ်န့ၢ်အီၤအဂီၢ်န့ၣ်လီၤ. အန့ၣ်ဝံၤဒီး, အဝဲဒီးအခ့အပှၤတဖၣ်က့ၤကဒါက့ၤဝဲဆူကီၢ်ၡဘၤန့ၣ်လီၤ.
(၁စီၤပၤ ၁၀:၁၄-၂၅)
13 ကိးနံၣ်ဒဲး, စီၤပၤၡလိၤမိၤဒိးန့ၢ်ဘၣ်ဝဲထူလီၤတယၢၢ်အါ န့ၢ်အကံကၢ်ဃုကယၤဃုဆံဃု,
14 လၢတၢ်ခိတၢ်သွဲတဖၣ်လၢအဘၣ်တၢ်ဟ့ၣ်အီၤလၢပှၤကူၣ်တၢ်ကၤတၢ်ဖိ တဖၣ်ဒီးပှၤဆါတၢ်ပှ့ၤတၢ်တဖၣ်အမဲာ်ညါန့ၣ်လီၤ. ကီၢ်ဧ့ရ့းအစီၤပၤတဖၣ်, ဒီးပဒိၣ်ဖးဒိၣ်တဖၣ်လၢကီၢ်အံၣ်စရ့ လးအကီၢ်ဆၣ်တဖၣ်, ဟဲစိာ်န့ၢ်စ့ၢ်ကီးအီၤလၢစ့ဒီးထူန့ၣ်လီၤ.
15 စီၤၡလိၤမိၤမၤကတီၤဖးဒိၣ်အဘ့ၣ်ခံကယၤ, လၢတဘ့ၣ်စုာ်စုာ်န့ၣ်ဘၣ်တၢ်ကးဘၢအီၤလၢထူလၢအဘၣ်တၢ်ပိာ်န့ၢ် အီၤလီၤတယၢၢ်ၡက့လးဃုဘယၤ,
16 ဒီးကတီၤဖိအဘ့ၣ်သၢကယၤလၢတဘ့ၣ်စုာ်စုာ်ဘၣ်တၢ်ကျးဘၢအီၤလၢ ထူပိာ်အသးလီၤတယၢၢ်ၡက့လးသၢကယၤန့ၣ်လီၤ. အဝဲမၢတၢ်ပာ် ကယဲၢ်ကတီၤတဖၣ်အံၤခဲလၢာ်လၢဘျီၣ်ဒိၣ်အပူၤ, လၢအအိၣ်လၢလဘၤနိၣ်အသ့ၣ်ပှၢ်အကျါန့ၣ်လီၤ.
17 စီၤပၤမၢပှၤမၤစ့ၢ်ကီးလီၢ်ပစိာ်ဖးဒိၣ်တဖျၢၣ်လၢကဆီမဲကျး ဘၢအီၤလၢထူစီန့ၣ်လီၤ.
18 လီၢ်ပစိာ်န့ၣ်အိၣ်ဝဲဒီးအဃီသွါဃုသွါဒီးအခီၣ်ယီၢ်လီၢ်လၢ အအိၣ်စဲဘူးဒီးအီၤန့ၣ်ဘၣ်တၢ်ကျးဘၢအီၤလၢထူန့ၣ်လီၤ. လီၢ်ပစိာ်အိၣ်ဒီးအစုဖံးခံခီဒီးခ့ယုၢ်တဒုအဂီၤအိၣ်ဆၢ ထၢၣ်ဝဲဖဲအစုဖံးတခီစုာ်စုာ်အဃၢၤန့ၣ်လီၤ.
19 ခ့ယုၢ်အဂီၤတဆံခံဒုအိၣ်ဆၢထၢၣ်ဝဲဖဲဃီသွါတဖၣ်အလိၤ, တသွါစုာ်စုာ်အိၣ်ဒီးခ့ယုၢ်ခံယုၢ်, တဒုလၢအံၤတခီဒီးတဒု လၢအဂၤတခီန့ၣ်လီၤ. လီၢ်ပစိာ်ဒ်သိးအံၤတအိၣ်ထီၣ်တ့ၢ်ဝဲနီတဘျီလၢဘီ မုၢ်အဂၤနီတဘ့ၣ်အပူၤဘၣ်.
20 ကယဲၢ်စီၤပၤၡလိၤမိၤအလီခီအီတၢ်တဖၣ်န့ၣ်ဘၣ်တၢ်မၤအီၤလၢ ထူ, ဒီးကယဲၢ်တၢ်ပီးတၢ်လီလၢအအိၣ်ဝဲဖဲဘျီၣ်ဒိၣ်လၢလဘၤနိၣ်အပှၢ် လၢ်ကျါအပူၤန့ၣ်, ဘၣ်တၢ်မၤအီၤလၢထူစီန့ၣ်လီၤ. လၢစီၤၡလိၤမိၤအမုၢ်နံၤန့ၣ်စ့တဘၣ်တၢ်ပာ်အီၤလၢတၢ်လုၢ်ဒိၣ် ပှ့ၤဒိၣ်ဘၣ်.
21 အဝဲအိၣ်ဒီးတၢ်မၤကူၣ်မၤကၤအကဘီတဖုလၢအလဲၤဆူဝ့ၢ်တၢ်ၡံၣ် ဒီးကဘီဖိတဖၣ်မ့ၢ်စီၤပၤဃံရၣ်အပှၤတဖၣ်န့ၣ်လီၤ. သၢနံၣ်တဘျီန့ၣ်, ကဘီတဖၣ်အံၤဟဲက့ၤစိာ်ဝဲထူ, စ့, ကဆီမဲ, ကယူၤဖၣ်တဖၣ်ဒီးတၤအုးတၤသွီၣ်တဖၣ်န့ၣ်လီၤ.
22 စီၤပၤၡလိၤမိၤမ့ၢ်ပှၤထူးတီၤအါန့ၢ်ဒီးကူၣ်သ့ဒိၣ်န့ၢ်ဒံး စီၤပၤအဂၤတဖၣ်လၢဟီၣ်ခိၣ်ချၢန့ၣ်လီၤ.
23 အဝဲသ့ၣ်ခဲလၢာ်ဃ့တၢ်ဟ့ၣ်ကူၣ်ဟ့ၣ်ဖးလၢစီၤၡလိၤမိၤအအိၣ်ဒ် သိးကနၢ်ဟူဘၣ်တၢ်ကူၣ်သ့လၢကစၢ်ယွၤဟ့ၣ်လီၤတ့ၢ်အီၤန့ၣ်လီၤ.
24 အဝဲသ့ၣ်တဂၤဘၣ်တဂၤစုာ်စုာ်ဟဲစိာ်န့ၢ်စီၤၡလိၤမိၤလၢတၢ်ဟ့ၣ် တဖၣ်လၢအမ့ၢ်ဝဲ, တၢ်ပီးတၢ်လီတဖၣ်လၢတၢ်မၤအီၤလၢစ့ဒီးထူ, ဆ့ကၤဖးထီတဖၣ်, တၢ်စုကဝဲၤတဖၣ်, တၢ်နၢမူတဖၣ်, ကသ့ၣ်တဖၣ်ဒီးကသ့ၣ်ယီၤတဖၣ်န့ၣ်လီၤ. တၢ်တဖၣ်အံၤမၤအသးတနံၣ်ဝံၤတနံၣ်န့ၣ်လီၤ.
25 စီၤပၤၡလိၤမိၤအိၣ်စ့ၢ်ကီးဒီးတၢ်ပာ်လ့ၣ်ကဟၣ်တဖၣ်ဒီးကသ့ၣ် တဖၣ်အလီၢ်အခါလွံၢ်ကထိ , ဒီးအိၣ်ဒီးပှၤဒိးကသ့ၣ်သုးဖိ တကလးခံကထိ ဂၤန့ၣ်လီၤ. အကျါတနီၤန့ၣ်, အဝဲပာ်ဝဲဖဲဝ့ၢ်ယရူၤၡလ့ၣ်အပူၤဒီးအအိၣ်လီၤတဲာ်တဖၣ်န့ၣ်ပာ် ဝဲလၢဝ့ၢ်အဂုၤအဂၤတဖၣ်အပူၤန့ၣ်လီၤ.
26 အဝဲမ့ၢ်စီၤပၤလၢအစိကမီၤအိၣ်ဝဲအဒိၣ်ကတၢၢ်လၢကယဲၢ်စီၤပၤ ခဲလၢာ်အဖီခိၣ်လၢအအိၣ်ဝဲလၢလီၢ်ကဝီၤတဖၣ်စးထီၣ်လၢထံ မိၢ်ပှၢ်ဖရၤသးတုၤဆူကီၢ်ဖလ့ၡသးဒီးလၢကီၢ်အဲၤကူပတူးအကီၢ် ဆၢန့ၣ်လီၤ.
27 ဖဲအဝဲပၢတၢ်အကတီၢ်န့ၣ်, စ့ကဲထီၣ်တၢ်လၢတမ့ၢ်တၢ်လီၤဆီလၢၤဒ် ဒၣ်လၢၢ်အသိးလၢဝ့ၢ်ယရူၤၡလ့ၣ်အပူၤ, ဒီးသ့ၣ်ဆှိအ့ရ့းတဖၣ်အိၣ်ဝဲအါအါကလဲာ်ဒ်ဒၣ်သိးဝံၣ်ဒၢမုၢ် ဆ့ၣ်မုၢ်ဂီၤလၢအအိၣ်လၢကီၢ်ယူဒၤအကစၢၢ်ကလိတဖၣ်အခီၣ်ထံးအသိး န့ၣ်လီၤ.
28 စီၤၡလိၤမိၤဟဲက့ၤစိာ်ကသ့ၣ်တဖၣ်လၢကီၢ်မူးစရံၣ်ဒီးလၢကယဲၢ် ထံကီၢ်အဂၤတပူၤလၢ်လၢ်ဒီးဆါဝဲန့ၣ်လီၤ.
(၁စီၤပၤ ၁၀:၄၁-၄၃)
29 တၢ်စံၣ်စိၤတဲစိၤအိၣ်လီၤတဲာ်ဘၣ်ထွဲဒီးစီၤၡလိၤမိၤစးထီၣ် လၢအခီၣ်ထံးဒီးတုၤလၢအကတၢၢ်န့ၣ်ဘၣ်တၢ်ကွဲးနီၣ်ကွဲးဃါအီၤ တၢ်စံၣ်စိၤတဲစိၤအလံာ်လၢအဘၣ်တၢ်ကွဲးအီၤလၢဝံနၤသၣ်အပူၤ, ဒီးလၢစီၤအဃံယၤလၢဝ့ၢ်ၡံလိၤ, အလံာ်ဝံအတၢ်စံးပာ်အပူၤ, ဒီးလၢဝံယံးဒိၤအတၢ်ထံၣ်လၢညါခီအလံာ်ဘၣ်ထွဲဒီးအံၣ်စရ့ လးအစီၤပၤယၤရၤဘၣ်အတၢ်ပၢအဂ့ၢ်အပူၤန့ၣ်လီၤ.
30 စီၤၡလိၤမိၤပၢတၢ်လၢပှၤအံၣ်စရ့လးဖိခဲလၢာ်အဖီခိၣ်လၢဝ့ၢ် ယရူၤၡလ့ၣ်အပူၤအနံၣ်လွံၢ်ဆံန့ၣ်လီၤ.
31 အဝဲသံဒီးဘၣ်တၢ်ခူၣ်လီၤကွံာ်အီၤလၢစီၤဒၤဝံးအဝ့ၢ်ပူၤ, ဒီးအဖိခွါစီၤရဃၤဘၣ်ကဲထီၣ်စီၤပၤလၢအလီၢ်န့ၣ်လီၤ.