10
(၁စီၤပၤ ၁၂:၁-၂၀)
1 စီၤၡဃၤဘၣ်လဲၤဆူဝ့ၢ်ၡက့ၣ်ဖဲကီၢ်အံၣ်စရ့လးအကလံၤစိးအပှၤ ဂီၢ်မုၢ်ပာ်ဖှိၣ်ထီၣ်အသးလၢကပာ်ထီၣ်အီၤဒ်စီၤပၤန့ၣ်လီၤ.
2 တုၤစီၤနဘးအဖိခွါစီၤယၤရၤဘၣ်လၢအလဲၤဆူကီၢ်အဲၤကူပ တူး, လၢတၢ်ဃ့ၢ်ပူၤဖျဲးကွံာ်အသးလၢစီၤပၤၡလိၤမိၤ, နၢ်ဟူတၢ်ကစီၣ်အံၤဒီး, အဝဲဟဲက့ၤကဒါက့ၤဆူအဟံၣ်န့ၣ်လီၤ.
3 ပှၤဂီၢ်မုၢ်လၢကလံၤစိးအဒူၣ်တဖၣ်မၤလိာ်စီၤယၤရၤဘၣ်ဒီးအဝဲ သ့ၣ်ခဲလၢာ်လဲၤသကိးဆူစီၤရဃၤဘၣ်အအိၣ်ဒီးစံးဘၣ်အီၤ,
4 “နပၢ်ပာ်လီၤတၢ်ဝံတၢ်ယိးလၢအဃၢတဖၣ်လၢပလိၤန့ၣ်လီၤ. နမ့ၢ်မၤဖှံထီၣ်ပတၢ်ဝံတၢ်ယိးတဖၣ်အံၤ, ဒီးမၤညီထီၣ်တၢ်အိၣ် မူလၢပဂီၢ်န့ၣ်, ပကမ့ၢ်ပှၤသးတီတဖၣ်လၢအအိၣ်လၢနဖီလာ်န့ၣ်လီၤ.”
5 စီၤရဃၤဘၣ်စံးဆၢဝဲ, “ဟ့ၣ်ယၤတၢ်ဆၢကတီၢ်သၢသီလၢယကဆိ ကမိၣ်တၢ်ဂ့ၢ်အံၤန့ၣ်တက့ၢ်. အန့ၣ်ဝံၤဒီးဟဲက့ၤကဒါက့ၤတက့ၢ်.” လၢတၢ်န့ၣ်အဃိပှၤဂီၢ်မုၢ်ဟးထီၣ်ဝဲဒၣ်န့ၣ်လီၤ.
6 စီၤပၤရဃၤဘၣ်ဃ့တၢ်ဟ့ၣ်ကူၣ်ဟ့ၣ်ဖးလၢပှၤသးပှၢ်တဖၣ်လၢအမၤ တ့ၢ်တၢ်ဒ်အပၢ်စီၤၡလိၤမိၤအပှၤဟ့ၣ်ကူၣ်တၢ်တဖၣ်အအိၣ်န့ၣ်လီၤ. အဝဲသံကွၢ်ဝဲ, “မ့ၢ်သုကဟ့ၣ်ကူၣ်ယၤလၢယကဟ့ၣ်ပှၤဂီၢ်မုၢ်တဖၣ် အံၤလၢတၢ်စံးဆၢဒ်လဲၣ်.”
7 အဝဲသ့ၣ်စံးဆၢဝဲ, “နမ့ၢ်သူၣ်ကညီသးကညီၤပှၤဂီၢ်မုၢ်တဖၣ် အံၤဒီးကျဲးစၢးမၤဘၣ်အဝဲသ့ၣ်အသးခီဖျိတၢ်ဟ့ၣ်အီၤတၢ်စံး ဆၢလၢအအိၣ်ဒီးတၢ်ဆိကမိၣ်န့ၢ်တၢ်လၢအဝဲသ့ၣ်အဂီၢ်န့ၣ်ဒီး, အဝဲသ့ၣ်ကမၤနတၢ်မၤလၢတၢ်သးတီအပူၤထီဘိန့ၣ်လီၤ.”
8 ဘၣ်ဆၣ်အဝဲကွၢ်ကပာ်ကွံာ်ပှၤသးပှၢ်တဖၣ်အတၢ်ဟ့ၣ်ကူၣ်အီၤ, အခိၣ်တလိၣ်န့ၣ်, အဝဲလဲၤဆူပှၤသးစၢ်တဖၣ်လၢအဒိၣ်ထီၣ်တကျဲကျဲ ဒီးအီၤလၢခဲအံၤမ့ၢ်အဝဲအပှၤဟ့ၣ်ကူၣ်ဟ့ၣ်ဖးတၢ်တဖၣ်အအိၣ်န့ၣ်လီၤ.
9 အဝဲသံကွၢ်ဝဲ, “ယကဘၣ်မၤတၢ်မနုၤလဲၣ်န့ၣ်, သုကဟ့ၣ်ကူၣ်ယၤဒ်လဲၣ်. ပှၤဂီၢ်မုၢ်လၢအသံကွၢ်ယၤလၢယက ဘၣ်မၤဖှံထီၣ်န့ၢ်အတၢ်ဝံတၢ်ယိးတဖၣ်န့ၣ်, ယကဘၣ်စံးဆၢအီၤတၢ်မနုၤလဲၣ်.”
10 အဝဲသ့ၣ်စံးဆၢဝဲ, “တၢ်အံၤမ့ၢ်တၢ်လၢနကြၢးတဲဘၣ်အဝဲ သ့ၣ်န့ၣ်လီၤ. ယစုမုၢ်ဆၣ်အံၤတီၣ်န့ၢ်ဒံးယပၢ်အယီၢ်ဒ့တက့ၢ် လီၤ.
11 တဲဘၣ်အဝဲသ့ၣ်တက့ၢ်. ယပၢ်ပာ်လီၤတၢ်ဝံတၢ်ယိးအဃၢတဖၣ်လၢသု ဖီခိၣ်လီၤ. ယကမၤဃၢဒိၣ်ထီၣ်ဒၣ်လဲာ်အီၤန့ၣ်လီၤ. အဝဲဖျ့သုလၢနီၣ်ဖျ့တဖၣ်, ယဲ, ယကတီၢ်သုလၢနီၣ်တီၢ်တဖၣ်လၢ ပှၤတီၢ်ဂီၤဖံးတဖၣ်န့ၣ်လီၤ.”
12 သၢသီဝံၤအလီၢ်ခံန့ၣ်, စီၤယၤရၤဘၣ်ဒီးကယဲၢ်ပှၤဂီၢ်မုၢ်ခဲ လၢာ်က့ၤကဒါက့ၤဆူစီၤပၤရဃၤဘၣ်အအိၣ်, ဒ်အဝဲမၤလိာ်တ့ၢ်အဝဲသ့ၣ်အသိးန့ၣ်လီၤ.
13 စီၤပၤကွၢ်ကပာ်ကွံာ်ပှၤသးပှၢ်တဖၣ်အတၢ်ဟ့ၣ်ကူၣ်ဒီးကတိၤတၢ်ဆူၣ် မီၤဃီၤဆူပှၤဂီၢ်မုၢ်, ဒ်ပှၤသးစၢ်တဖၣ်ဟ့ၣ်ကူၣ်တ့ၢ်ဝဲအသိးန့ၣ်လီၤ.
14 အဝဲစံးဝဲ, “ယပၢ်ပာ်လီၤတၢ်ဝံတၢ်ယိးအဃၢတဖၣ်လၢသုဖီခိၣ် လီၤ. ယကမၤဃၢဒိၣ်ထီၣ်ဒၣ်လဲာ်အီၤန့ၣ်လီၤ. အဝဲဖျ့သုလၢနီၣ်ဖျ့တဖၣ်, ယဲယကတီၢ်သုလၢနီၣ်တီၢ်တဖၣ်လၢပှၤတီၢ်ဂီၤဖံးန့ၣ်လီၤ.”
15 တၢ်အံၤ, မ့ၢ်ယွၤ, ကစၢ်ယွၤအတၢ်ဘၣ်သးလၢကမၤလၢပှဲၤထီၣ်တၢ်လၢ အဝဲစံးဘၣ်တ့ၢ်စီၤနဘးအဖိခွါစီၤယၤရၤဘၣ်ခီဖျိ, ဝံအဃံယၤလၢဝ့ၢ်ၡံလိၤန့ၣ်လီၤ. လၢတၢ်အံၤအဃိစီၤပၤတကနၣ်ဃုာ်ဘၣ်ပှၤဂီၢ်မုၢ်နီတစဲးဘၣ်.
16 တုၤပှၤဂီၢ်မုၢ်ထံၣ်တ့ၢ်လၢစီၤပၤတဒိကနၣ်အဝဲသ့ၣ်ဘၣ်ဒီး, အဝဲသ့ၣ်ကိးထီၣ်ဝဲ, “ထုးလီၤကွံာ်, စီၤဒၤဝံးဒီးအဟံၣ်ဖိ ဃီဖိလၢစီၤပၤအလီၢ်န့ၣ်တက့ၢ်. အဝဲသ့ၣ်မၤတ့ၢ်တၢ်လၢပဂီၢ်မနုၤ လဲၣ်. အံၣ်စရ့လးအပှၤသ့ၣ်ဧၢ, မ်ပက့ၤဆူဟံၣ်န့ၣ်တက့ၢ်. မ်စီၤရဃၤဘၣ်ကွၢ်လီၤက့ၤဒၣ်အသးဒၣ်ဝဲန့ၣ်တက့ၢ်.”
17 လၢတၢ်န့ၣ်အဃိ, အံၣ်စရ့လးအပှၤဂီၢ်မုၢ်ပူထီၣ်တၢ်, ဒီးပာ်တီၢ်စီၤရဃၤဘၣ်ဒ်စီၤပၤထဲဒၣ်လၢပှၤဂီၢ်မုၢ်လၢအအိၣ် ဆိးတ့ၢ်လၢယူဒၤအလီၢ်ကဝီၤတဖၣ်အဂီၢ်ဧိၤန့ၣ်လီၤ.
18 တုၤနုၤတစု, စီၤပၤရဃၤဘၣ်ဆှၢလီၤစီၤအဒိၤနံရၣ်, လၢအမ့ၢ်ပှၤအဒိၣ်တဂၤလၢအကွၢ်ထွဲပှၤလၢတၢ်မၢဆူၣ်အီၤလၢကုၢ် အတၢ်မၤအပူၤ, ဒ်သိးကလဲၤဆူပှၤအံၣ်စရ့လးဖိတဖၣ်အအိၣ်န့ၣ်လီၤ. ဘၣ်ဆၣ်အဝဲသ့ၣ်ကွံာ်သံကွံာ်အီၤလၢလၢၢ်န့ၣ်လီၤ. လၢတၢ်မၤအသးအံၤအဃိ, စီၤရဃၤဘၣ်ဒိးထီၣ်အလ့ၣ်ကဟၣ်ချ့ချ့ ဒီးဃ့ၢ်ပူၤဖျဲးကွံာ်အသးဆူဝ့ၢ်ယရူၤၡလ့ၣ်န့ၣ်လီၤ.
19 စးထီၣ်လၢန့ၣ်လံၤလံၤအံၣ်စရ့လးအကလံၤစိးအပှၤဂီၢ်မုၢ်တဖၣ် အိၣ်ဝဲလၢတၢ်ပူထီၣ်ထီဒါစီၤဒၤဝံးအစၢၤအသွဲၣ်အတၢ်ပၢတၢ် ပြးအပူၤန့ၣ်လီၤ.