8
(၁စီၤပၤ ၉:၁၀-၂၈)
1 လၢတၢ်ဘှီထီၣ်ယွၤအတၢ်လုၢ်ဟံၣ်ဒီးစီၤပၤအနီအဂီၢ်န့ၣ်, တၢ်ဆၢကတီၢ်ယံာ်ဝဲလၢစီၤၡလိၤမိၤအဂီၢ်အနံၣ်ခံဆံလီၤ.
2 အဝဲသူၣ်ထီၣ်ကဒါက့ၤစ့ၢ်ကီးဝဲဝ့ၢ်တဖၣ်လၢစီၤပၤဃံရၣ်ဟ့ၣ် လီၤတ့ၢ်အီၤ, ဒီးမၢလီၤပှၤအံၣ်စရ့လးဖိတဖၣ်လၢကအိၣ်ဝဲ ဆိးဝဲလၢဝ့ၢ်တဖၣ်န့ၣ်အပူၤန့ၣ်လီၤ.
3 အဝဲလဲၤထီၣ်ဒုးဒီးမၤန့ၢ်စ့ၢ်ကီးဝ့ၢ်ဃမါသးဒီးဝ့ၢ်စိဘၤ ဃုာ်ဒီးအခိၣ်အဃၢၤတဖၣ်,
4 ဒီးမၤကျၢၤထီၣ်က့ၤဝ့ၢ်ဖၢၣ်လမါရၤလၢမဲးမုၢ်ခိၣ်အပူၤန့ၣ် လီၤ. အဝဲသူၣ်ထီၣ်ကဒါက့ၤကယဲၢ်ဝ့ၢ်ခဲလၢာ်လၢအအိၣ်လၢဃမါသးအခိၣ် အဃၢၤလၢအမ့ၢ်တ့ၢ်တၢ်ပာ်ဖှိၣ်အဒၢးတဖၣ်အလီၢ်ခၢၣ်သးတဖၣ်န့ၣ်လီၤ.
5 စီၤၡလိၤမိၤသူၣ်ထီၣ်ကဒါက့ၤစ့ၢ်ကီးဝ့ၢ်လၢလာ်တဖၣ်အံၤလီၤ. ဝ့ၢ်ဘ့ၤသဃိရိၣ်လၢထးခီဒီးဝ့ၢ်ဘ့ၤသဃိရိၣ်လၢလာ်ခီ (ဝ့ၢ်တဖၣ်လၢအအိၣ်ဒီးအခိၣ်ဒူဒီးတြဲၤဖးဒိၣ်တဖၣ်လၢပှၤကး တံာ်အီၤဒီးထးဘိဖးဒိၣ်တဖၣ်သ့ဝဲ),
6 ဝ့ၢ်ဘဧၤလး, ကယဲၢ်ဝ့ၢ်ခဲလၢာ်လၢ, အဝဲပဒၢးဃာ်တၢ်လၢပှၤသူအီၤ အလီၢ်အိၣ်တဖၣ်, ဝ့ၢ်တဖၣ်လၢအဝဲအကသ့ၣ်တဖၣ်ဒီးအလ့ၣ်ကဟၣ်တဖၣ်ဘၣ်တၢ်ပာ်လီၤအီၤ န့ၣ်လီၤ. အဝဲမၤဝံၤကယဲၢ်တၢ်ကူၣ်ကျဲၤခဲလၢာ်လၢတၢ်သူၣ်ထီၣ်လၢဝ့ၢ်ယရူၤ ၡလ့ၣ်အပူၤအဂီၢ်, လၢကီၢ်လဘၤနိၣ်အပူၤအဂီၢ်ဒီးလၢကယဲၢ်တၢ်လီၢ်ကဝီၤလၢအဝဲပၢ ဘၣ်ဝဲခဲလၢာ်အပူၤအဂီၢ်န့ၣ်လီၤ.
7 ကယဲၢ်ကီၢ်ကနၤဧၣ်အပှၤဂီၢ်မုၢ်အစၢၤအသွဲၣ်တဖၣ်, လၢပှၤအံၣ်စရ့လးဖိတဖၣ်မၤသံကွံာ်ဘၣ်အီၤဖဲအဟံးန့ၢ်ကွံာ် တ့ၢ်ထံကီၢ်အခါ, ဃုာ်ဒီးပှၤဃ့ၤသးဖိ, ပှၤအမိၢ်ဖိ, ပှၤပရးစးဖိ, ပှၤဃံၤဝံဖိဒီးပှၤယဘူၣ်ဖိ, ပှၤလၢအတမ့ၢ်ဘၣ်ပှၤအံၣ်စရ့လးဖိတဖၣ်ဘၣ်,
8 လၢအမ့ၢ်ပှၤအိၣ်လီၤတဲာ်တ့ၢ်တဖၣ်န့ၣ်, စီၤၡလိၤမိၤမၢဆူၣ်အီၤ လၢကုၢ်အတၢ်မၤအပူၤတုၤလၢမုၢ်မဆါတနံၤအံၤန့ၣ်လီၤ.
9 ပှၤအံၣ်စရ့လးဖိတဖၣ်တဘၣ်တၢ်သူအီၤလၢတၢ်မၤအဆူၣ်အကိၢ်တဖၣ် အပူၤဘၣ်. မ့မ့ၢ်အဝဲသ့ၣ်မၤတၢ်ဒ်ပှၤသုးဖိတဖၣ်, သုးခိၣ်သုးနၢ်တဖၣ်, လ့ၣ်ကဟၣ်သုးအခိၣ်တဖၣ်ဒီးပှၤဒိးကသ့ၣ်သုးဖိတဖၣ်န့ၣ်လီၤ.
10 ပဒိၣ်ပပှၢ်တဖၣ်လၢအကွၢ်ထွဲတၢ်မၤအဆူၣ်အကိၢ်ဘၣ်ထွဲဒီးတၢ်သူၣ် ထီၣ်ဘှီထီၣ်အကလုာ်ကလုာ်အတၢ်တိာ်ကျဲၤအတၢ်မၤ, အိၣ်ဝဲခံကယၤယဲၢ်ဆံဂၤန့ၣ်လီၤ.
11 စီၤၡလိၤမိၤဒုးဟးထီၣ်ကွံာ်အမါလၢအမ့ၢ်ကီၢ်အဲၤကူပတူး အစီၤပၤအဖိမုၣ်လၢစီၤဒၤဝံးအဝ့ၢ်ဆူဟံၣ်တဖျၢၣ်လၢအဝဲသူၣ် ထီၣ်ဝဲလၢအမါအံၤအဂီၢ်န့ၣ်လီၤ. အဝဲစံးဝဲ, “ပိာ်မုၣ်အံၤတဘၣ်အိၣ်လၢအံၣ်စရ့လးအစီၤပၤဒၤ ဝံးအနီပူၤဘၣ်. အဂ့ၢ်ဒ်အံၤ, တၢ်လီၢ်တပူၤလၢ်လၢ်ဖဲ တၢ်အၢၣ်လီၤအီလီၤအတလါစီဆှံအိၣ်ဝဲန့ၣ်မ့ၢ်တၢ်လီၢ်စီဆှံ န့ၣ်လီၤ.”
12 စီၤၡလိၤမိၤလုၢ်ထီၣ်ပာ်ထီၣ်ဝဲတၢ်လုၢ်တၢ်ပာ်တဖၣ်ဆူယွၤအအိၣ် လၢတၢ်လုၢ်လီၢ်လၢအသူၣ်ထီၣ်ဝဲအဖီခိၣ်, ဖဲတၢ်လုၢ်ဟံၣ်အမဲာ်ညါန့ၣ်လီၤ.
13 အဝဲဆူးကဲၤထီၣ်ဝဲတၢ်လုၢ်မ့ၣ်အူတဖၣ်ဒ်စီၤမိၤၡ့အတၢ်သိၣ်တၢ် သီပာ်ဖျါဝဲ, လၢမုၢ်နံၤစီဆှံတနံၤဘၣ်တနံၤအဂီၢ်အသိး, လၢမုၢ်အိၣ်ဘှံးနံၤတဖၣ်, လါထီၣ်သီအမူးအပွဲတဖၣ်, ဒီးလၢတနံၣ်တဘျီအဘူၣ်သၢဘူၣ်လၢအမ့ၢ်ဝဲ, ဘူၣ်ကိၣ်တအိၣ်ဘၣ်ဒီးကိၣ်မံၣ်, ဘူၣ်နွံဒီးဘူၣ်ဒဲတဖၣ်န့ၣ်လီၤ.
14 ပိာ်ထွဲထီၣ်တၢ်သိၣ်တၢ်ဘျၢတဖၣ်လၢအဘၣ်တၢ်ပာ်လီၤတ့ၢ်အီၤလၢ အပၢ်စီၤဒၤဝံးအခံန့ၣ်, အဝဲကရၢကရိထီၣ်တနံၤဘၣ်တနံၤအတၢ်မၤလၢပှၤလုၢ်တၢ်အခိၣ်တဖၣ်အ ဂီၢ်, ဒီးလၢပှၤလ့ၤဝံဖိတဖၣ်လၢအမၤစၢၤပှၤလုၢ်တၢ်အခိၣ်တဖၣ်လၢတၢ် သးဝံၣ်ထါသးဝံၣ်တဖၣ်ဒီးလၢတၢ်မၤအဝဲသ့ၣ်အတၢ်မၤအပူၤအဂီၢ် န့ၣ်လီၤ. အဝဲကရၢကရိထီၣ်စ့ၢ်ကီးပှၤပၢၤတၢ်လုၢ်ဟံၣ်တဖၣ်တဖုဘၣ်တဖု လၢအကမၤအဝဲသ့ၣ်အမူအဒါတနံၤဘၣ်တနံၤဖဲတြဲၤဖးဒိၣ်တဘ့ၣ်စုာ် စုာ်, လီၤပလိာ်ဝဲဒီးကစၢ်ယွၤအပှၤကညီစီၤဒၤဝံးအတၢ်မၤလိာ်တဖၣ် န့ၣ်လီၤ.
15 တၢ်မၤလိာ်ပိာ်လီၤတဖၣ်လၢစီၤဒၤဝံးဟ့ၣ်တ့ၢ်ဝဲပှၤလုၢ်တၢ် အခိၣ်တဖၣ်ဒီးပှၤလ့ၤဝံဖိတဖၣ်ဘၣ်ဃးဒီးတၢ်ပာ်ဖှိၣ်အဟံၣ်တဖၣ် ဒီးတၢ်ဂ့ၢ်အဂၤတဖၣ်န့ၣ်, ဘၣ်တၢ်မၤထွဲအီၤလၢာ်အခၢးန့ၣ်လီၤ.
16 တုၤတၢ်ဆၢကတီၢ်အဝဲအံၤန့ၣ်, စီၤၡလိၤမိၤအတၢ်တိာ်ကျဲၤအတၢ်မၤ ခဲလၢာ်ဘၣ်တၢ်မၤဝံၤအီၤလၢလၢပှဲၤပှဲၤန့ၣ်လီၤ. စးထီၣ်လၢတၢ်ပာ်လီၤယွၤအတၢ်လုၢ်ဟံၣ်အလၢၢ်ခၢၣ်သနၢၣ်ဒီးတုၤလၢ အဝံၤဝဲတစုန့ၣ်, ကယဲၢ်တၢ်မၤခဲလၢာ်အံၤကဲထီၣ်လိၣ်ထီၣ်ဝဲလၢလၢပှဲၤပှဲၤန့ၣ် လီၤ.
17 အန့ၣ်ဝံၤဒီး, စီၤၡလိၤမိၤလဲၤဝဲဆူကဘီသန့အဝ့ၢ်ခံဝ့ၢ်လၢ အမ့ၢ်ဝဲ ဝ့ၢ်ဧ့းစယိၣ်က့ဘ့ၢ်ဒီးဝ့ၢ်အ့လး, လၢအအိၣ်ဝဲဖဲပီၣ်လဲၣ်က့ၣ် ကျီၤအကၣ်ဘၣ်အကၢၢ်ခိၣ်, လၢကီၢ်အဒိၣ်အပူၤန့ၣ်လီၤ.
18 စီၤပၤဃံရၣ်ဆှၢလီၤန့ၢ်အီၤကဘီတဖၣ်လၢအဘၣ်တၢ်ပၢဆှၢအီၤလၢ အကစၢ်ဒၣ်ဝဲအပဒိၣ်ပပှၢ်တဖၣ်ဒီးပှၤမၤတၢ်ဖိတဖၣ်လၢအမ့ၢ်ကဘီဖိ တဖၣ်လၢအအိၣ်ဒီးတၢ်လဲၤခီဖျိအါမးန့ၣ်လီၤ. အဝဲသ့ၣ်ဒိးထီၣ်သကိးကဘီဃုာ်ဒီးစီၤၡလိၤမိၤအပဒိၣ်ပပှၢ်တဖၣ် ဆူကီၢ်အိဖ့ၢ်ဒီးဟဲက့ၤစိာ်န့ၢ်စီၤၡလိၤမိၤလၢထူလီၤတယၢၢ် အကံကၢ်လွံၢ်ကယၤယဲၢ်ဆံန့ၣ်လီၤ.