7
(၁စီၤပၤ ၈:၆၂-၆၆)
1 ဖဲစီၤပၤၡလိၤမိၤမၤကတၢၢ်အတၢ်ဘါထုကဖၣ်ဝံၤန့ၣ်, မ့ၣ်အူဟဲလီၤလၢမူခိၣ်, ဒီးအီၣ်ကွံာ်တၢ်လုၢ်တၢ်ပာ်တဖၣ်လၢ အဘၣ်တၢ်လုၢ်ထီၣ်တ့ၢ်အီၤ, ဒီးယွၤအတၢ်အိၣ်ဝဲအတၢ်ကပီၤကပြုၢ်ကပြီၤမၤပှဲၤယွၤအတၢ်လုၢ် ဟံၣ်န့ၣ်လီၤ.
2 မ့ၢ်လၢယွၤအတၢ်လုၢ်ဟံၣ်ပှဲၤဝဲဒီးတၢ်ကပီၤကပြုၢ်ကပြီၤအ ဃိ, ပှၤလုၢ်တၢ်အခိၣ်တဖၣ်လဲၤနုာ်ဝဲတသ့ဘၣ်န့ၣ်လီၤ.
3 တုၤအံၣ်စရ့လးအပှၤဂီၢ်မုၢ်ထံၣ်တ့ၢ်မ့ၣ်အူဟဲလီၤလၢမူခိၣ် ဒီးတၢ်ကပီၤမၤပှဲၤယွၤအတၢ်လုၢ်ဟံၣ်န့ၣ်ဒီး, အဝဲသ့ၣ်ထိၣ်တွံၤလီၤအသးလၢအမဲာ်ညါ, ဒါလီၤအမဲာ်သၣ်တဖၣ်လၢ တၢ်ဒါလၢၢ်အဖီခိၣ်, ဘူၣ်ထီၣ်ဘါထီၣ်ကစၢ်ယွၤ, ဒီးစံးထီၣ်ပတြၢၤအီၤလၢအဝဲအတၢ် ဂ့ၤတၢ်ဝါဒီးအတၢ်အဲၣ်လီၤထူလီၤယိာ်အဃိန့ၣ်လီၤ.
4 တုၤနုၤတစုစီၤၡလိၤမိၤဒီးကယဲၢ်ပှၤဂီၢ်မုၢ်ခဲလၢာ်လုၢ်ထီၣ် တၢ်လုၢ်တၢ်ပာ်တဖၣ်ဆူယွၤအအိၣ်န့ၣ်လီၤ.
5 အဝဲလုၢ်ထီၣ်ဝဲ, ဂီၤဖံးအဒုခံကလးခံကထိ, ဒီးသိအဒုတကလီၤခံကလးလၢတၢ်လုၢ်မၤဃူမၤဖိးတဖၣ်အဂီၢ်န့ၣ် လီၤ. ဒီးလၢတၢ်န့ၣ်အဃိအဝဲဒီးပှၤဂီၢ်မုၢ်ခဲလၢာ်ပာ်စီဆှံယွၤ အတၢ်လုၢ်ဟံၣ်န့ၣ်လီၤ.
6 ပှၤလုၢ်တၢ်အခိၣ်တဖၣ်ဆၢထၢၣ်ဝဲဖဲတၢ်လီၢ်တဖၣ်လၢအဘၣ်တၢ်ပာ်လီၤ အီၤဒီးလၢအဝဲသ့ၣ်အမဲာ်ညါလိၤလိၤန့ၣ်, ပှၤလ့ၤဝံဖိတဖၣ်ဆၢထၢၣ်ဝဲစံးထီၣ်ပတြၢၤယွၤလၢတၢ်ဒ့တၢ်အူ အပီးအလီတဖၣ်လၢစီၤပၤဒၤဝံးမၤပာ်စၢၤတ့ၢ်ဝဲ, ဒီးသးဝံၣ်ထါသးဝံၣ်, “အဝဲအတၢ်အဲၣ်မ့ၢ်တၢ်အထူအယိာ်” ဒ်အဝဲသ့ၣ်ဘၣ်တၢ်မၢတ့ၢ်ဒီးဟ့ၣ်စိဟ့ၣ်ကမီၤအီၤလၢစီၤဒၤဝံး အသိးန့ၣ်လီၤ. ဖဲပှၤဂီၢ်မုၢ်ခဲလၢာ်ဆၢထၢၣ်ဝဲန့ၣ်, ပှၤလုၢ်တၢ်အခိၣ်တဖၣ်အူထီၣ်ကွဲၤတဖၣ်န့ၣ်လီၤ.
7 စီၤၡလိၤမိၤပာ်စီဆှံထီၣ်ဝဲဂၢၤအတၢ်လီၢ်လၢတၢ်ခၢၣ်သးက တၢၢ်, တၢ်လီၢ်ကဝီၤလၢအအိၣ်ဝဲဖဲယွၤအတၢ်လုၢ်ဟံၣ်အမဲာ်ညါ, အဝဲလုၢ်ထီၣ်တၢ်လုၢ်တၢ်ပာ်တဖၣ်လၢအမ့ၢ်, တၢ်လုၢ်ဆူးကဲၤဒီတဒုညါ, တၢ်လုၢ်ဘုဧိၤဟုဧိၤတဖၣ်ဒီးတၢ်အသိတဖၣ်လၢတၢ်လုၢ်မၤဃူမၤဖိး အပူၤန့ၣ်လီၤ. အဝဲမၤတ့ၢ်တၢ်အံၤမ့ၢ်လၢတၢ်လုၢ်လီၢ်တိၢ်ဘီလၢ အဝဲဘှီထီၣ်တ့ၢ်ဝဲန့ၣ်, ဆံးကဲာ်ဆိးလၢတၢ်လုၢ်တၢ်ပာ်ခဲလၢာ်အံၤအဂီၢ် အဃိန့ၣ်လီၤ.
8 စီၤၡလိၤမိၤဒီးကယဲၢ်အံၣ်စရ့လးအပှၤဂီၢ်မုၢ်မၤမူးမၤပွဲ လၢဘူၣ်ဒဲအဂီၢ်နွံသီန့ၣ်လီၤ. ဖဲန့ၣ်ပှၤကမျၢၢ်ဂီၢ်မုၢ်ဖးဒိၣ်တဖၣ်အိၣ်ဝဲ, လၢအဟဲဝဲလၢကလံၤစိးတခီယံၤဝဲပၢၢ်လၢဝ့ၢ်ဃမါသးအတၢ်လဲၤ နုာ်အကျဲဒီးလၢကလံၤထံးတခီန့ၣ်ယံၤဝဲပၢၢ်လၢကီၢ်အဲၤကူပတူး အကီၢ်အဆၢန့ၣ်လီၤ.
9 လၢတၢ်ပာ်စီဆှံတၢ်လုၢ်လီၢ်အဂီၢ်, အဝဲသ့ၣ်မၤလၢာ်တၢ်ဆၢကတီၢ် နွံသီ, ဒီးလၢမူးပွဲအဂီၢ်မၤလၢာ်အါထီၣ်ကဒီးဝဲနွံသီန့ၣ်လီၤ. လၢခံကတၢၢ်တနံၤန့ၣ်အဝဲသ့ၣ်အိၣ်ဒီးတၢ်မၤကတၢၢ်က့ၤအမူး,
10 ဒီးပိာ်ထွဲထီၣ်အခံတနံၤလၢအမ့ၢ်, လါနွံလါတလါထီၣ်ခံဆံ သၢသီတသီန့ၣ်, စီၤၡလိၤမိၤပျၢ်က့ၤပှၤဂီၢ်မုၢ်ဆူအဟံၣ်ဒၣ်ဝဲန့ၣ်လီၤ. အဝဲသ့ၣ်သူၣ်ဖှံသးညီဝဲလၢတၢ်ဆိၣ်ဂ့ၤတဖၣ်လၢယွၤဟ့ၣ်လီၤ တ့ၢ်အီၤဆူအပှၤဂီၢ်မုၢ်အံၣ်စရ့လး, ဆူစီၤဒၤဝံး, ဒီးဆူစီၤၡလိၤမိၤအဃိန့ၣ်လီၤ.
(၁စီၤပၤ ၉:၁-၉)
11 တုၤစီၤပၤၡလိၤမိၤမၤယွၤအတၢ်လုၢ်ဟံၣ်ဒီးစီၤပၤအနီဒီးမၤ လၢပှဲၤက့ၤအတၢ်တိာ်ကျဲၤတဖၣ်လၢတၢ်န့ၣ်တဖၣ်အဂီၢ်ခဲလၢာ်ဝံၤ အလီၢ်ခံန့ၣ်,
12 ယွၤလီၣ်ဖျါထီၣ်အသးလၢအီၤလၢမုၢ်နၤန့ၣ်လီၤ. ယွၤစံးဘၣ်အီၤ, “ယနၢ်ဟူတ့ၢ်လံနတၢ်ထုကဖၣ်ဒီးယတူၢ်လိာ်ယွၤ အတၢ်လုၢ်ဟံၣ်အံၤဒ်တၢ်လီၢ်လၢတၢ်လုၢ်တၢ်ပာ်တဖၣ်ကဘၣ်တၢ်လုၢ်ထီၣ် အီၤဆူယအိၣ်အဂီၢ်န့ၣ်လီၤ.
13 တဘျီလၢ်လၢ်ဖဲယတြီဃာ်တၢ်စူၤမ့ၢ်ဂ့ၤ, ဆှၢလီၤဒွဲၣ်ဧိၤတြၤ ဧိၤတဖၣ်လၢအကအီၣ်ကွံာ်တၢ်မုၢ်တၢ်ဘိမ့ၢ်ဂ့ၤ, တၢ်သံသတြိာ်လၢအကလီၤဘၣ်လၢယပှၤဂီၢ်မုၢ်အဖီခိၣ်မ့ၢ်ဂ့ၤဒၣ်လဲာ်,
14 အဝဲသ့ၣ်မ့ၢ်ဘါထုကဖၣ်တၢ်ဆူယအိၣ်ဒီးပီၢ်ယၢ်လီၤက့ၤအသးဒီး ဃၣ်က့ၤအသးလၢတၢ်မၤအအၢတဖၣ်လၢအမၤတ့ၢ်ဝဲန့ၣ်ဒီး, အန့ၣ်တစု, ယကဒိကနၣ်အီၤလၢမူခိၣ်ဒီးပျၢ်ကွံာ်အဝဲသ့ၣ်အတၢ် ဒဲးဘးတဖၣ်, ဒီးဒုးဘီၣ်ထီၣ်ညီထီၣ်အထံဧိၤကီၢ်ဧိၤတဘျီ ကဒီးန့ၣ်လီၤ.
15 ယကအံးလီၤကွၢ်လီၤယွၤအတၢ်လုၢ်ဟံၣ်အံၤဒီးယကအိၣ်ကတဲာ်ကတီၤ ယသးလၢယကဒိကနၣ်တၢ်ထုကဖၣ်တဖၣ်လၢအဘၣ်တၢ်ဃ့အီၤဖဲအံၤလီၤ.
16 အဂ့ၢ်ဒ်အံၤ, ယဃုထၢတ့ၢ်တၢ်လီၢ်အံၤဒီးပာ်စီဆှံတ့ၢ်အီၤဒ် အမ့ၢ်တၢ်လီၢ်လၢယကဘၣ်တၢ်ဘူၣ်ထီၣ်ဘါထီၣ်ယၤတဘိ ယူၢ်ဃီန့ၣ်လီၤ. ယကအံးလီၤကွၢ်လီၤတၢ်လီၢ်အံၤဒီးဒီဒၣ်အိၣ် ပှိၤအီၤကိးဆၢကိးကတီၢ်ဒဲးန့ၣ်လီၤ.
17 နမ့ၢ်မၤယတၢ်လၢတၢ်ကလုၢ်တီအပူၤဒ်နပၢ်စီၤဒၤဝံးမၤတ့ၢ်ဝဲ အသိး, စူၢ်, တၢ်စူၢ်တၢ်နာ်အတၢ်သိၣ်တၢ်သီတဖၣ်လၢယ ဟ့ၣ်လီၤ, ဒီးမၤကယဲၢ်တၢ်လၢယမၤလိာ်တ့ၢ်နၤခဲလၢာ်န့ၣ်ဒီး,
18 ယကဟံးဃာ်ဂၢၢ်ကျၢၤယတၢ်အၢၣ်လီၤလၢယမၤတ့ၢ်ဒီးနပၢ်စီၤဒၤဝံး, ဖဲယတဲတ့ၢ်အီၤလၢ, ကီၢ်အံၣ်စရ့လးကဘၣ်တၢ်ပၢအီၤတဘိယူာ်ဃီ လၢအဝဲအစၢၤအသွဲၣ်တဖၣ်န့ၣ်လီၤ.
19 ဘၣ်ဆၣ်ဒီး, နၤဒီးနပှၤဂီၢ်မုၢ်မ့ၢ်တစူၢ်ဘၣ်ဖုး, တၢ်ဘူၣ်တၢ်ဘါအတၢ်သိၣ်တၢ်သီတဖၣ်ဒီးတၢ်မၤလိာ်တဖၣ်လၢယဟ့ၣ်လီၤ တ့ၢ်နၤ, ဒီးဘူၣ်ထီၣ်ဘါထီၣ်ကစၢ်အဂုၤအဂၤန့ၣ်,
20 အန့ၣ်တစုယကဟီထီၣ်ကွံာ်သုလၢထံဧိၤကီၢ်ဧိၤလၢယဟ့ၣ်လီၤတ့ၢ် သုအပူၤဒီးယကပာ်လီၤတဲာ်ကွံာ်ယွၤအတၢ်လုၢ်ဟံၣ်အံၤ, လၢယပာ်စီဆှံတ့ၢ်လံအီၤဒ်တၢ်လီၢ်တတီၤလၢယကဘၣ်တၢ်ဘူၣ်ထီၣ်ဘါ ထီၣ်ယၤအဂီၢ်န့ၣ်လီၤ. ပှၤဂီၢ်မုၢ်လၢတၢ်လီၢ်ကိးပူၤဒဲးကဒုးကဲထီၣ်အီၤလၢတၢ်လီၤ နံၤဘၣ်ဖၣ်လဲအလီၢ်ဒီးပာ်အီၤဒ်တၢ်လီၤသးဘၣ်အၢအလီၢ်န့ၣ်လီၤ.
21 ခဲကနံၣ်အံၤယွၤအတၢ်လုၢ်ဟံၣ်အံၤဘၣ်တၢ်ပာ်ကပီၤအီၤဒိၣ်မးဘၣ်ဆၣ်, အန့ၣ်တစု, ပှၤတဂၤလၢ်လၢ်လၢအလဲၤခီတြူာ်ဘၣ်အီၤန့ၣ်, ကကမၢကမၣ်ဒီးကသံကွၢ်ဝဲ, ဘၣ်မနုၤအဃိ ယွၤမၤထံကီၢ်အံၤဒီးယွၤအတၢ်လုၢ်ဟံၣ်အံၤဒ်န့ၣ်လဲၣ်.
22 ပှၤဂီၢ်မုၢ်ကစံးဆၢဝဲ, တၢ်န့ၣ်မ့ၢ်လၢ, အဝဲသ့ၣ်လဲၤသဒၣ်ကွံာ် ယွၤ, အကစၢ်ယွၤ, လၢအထုးထီၣ်ကွံာ်အမိၢ်ပၢ်ဖံဖု လၢပျၢၤတဖၣ်လၢကီၢ်အဲၤကူပတူးအပူၤအဃိန့ၣ်လီၤ. အဝဲသ့ၣ်တူၢ်လိာ်ဟ့ၣ်လီၤသးဒီးဘူၣ်ထီၣ်ဘါထီၣ်ကစၢ်အဂုၤအဂၤ တဖၣ်န့ၣ်လီၤ. လၢတၢ်န့ၣ်အဃိယွၤဟဲစိာ်တၢ်တတၢးတနါအံၤလၢအဝဲသ့ၣ်အဖီခိၣ် န့ၣ်လီၤ.”