6
(၁စီၤပၤ ၈:၁၂-၂၁)
1 တုၤနုၤတစု, စီၤပၤစီၤၡလိၤမိၤဃ့ဘါထုကဖၣ်တၢ်စံးဝဲ, “ယွၤဧၢ, နဃုထၢတ့ၢ်လၢနကအိၣ်ကဆိးလၢတၢ်အၢၣ်တဖၣ်ဒီးတၢ်ခံး တၢ်နၤအပူၤလီၤ.
2 ခဲကနံၣ်အံၤယသူၣ်ထီၣ်တ့ၢ်လံတၢ်လုၢ်ဟံၣ်လီၤဘီလီၤမုၢ်တဖျၢၣ် လၢနဂီၢ်, တၢ်လီၢ်တတီၤလၢနကအိၣ်နဲဆိးနဲလၢအပူၤ လီၤစိၤလီၤထီန့ၣ်လီၤ.”
3 ကယဲၢ်အံၣ်စရ့လးအပှၤဂီၢ်မုၢ်ခဲလၢာ်ဂဲၤဆၢထၢၣ်ဝဲဖဲန့ၣ်လီၤ. စီၤပၤဃၣ်တရံးဃီၤဒီးကွၢ်တၢ်ဆူအဝဲသ့ၣ်အအိၣ်, ဒီးဃ့သကွံာ်ကညးဝဲလၢကစၢ်ယွၤအတၢ်ဆိၣ်ဂ့ၤဆိၣ်ဝါကလီၤဘၣ်လၢ အဝဲသ့ၣ်အလိၤန့ၣ်လီၤ.
4 အဝဲစံးဝဲ, “စံးထီၣ်ပတြၢၤယွၤ, အံၣ်စရ့လးအကစၢ်ယွၤတ က့ၢ်. အဝဲဟံးဃာ်ဂၢၢ်ကျၢၤအတၢ်အၢၣ်လီၤလၢအမၤတ့ၢ်ဝဲဒီးယပၢ်စီၤဒၤ ဝံးဖဲအဝဲစံးဘၣ်တ့ၢ်အီၤ,
5 စးထီၣ်လၢယထုးထီၣ်ကွံာ်ယပှၤဂီၢ်မုၢ်လၢကီၢ်အဲၤကူပတူးအပူၤ တုၤလီၤခဲအံၤန့ၣ်, ယတဃုထၢတ့ၢ်ဝ့ၢ်လၢကီၢ်အံၣ်စရ့လးအပူၤနီတဖျၢၣ်, ဒ်တၢ်လီၢ်လၢတၢ်ကသူၣ်ထီၣ်တၢ်လုၢ်ဟံၣ်တဖျၢၣ်လၢတၢ်ကဘူၣ်ထီၣ်ဘါ ထီၣ်ယၤအဂီၢ်, ဒီးယတဃုထၢတ့ၢ်ပှၤနီတဂၤလၢကဆှၢယပှၤဂီၢ်မုၢ်, ပှၤအံၣ်စရ့လးဖိတဖၣ်န့ၣ်ဘၣ်.
6 ဘၣ်ဆၣ်ဒီး, ခဲကနံၣ်အံၤယဃုထၢလံဝ့ၢ်ယရူၤၡလ့ၣ်ဒ်တၢ်လီၢ်လၢ ယကဘၣ်တၢ်ဘူၣ်ထီၣ်ဘါထီၣ်ယၤအဂီၢ်, ဒီးနဲဒၣ်, စီၤဒၤဝံးဒ်ပှၤလၢကပၢယပှၤဂီၢ်မုၢ်န့ၣ်လီၤ.”
7 ဒီးစီၤၡလိၤမိၤစံးထွဲကဒီးဝဲ, “ယပၢ်စီၤဒၤဝံးတိာ်ကျဲၤ ပာ်တ့ၢ်ဝဲလၢကသူၣ်ထီၣ်တၢ်လုၢ်ဟံၣ်တဖျၢၣ်လၢတၢ်ဘူၣ်ထီၣ်ဘါထီၣ် ယွၤ, အံၣ်စရ့လးအကစၢ်ယွၤအဂီၢ်,
8 ဘၣ်ဆၣ်ယွၤစံးဘၣ်အီၤ, နသးအိၣ်သူၣ်ထီၣ်တၢ်လုၢ်ဟံၣ်တဖျၢၣ်လၢ ယဂီၢ်န့ၣ်ဘၣ်ဝဲ,
9 ဘၣ်ဆၣ်, နတသူၣ်ထီၣ်ဘၣ်အီၤနီတစုဘၣ်. ပှၤလၢကသူၣ်ထီၣ်ဘၣ်ယတၢ်လုၢ်ဟံၣ်န့ၣ်, မ့ၢ်နဖိခွါ, နဖိခွါဒၣ်နဲန့ၣ်လီၤ.
10 ခဲကနံၣ်အံၤ, ယွၤဟံးဃာ်ဂၢၢ်ကျၢၤတ့ၢ်လံအတၢ်အၢၣ်လီၤအီလီၤ န့ၣ်လီၤ. ယကဲထီၣ်ဘၣ်အံၣ်စရ့လးအစီၤပၤလၢယပၢ်အလီၢ်, ဒီးယသူၣ်ထီၣ်တ့ၢ်လံတၢ်လုၢ်ဟံၣ်တဖျၢၣ်လၢတၢ်ဘူၣ်ထီၣ်ဘါထီၣ် ယွၤ, အံၣ်စရ့လးအကစၢ်ယွၤအဂီၢ်န့ၣ်လီၤ.
11 ယပာ်လီၤတ့ၢ်တၢ်အၢၣ်လီၤအီလီၤအတလါစီဆှံ, လၢအအိၣ်ဒီးတၢ်အၢၣ်လီၤအီလီၤအလၢၢ်ဘ့ၣ်ဘၣ်တဖၣ်, လၢယွၤမၤတ့ၢ်ဝဲဒီးအံၣ်စရ့လးအပှၤဂီၢ်မုၢ်န့ၣ်, လၢယွၤအတၢ်လုၢ်ဟံၣ်အပူၤန့ၣ်လီၤ.”
(၁စီၤပၤ ၈:၂၂-၅၃)
12 အန့ၣ်ဝံၤဒီး, လၢပှၤဂီၢ်မုၢ်အမဲာ်ညါန့ၣ်, စီၤၡလိၤမိၤဂဲၤဆၢ ထၢၣ်ဝဲလၢတၢ်လုၢ်လီၢ်အမဲာ်ညါဒီးယူာ်ထီၣ်အစုလၢတၢ်ထုကဖၣ် အပူၤန့ၣ်လီၤ.
13 (စီၤၡလိၤမိၤမၤထီၣ်တ့ၢ်စိၤမိၤတိၢ်ဘီတခါ, ဒီးပာ်အီၤလၢဂၢၢ်အသးကံၢ်ပူၤန့ၣ်လီၤ. စိၤမိၤန့ၣ်အထီအိၣ် ဝဲယဲၢ်ပျၢ်, အဒီၣ်ဃီၤအိၣ်ယဲၢ်ပျၢ်ဒီးအကစီၤထီၣ်အိၣ်သၢပျၢ်န့ၣ်လီၤ. အဝဲလဲၤထီၣ်ဆူစိၤမိၤအံၤအဖီခိၣ်, ချံးလီၤအခီၣ်ဖဲပှၤကိးဂၤဒဲးထံၣ်အီၤသ့, ဒီးယူာ်ထီၣ်အစုဆူ မူခိၣ်န့ၣ်လီၤ.)
14 အဝဲဘါထုကဖၣ်တၢ်စံးဝဲ, “ယွၤ, အံၣ်စရ့လးအကစၢ်ယွၤဧၢ, လၢမူခိၣ်မ့ၢ်ဂ့ၤ, လၢဟီၣ်ခိၣ်မ့ၢ်ဂ့ၤကစၢ်ဒ်သိးနၤတအိၣ်နီ တဂၤဘၣ်. နဟံးဃာ်ဂၢၢ်ကျၢၤနတၢ်အၢၣ်လီၤဒီးနပှၤဂီၢ်မုၢ်ဒီးဒုးနဲၣ်အ ဝဲသ့ၣ်လၢနတၢ်အဲၣ်, ဖဲအဝဲသ့ၣ်အိၣ်မူစူၢ်နၤလၢအသူၣ်ဒီဖျၢၣ်သး ဒီဖျၢၣ်န့ၣ်လီၤ.
15 နဟံးဃာ်ဂၢၢ်ကျၢၤတ့ၢ်လံတၢ်အၢၣ်လီၤအီလီၤလၢနမၤတ့ၢ်ဒီးယပၢ် စီၤဒၤဝံး, ဒီးမုၢ်တနံၤအံၤ, ကယဲၢ်တၢ်ကတိၤတထံၣ်လၢ်လၢ်လၢထီၣ်ပှဲၤထီၣ်လံဝဲန့ၣ်လီၤ.
16 ခဲကနံၣ်အံၤယွၤ, အံၣ်စရ့လးအကစၢ်ယွၤဧၢ, ဟံးဃာ်ဂၢၢ်ကျၢၤတၢ်အၢၣ်လီၤအီလီၤအဂၤတမံၤလၢနမၤတ့ၢ်ဒီးယ ပၢ်, ဖဲနတဲဘၣ်တ့ၢ်အီၤလၢ, ထီဘိအဝဲအစၢၤအသွဲၣ်တဖၣ်အကျါတဂၤကအိၣ် ဝဲလၢကပၢတၢ်ဒ်အံၣ်စရ့လးအစီၤပၤ, ဖဲအဝဲသ့ၣ်မ့ၢ်စူၢ်နတၢ်သိၣ်တၢ်သီလၢနဟ့ၣ်လီၤပှၤယူဒၤဖိ လီၤတံၢ်လီၤဆဲးဒ်နမၤတ့ၢ်ဝဲအသိးန့ၣ်တက့ၢ်.
17 လၢတၢ်န့ၣ်အဃိ, ယွၤ, အံၣ်စရ့လးအကစၢ်ယွၤဧၢ, တၢ်လၢနအၢၣ်လီၤတ့ၢ်နခ့နပှၤစီၤဒၤဝံးန့ၣ်, မ်အလၢထီၣ်ပှဲၤထီၣ်ခဲလၢာ်တက့ၢ်.
18 ဘၣ်ဆၣ်ဒီး, အိကစၢ်ယွၤဧၢ, နအိၣ်နဆိးလၢဟီၣ်ခိၣ်ချၢလၢပှၤပိာ် ခွါတဖၣ်ဒီးပှၤပိာ်မုၣ်တဖၣ်အကျါ, ဘၣ်ကသ့နီၢ်နီၢ်ဧါ. ကယဲၢ်မူခိၣ်အလီၢ်ခဲလၢာ်ဒၣ်လဲာ်န့ၣ်, တလဲၢ်ဝဲတုၤကလၢဝဲလၢနကအိၣ်ကဆိးအဂီၢ်န့ၣ်ဘၣ်. လၢတၢ်န့ၣ်အဃိ, ယွၤအတၢ်လုၢ်ဟံၣ်လၢယသူၣ်ထီၣ်တ့ၢ်အီၤအံၤ, လဲၢ်ဝဲလၢလၢလီၣ်လီၣ်ကသ့ဒ်လဲၣ်.
19 ယွၤ, ကစၢ်ယွၤဧၢ, ယမ့ၢ်နခ့နပှၤန့ၣ်လီၤ. ဒိကနၣ်လၢ်ယတၢ်ထု ကဖၣ်ဒီးဟ့ၣ်လီၤလၢ်ယၤတၢ်လၢယဃ့နၤတဖၣ်န့ၣ်တက့ၢ်.
20 အံးလီၤကွၢ်လီၤယွၤအတၢ်လုၢ်ဟံၣ်အံၤလၢမုၢ်ဆါဆဲးလၢမုၢ်နၤ န့ၣ်တက့ၢ်. နအၢၣ်လီၤတ့ၢ်နဲလၢ, အအံၤကမ့ၢ်တၢ်လီၢ်ဖဲနကဘၣ်တၢ်ဘူၣ်ထီၣ်ဘါထီၣ်နၤ, အဃိဒီး, ဖဲယကွၢ်ဃီၤယွၤအတၢ်လုၢ်ဟံၣ်အံၤ, ဒီးဃ့ဘါထုကဖၣ်န့ၣ်ဒိကနၣ်လၢ်ယၤတက့ၢ်.
21 ဒိကနၣ်ယတၢ်ထုကဖၣ်တဖၣ်ဒီးနပှၤဂီၢ်မုၢ်အံၣ်စရ့လးအတၢ်ထု ကဖၣ်တဖၣ်ဖဲအဝဲသ့ၣ်ဃၣ်ဃီၤအမဲာ်ဆူတၢ်လီၢ်အံၤဒီးဃ့ဘါထု ကဖၣ်ဝဲန့ၣ်တက့ၢ်. ဒိကနၣ်လၢ်ပှၤလၢနဟံၣ်လၢမူခိၣ်န့ၣ်ဒီးပျၢ်လၢ်ပတၢ် ကမၣ်န့ၣ်တက့ၢ်.
22 ဖဲပှၤတဂၤဘၣ်တၢ်ပာ်တၢ်ကမၣ်လၢအလိၤလၢအမၤကမၣ်ဘၣ်ပှၤ အဂၤတဂၤဒီးဘၣ်တၢ်ဟဲစိာ်အီၤဆူနတၢ်လုၢ်လီၢ်ဖဲတၢ်လုၢ်ဟံၣ်အံၤ အပူၤ, လၢကဆိၣ်လီၤအသးလၢအဝဲအတၢ်ကမၣ်တအိၣ်ဘၣ်န့ၣ်,
23 အိယွၤဧၢ, ဒိကနၣ်လၢ်လၢမူခိၣ်ဒီးစံၣ်ညီၣ်နခ့နပှၤတဖၣ်န့ၣ်တ က့ၢ်. စံၣ်ညီၣ်ဃၣ်ပှၤလၢအတၢ်ကမၣ်အိၣ်တဂၤဒ်အကြၢးဒိးဘၣ်ဝဲ အသိး, ဒီးပျၢ်ကွံာ်ပှၤတဂၤလၢအတၢ်ကမၣ်တအိၣ်ဘၣ်န့ၣ်တက့ၢ်.
24 ဖဲနပှၤဂီၢ်မုၢ်အံၣ်စရ့လးဘၣ်တၢ်မၤနၢၤကွံာ်အီၤလၢအဝဲသ့ၣ် အဒုၣ်အဒါတဖၣ်, မ့ၢ်လၢအဝဲသ့ၣ်မၤတၢ်ဒဲးဘးထီဒါနၤအဃိ, ဒီးဖဲအဝဲသ့ၣ်ဃၣ်က့ၤအသးဆူနအိၣ်ဒီးဟဲဆူယွၤအတၢ်လုၢ်ဟံၣ် အံၤ, ဃ့ဘါထုကဖၣ်အိၣ်ဒီးတၢ်ဆီၣ်လီၤသးလၢနကပျၢ်အတၢ်ဒဲးဘးန့ၣ်,
25 ဒိကနၣ်လၢ်အီၤလၢမူခိၣ်န့ၣ်တက့ၢ်. ပျၢ်လၢ်ဘၣ်နပှၤဂီၢ်မုၢ်အတၢ်ဒဲးဘးတဖၣ်ဒီးဟဲက့ၤစိာ်ကဒါက့ၤ အဝဲသ့ၣ်ဆူကီၢ်တဘ့ၣ်လၢနဟ့ၣ်တ့ၢ်အဝဲသ့ၣ်ဒီးအမိၢ်ပၢ်ဖံဖုလၢ ပျၢၤတဖၣ်န့ၣ်တက့ၢ်.
26 ဒီးဖဲနတြီဃာ်တၢ်ဟဲစူၤလီၤ, မ့ၢ်လၢနပှၤဂီၢ်မုၢ်မၤတ့ၢ်တၢ် ဒဲးဘးထီဒါနၤ, ဒီးတုၤအဝဲသ့ၣ်ပီၢ်ယၢ်လီၤက့ၤအသးဒီးဃၣ်ဃီၤအမဲာ်ဆူယွၤ အတၢ်လုၢ်ဟံၣ်အံၤ, ဒီးဃ့ဘါထုကဖၣ်နၤလၢတၢ်ဆီၣ်လီၤသးအပူၤန့ၣ်,
27 အိယွၤဧၢ, ဒိကနၣ်လၢ်အဝဲသ့ၣ်လၢမူခိၣ်ဒီးပျၢ်လၢ်ဘၣ်နခ့နပှၤ အံၣ်စရ့လးအပှၤဂီၢ်မုၢ်အတၢ်ဒဲးဘးတဖၣ်, ဒီးသိၣ်လိအဝဲသ့ၣ်လၢကမၤတၢ်လၢအဘၣ်န့ၣ်တက့ၢ်. အန့ၣ်ဝံၤဒီးယွၤဧၢ, ဒုးဟဲစူၤလီၤတၢ်လၢနထံဧိၤကီၢ်ဧိၤ အံၤ, လၢနဟ့ၣ်လီၤတ့ၢ်နပှၤဂီၢ်မုၢ်ဒ်တၢ်န့ၢ်သါအဂၢၢ်အကျၢၤတမံၤအသိး န့ၣ်, အဖီခိၣ်တက့ၢ်.
28 တုၤတၢ်သၣ်ဝံၤလီၤဒိအိၣ်ထီၣ်လၢထံဧိၤကီၢ်ဧိၤအပူၤမ့ၢ်ဂ့ၤ, တၢ်ဆါသံသတြိာ်တမံၤမ့ၢ်ဂ့ၤ, တၢ်မုၢ်တၢ်ဘိတဖၣ်ဘၣ်တၢ်မၤဟး ဂီၤအီၤလၢကလံၤကိၢ်မ့တမ့ၢ်ဒွဲၣ်ဧိၤတကံၤဧိၤအဖုအဂီၢ်တဖၣ် မ့ၢ်ဂ့ၤ, ဖဲနပှၤဂီၢ်မုၢ်ဘၣ်တၢ်ထီဒါအီၤလၢအဝဲသ့ၣ်အဒုၣ်အဒါတဖၣ်မ့ၢ် ဂ့ၤ, ဖဲတၢ်ဆူးတၢ်ဆါမ့တမ့ၢ်တၢ်ဆိးက့အိၣ်လၢအဝဲသ့ၣ်အကျါမ့ၢ် ဂ့ၤ,
29 ဒီးနပှၤဂီၢ်မုၢ်အံၣ်စရ့လးအကျါတဂၤဂၤ, မ့ၢ်ဃၣ်ဃီၤအမဲာ်ဆူ ယွၤအတၢ်လုၢ်ဟံၣ်အံၤဒီးယူာ်ထီၣ်အစု, ဘါထုကဖၣ်လၢတၢ်သးဘၣ် ဒိဘၣ်ထံးအပူၤဒီးနၢ်ဟူလၢ်အဝဲသ့ၣ်အတၢ်ထုကဖၣ်တဖၣ်တက့ၢ်.
30 ဒိကနၣ်လၢ်အဝဲသ့ၣ်အတၢ်ထုကဖၣ်တက့ၢ်. ဒိကနၣ်လၢ်အဝဲသ့ၣ်လၢနဟံၣ်အိၣ်လၢမူခိၣ်ဒီးပျၢ်လၢ်အဝဲသ့ၣ် အတၢ်ကမၣ်တက့ၢ်. နမ့ၢ်ပှၤထဲတဂၤဧိၤလၢအသ့ၣ်ညါပှၤကညီအသးအတၢ်ဆိကမိၣ်တဖၣ် န့ၣ်လီၤ. မၤဘၣ်ပှၤတဂၤဘၣ်တဂၤစုာ်စုာ်ဒ်တၢ်လၢအကြၢးဒီးအီၤအသိး,
31 ဒ်သိးနပှၤဂီၢ်မုၢ်ကအိၣ်ဒီးတၢ်ယူးယီၣ်နၤ, ဒီးစူၢ်နၤကိးဆၢကိးကတီၢ်ဒဲးဖဲအအိၣ်ဆိးဒံးလၢထံဧိၤကီၢ် ဧိၤလၢနဟ့ၣ်လီၤတ့ၢ်ပမိၢ်ပၢ်ဖံဖုလၢပျၢၤသ့ၣ်တဖၣ်အပူၤန့ၣ်တက့ၢ်.
32 တုၤပှၤတခီဘီမုၢ်ဖိတဂၤလၢအအိၣ်ဝဲဆိးဝဲလၢထံကီၢ်အယံၤ တဘ့ၣ်အပူၤနၢ်ဟူဝဲလၢနမ့ၢ်တၢ်ဒိၣ်တၢ်မုၢ်, တၢ်ဒိၣ်စိဒိၣ်ကမီၤထီထဲလဲၣ်ဒီးထီဘိနအိၣ်ကတဲာ်ကတီၤနသးလၢ နကမၤတၢ်ဒ်လဲၣ်, ဒီးဖဲအဝဲဟဲဆူယွၤအတၢ်လုၢ်ဟံၣ်အံၤလၢကဘါထုကဖၣ်တၢ်အဂီၢ် န့ၣ်,
33 ဒိကနၣ်လၢ်အတၢ်ထုကဖၣ်န့ၣ်တက့ၢ်. လၢမူခိၣ်ဖဲနအိၣ်ဝဲဆိးဝဲအလီၢ်န့ၣ်ဒိကနၣ်လၢ်အီၤဒီးမၤတၢ် လၢအဝဲဃ့ဝဲလၢနကမၤန့ၢ်အီၤ, ဒ်သိးကယဲၢ်ပှၤဂီၢ်မုၢ်လၢဟီၣ်ခိၣ်ချၢခဲလၢာ်, ကသ့ၣ်ညါနၤဒီးကစူၢ်နၤ, ဒ်နပှၤဂီၢ်မုၢ်အံၣ်စရ့လးမၤဝဲအသိးန့ၣ်တက့ၢ်. အန့ၣ်ဒီးအဝဲသ့ၣ်ကသ့ၣ်ညါဝဲလၢယွၤအတၢ်လုၢ် ဟံၣ်လၢယဘှီထီၣ်အီၤအံၤ, မ့ၢ်တၢ်လီၢ်ဖဲနကဘၣ်တၢ်ဘူၣ်ထီၣ်ဘါထီၣ်နၤန့ၣ်လီၤ.
34 တုၤနမၤလိာ်နပှၤဂီၢ်မုၢ်လၢကလဲၤဆူတၢ်ဒုးအပူၤထီဒါအဒုၣ် အဒါတဖၣ်, ဒီးအဝဲသ့ၣ်ဘါထုကဖၣ်ဆူနအိၣ်န့ၣ်, အဝဲသ့ၣ်မ့ၢ်အိၣ်ဖဲလဲၣ်ပူၤလဲၣ်ဂ့ၤ, မ့ၢ်ဃၣ်အမဲာ်ဆူဝ့ၢ်လၢနဃုထၢအီၤအံၤ, ဒီးဆူယွၤအတၢ်လုၢ်ဟံၣ်အံၤလၢယဘှီထီၣ်တ့ၢ်လၢနဂီၢ်န့ၣ်,
35 ဒိကနၣ်လၢ်အဝဲသ့ၣ်အတၢ်ထုကဖၣ်တဖၣ်န့ၣ်တက့ၢ်. ဒိကနၣ်လၢ်အဝဲသ့ၣ်လၢမူခိၣ်ဒီးဟ့ၣ်လီၤအဝဲသ့ၣ်လၢတၢ်မၤနၢၤ န့ၣ်တက့ၢ်.
36 တုၤနပှၤဂီၢ်မုၢ်မၤတၢ်ဒဲးဘးထီဒါနၤ, ဒီးပှၤလၢအတမၤဒဲးဘး တၢ်တအိၣ်ဘၣ်နီတဂၤဘၣ်, ဒီးလၢနတၢ်သးထီၣ်အပူၤနပျဲ အဝဲသ့ၣ်အဒုၣ်အဒါတဖၣ်မၤနၢၤအဝဲသ့ၣ်ဒီးစိာ်ထီၣ်ကွံာ်အဝဲသ့ၣ် ဒ်ပှၤဘၣ်တၢ်စၢဃာ်တဖၣ်အသိးဆူကီၢ်အဂၤတနီၤ, ဖဲကီၢ်န့ၣ်အိၣ်ဝဲယံၤမးဒၣ်လဲာ်န့ၣ်,
37 ဒိကနၣ်လၢ်နပှၤဂီၢ်မုၢ်အတၢ်ထုကဖၣ်တဖၣ်န့ၣ်တက့ၢ်. လၢထံကီၢ်အဝဲန့ၣ်အပူၤအဝဲသ့ၣ်မ့ၢ်ပီၢ်ယၢ်လီၤက့ၤအသးဒီးဘါ ထုကဖၣ်ဆူနအိၣ်, ဒီးအၢၣ်လီၤက့ၤဝဲလၢမၤဘၣ်တၢ်ဒဲးဘးထဲလဲၣ်, ဒီးအဝဲသ့ၣ်မ့ၢ်တ့ၢ်ပှၤအၢဝဲသီဝဲထဲလဲၣ်န့ၣ်, ယွၤဧၢ, ဒိကနၣ်လၢ်အဝဲသ့ၣ်အတၢ်ထုကဖၣ်တဖၣ်န့ၣ်တက့ၢ်.
38 လၢထံကီၢ်အဝဲန့ၣ်အပူၤအဝဲသ့ၣ်မ့ၢ်ပီၢ်ယၢ်လီၤက့ၤအသးနီၢ် နီၢ်လၢတၢ်သူၣ်တီသးရၤအပူၤဒီးဃ့ဘါထုကဖၣ်ဆူနအိၣ်ဖဲ အမဲာ်ဃၣ်ဃီၤအသးဆူကီၢ်အံၤလၢနဟ့ၣ်လီၤတ့ၢ်ပမိၢ်ပၢ်ဖံဖု လၢပျၢၤတဖၣ်, ဒီးဆူဝ့ၢ်အံၤလၢနဃုထၢတ့ၢ်, ဒီးဆူယွၤအတၢ်လုၢ်ဟံၣ်အံၤလၢယသူၣ်ထီၣ်တ့ၢ်လၢနဂီၢ်န့ၣ်ဒီး,
39 ဒိကနၣ်လၢ်အဝဲသ့ၣ်အတၢ်ထုကဖၣ်တဖၣ်န့ၣ်တက့ၢ်. လၢနဟံၣ်လၢမူခိၣ်န့ၣ်ဒိကနၣ်လၢ်အဝဲသ့ၣ်, ဒီးသူၣ်ကညီၤသးက ညီၤလၢ်အဝဲသ့ၣ်ဒီးပျၢ်လၢ်ဘၣ်နပှၤဂီၢ်မုၢ်အတၢ်ဒဲးဘးခဲလၢာ် န့ၣ်တက့ၢ်.
40 ခဲကနံၣ်အံၤအိ, ယကစၢ်ယွၤဧၢ, အံးလီၤကွၢ်လီၤပှၤဒီးဒိကနၣ် လၢ်တၢ်ထုကဖၣ်တဖၣ်လၢပဃ့ထီၣ်အီၤဖဲတၢ်လီၢ်အံၤန့ၣ်တက့ၢ်.
41 ယွၤ, ကစၢ်ယွၤဧၢ, ဂဲၤထၢၣ်ခဲကနံၣ်အံၤ, ဒီးလဲၤနုာ်ဆူယွၤအတၢ် လုၢ်ဟံၣ်ပူၤဃုာ်ဒီးတၢ်အၢၣ်လီၤအီလီၤအတလါစီဆှံ, တၢ်အဒိဘၣ်ထွဲဒီးနတၢ်စိတၢ်ကမီၤဒီးအိၣ်နဲဆိးနဲဖဲအံၤ လီၤစိၤလီၤထီတက့ၢ်. ဆိၣ်ဂ့ၤနပှၤလုၢ်တၢ်အခိၣ်တဖၣ်လၢကယဲၢ်တၢ်ခဲလၢာ်လၢအမၤဝဲအပူၤ ဒီးမ်နပှၤဂီၢ်မုၢ်ခဲလၢာ်သူၣ်ဖှံသးညီ, မ့ၢ်လၢနတၢ်မၤဂ့ၤဘၣ်အဝဲသ့ၣ်အဃိန့ၣ်တက့ၢ်.
42 ယွၤ, ကစၢ်ယွၤဧၢ, ညိကွံာ်စီၤပၤအံၤလၢနဃုထၢတ့ၢ်နဲန့ၣ်တ ဂ့ၤ. သ့ၣ်နီၣ်ထီၣ်က့ၤတၢ်အဲၣ်လၢနအဲၣ်ဘၣ်တ့ၢ်နခ့နပှၤစီၤဒၤဝံးန့ၣ် တက့ၢ်.”