31
1 တုၤဘူၣ်လဲၤကပာ်ဝံၤဝဲန့ၣ်ကယဲၢ်ကီၢ်အံၣ်စရ့လးအပှၤဂီၢ်မုၢ် လဲၤဆူကယဲၢ်ဝ့ၢ်အိၣ်လၢကီၢ်ယူဒၤအပူၤခဲလၢာ်ဒီးမၤကၢ်လီၤက လဲကွံာ်လၢၢ်ထူၣ်တဖၣ်, ကူာ်လီၤကွံာ်ကစၢ်မုၣ်အၡ့ရၤအတၢ်ပနီၣ်တ ဖၣ်, ဒီးမၤဟးဂီၤကွံာ်တၢ်လုၢ်လီၢ်တဖၣ်ဒီးပှၤဘါတၢ်ဂီၤတၢ်ဖီၣ် အတၢ်ဘူၣ်ထီၣ်ဘါထီၣ်အလီၢ်တဖၣ်န့ၣ်လီၤ. အဝဲသ့ၣ်မၤတၢ်တမံၤဃီအံၤလၢတၢ်လီၢ်အိၣ်လီၤတဲာ်လၢကီၢ်ယူဒၤ ဒီကီၢ်ညါအပူၤဒီးလီၢ်ကဝီၤတဖၣ်လၢဘံၣ်ယၤမံၣ်, အ့ဖရဲၣ်ဒီးမနၤၡ့ၤအဒူၣ်တဖၣ်အိၣ်ဝဲဆိးဝဲန့ၣ်လီၤ. ဝံၤဒီးအဝဲသ့ၣ်ခဲလၢာ်က့ၤကဒါက့ၤဆူအဟံၣ်န့ၣ်လီၤ.
2 စီၤပၤယဃံးစကံၤယၤဒုးအိၣ်ထီၣ်ကဒါက့ၤတၢ်ကရၢကရိ ဘၣ်ထွဲဒီးပှၤလုၢ်တၢ်အခိၣ်တဖၣ်ဒီးပှၤလ့ၤဝံဖိတဖၣ်, လၢအဝဲသ့ၣ်တဂၤဘၣ်တဂၤစုာ်စုာ်အိၣ်ဒီးအမူအဒါလီၤတံၢ်လီၤဆဲးန့ၣ် လီၤ. မူဒါတဖၣ်အံၤအိၣ်စ့ၢ်ကီးဒီးတၢ်ဆူးကဲၤထီၣ်တၢ်လုၢ်မ့ၣ်အူ, တၢ်လုၢ်ထီၣ်တၢ်လုၢ်မၤဃူမၤဖိးတဖၣ်, တၢ်ဟံးန့ၢ်မူဒါလၢယွၤ အတၢ်လုၢ်ဟံၣ်အတၢ်ဘူၣ်တၢ်ဘါအပူၤ, တၢ်ဟ့ၣ်ထီၣ်တၢ်စံၣ်ထီၣ်ပတြၢၤဒီးတၢ်စံးဘျုးတဖၣ်လၢယွၤအတၢ် လုၢ်ဟံၣ်အလီၢ်တတီၤဘၣ်တတီၤအပူၤန့ၣ်လီၤ.
3 လၢအဝဲအကစၢ်ဒၣ်ဝဲအသိအဖုတဖၣ်ဒီးအဂီၤဘုၣ်ဂီၤဖံးအဖုတဖၣ် အပူၤန့ၣ်, အဝဲဟ့ၣ်ထီၣ်ဆၣ်ဖိကီၢ်ဖိတဖၣ်လၢတၢ်လုၢ်မ့ၣ်အူတဖၣ်အဂီၢ်ကိး မုၢ်ဂီၤဒဲးဒီးကိးမုၢ်ဟါဒဲး, ဒီးတၢ်တဖၣ်လၢတၢ်လုၢ်ထီၣ်အီၤလၢမုၢ်အိၣ်ဘှံး အနံၤ, လၢလါထီၣ်သီအမူးဒီးလၢမူးအဂၤတဖၣ်ဒ်အလိၣ်ဝဲ, လၢအဘၣ်တၢ်ပာ်ဖျါအီၤလၢယူဒၤအတၢ်သိၣ်တၢ်သီလၢယွၤဟ့ၣ်ဝဲ အပူၤန့ၣ်လီၤ.
4 အါန့ၢ်အန့ၣ်စီၤပၤစံးဘၣ်ပှၤဂီၢ်မုၢ်လၢဝ့ၢ်ယရူၤၡလ့ၣ်တဖၣ်ဒ် သိးကဟဲစိာ်တၢ်မၤဘူၣ်တဖၣ်လၢပှၤလုၢ်တၢ်အခိၣ်တဖၣ်ဒီးပှၤလ့ၤ ဝံဖိသ့ၣ်တဖၣ်ကြၢးဒိးန့ၢ်ဘၣ်ဝဲ, ဒ်သိးအဝဲသ့ၣ်ဟ့ၣ်အတၢ်ဆၢကတီၢ် ခဲလၢာ်ကသ့ဝဲဒ်ယူဒၤအတၢ်သိၣ်တၢ်သီလၢယွၤဟ့ၣ်ဝဲ, အတၢ်လိၣ်ဘၣ်အိၣ်ဝဲန့ၣ်လီၤ.
5 တုၤတၢ်ကလုၢ်ဘၣ်တၢ်ဟ့ၣ်လီၤအီၤဝံၤတဘျီဃီန့ၣ်, ကီၢ်အံၣ်စရ့လးအပှၤဂီၢ်မုၢ်ဟဲစိာ်တၢ်ဟ့ၣ်အဂ့ၤကတၢၢ်တဖၣ်လၢ အဝဲသ့ၣ်အဘုဧိၤဟုဧိၤ, စပံးထံ, သ့ၣ်စၤယံးအသိ, ကနဲစီဒီးစံာ်ဧိၤပှဲၤဧိၤအတၢ်ဟးထီၣ်တဖၣ်အကျါ, ဒီးအဝဲသ့ၣ်ဟဲစိာ်စ့ၢ်ကီးကယဲၢ်တၢ်လၢအဒိးန့ၢ်ဝဲခဲလၢာ်အတၢ် ဆံဆဲၣ်ပူတပူန့ၣ်လီၤ.
6 ကယဲၢ်ပှၤဂီၢ်မုၢ်လၢအအိၣ်ဝဲဆိးဝဲလၢကီၢ်ယူဒၤအဝ့ၢ်တဖၣ်အပူၤ ဟဲစိာ်အဂီၤဖံး, ဒီးအသိတဖၣ်ဆံဆဲၣ်ပူတပူ, ဒီးအဝဲသ့ၣ်ဟဲစိာ်စ့ၢ်ကီးတၢ်ဟ့ၣ်အါအါဂီၢ်ဂီၢ်လၢအဝဲသ့ၣ် ပာ်စီဆှံဝဲဆူယွၤ, အဝဲသ့ၣ်အကစၢ်ယွၤအအိၣ်န့ၣ်လီၤ.
7 တၢ်ဟ့ၣ်တဖၣ်စးထီၣ်ဟဲတုၤဝဲလၢလါသၢလါတလါအပူၤဒီးပာ်ဖှိၣ် ပူၣ်ထီၣ်ထွဲဒံးအသးလၢဆူညါလွံၢ်လါအတီၢ်ပူၤန့ၣ်လီၤ.
8 တုၤစီၤပၤယဃံးစကံယၤဒီးအဝဲအပဒိၣ်ပပှၢ်တဖၣ်, ထံၣ်ဘၣ်တၢ်ဟ့ၣ်တဖၣ်ဘၣ်တၢ်ဟ့ၣ်လီၤအီၤအါထဲလဲၣ်န့ၣ်, အဝဲသ့ၣ်စံးထီၣ်ပတြၢၤယွၤဒီးစံးထီၣ်ပတြၢၤအဝဲအပှၤဂီၢ် မုၢ်အံၣ်စရ့လးန့ၣ်လီၤ.
9 စီၤပၤကတိၤတၢ်ဒီးပှၤလုၢ်တၢ်အခိၣ်တဖၣ်ဒီးပှၤလ့ၤဝံဖိတဖၣ် လၢတၢ်ဟ့ၣ်သ့ၣ်တဖၣ်အံၤအဂ့ၢ်,
10 ဒီးပှၤလုၢ်တၢ်အခိၣ်အဒိၣ်ကတၢၢ်စီၤဧစၤရယၤ, ပှၤဟဲလီၤစၢၤလီၤသွဲၣ်လၢစီၤစၤဒိးတဂၤ, စံးဘၣ်အီၤ, “စးထီၣ်လၢပှၤဂီၢ်မုၢ်ဟဲစိာ်အတၢ်ဟ့ၣ်တဖၣ်ဆူ ယွၤအတၢ်လုၢ်ဟံၣ်န့ၣ်, တၢ်အီၣ်တၢ်အီလၢပကအီၣ်အိၣ်ဝဲလၢလၢလီၣ်လီၣ်ဒီးလၢန့ၣ်အမဲာ် ညါတၢ်အိၣ်ဘျဲၣ်အိၣ်စဲၢ်အိၣ်အါမးန့ၣ်လီၤ. ပအိၣ်ဒီးကယဲၢ်တၢ်ခဲလၢာ်အံၤမ့ၢ်လၢယွၤဆိၣ်ဂ့ၤတ့ၢ်အပှၤဂီၢ် မုၢ်အဃိန့ၣ်လီၤ.”
11 ခီဖျိစီၤပၤအတၢ်ဟ့ၣ်လီၤတၢ်ကလုၢ်တဖၣ်န့ၣ်, အဝဲသ့ၣ်ကတဲာ်ကတီၤတၢ်ပာ်ဖှိၣ်အဒၢးတဖၣ်လၢယွၤအတၢ်လုၢ်ဟံၣ် အလီၢ်ကဝီၤပူၤ,
12 ဒီးဒၢနုာ်ကယဲၢ်တၢ်ဟ့ၣ်ခဲလၢာ်ဒီးတၢ်မၤဘူၣ်ဆံဆဲၣ်ပူတပူ လၢတၢ်ပာ်ဖှိၣ်အဒၢးတဖၣ်န့ၣ်အပူၤလၢတၢ်ကပၢၤဃာ်အီၤအဂီၢ်န့ၣ် လီၤ. အဝဲသ့ၣ်ပာ်လီၤပှၤလ့ၤဝံဖိစီၤကနၤနယၤလၢပှၤအခိၣ်လၢကကွၢ် ထွဲတၢ်အဂီၢ်, ဒီးဒုးကဲထီၣ်အဝဲအဒီပုၢ်ဝဲၢ်ခွါစီၤၡံမံၤလၢပှၤကမၤစၢၤ အီၤန့ၣ်လီၤ.
13 ဒီးပှၤလ့ၤဝံဖိအဂၤတဆံဘၣ်တၢ်ဃုထၢပာ်လီၤဒ်သိးကမၤတၢ်လၢ အဝဲသ့ၣ်အဖီလာ်န့ၣ်လီၤ. အဝဲသ့ၣ်မ့ၢ်ဝဲစီၤယဃံအ့လး, စီၤဧၤစါစယၤ, စီၤနၤဃး, စီၤဧၤစၤအ့လး, စီၤယရံမိး, စီၤယိစဘး, စီၤအလံၤအ့လး, စီၤယံးစမၤကယၤ, စီၤမၤဃးဒီးစီၤဘနါယၤတဖၣ်န့ၣ်လီၤ. ကယဲၢ်တၢ်သ့ၣ်တဖၣ်အံၤခဲလၢာ်န့ၣ်ဘၣ်တၢ်မၤဝံၤအီၤလၢ စီၤပၤဃံးစကံယၤဒီးပှၤလုၢ်တၢ်အခိၣ်အဒိၣ်ကတၢၢ်စီၤဧစၤရယၤ အတၢ်ဟ့ၣ်စိဟ့ၣ်ကမီၤအပူၤန့ၣ်လီၤ.
14 ပှၤလ့ၤဝံဖိတဂၤလၢအမ့ၢ်စီၤယံးမနၤအဖိခွါစီၤကိၤရ့, ပှၤပၢၤတၢ်အခိၣ်အဒိၣ်ကတၢၢ်လၢယွၤအတၢ်လုၢ်ဟံၣ်အတြဲၤမုၢ်ထီၣ် တကပၤန့ၣ်, ဘၣ်ကွၢ်ထွဲတၢ်တူၢ်လိာ်တၢ်ဟ့ၣ်တဖၣ်လၢတၢ် လုၢ်ထီၣ်အီၤဆူယွၤဒီးနီၤဟ့ၣ်လီၤတၢ်ဟ့ၣ်တဖၣ်န့ၣ်စ့ၢ်ကီးလီၤ.
15 လၢဝ့ၢ်အဂၤတဖၣ်ဖဲပှၤလုၢ်တၢ်အခိၣ်တဖၣ်အိၣ်ဆိးဝဲန့ၣ်, အဝဲဘၣ်တၢ်မၤစၢၤအီၤလၢတၢ်ကလုၢ်တီအပူၤ, လၢပှၤလ့ၤဝံဖိ အဂၤတဖၣ်လၢအမ့ၢ်ဝဲ, စီၤဧ့ၤဒ့ၣ်, စီၤမံးနယၤမံၣ်, စီၤယ့ၤၡူ, စီၤၡမါယၤ, စီၤအမၤရယၤဒီးစီၤၡကါယၤတဖၣ်န့ၣ် လီၤ. အဝဲသ့ၣ်နီၤဟ့ၣ်လီၤတၢ်အီၣ်တၢ်အီတဖၣ်ပှဲၤသိးသိးဆူအဝဲသ့ၣ် အပှၤလ့ၤဝံဖိကဒဲကဒဲဒီးအီၤ, ဒ်အဝဲသ့ၣ်အမူအဒါတဖၣ်အိၣ်ဝဲအသိး, ဒီးတမ့ၢ်ဘၣ်ဒ်အဒူၣ်ထၢတဖၣ်အသိးန့ၣ်ဘၣ်.
16 ကယဲၢ်ပှၤပိာ်ခွါတဖၣ်လၢအသးအိၣ်အနံၣ်သၢဆံဒီးဆူအဖီခိၣ်လၢ အမံၤအိၣ်ကွဲးအသးလၢတၢ်ကရၢကရိအတၢ်ကွဲးနီၣ်အပူၤ, လၢကိးနံၤဒဲးမၤအမူအဒါလၢယွၤအတၢ်လုၢ်ဟံၣ်အပူၤန့ၣ်, အဝဲသ့ၣ်ဟ့ၣ်အီၤလၢတၢ်နီၤဟ့ၣ်တဂၤတမံၤဒ်အကြၢးဒီးအမူဒါ လီၢ်လၤအတီၤတဖၣ်အသိးစုာ်စုာ်န့ၣ်လီၤ.
17 ပှၤလုၢ်တၢ်အခိၣ်တဖၣ်ဘၣ်တၢ်ကရၢကရိထီၣ်အီၤလၢတၢ်မၤအဂီၢ်ဒ် အဒူၣ်ထၢဒၣ်ဝဲအသိး, ဒီးပှၤလ့ၤဝံဖိတဖၣ်လၢအသးအိၣ်အနံၣ်ဆံခံဒီးဆူအဖီခိၣ် န့ၣ်ဘၣ်တၢ်ကရၢကရိထီၣ်အီၤလၢအတၢ်မၤအဂီၢ်ဒ်တၢ်မၤအတီၤဒၣ်ဝဲ အသိးန့ၣ်လီၤ.
18 အဝဲသ့ၣ်ဘၣ်ဆဲးလီၤအမံၤခဲလၢာ်ပၣ်ဃုာ်ဒီးအမါတဖၣ်, အဖိတဖၣ်ဒီးပှၤအဂၤလၢအဘၣ်သန့ၤအသးလၢအီၤတဖၣ်, မ့ၢ်လၢအဝဲသ့ၣ်ကဘၣ်အိၣ်ဒီးတၢ်သူၣ်တီသးရၤဒီးပာ်စီဆှံ ထီၣ်အသးလၢတၢ်မၤမူဒါစီဆှံတဖၣ်တဘျီဂ့ၤတဘျီဂ့ၤအဂီၢ် အဃိန့ၣ်လီၤ.
19 လၢပှၤလုၢ်တၢ်အခိၣ်တဖၣ်လၢအအိၣ်ဆိးဝဲလၢစီၤအၤဟရိၣ်အစၢၤ အသွဲၣ်အတၢ်န့ၢ်သါအဝ့ၢ်တဖၣ်အပူၤမ့ၢ်ဂ့ၤ, လၢဝ့ၢ်တဖၣ်န့ၣ်အတၢ်အီၣ်ဆၣ်လီၢ်လါဟ့အပူၤမ့ၢ်ဂ့ၤအကျါပှၤ အိၣ်မူအိၣ်ဒါတဖၣ်အိၣ်စ့ၢ်ကီးဝဲလၢအနီၤလီၤတၢ်အီၣ်တၢ်အီဆူ ကယဲၢ်ပှၤပိာ်ခွါတဖၣ်လၢပှၤလုၢ်တၢ်အခိၣ်အဟံၣ်ဖိဃီဖိအအိၣ်ဒီး ဆူကယဲၢ်ပှၤတဂၤလၢ်လၢ်လၢအမံၤအိၣ်ဝဲလၢပှၤလ့ၤဝံအဒူၣ်ထၢ အတၢ်ကွဲးနီၣ်အပူၤအအိၣ်န့ၣ်လီၤ.
20 စီၤပၤဃံးစကံယၤမၤတ့ၢ်တၢ်လၢအဘၣ်ဒီးတၢ်လၢအမၤမုာ်အဝဲအ ယွၤ, ကစၢ်ယွၤအသးလၢကီၢ်ယူဒၤဒီတကီၢ်ညါအပူၤန့ၣ်လီၤ.
21 အဝဲမၤတၢ်ကဲထီၣ်လိၣ်ထီၣ်ဝဲ, မ့ၢ်လၢကယဲၢ်တၢ်ကိးမံၤဒဲးလၢ အမၤတ့ၢ်ဝဲလၢယွၤအတၢ်လုၢ်ဟံၣ်အဂီၢ်မ့ၢ်ဂ့ၤ, လၢတၢ်လူၤပိာ်ထွဲယူဒၤအတၢ်သိၣ်တၢ်သီမ့ၢ်ဂ့ၤန့ၣ်, အဝဲမၤတ့ၢ်ဝဲအိၣ်ဒီးသးလၢအတီဝဲလၢလၢပှဲၤပှဲၤဒီးတၢ်ဟ့ၣ် လီၤအးလီၤသးဆူအကစၢ်ယွၤအစုပူၤအဃိန့ၣ်လီၤ.