30
1 စီၤဃံးစကံယၤဟံးန့ၢ်လီၤဆီတၢ်ခွဲးတၢ်ယာ်လၢကဆှၢလီၤလံာ် ပရၢတဖၣ်ဆူအ့ဖရဲၣ်အဒူၣ်ဒီးမနၤၡ့ၣ်အဒူၣ်, ကွဲဃီၤအဝဲသ့ၣ်ဒ်သိးကဟဲဆူယွၤအတၢ်လုၢ်ဟံၣ်လၢဝ့ၢ်ယရူၤ ၡလ့ၣ်အပူၤ, လၢတၢ်ကမၤဘူၣ်လဲၤကပာ်လၢတၢ်မၤလၤကပီၤယွၤ, အံၣ်စရ့လးအကစၢ်ယွၤအဂီၢ်န့ၣ်လီၤ.
2 စီၤပၤဃံးစကံယၤ, အဝဲအပဒိၣ်ပပှၢ်တဖၣ်ဒီးဝ့ၢ်ယရူၤၡလ့ၣ်အပှၤ ဂီၢ်မုၢ်ဘၣ်သူၣ်ဘၣ်သးသကိးလၢကမၤဘူၣ်လဲၤကပာ်အံၤဖဲလါခံလါ တလါအပူၤအဃိ, စီၤပၤဆှၢလီၤတၢ်ကစီၣ်ဆူကယဲၢ်ကီၢ်အံၣ်စရ့လးဒီးကီၢ်ယူဒၤ အပှၤဂီၢ်မုၢ်အအိၣ်န့ၣ်လီၤ.
3 ပှၤဂီၢ်မုၢ်မၤဘူၣ်လဲၤကပာ်လၢအဆၢကတီၢ်ဒၣ်ဝဲ, ဖဲလါအခီၣ်ထံးတလါအပူၤတသ့ဝဲဘၣ်, မ့ၢ်လၢပှၤလုၢ်တၢ်အခိၣ် တအိၣ်လၢလၢလီၣ်လီၣ်လၢအမၤကဆှီထီၣ်တ့ၢ်အသးဒ်တၢ်အလုၢ်အလၢ်အိၣ် ဝဲအသိးအဃိဒီးပှၤဂီၢ်မုၢ်တပာ်ဖှိၣ်ဒံးအသးလၢဝ့ၢ်ယရူၤၡလ့ၣ် အပူၤအါအါဂီၢ်ဂီၢ်ဘၣ်အဃိန့ၣ်လီၤ.
4 စီၤပၤဒီးပှၤဂီၢ်မုၢ်ဘၣ်သူၣ်ဘၣ်သးလၢအဝဲသ့ၣ်အတၢ်ကူၣ်ကျဲၤ အံၤ,
5 အဃိအဝဲသ့ၣ်ကွဲမုာ်ကယဲၢ်ပှၤအံၣ်စရ့လးဖိခဲလၢာ်, စးထီၣ်လၢဝ့ၢ်ဒၣ်လၢကလံၤစိးတုၤလၢဝ့ၢ်ဘ့ၢ်ၡဘၤလၢကလံၤထံး, ဒ်သိးကဟဲပာ်ဖှိၣ်သကိးအသးလၢဝ့ၢ်ယရူၤၡလ့ၣ်အပူၤ, အနီၣ်ဂံၢ်အါန့ၢ်ဒံးလၢအပူၤကွံာ်ဒီးမၤဘူၣ်လဲၤကပာ်ဒ်ယူဒၤ အတၢ်သိၣ်တၢ်သီအိၣ်ဝဲအသိးန့ၣ်လီၤ.
6 တုၤစီၤပၤဒီးအပဒိၣ်ပပှၢ်တဖၣ်ဟ့ၣ်လီၤအကလုၢ်န့ၣ်ပှၤစိာ်တၢ် ကစီၣ်တဖၣ်ဟးထီၣ်ဝဲဆူကီၢ်ယူဒၤဒီးကီၢ်အံၣ်စရ့လးဒီ တဘ့ၣ်ညါအိၣ်ဒီးတၢ်ကွဲဒ်လၢလာ်အံၤန့ၣ်လီၤ.
“ကီၢ်အံၣ်စရ့လးအပှၤဂီၢ်မုၢ်သ့ၣ်ဧၢ, သုပူၤဖျဲးဒီးအိၣ်မူ လီၤတဲာ်တ့ၢ်ဒံးဖဲပှၤအၤၡူၢ်ဖိဟဲမၤနၢၤထံကီၢ်န့ၣ်လီၤ. ခဲကနံၣ်အံၤဃၣ်က့ၤသုသးဆူယွၤ, စီၤအၤဘြၤဟၣ်, စီၤအံၤစဲး, ဒီးစီၤယၤကိာ်အကစၢ်ယွၤအအိၣ်န့ၣ်တက့ၢ်. ဒီးအဝဲဒၣ်ကဃၣ်က့ၤအသးဆူသုအိၣ်န့ၣ်လီၤ.
7 သုတဘၣ်လီၤဂာ်ဒီးသုမိၢ်ပၢ်ဖံဖုလၢပျၢၤတဖၣ်ဒီးသုပှၤအံၣ် စရ့လးဖိသကိးသကိးတဖၣ်လၢအသူၣ်တတီသးတရၤဘၣ်ဒီးယွၤ, ပကစၢ်ယွၤန့ၣ်ဘၣ်, ဒ်သုထံၣ်ဘၣ်တ့ၢ်လံအသိး, ယွၤစံၣ်ညီၣ်အဝဲသ့ၣ်ဆါဆါကလဲာ်န့ၣ်လီၤ.
8 မၤကိၤသုခိၣ်ဒ်အဝဲသ့ၣ်အသိးတဂ့ၤ, မ့မ့ၢ်စူၢ်ယွၤတက့ၢ်. ဟဲဆူယွၤအတၢ်လုၢ်ဟံၣ်လၢဝ့ၢ်ယရူၤၡလ့ၣ်အပူၤ, လၢယွၤသုကစၢ်ယွၤမၤကဆှီတ့ၢ်ဝဲတဘိယူာ်ဃီဒီးဘူၣ်ထီၣ်ဘါ ထီၣ်အီၤဒ်သိးအဝဲသုတသးဒိၣ်ထီၣ်ဘၣ်လၢၤသုနီတစုတဂ့ၤန့ၣ်တ က့ၢ်.
9 သုမ့ၢ်ဃၣ်က့ၤသုသးဆူယွၤအအိၣ်ဒီး, ပှၤတဖၣ်လၢအစိာ်ထီၣ်ကွံာ် သုဘူးသုတံၢ်သ့ၣ်တဖၣ်ဒ်ပှၤဘၣ်တၢ်စၢဃာ်တဖၣ်အသိးန့ၣ်, ကသးကညီၤဘၣ်အဝဲသ့ၣ်ဒီးကပျဲအဝဲသ့ၣ်ဟဲက့ၤကဒါက့ၤဆူ ဟံၣ်န့ၣ်လီၤ. ယွၤသုကစၢ်ယွၤန့ၣ်အသးအိၣ်တၢ်ဒီးသူၣ်ကညီၤသးကညီၤ တၢ်လီၤ. ဒီးသုမ့ၢ်ဃၣ်က့ၤသုသးဆူအအိၣ်ဒီးအဝဲကတူၢ်လိာ်သုန့ၣ် လီၤ.”
10 ပှၤစိာ်တၢ်ကစီၣ်တဖၣ်လဲၤဆူကယဲၢ်ဝ့ၢ်အိၣ်လၢအ့ဖရဲၣ်အဒူၣ်ဒီး မနၤၡ့ၤအဒူၣ်အလီၢ်ကဝီၤပူၤ, ဒီးလဲၤတုၤဝဲယံၤပၢၢ်တုၤလၢကလံၤစိးလၢစဘူလိၣ်အဒူၣ်အိၣ် ဝဲန့ၣ်လီၤ. ဘၣ်ဆၣ်ပှၤဂီၢ်မုၢ်နံၤဘၣ်ဖၣ်လဲအဝဲသ့ၣ်ဒီးမၤအဝဲသ့ၣ်ကလိာ် ကလာ်န့ၣ်လီၤ.
11 ပှၤအိၣ်ဒံးတနီၤလၢအၤၡ့ၢ်, မနၤၡ့ၤဒီးစဘူလိၣ်အဒူၣ်တဖၣ်အပူၤ လၢအသးအိၣ်ဟဲဝဲဆူဝ့ၢ်ယရူၤၡလ့ၣ်န့ၣ်လီၤ.
12 ကစၢ်ယွၤမၤစ့ၢ်ကီးတၢ်လၢကီၢ်ယူဒၤအပူၤဒီးပာ်ဖှိၣ်က့ၤပှၤ ဂီၢ်မုၢ်ခီဖျိလၢအဝဲသ့ၣ်အတၢ်ပာ်လီၤအသးလၢကစူၢ်အဝဲအတၢ်ဘၣ် သူၣ်ဘၣ်လၢတၢ်မၤထွဲစီၤပၤဒီးအပဒိၣ်ပပှၢ်တဖၣ်အတၢ်မၤလိာ်တဖၣ် န့ၣ်လီၤ.
13 ပှၤဂီၢ်မုၢ်အါအါဂီၢ်ဂီၢ်ပာ်ဖှိၣ်ထီၣ်အသးလၢဝ့ၢ်ယရူၤၡလ့ၣ်အ ပူၤ, လၢလါခံလါတလါဒ်သိးကမၤဘူၣ်တအိၣ်ဘၣ်ဒီးကိၣ်မံၣ်န့ၣ်လီၤ.
14 ကယဲၢ်တၢ်လုၢ်လီၢ်တဖၣ်လၢအဘၣ်တၢ်သူတ့ၢ်အီၤလၢတၢ်လုၢ်ထီၣ်ပာ် ထီၣ်တဖၣ်ဒီးတၢ်ဆူးကဲၤတၢ်နၢမူအဂီၢ်လၢအအိၣ်လၢဝ့ၢ်ယရူၤ ၡလ့ၣ်အပူၤန့ၣ်, အဝဲသ့ၣ်ဟံးထီၣ်ကွံာ်ဒီးတ့ၢ်လီၤကွံာ်ဝဲဆူကံဒြိၣ်အတၢ်တြီၤ ပူၤန့ၣ်လီၤ.
15 ဒီးလၢလါထီၣ်တဆံလွံၢ်သီတသီအနံၤန့ၣ်အဝဲသ့ၣ်မၤသံသိဖိ တဖၣ်လၢတၢ်လုၢ်ဘူၣ်လဲၤကပာ်အဂီၢ်န့ၣ်လီၤ. ပှၤလုၢ်တၢ်အခိၣ်တဖၣ်ဒီးပှၤလ့ၤဝံတဖၣ်လၢအတကဆှီဝဲဒ်တၢ်အလုၢ် အလၢ်အိၣ်ဝဲအသိးန့ၣ်မဲာ်ဆှးဝဲဒိၣ်မး, တုၤအဝဲသ့ၣ်ပာ်စီဆှံထီၣ်က့ၤအသးလၢယွၤအဂီၢ်, ဒီးခဲအံၤအဝဲသ့ၣ်လုၢ်ထီၣ်တ့ၢ်တၢ်လုၢ်မ့ၣ်အူတဖၣ်လၢယွၤအတၢ် လုၢ်ဟံၣ်အပူၤသ့ဝဲန့ၣ်လီၤ.
16 အဝဲသ့ၣ်ဟံးန့ၢ်အလီၢ်တဖၣ်လၢယွၤအတၢ်လုၢ်ဟံၣ်အပူၤဒ်တၢ်သိၣ်လိ နဲၣ်ယုၤအိၣ်ဝဲလၢကစၢ်ယွၤအပှၤကညီစီၤမိၤၡ့ အတၢ်သိၣ်တၢ်သီအပူၤအသိးန့ၣ်လီၤ. တၢ်လုၢ်တၢ်ပာ်တဖၣ်အသွံၣ်န့ၣ်, ပှၤလ့ၤဝံဖိတဖၣ်ဟ့ၣ်လီၤဝဲဆူပှၤလုၢ်တၢ်အခိၣ်တဖၣ်အစုပူၤဒီး အဝဲသ့ၣ်ဖှံလီၤအီၤလၢတၢ်လုၢ်လီၢ်အဖီခိၣ်န့ၣ်လီၤ.
17 မ့ၢ်လၢပှၤဂီၢ်မုၢ်အါဂၤတကဆှီဘၣ်ဒ်တၢ်ဘါအလုၢ်အလၢ်အိၣ်ဝဲ အသိးအဃိအဝဲသ့ၣ်မၤသံဘူၣ်လဲၤကပာ်အသိဖိတဖၣ်တသ့ဝဲဘၣ်. လၢတၢ်န့ၣ်အဃိပှၤလ့ၤဝံဖိတဖၣ်ဘၣ်မၤအီၤလၢအဝဲသ့ၣ်အဂီၢ်, ဒီးလုၢ်ထီၣ်သိဖိတဖၣ်ဆူယွၤအအိၣ်န့ၣ်လီၤ.
18 အါန့ၢ်အန့ၣ်, ပှၤအါဂၤလၢအဟဲတ့ၢ်ဝဲလၢအ့ဖရဲၣ်, မနၤၡ့ၤ, ယံးစၣ်ကၢ်ဒီးစဘူလိၣ်အဒူၣ်တဖၣ်န့ၣ်, ကမၤကဆှီထီၣ်အသးဒ်တၢ်အလုၢ်အလၢ်အိၣ်ဝဲအသိးဒၣ်လဲာ်, အဝဲသ့ၣ်မၤဘူၣ်လဲၤကပာ်လၢတၢ်တကြၢးဝဲဘၣ်ဝဲအပူၤန့ၣ်လီၤ. စီၤပၤဃံးစကံယၤဘါထုကဖၣ်တၢ်လၢအဝဲသ့ၣ် အဂီၢ်ဒ်လၢလာ်အံၤန့ၣ်လီၤ.
19 “အိယွၤ, ပမိၢ်ပၢ်ဖံဖုလၢပျၢၤတဖၣ်အကစၢ်ယွၤဧၢ, လၢနတၢ်ဂ့ၤတၢ်ဝါဒၣ်နဲအပူၤန့ၣ်, ပျၢ်လၢ်ပှၤတဖၣ်လၢအဘူၣ်ထီၣ် ဘါထီၣ်နၤလၢအသူၣ်ဒီဖျၢၣ်သးဒီဖျၢၣ်အတၢ်ကမၣ်, ဖဲအဝဲသ့ၣ်တကဆှီဘၣ်ဒ်တၢ်အလုၢ်အလၢ်အိၣ်ဝဲအသိးအခါဒၣ်လဲာ်န့ၣ် တက့ၢ်.”
20 ယွၤစံးဆၢစီၤဃံးစကံယၤအတၢ်ထုကဖၣ်, ဒီးအဝဲပျၢ်ကွံာ်ပှၤ ဂီၢ်မုၢ်အတၢ်ကမၣ်, ဒီးတမၤဆါအဝဲသ့ၣ်ဘၣ်လီၤ.
21 လၢနွံသီအတီၢ်ပူၤပှၤဂီၢ်မုၢ်လၢအပာ်ဖှိၣ်အသးလၢဝ့ၢ်ယရူၤ ၡလ့ၣ်အပူၤ, ဒီးမၤဘူၣ်တအိၣ်ဘၣ်ဒီးကိၣ်မံၣ်လၢတၢ်သူၣ်ခုသးခုဖးဒိၣ် အပူၤန့ၣ်လီၤ. တနံၤဘၣ်တနံၤန့ၣ်, ပှၤလ့ၤဝံဖိတဖၣ်ဒီးပှၤလုၢ်တၢ်အခိၣ်တဖၣ် စံးထီၣ်ပတြၢၤယွၤလၢအဂံၢ်အဘါခဲလၢာ်န့ၣ်လီၤ.
22 စီၤဃံးစကံယၤစံးထီၣ်ပတြၢၤပှၤလ့ၤဝံဖိတဖၣ်လၢအဝဲသ့ၣ် အတၢ်သ့တၢ်ဘၣ်လၢကဆှၢတၢ်ဘူၣ်ထီၣ်ဘါထီၣ်ယွၤအဃိ န့ၣ်လီၤ.
23 ဖဲအဝဲသ့ၣ်လုၢ်ထီၣ်ယွၤ, အမိၢ်ပၢ်ဖံဖုလၢပျၢၤတဖၣ်အကစၢ်ယွၤ လၢတၢ်လုၢ်စံးထီၣ်ပတြၢၤ, လၢနွံသီအတီၢ်ပူၤဝံၤအလီၢ်ခံန့ၣ်, အဝဲသ့ၣ်ခဲလၢာ်ပာ်လီၤသကိးအသးလၢကမၤကဒီးဝဲဆူညါနွံသီ န့ၣ်လီၤ. ဒီးလၢတၢ်န့ၣ်အဃိအဝဲသ့ၣ်မၤဝဲလၢတၢ်သူၣ်ခု သးခုအပူၤန့ၣ်လီၤ.
24 စီၤပၤဃံးစကံယၤမၤဘူၣ်လီၤဂီၤဖံးဖါအဒုတကထိဒီးသိအဒု နွံကထိလၢပှၤဂီၢ်မုၢ်ကမၤသံဒီးအီၣ်ဝဲအဂီၢ်, ဒီးပဒိၣ်ပပှၢ်တဖၣ်ဟ့ၣ်အဝဲသ့ၣ်ဂီၤဖံးအဂၤအဒုတကထိဒီးသိအဒု တကလးန့ၣ်လီၤ. ပှၤလုၢ်တၢ်အခိၣ်အါဂၤမၤကဆှီထီၣ်က့ၤအသးဒ်တၢ်အလုၢ်အလၢ်အိၣ် ဝဲအသိးန့ၣ်လီၤ.
25 လၢတၢ်န့ၣ်အဃိပှၤကိးဂၤဒဲးလၢအမ့ၢ်, ကီၢ်ယူဒၤအပှၤဂီၢ်မုၢ်, ပှၤလုၢ်တၢ်အခိၣ်တဖၣ်, ပှၤလ့ၤဝံဖိတဖၣ်, ဒီးပှၤဂီၢ်မုၢ်လၢအဟဲ လၢကလံၤစိးတဖၣ်ဒီးပှၤတခီဘီမုၢ်ဖိလၢအအိၣ်ဝဲဆိးဝဲဂၢၢ် ဂၢၢ်ကျၢၤကျၢၤလၢကီၢ်အံၣ်စရ့လးဒီးကီၢ်ယူဒၤအပူၤ, သးခုဝဲဒၣ်န့ၣ်လီၤ.
26 ဝ့ၢ်ယရူၤၡလ့ၣ်ပှဲၤဝဲဒီးတၢ်သူၣ်ခုသးခု, မ့ၢ်လၢတၢ်ဒ်သိးအံၤတမၤတ့ၢ်အသးစးထီၣ်လၢစီၤဒၤဝံးအဖိခွါ စီၤပၤၡလိၤမိၤအမုၢ်နံၤတဖၣ်အပူၤဒၣ်လဲာ်အဃိန့ၣ်လီၤ.
27 ပှၤလုၢ်တၢ်အခိၣ်တဖၣ်ဒီးပှၤလ့ၤဝံဖိတဖၣ်ဃ့တၢ်ဆိၣ်ဂ့ၤလၢ ယွၤ, လၢပှၤဂီၢ်မုၢ်အဂီၢ်န့ၣ်လီၤ. လၢအဝဲအဟံၣ်အိၣ်လၢမူခိၣ်အပူၤ န့ၣ်, ကစၢ်ယွၤနၢ်ဟူတ့ၢ်အဝဲသ့ၣ်အတၢ်ထုကဖၣ်တဖၣ်ဒီးတူၢ်လိာ်အဝဲသ့ၣ် န့ၣ်လီၤ.