32
(၂စီၤပၤ ၁၈:၁၃-၃၇, ၁၉:၁၄-၁၉, ၃၅-၃၇, ၡါ.၃၆:၁-၂၂, ၃၇:၈-၃၈)
1 ဖဲတၢ်မၤအသးတဖၣ်အံၤလၢအမ့ၢ်ဝဲ, စီၤပၤဃံးစကံယၤမၤယွၤ အတၢ်လၢတၢ်သူၣ်တီသးရၤဝံၤအလီၢ်ခံန့ၣ်, ကီၢ်အၤၡူၢ်အစီၤပၤဖးဒိၣ်စၤနဃ့ရံးဟဲထီၣ်ဒုးကီၢ်ယူဒၤ န့ၣ်လီၤ. အဝဲကဝီၤဃာ်ကယဲၢ်ဝ့ၢ်တဖၣ်ခဲလၢာ်လၢအအိၣ်ဒီးတိာ်ဧိၤတာ်ဧိၤ ဒီးဟ့ၣ်လီၤအကလုၢ်ဒ်သိးအသုးမုၢ်ကမၤလီၤပှီၢ်ဝ့ၢ်ခိၣ်ဒူတဖၣ် အဂီၢ်န့ၣ်လီၤ.
2 တုၤစီၤပၤဃံးစကံယၤထံၣ်ဘၣ်ဝဲလၢစီၤပၤစၤနဃ့ရံးသါကဟဲ ထီၣ်ဒုးစ့ၢ်ကီးဝ့ၢ်ယရူၤၡလ့ၣ်န့ၣ်
3 အဝဲဒီးအပဒိၣ်ပပှၢ်တဖၣ်ပာ်လီၤအသးလၢကဆွံတံာ်ထံထီၣ်ပၢၢ်တဖၣ် လၢအအိၣ်လၢဝ့ၢ်ချၢ, ဒ်သိးကတြီဃာ်ပှၤအၤၡူၢ်ဖိတဖၣ် လၢတၢ်မၤန့ၢ်ထံ, ဖဲအဝဲသ့ၣ်ဘူးထီၣ်ဒီးဝ့ၢ်ယရူၤၡလ့ၣ်န့ၣ်လီၤ.
4 ပဒိၣ်ပပှၢ်တဖၣ်မၢပှၤဂီၢ်မုၢ်အါဂၤဟးထီၣ်ဆူဝ့ၢ်အချၢဒီးဆွံ တံာ်ကယဲၢ်ထံထီၣ်ပၢၢ်တဖၣ်ဒ်သိးထံသုတဟဲယွၤထီၣ်လၢအပူၤတဂ့ၤ အဂီၢ်န့ၣ်လီၤ.
5 စီၤပၤမၤခၢၣ်သနၢၣ်ထီၣ်က့ၤဝ့ၢ်အတၢ်တြီဆၢဒုၣ်ဒါအလီၢ်တဖၣ်, ခီဖျိတၢ်ဘှီဂ့ၤက့ၤဝ့ၢ်ခိၣ်ဒူ, ဘှီထီၣ်ပှၤခိးတၢ်အလီၢ်တဖၣ်လၢအဖီခိၣ်, ဒီးဘှီထီၣ်ကဒီးတၢ်ဒူၣ်လၢတၢ်ချၢတဒူၣ်န့ၣ်လီၤ. တကးဒံးဘၣ်, အဝဲဘှီဂ့ၤက့ၤတၢ်တြီဆၢဒုၣ်ဒါအလီၢ်တဖၣ်လၢအဘၣ် တၢ်ဘှီထီၣ်တ့ၢ်အီၤဖဲဝ့ၢ်ယရူၤၡလ့ၣ်အတၢ်လီၢ်လၢအလီၢ်လံၤတကပၤ အမုၢ်ထီၣ်, တၢ်လီၢ်လၢတၢ်မၤဃူမၤပှဲၤက့ၤအီၤအပူၤန့ၣ်လီၤ. အဝဲမၢပှၤမၤစ့ၢ်ကီးဘီတဖၣ်ဒီးကတီၤတဖၣ်အါအါဂီၢ်ဂီၢ်န့ၣ်လီၤ.
6 ကယဲၢ်ပိာ်ခွါခဲလၢာ်လၢဝ့ၢ်ပူၤန့ၣ်အဝဲပာ်လီၤဝဲလၢသုးမုၢ် အခိၣ်အနၢ်တဖၣ်အတၢ်ပၢတၢ်ဆှၢအဖီလာ်ဒီးမၢအဝဲသ့ၣ်အိၣ်ဖှိၣ်ရိ ဖှိၣ်လၢတၢ်လီၢ်လီၤပျီအိၣ်ဖဲဝ့ၢ်အတြဲၤကပၤန့ၣ်လီၤ. စီၤပၤစံးဘၣ်အဝဲသ့ၣ်,
7 “ပာ်လီၤသုသးသပှၢ်ပှၢ်ဒီးနာ်န့ၢ်လီၤသုသးတက့ၢ်. ပျံၤဘၣ်ကီၢ်အၤရူၢ်အစီၤပၤဖးဒိၣ်မ့ၢ်ဂ့ၤ, အသုးမုၢ်လၢအဝဲဆှၢဝဲမ့ၢ်ဂ့ၤန့ၣ်တဂ့ၤ. လၢပအိၣ်တခီန့ၣ်ပအိၣ်ဒီးတၢ်စိတၢ်ကမီၤအါန့ၢ်ဒံး, တၢ်စိတၢ်ကမီၤလၢအအိၣ်ဒီးအီၤတက့ၢ်လီၤ.
8 အဝဲအိၣ်ဒီးပှၤဟီၣ်ခိၣ်ဖိအတၢ်စိတၢ်ကမီၤ, မ့မ့ၢ်ပဝဲပအိၣ်ဒီးယွၤ, ပကစၢ်ယွၤလၢကမၤစၢၤပှၤဒီးဒုးန့ၢ်ပတၢ်ဒုးတဖၣ်န့ၣ်လီၤ.” ပှၤဂီၢ်မုၢ်ဘၣ်တၢ်ဟ့ၣ်ဂံၢ်ဟ့ၣ်ဘါအီၤလၢအဝဲသ့ၣ်အစီၤပၤအတၢ် ကတိၤတဖၣ်အံၤန့ၣ်လီၤ.
9 တယံာ်ဘၣ်ဖဲစီၤစၤနဃ့ရံးဒီးပှၤသုးမုၢ်အိၣ်ဒံးဝဲဖဲဝ့ၢ် လၤကံၣ်အခါန့ၣ်, အဝဲဆှၢလီၤတၢ်ကစီၣ်လၢလာ်အံၤဆူစီၤဃံးစကံယၤဒီးကီၢ်ယူ ဒၤအပှၤဂီၢ်မုၢ်လၢအအိၣ်ဒီးအီၤလၢဝ့ၢ်ယရူၤၡလ့ၣ်အပူၤအအိၣ် န့ၣ်လီၤ.
10 “ယၤ, စီၤစၤနဃ့ရံး, ကီၢ်အၤၡူၢ်အစီၤပၤဖးဒိၣ်သံကွၢ်သု, တၢ်မနုၤတမံၤဟ့ၣ်သုဝဲပှၤဂီၢ်မုၢ်တၢ်နာ်န့ၢ်လီၤသးလၢ, သုကအိၣ်ဒံးဒၣ်တၢ်လၢဝ့ၢ်ယရူၤၡလ့ၣ်အပူၤဖဲတၢ်ကဝီၤဃာ် သုန့ၣ်လဲၣ်.
11 စီၤဃံးစကံယၤတဲဘၣ်သုလၢယွၤ, သုကစၢ်ယွၤကအုၣ်က့ၤခီၣ်က့ၤ သုလၢပတၢ်စိတၢ်ကမီၤအဖီလာ်, ဘၣ်ဆၣ်မ့ၢ်ဒၣ်စီၤဃံးစကံယၤလီန့ၢ်သုဒီးကပျဲသုသံကွံာ်လၢ တၢ်သူၣ်ဝံၤသၣ်စ့ၤဒီးတၢ်သးသူထံအပူၤန့ၣ်လီၤ.
12 အဝဲမ့ၢ်ပှၤတဂၤလၢအမၤဟးဂီၤကွံာ်ယွၤအတၢ်လီၢ်စီဆှံတဖၣ်ဒီး တၢ်လုၢ်လီၢ်တဖၣ်ဝံၤဒီးတဲဘၣ်ကီၢ်ယူဒၤဒီးဝ့ၢ်ယရူၤၡလ့ၣ်အပှၤ ဂီၢ်မုၢ်လၢကဘူၣ်ထီၣ်ဘါထီၣ်တၢ်ဒီးဆိၣ်ကဲၤတၢ်နၢမူထဲလၢတၢ် လုၢ်လီၢ်တခါဧိၤန့ၣ်လီၤ.
13 မ့ၢ်သုတသ့ၣ်ညါဘၣ်လၢယမိၢ်ပၢ်ဖံဖုလၢပျၢၤတဖၣ်ဒီးယၤ, ပမၤဘၣ်တ့ၢ်ပှၤကလုာ်အဂၤတဖၣ်အပှၤဂီၢ်မုၢ်ဒ်လဲၣ်န့ၣ်ဘၣ်ဧါ. မ့ၢ်ပှၤကလုာ်အဂၤတဖၣ်အကစၢ်တဖၣ်အုၣ်က့ၤခီၣ်က့ၤအပှၤဂီၢ်မုၢ်လၢ ကီၢ်အၤၡူၢ်အစီၤပၤဖးဒိၣ်အစုပူၤန့ၣ်ဧါ.
14 ကယဲၢ်ထံကီၢ်တဖၣ်န့ၣ်အကစၢ်တဖၣ်အကျါတဂၤဂၤမၤပူၤဖျဲးတ့ၢ်အထံ အကီၢ်လၢပစုပူၤအခါဖဲလဲၣ်. မ့မ့ၢ်ဒ်န့ၣ်အဃိ, တၢ်လၢအဒုးဆိကမိၣ်သုလၢသုကစၢ်ကမၤပူၤဖျဲးသုန့ၣ်မ့ၢ်မနုၤလဲၣ်.
15 ခဲကနံၣ်အံၤ, ပျဲစီၤဃံးစကံယၤလီန့ၢ်သုမ့ၢ်ဂ့ၤ, ဆှၢကမၣ်သုမ့ၢ်ဂ့ၤဒ်န့ၣ်တဂ့ၤ, နာ်အီၤတဂ့ၤ. အဂ့ၢ်ဒ်အံၤ, ပှၤတကလုာ်ဂ့ၤတကလုာ်ဂ့ၤန့ၣ်အကစၢ်လၢအမၤပူၤဖျဲးအပှၤဂီၢ်မုၢ် လၢကီၢ်စူၤရံအစီၤပၤဖးဒိၣ်အစုပူၤကသ့တအိၣ်နီတဂၤဘၣ်. လၢတၢ်န့ၣ်အဃိသုဝဲသုကစၢ်အံၤမၤပူၤမၤဖျဲးသုတသ့လ့ၤတက့ၤဘၣ်.”
16 ကီၢ်အၤၡူၢ်အပဒိၣ်ပပှၢ်တဖၣ်စံးတၢ်လၢအအၢန့ၢ်ဒံးအန့ၣ်, ဘၣ်ဃးဒီးယွၤ, ကစၢ်ယွၤဒီးယွၤအခ့အပှၤစီၤဃံးစကံယၤအဂ့ၢ် န့ၣ်လီၤ.
17 လံာ်ပရၢလၢစီၤပၤဖးဒိၣ်ကွဲးတ့ၢ်ဝဲန့ၣ်, မ့ၢ်တၢ်တၤတၢ်ဒီးယွၤ, အံၣ်စရ့လးအကစၢ်ယွၤန့ၣ်လီၤ. တၢ်ကွဲးစံးဝဲ, “ပှၤကလုာ်တဖၣ်အကစၢ်တဖၣ်တမၤပူၤမၤဖျဲးအဝဲသ့ၣ်အပှၤဂီၢ်မုၢ် လၢယတၢ်စိတၢ်ကမီၤအဖီလာ်ဘၣ်. ဒီးဒ်န့ၣ်အသိးစီၤဃံးစကံၤယၤမၤပူၤမၤဖျဲးအပှၤဂီၢ်မုၢ်လၢ ယစုပူၤတသ့ဘၣ်.
18 ပဒိၣ်ပပှၢ်တဖၣ်ကိးသတြီထီၣ်တၢ်အံၤလၢဧ့ၤဘြံၤ အကျိာ်, ဒ်သိးကမၤပျံၤမၤဖုးဒီးမၤသးဟးဂီၤဝ့ၢ်ယရူၤၡလ့ၣ်အပှၤဂီၢ် မုၢ်လၢအအိၣ်လၢဝ့ၢ်ခိၣ်ဒူအဖီခိၣ်လၢမၤန့ၢ်ဝ့ၢ်ကသ့ညီကဒၣ် အဂီၢ်န့ၣ်လီၤ.
19 အဝဲသ့ၣ်ကတိၤတၢ်ဘၣ်ဃးဒီးဝ့ၢ်ယရူၤၡလ့ၣ်အကစၢ်ယွၤအဂ့ၢ်, တမံၤဃီဒ်အဝဲသ့ၣ်ကတိၤတၢ်ဘၣ်ဃးဒီးပှၤဂီၢ်မုၢ်အဂၤတဖၣ်အကစၢ် တဖၣ်လၢအမ့ၢ်တၢ်ဂီၤတၢ်ဖီၣ်တဖၣ်လၢအဘၣ်တၢ်မၤအီၤလၢပှၤ ကညီအစုတဖၣ်အသိးန့ၣ်လီၤ.
20 အန့ၣ်ဒီးစီၤပၤဃံးစကံယၤဒီးစီၤအၤမိးအဖိခွါဝံယၡါယၤ ဘါထုကဖၣ်တၢ်ဆူကစၢ်ယွၤအအိၣ်ဒီးကိးထီၣ်အီၤလၢတၢ်မၤစၢၤ အဂီၢ်န့ၣ်လီၤ.
21 ယွၤဆှၢလီၤအကလူးတဂၤလၢအမၤသံကွံာ်ကီၢ်အၤၡူၢ်အသုးဖိ တဖၣ်ဒီးအသုးခိၣ်သုးနၢ်တဖၣ်န့ၣ်လီၤ. လၢတၢ်န့ၣ်အဃိကီၢ်အၤၡူၢ်အစီၤပၤဖးဒိၣ်က့ၤကဒါက့ၤဆူ ကီၢ်အၤၡူၢ်လၢတၢ်မဲာ်ဆှးအပူၤန့ၣ်လီၤ. ဘၣ်မုၢ်တနံၤဖဲ အဝဲအိၣ်လၢအကစၢ်အတၢ်လုၢ်ဟံၣ်အပူၤအခါန့ၣ်, အဝဲအဖိခွါတနီၤမၤသံကွံာ်အီၤလၢအဝဲသ့ၣ်အနးတဖၣ်န့ၣ်လီၤ.
22 လၢကျဲဒ်သိးအံၤန့ၣ်, ယွၤမၤထူၣ်ဖျဲးစီၤပၤဃံးစကံယၤဒီး ဝ့ၢ်ယရူၤၡလ့ၣ်အပှၤဂီၢ်မုၢ်လၢကီၢ်အၤၡူၢ်အစီၤပၤဖးဒိၣ်စီၤ စၤနဃ့ရံးအစိကမီၤအဖီလာ်, ဒီးလၢအဝဲသ့ၣ်အဒုၣ်အဒါအဂၤတဖၣ်အစုပူၤစ့ၢ်ကီးန့ၣ်လီၤ. အဝဲပျဲပှၤဂီၢ်မုၢ်အိၣ်ဆိးဃုာ်ဒီးကယဲၢ်ထံကီၢ်အိၣ်ခိၣ်အိၣ် ဃၢၤတဖၣ်လၢတၢ်ဃူတၢ်ဖိးအပူၤန့ၣ်လီၤ.
23 ပှၤဂီၢ်မုၢ်အါမးဟဲဆူဝ့ၢ်ယရူၤၡလ့ၣ်, ဟဲစိာ်ဃုာ်ဒီးတၢ်လုၢ် တဖၣ်ဆူယွၤဒီးတၢ်ဟ့ၣ်တဖၣ်ဆူစီၤဃံးစကံယၤအအိၣ်တုၤဒၣ်လဲာ်, စးထီၣ်ဖဲန့ၣ်, ပှၤကလုာ်ခဲလၢာ်ပာ်လၤပာ်ကပီၤစီၤဃံးစကံယၤ န့ၣ်လီၤ.
(၂စီၤပၤ ၂၀:၁-၃, ၁၂-၁၉, ယၡါ. ၃၈:၁-၃, ၃၉:၁-၈)
24 ဖဲတၢ်ဆၢကတီၢ်အံၤန့ၣ်, စီၤပၤဃံးစကံယၤဆါထီၣ်ဝဲဘူးလၢ အကသံန့ၣ်လီၤ. အဝဲဃ့ဘါထုကဖၣ်တၢ်ဒီးယွၤဟ့ၣ်လီၤအီၤတၢ်ပနီၣ်တမံၤလၢအဝဲ ကအိၣ်ဆူၣ်ထီၣ်က့ၤဝဲန့ၣ်လီၤ.
25 ဘၣ်ဆၣ်စီၤပၤဃံးစကံယၤပာ်ထီၣ်ထီအသးကဲာ်ဆိးလၢကဒုးနဲၣ် အတၢ်စံးဘျုးဆၢက့ၤလၢ, တၢ်လၢယွၤမၤတ့ၢ်လၢအဂီၢ်အဃိန့ၣ်လီၤ. ဒီးကီၢ်ယူဒၤဒီးဝ့ၢ်ယရူၤၡလ့ၣ်တူၢ်ဘၣ်တၢ်လၢတၢ်န့ၣ်အဃိလီၤ.
26 ဘၣ်ဆၣ်ဒီးလၢခံကတၢၢ်န့ၣ်, စီၤဃံးစကံယၤဒီးဝ့ၢ်ယရူၤၡလ့ၣ် အပှၤဂီၢ်မုၢ်ဆီၣ်လီၤအသး, ဒီးလၢတၢ်န့ၣ်အဃိ, တချုးဒံးဘၣ်လၢစီၤဃံးစကံယၤသံဝံၤန့ၣ်ယွၤတစံၣ် ညီၣ်ဘၣ်ပှၤဂီၢ်မုၢ်ဘၣ်လီၤ.
27 စီၤပၤဃံးစကံယၤထူးထီၣ်တီၤထီၣ်ဝဲဒိၣ်မးဒီးပှၤကိးဂၤ ဒဲးပာ်လၤပာ်ကပီၤအီၤန့ၣ်လီၤ. အဝဲဘှီထီၣ်အတၢ်ပာ်ဖှိၣ်အဒၢးတဖၣ်လၢအထူ, စ့, လၢၢ်လုၢ်ပှ့ၤဒိၣ်တဖၣ်, တၢ်နၢမူတဖၣ်, ကတီၤတဖၣ်ဒီးတၢ်ပီးတၢ်လီလုၢ်ဒိၣ်ပှ့ၤဒိၣ်တဖၣ်အဂီၢ်န့ၣ်လီၤ.
28 အါန့ၢ်အန့ၣ်, အဝဲဘှီထီၣ်စ့ၢ်ကီးဒီးတၢ်ပာ်ဖှိၣ်အဟံၣ်တဖၣ်လၢ အဘုဧိၤဟုဧိၤ, စပံးထံဒီးသ့ၣ်စၤယံးအသိအဂီၢ်, တၢ်အိၣ်အလီၢ်တဖၣ်လၢအဂီၤဘုၣ်ဂီၤဖံးအဂီၢ်, ဒီးကရၢတဖၣ်လၢသိတဖၣ်အဂီၢ်န့ၣ်လီၤ.
29 လၢကယဲၢ်တၢ်တဖၣ်အံၤအမဲာ်ညါ, ကစၢ်ယွၤဟ့ၣ်လီၤအီၤသိဒီးဂီၤ ဘုၣ်ဂီၤဖံးဒီးတၢ်ထူးတၢ်တီၤအဂၤအါအါဂီၢ်ဂီၢ်တုၤဒၣ်လဲာ်အ ဝဲဘှီထီၣ်ဝ့ၢ်အါဖျၢၣ်န့ၣ်လီၤ.
30 ပှၤလၢအမၤတံာ်တၢၤကံဃိၣ်အထံထီၣ်ပၢၢ်ဒီးဒုးယွၤတရံးထံ ကျိၤဒ်သိးကယွၤလီၤခီဖျိထံပီၤတပီၤဆူတၢ်လီၢ်တတီၤလၢဝ့ၢ် ယရူၤၡလ့ၣ်အခိၣ်ဒူတဖၣ်အသးကံၢ်ပူၤန့ၣ်, မ့ၢ်စီၤပၤဃံးစကံယၤလီၤ. ကယဲၢ်တၢ်လၢစီၤဃံးစကံယၤမၤဝဲတမံၤလၢ်လၢ်န့ၣ်ကဲထီၣ်လိၣ်ထီၣ် ဝဲ
31 ဒီးဖဲကီၢ်ဘၤဘူၤလိၣ်အမီၣ်သီတဖၣ်ဟဲတ့ၢ်ဝဲလၢကဃုသ့ၣ်ညါတၢ် မၤအသးလီၤတိၢ်လီၤဆီလၢအကဲထီၣ်တ့ၢ်လၢထံကီၢ်အပူၤအခါဒၣ် လဲာ်န့ၣ်, ကစၢ်ယွၤပျဲစီၤဃံးစကံယၤလၢကမၤဒ်အတၢ်ဘၣ်အသးဒၣ်ဝဲဒ်သိး အကမၤကွၢ်အသကဲးပဝးအဂီၢ်ဧိၤန့ၣ်လီၤ.
(၂စီၤပၤ ၂၀:၂၀-၂၁)
32 ကယဲၢ်တၢ်ဂ့ၢ်အဂုၤအဂၤတဖၣ်လၢစီၤပၤဃံးစကံယၤမၤတ့ၢ်ဝဲဒီး အဝဲအတၢ်အဲၣ်ထူအဲၣ်ယွၤအဂ့ၢ်န့ၣ်, ဘၣ်တၢ်ကွဲးနီၣ်ကွဲးဃါအီၤလၢလံာ်စီၤအၤမိၣ်အဖိခွါဝံယၡါ ယၤအတၢ်ထံၣ်လၢညါခီအပူၤဒီးလၢကီၢ်ယူဒၤဒီးကီၢ်အံၣ်စရ့လး အစီၤပၤတဖၣ်အလံာ်တၢ်စံၣ်စိၤတဲစိၤအပူၤန့ၣ်လီၤ.
33 စီၤဃံးစကံယၤသံဝဲဒီးဘၣ်တၢ်ခူၣ်လီၤကွံာ်အီၤလၢစီၤပၤ အတၢ်သွၣ်ခိၣ်တဖၣ်အတၢ်လီၢ်လၢထးခီတတီၤန့ၣ်လီၤ. ကယဲၢ်ကီၢ်ယူဒၤဒီးဝ့ၢ်ယရူၤၡလ့ၣ်အပှၤဂီၢ်မုၢ်ဟ့ၣ်ထီၣ်အတၢ်ယူး ယီၣ်အီၤဒိၣ်ဒိၣ်မုၢ်မုၢ်ဖဲအဝဲသံန့ၣ်လီၤ. အဝဲအဖိခွါစီၤမနၤၡ့ၤကဲထီၣ်စီၤပၤလၢအလီၢ်န့ၣ်လီၤ.