29
(၂စီၤပၤ ၁၈:၁-၃)
1 စီၤဃံးစကံယၤကဲထီၣ်ကီၢ်ယူဒၤအစီၤပၤဖဲအသးအိၣ်ခံဆံယဲၢ် နံၣ်, ဒီးအဝဲပၢတ့ၢ်တၢ်လၢဝ့ၢ်ယရူၤၡလ့ၣ်အပူၤခံဆံခွံနံၣ်န့ၣ်လီၤ. အဝဲအမိၢ်မ့ၢ်ဝဲစီၤစကၤရယၤအဖိမုၣ်, နီၢ်အဘံယၤန့ၣ်လီၤ.
2 ပိာ်ထွဲထီၣ်အဝဲအပၢ်ဖးဒိၣ်လၢပျၢၤစီၤပၤစီၤဒၤဝံးအဒိ အတဲာ်အခံန့ၣ်, အဝဲမၤတ့ၢ်တၢ်လၢအဘၣ်ယွၤအသးန့ၣ်လီၤ.
3 ဖဲစီၤဃံးစကံယၤကဲထီၣ်စီၤပၤအခီၣ်ထံးတနံၣ်, လၢလါအခီၣ်ထံးတလါအပူၤန့ၣ်, အဝဲအိးထီၣ်ကဒါက့ၤယွၤအတၢ်လုၢ် ဟံၣ်အတြဲၤတဖၣ်, ဒီးမၢပှၤဘှီဂ့ၤထီၣ်က့ၤအီၤန့ၣ်လီၤ.
4 အဝဲကိးဖှိၣ်ဃီၤပှၤတဖုလၢအမ့ၢ်ပှၤလုၢ်တၢ်အခိၣ်တဖၣ်ဆူယွၤ အတၢ်လုၢ်ဟံၣ်အဂၢၤလၢမုၢ်ထီၣ်တကပၤ, ဒီးကတိၤတၢ်ဒီးအဝဲသ့ၣ်ဖဲန့ၣ်လီၤ.
5 အဝဲစံးဝဲ, “သုဝဲပှၤလ့ၤဝံဖိတဖၣ်သုကဘၣ်ပာ်စီဆှံထီၣ် သုသးဒီးမၤကဆှီထီၣ်ယွၤ, သုမိၢ်ပၢ်ဖံဖုလၢပျၢၤတဖၣ်အကစၢ်ယွၤအတၢ်လုၢ်ဟံၣ်န့ၣ်လီၤ.
6 ပမိၢ်ပၢ်ဖံဖုလၢပျၢၤတဖၣ်တသူၣ်တီသးရၤတ့ၢ်ဒီးယွၤ, ပကစၢ်ယွၤဘၣ်. ဒီးမၤတ့ၢ်တၢ်လၢအတဘၣ်ယွၤအသးန့ၣ်လီၤ. အဝဲသ့ၣ်လဲၤသဒၣ်ကွံာ်အီၤဒီးဃၣ်ကွံာ်အမဲာ်လၢတၢ်လီၢ်ဖဲယွၤ အိၣ်ဝဲဆိးဝဲန့ၣ်လီၤ.
7 အဝဲသ့ၣ်ကးတံၢ်ယွၤအတၢ်လုၢ်ဟံၣ်အတြဲၤတဖၣ်, ပျဲမ့ၣ်အူဒၢတဖၣ်လီၤပံာ်ကွံာ်, ဒီးတဆိၣ်ကဲၤထီၣ်တၢ်နၢမူ မ့ၢ်ဂ့ၤ, လုၢ်ထီၣ်ပာ်ထီၣ်တၢ်လုၢ်တဖၣ်မ့ၢ်ဂ့ၤ, လၢကီၢ်အံၣ်စရ့လးအကစၢ်ယွၤအတၢ်လုၢ်ဟံၣ်အပူၤန့ၣ်ဘၣ်.
8 လၢတၢ်အံၤအဃိယွၤသးထီၣ်ဘၣ်ကီၢ်ယူဒၤဒီးဝ့ၢ်ယရူၤၡလ့ၣ်, ဒီးတၢ်လၢယွၤမၤဘၣ်အဝဲသ့ၣ်န့ၣ်ဒုးကမၢကမၣ်မၤပျံၤမၤဖုး ပှၤကိးဂၤဒဲးန့ၣ်လီၤ. သုသ့ၣ်ညါတၢ်အံၤဂ့ၤဂ့ၤဘၣ်ဘၣ်လီၤ.
9 ပပၢ်တဖၣ်ဘၣ်တၢ်မၤသံကွံာ်အီၤလၢတၢ်ဒုးတၢ်ယၤအပူၤ, ဒီးပမါတဖၣ်ဒီးပဖိတဖၣ်ဘၣ်တၢ်စိာ်ကွံာ်အီၤဒ်ပှၤဘၣ်တၢ်စၢဃာ် တဖၣ်အသိးန့ၣ်လီၤ.
10 ဒီးခဲကနံၣ်အံၤယပာ်လီၤယသးလၢယကမၤတၢ်အၢၣ်လီၤအီလီၤတမံၤ ဒီးယွၤ, အံၣ်စရ့လးအကစၢ်ယွၤ, ဒ်သိးအဝဲသုတသးထီၣ်ဘၣ်ပှၤလၢၤတဂ့ၤန့ၣ်လီၤ.
11 ယဖိခွါသ့ၣ်ဧၢ, မၤလၢာ်တၢ်ဆၢကတီၢ်နီတစဲးတဂ့ၤ. သုမ့ၢ်ပှၤလၢယွၤဃုထၢတ့ၢ်အီၤလၢကဆူးကဲၤထီၣ်တၢ်နၢမူ ဆူအအိၣ်, ဒီးလၢကဆှၢပှၤဂီၢ်မုၢ်လၢတၢ်ဘူၣ်ထီၣ်ဘါထီၣ်အီၤ အဂီၢ်န့ၣ်လီၤ.
12 ဖဲန့ၣ်ပှၤလ့ၤဝံဖိတဖၣ်လၢအအိၣ်ဖှိၣ်ရိဖှိၣ်မ့ၢ်ဝဲလၢပှၤ ကဃးဖိအဒူၣ်ထၢန့ၣ်, စီၤဧမၤဝဲအဖိခွါစီၤမၤဃးဒီးစီၤဧစၤရယၤ အဖိခွါစီၤယိၤအ့လး, လၢပှၤမရၤရံအဒူၣ်ထၢန့ၣ်, စီၤဧၤဘ့းဒံးအဖိခွါစီၤကံၣ်, ဒီးစီၤယဟးလ့ၤလ့လးအဖိ ခွါစီၤဧစၤရယၤ, လၢပှၤက့ရၡိၣ်အဒူၣ်ထၢန့ၣ်, စီၤစံးမၤအဖိခွါစီၤယိၤအၤ, ဒီးစီၤယိၤအၤအဖိခွါစီၤဧ့ၤဒ့ၣ်,
13 လၢပှၤအလံစဖၣ်အဒူၣ်ထၢန့ၣ်, စီၤၡံးမရံဒီးစီၤယံးအ့လး, လၢပှၤအၤစာ်အဒူၣ်ထၢန့ၣ်စီၤစကၤရယၤဒီးစီၤမးတၤနယၤ,
14 လၢပှၤဟ့မၣ်အဒူၣ်ထၢန့ၣ်, စီၤယဃ့အ့လးဒီးစီၤၡံးမံၤ, လၢပှၤယဒူသူၣ်အဒူၣ်ထၢန့ၣ်, စီၤၡမါယၤဒီးစီၤဧူးစံၤအ့လးန့ၣ်လီၤ.
15 ပှၤတဖၣ်အံၤဒုးအိၣ်ဖှိၣ်ရိဖှိၣ်ပှၤလ့ၤဝံဖိသကိးသကိးဒီး အီၤတဖၣ်, ဒီးအဝဲသ့ၣ်ခဲလၢာ်မၤကဆှီထီၣ်အသးဒ်တၢ်အလုၢ်အလၢ်အိၣ်ဝဲအသိး န့ၣ်လီၤ. အန့ၣ်ဝံၤဒီး, ဒ်စီၤပၤမၤလိာ်တ့ၢ်အဝဲ သ့ၣ်တၢ်လၢကမၤဝဲအသိးန့ၣ်, အဝဲသ့ၣ်စးထီၣ်မၤကဆှီယွၤအတၢ် လုၢ်ဟံၣ်ဒ်တၢ်အလုၢ်အလၢ်အိၣ်ဝဲအသိး, လီၤပလိာ်ဒီးယူဒၤအတၢ်သိၣ်တၢ်သီလၢယွၤဟ့ၣ်လီၤဝဲန့ၣ်လီၤ.
16 ပှၤလုၢ်တၢ်အခိၣ်တဖၣ်လဲၤနုာ်လီၤဆူယွၤအတၢ်လုၢ်ဟံၣ်အပူၤလၢ ကမၤကဆှီထီၣ်အီၤအဂီၢ်, ဒီးအဝဲသ့ၣ်စိာ်ထီၣ်ကွံာ်တၢ်လၢအတကဆှီဘၣ်ဒ်တၢ်အလုၢ်အလၢ်အိၣ် ဝဲအသိးတဖၣ်ခဲလၢာ်ဆူယွၤအတၢ်လုၢ်ဟံၣ်အဂၢၤပူၤန့ၣ်လီၤ. ပှၤလ့ၤဝံဖိတဖၣ်စိာ်ထီၣ်ကွံာ်တၢ်သ့ၣ်တဖၣ်န့ၣ်ခဲလၢာ်ဖဲန့ၣ်, ဒီးလဲၤစိာ်ဝဲဆူဝ့ၢ်အချၢလၢကံဒြိၣ်အတၢ်တြီၤပူၤန့ၣ်လီၤ.
17 တၢ်မၤဘၣ်တၢ်စးထီၣ်မၤအီၤလၢလါအခီၣ်ထံးတလါ, လါထီၣ်တသီ, ဒီးလၢလါထီၣ်ဃိးသီတသီအနံၤန့ၣ်, အဝဲသ့ၣ်မၤဝံၤကွံာ်အီၤခဲလၢာ်, ဃုာ်ဒီးဒၢးတၢ်မဲာ်ညါလၢတၢ် လဲၤနုာ်ဆူယွၤအတၢ်လုၢ်ဟံၣ်န့ၣ်လီၤ. ဝံၤဒီးအဝဲသ့ၣ်မၤကဒီးတၢ်ဆူညါဃိးသီ, တုၤလၢလါထီၣ်တဆံ ဃုသီအနံၤ, လၢတၢ်ဘူၣ်ထီၣ်ဘါထီၣ်အဂီၢ်န့ၣ်လီၤ.
18 ပှၤလ့ၤဝံဖိတဖၣ်ဟ့ၣ်ထီၣ်က့ၤတၢ်ပာ်ဖျါဒ်လၢလာ်အံၤဆူစီၤပၤ ဃံးစကံယၤအအိၣ်န့ၣ်လီၤ. “ပမၤကဆှီထီၣ်က့ၤယွၤအတၢ်လုၢ်ဟံၣ်ဒီတဖျၢၣ်ညါဒ်တၢ်အလုၢ်အလၢ် အိၣ်ဝဲအသိးဝံၤလံဝဲ, ဃုာ်ဒီးတၢ်လုၢ်လီၢ်လၢတၢ်လုၢ်မ့ၣ်အူတဖၣ်အဂီၢ်, စီၢ်နီၤခိၣ်လၢတၢ်ပာ်ကိၣ်စီဆှံအဂီၢ်ဒီးကယဲၢ်တၢ်အဃၢၤအဃိၢ် ခဲလၢာ်န့ၣ်လီၤ.
19 ကယဲၢ်တၢ်အဃၢၤအဃိၢ်လၢစီၤပၤအၤဃးစိာ်ကွံာ်တ့ၢ်ဖဲနံၣ်တဖၣ်လၢ အဝဲတသးတီဒီးကစၢ်ယွၤအကတီၢ်န့ၣ်, ပဟဲက့ၤစိာ်ကဒါက့ၤစ့ၢ်ကီးဒီးပပာ်စီဆှံထီၣ်ကဒါက့ၤအီၤ ဝံၤလံ. တၢ်န့ၣ်တဖၣ်ခဲလၢာ်အိၣ်ဝဲလၢယွၤအတၢ်လုၢ်လီၢ်အမဲာ်ညါန့ၣ် လီၤ.”
20 လၢတၢ်တမၤယံာ်မၤနီၢ်သးအပူၤန့ၣ်, စီၤပၤဃံးစကံယၤကိးဖှိၣ် ဝ့ၢ်အပှၤတူၢ်ဒိၣ်ကီၤဒိၣ်တဖၣ်, ဒီးအဝဲသ့ၣ်လဲၤသကိးဝဲဆူယွၤအတၢ်လုၢ်ဟံၣ်န့ၣ်လီၤ.
21 အဝဲသ့ၣ်လဲၤစိာ်ဂီၤဖံးဖါနွံဒု, သိနွံဒု, သိဖိနွံဒုဒီးမဲာ်တဲးလဲးနွံဒုဒ်တၢ်လုၢ်တၢ်ပာ်တမံၤအဆိး လၢကစိာ်ထီၣ်ကွံာ်စီၤပၤအဟံၣ်ဖိဃီဖိတဖၣ်ဒီးကီၢ်ယူဒၤ အပှၤဂီၢ်မုၢ်အတၢ်ဒဲးဘးတဖၣ်အဂီၢ်ဒီးလၢတၢ်မၤကဆှီထီၣ် ယွၤအတၢ်လုၢ်ဟံၣ်အဂီၢ်န့ၣ်လီၤ. စီၤပၤစံးဘၣ်ပှၤလုၢ်တၢ်အခိၣ်တဖၣ်လၢအမ့ၢ်စီၤအၤဟရိၣ်အစၢၤ အသွဲၣ်လၢကလုၢ်ထီၣ်ဆၣ်ဖိကီၢ်ဖိတဖၣ်လၢတၢ်လုၢ်လီၢ်အဖီခိၣ်ဒ် တၢ်လုၢ်တၢ်ပာ်တဖၣ်အသိးန့ၣ်လီၤ.
22 အဆိကတၢၢ်ပှၤလုၢ်တၢ်အခိၣ်တဖၣ်မၤသံဂီၤဖံးဖါတဖၣ်, ဝံၤဒီးသိတဖၣ်, ဝံၤဒီးသိဖိတဖၣ်ဒီးဖှံတၢ်လုၢ်တၢ်ပာ်တမံၤ စုာ်စုာ်အသွံၣ်လၢတၢ်လုၢ်လီၢ်အဖီခိၣ်န့ၣ်လီၤ.
23 လၢခံကတၢၢ်အဝဲသ့ၣ်လဲၤစိာ်မဲာ်တဲးလဲးတဖၣ်ဆူစီၤပၤဒီးဆူ ပှၤဘူၣ်တၢ်ဘါတၢ်အဂၤတဖၣ်အအိၣ်ဒီးအဝဲသ့ၣ်ပာ်ထီၣ်အစုလၢမဲာ် တဲးလဲးတဖၣ်အလိၤန့ၣ်လီၤ.
24 ဝံၤဒီးပှၤလုၢ်တၢ်အခိၣ်တဖၣ်မၤသံကွံာ်မဲာ်တဲးလဲးတဖၣ်ဒီးလူ လီၤအသွံၣ်, လၢတၢ်လုၢ်လီၢ်အလိၤဒ်တၢ်လုၢ်တၢ်ပာ်တမံၤအသိးလၢကစိာ်ထီၣ်ကွံာ် ပှၤဂီၢ်မုၢ်အတၢ်ဒဲးဘးအဂီၢ်န့ၣ်လီၤ. အဂ့ၢ်ဒ်အံၤ, စီၤပၤမၤလိာ်တ့ၢ်ဝဲလၢတၢ်လုၢ်မ့ၣ်အူတဖၣ်ဒီးတၢ် လုၢ်တၢ်ဒဲးဘးတဖၣ်န့ၣ်ကဘၣ်တၢ်မၤအီၤလၢပှၤအံၣ်စရ့လးဖိခဲ လၢာ်အဂီၢ်န့ၣ်လီၤ.
25 စီၤပၤမၤထွဲတၢ်သိၣ်လိနဲၣ်ယုၤတဖၣ်လၢယွၤဟ့ၣ်လီၤတ့ၢ်စီၤ ပၤဒၤဝံးခီဖျိစီၤပၤအဝံစီၤကးဒီးဝံနၤသၣ်တဖၣ်န့ၣ်လီၤ. အဝဲပာ်လီၤပှၤလ့ၤဝံဖိတဖၣ်လၢယွၤအတၢ်လုၢ်ဟံၣ်အပူၤအိၣ်ဒီး သီတူၢ်တဖၣ်ဒီးစှၢၢ်စှံးတဖၣ်,
26 တၢ်ပီးတၢ်လီတဖၣ်ဒ်စီၤပၤစီၤဒၤဝံးသူတ့ၢ်ဝဲန့ၣ်လီၤ. ပှၤလုၢ်တၢ်အခိၣ်တဖၣ်စ့ၢ်ကီးဆၢထၢၣ်ဖဲန့ၣ်အိၣ်ဒီးကွဲၤတဖၣ်န့ၣ်လီၤ.
27 စီၤဃံးစကံယၤဟ့ၣ်လီၤကလုၢ်လၢတၢ်ကဆူးကဲၤထီၣ်တၢ်လၢတၢ်လုၢ် မ့ၣ်အူကဘၣ်တၢ်မၤအီၤ, ဒီးဖဲတၢ်လုၢ်တၢ်ပာ်ဘၣ်တၢ်စးထီၣ်မၤအီၤန့ၣ်, ပှၤဂီၢ်မုၢ်သးဝံၣ်စံးထီၣ်ပတြၢၤယွၤ, ဒီးပှၤဒ့တၢ်အူတၢ်ဖိ တဖၣ်စးထီၣ်အူထီၣ်ကွဲၤတဖၣ်ဒီးကယဲၢ်တၢ်အပီးအလီ အဂၤတဖၣ်န့ၣ်လီၤ.
28 ကယဲၢ်ပှၤခဲလၢာ်လၢအအိၣ်ဖဲန့ၣ်, ဘူၣ်ထီၣ်ဘါထီၣ်သကိးတၢ်, ဒီးတၢ်သူၣ်ဝံၣ်သးဆၢဒီးတၢ်ဒ့တၢ်အူအဂၤတဖၣ်သီၣ်ထွဲဝဲ တုၤလၢကယဲၢ်တၢ်လုၢ်တၢ်ပာ်ခဲလၢာ်ဘၣ်တၢ်ဆူးကဲၤအီၤဝံၤန့ၣ် လီၤ.
29 အန့ၣ်ဒီးစီၤပၤဃံးစကံယၤဒီးကယဲၢ်ပှၤဂီၢ်မုၢ်ခဲလၢာ်တီၤ လီၤကဒွံကျိာ်ဒီးဘူၣ်ထီၣ်ဘါထီၣ်ကစၢ်ယွၤန့ၣ်လီၤ.
30 စီၤပၤဒီးပှၤကလုာ်အခိၣ်အနၢ်တဖၣ်တဲဘၣ်ပှၤလ့ၤဝံဖိတဖၣ်လၢ ကသးဝံၣ်စံးထီၣ်ပတြၢၤယွၤလၢတၢ်သးဝံၣ်စံးထီၣ်ပတြၢၤလၢ အဘၣ်တၢ်ကွဲးအီၤလၢစီၤဒၤဝံးဒီးဝံအၤစာ်န့ၣ်လီၤ. လၢတၢ်န့ၣ်အဃိပှၤကိးဂၤဒဲးသးဝံၣ်ထီၣ်တၢ်လၢတၢ်သးခု ဖးဒိၣ်အပူၤဖဲအဝဲသ့ၣ်တီၤလီၤကဒွံကျိာ်ဒီးဘူၣ်ထီၣ်ဘါထီၣ် ကစၢ်ယွၤအခါန့ၣ်လီၤ.
31 စီၤဃံးစကံယၤစံးဘၣ်ပှၤဂီၢ်မုၢ်, “ခဲကနံၣ်အံၤမ့ၢ်လၢသု ကဆှီဒ်တၢ်အလုၢ်အလၢ်အိၣ်အသိးအဃိ, ဟဲစိာ်တၢ်လုၢ်တၢ်ပာ်တဖၣ်ဒ်တၢ်စံးဘျုးစံးဖှိၣ်ယွၤအတၢ်လုၢ် မၤဘူၣ်တဖၣ်တက့ၢ်.” အဝဲသ့ၣ်စူၢ်ဝဲ, ဒီးပှၤအဂၤတနီၤစ့ၢ်ကီးဟဲစိာ်ဆၣ်ဖိကီၢ်ဖိတဖၣ်လၢတၢ်သူၣ်အိၣ် သးအိၣ်အပူၤဒ်သိးကလုၢ်ထီၣ်ဝဲဒ်တၢ်လုၢ်မ့ၣ်အူတဖၣ်အသိးန့ၣ်လီၤ.
32 အဝဲသ့ၣ်ဟဲစိာ်ဂီၤဖံးဖါအဒုနွံဆံ, သိအဒုတကယၤ, ဒီးသိဖိအဒု ခံကယၤဒ်တၢ်လုၢ်မ့ၣ်အူတဖၣ်အသိးလၢယွၤအဂီၢ်န့ၣ်လီၤ.
33 အဝဲသ့ၣ်ဟဲစိာ်စ့ၢ်ကီးဂီၤဖံးဖါအဒုဃုကယၤ, သိအဒုသၢကထိ ဒ်တၢ်လုၢ်တၢ်ပာ်တဖၣ်လၢပှၤဂီၢ်မုၢ်ကအီၣ်ဝဲအဂီၢ်န့ၣ်လီၤ.
34 မ့ၢ်လၢပှၤလုၢ်တၢ်အခိၣ်တဖၣ်တအိၣ်လၢလၢလီၣ်လီၣ်လၢကမၤသံကယဲၢ် ဆၣ်ဖိကီၢ်ဖိတဖၣ်အံၤအဃိ, ပှၤလ့ၤဝံဖိတဖၣ်မၤစၢၤအဝဲသ့ၣ်, တုၤလၢတၢ်မၤဝံၤဝဲတစု န့ၣ်လီၤ. တုၤလီၤလၢအကတီၢ်အဝဲန့ၣ်, ပှၤလုၢ်တၢ်အခိၣ်တဖၣ်လၢ အမၤကဆှီထီၣ်အသးဒ်အလုၢ်အလၢ်အိၣ်ဝဲအသိးန့ၣ်, အနီၣ်ဂံၢ်အါထီၣ်ဝဲလီၤ. (ပှၤလ့ၤဝံဖိတဖၣ်သူၣ်တီသးရၤလၢတၢ် မၤကဆှီထီၣ်သးအလုၢ်အလၢ်အါန့ၢ်ဒံးပှၤလုၢ်တၢ်အခိၣ်တဖၣ်မၤဝဲ တက့ၢ်န့ၣ်လီၤ.)
35 လၢတၢ်လုၢ်ထီၣ်တၢ်လုၢ်တၢ်ပာ်တဖၣ်လၢကဘၣ်တၢ်ဆူးကဲၤထီၣ်အီၤဒီ တဒုအမဲာ်ညါန့ၣ်, ပှၤလုၢ်တၢ်အခိၣ်တဖၣ်အိၣ်မူ အိၣ်ဒါစ့ၢ်ကီးလၢကဆူးကဲၤထီၣ်တၢ်အသိတဖၣ်လၢအဘၣ်တၢ်လုၢ်ထီၣ် အီၤ, ဟဲလၢတၢ်လုၢ်တၢ်ပာ်တဖၣ်လၢပှၤဂီၢ်မုၢ်အီၣ်ဝဲအပူၤ, ဒီးလၢတၢ်လူလီၤစပံးထံလၢအဘၣ်တၢ်လုၢ်ထီၣ်အီၤဃုာ်ဒီးတၢ် လုၢ်ဆူးကဲၤတဖၣ်န့ၣ်လီၤ.
ဒီးလၢတၢ်န့ၣ်အဃိ, တၢ်ဘူၣ်တၢ်ဘါထီၣ်လၢယွၤအတၢ်လုၢ်ဟံၣ်အပူၤ စးထီၣ်ကဒါက့ၤဝဲန့ၣ်လီၤ.
36 စီၤပၤဃံးစကံယၤဒီးပှၤဂီၢ်မုၢ်တဖၣ်သူၣ်ဖှံသးညီဝဲမ့ၢ်လၢ ကစၢ်ယွၤမၤစၢၤတ့ၢ်အဝဲသ့ၣ်လၢကမၤတၢ်အံၤခဲလၢာ်ချ့ချ့ အဃိန့ၣ်လီၤ.