23
(၂စီၤပၤ ၁၁:၄-၁၆)
1 လၢတၢ်အိၣ်ခိးတၢ်ဃုနံၣ်ဝံၤအလီၢ်ခံန့ၣ်, ပှၤလုၢ်တၢ်အခိၣ်စီၤ ယဟိယဒါပာ်လီၤအသးလၢတၢ်အံၤမ့ၢ်တၢ်ဆၢကတီၢ်လၢအဝဲကဘၣ်စး ထီၣ်မၤတၢ်န့ၣ်လီၤ. အဝဲမၤသကိးတၢ်အၢၣ်လီၤအီလီၤတမံၤဒီးသုးခိၣ်သုးနၢ်ယဲၢ်ဂၤ လၢအမ့ၢ်ဝဲစီၤယရိဃၣ်အဖိခွါစီၤဧစၤရယၤ, စီၤယိဃၤနၣ်အဖိခွါစီၤယံးၡမၤဧ့လး, စီၤဧိၤဘ့းအဖိခွါ စီၤဧစၤရယၤ, စီၤဧဒါယၤအဖိခွါစီၤမၤစ့ယၤဒီးစီၤစံးကရံးအဖိခွါစီၤ အလံၡဖးတဖၣ်န့ၣ်လီၤ.
2 အဝဲသ့ၣ်လဲၤတၢ်က့ၤတၢ်ဆူကယဲၢ်ဝ့ၢ်ခဲလၢာ်လၢကီၢ်ယူဒၤအပူၤ ဒီးဟဲက့ၤကိးက့ၤ, ပှၤလ့ၤဝံဖိတဖၣ်ဒီးကယဲၢ်ဒူၣ်ထၢခဲလၢာ်အခိၣ်တဖၣ်ဃုာ်ဒီးအဝဲ သ့ၣ်ဆူဝ့ၢ်ယရူၤၡလ့ၣ်န့ၣ်လီၤ.
3 အဝဲသ့ၣ်ခဲလၢာ်ပာ်ဖှိၣ်ထီၣ်အသးလၢယွၤအတၢ်လုၢ်ဟံၣ်အပူၤ, ဒီးဖဲန့ၣ်အဝဲသ့ၣ်မၤတၢ်အၢၣ်လီၤဒီးစီၤပၤဖိခွါစီၤယိၤအၣ်န့ၣ်လီၤ. စီၤယဟိယဒါစံးဘၣ်အဝဲသ့ၣ်, “အအံၤမ့ၢ်စီၤပၤအဃၤစယၤလၢအသံဝဲအဖိခွါန့ၣ်လီၤ. ခဲအံၤအဝဲကကဲထီၣ်စီၤပၤ, ဒ်ယွၤအၢၣ်လီၤတ့ၢ်ဝဲလၢစီၤပၤ ဒၤဝံးအစၢၤအသွဲၣ်တဖၣ်ကမ့ၢ်စီၤပၤအသိးန့ၣ်လီၤ.
4 အအံၤမ့ၢ်တၢ်လၢပမၤအီၤန့ၣ်လီၤ. ဖဲပှၤလုၢ်တၢ်အခိၣ်တဖၣ်, ဒီးပှၤလ့ၤဝံဖိတဖၣ်ဟဲဝဲလၢကမၤအမူအဒါလၢမုၢ်အိၣ်ဘှံး အနံၤန့ၣ်, ပှၤလၢအဝဲသ့ၣ်အကျါသၢပူတပူကခိးပၢၤတၢ်လုၢ်ဟံၣ်အတြဲၤဖးဒိၣ်တဖၣ်,
5 အဂၤသၢပူတပူကခိးပၢၤစီၤပၤအနီ, ဒီးပှၤအိၣ်လီၤတဲာ်တဖၣ် ကဘၣ်တၢ်ပာ်လီၤအီၤဖဲတၢ်အခီၣ်ထံးအတြဲၤဖးဒိၣ်န့ၣ်လီၤ. ကယဲၢ်ပှၤဂီၢ်မုၢ်ခဲလၢာ်ကအိၣ်ဖှိၣ်ရိဖှိၣ်ဝဲဒၣ်ဖဲယွၤအတၢ် လုၢ်ဟံၣ်အဂၢၤပူၤန့ၣ်လီၤ.
6 တ့မ့ၢ်လၢပှၤလုၢ်တၢ်အခိၣ်တဖၣ်ဒီးပှၤလ့ၤဝံဖိတဖၣ်လၢအအိၣ်မူ အိၣ်ဒါဘၣ်န့ၣ်ဒီး, ပှၤတဘၣ်လဲၤနုာ်ဆူယွၤအတၢ်လုၢ်ဟံၣ်အတၢ်သူၣ်ထီၣ်တဖၣ်အပူၤနီ တဂၤဘၣ်. အဝဲသ့ၣ်လဲၤနုာ်ဘၣ်ဝဲမ့ၢ်လၢအဝဲသ့ၣ်ဘၣ်တၢ်ပာ်စီဆှံတ့ၢ်အီၤ အဃိလီၤ. မ့မ့ၢ်ပှၤဂီၢ်မုၢ်လၢအိၣ်လီၤတဲာ်တဖၣ်န့ၣ်ကဘၣ်စူၢ်ယွၤအတၢ်သိၣ် လိနဲၣ်ယုၤတဖၣ်ဒီးကဘၣ်အိၣ်ဒၣ်လၢတၢ်ချၢန့ၣ်လီၤ.
7 ပှၤလ့ၤဝံဖိတဖၣ်ကဘၣ်ဆၢထၢၣ်အိၣ်ခိးပၢၤတၢ်ဝးတရံးစီၤပၤ အိၣ်ဒီးအဝဲသ့ၣ်အနးတဖၣ်လၢအအိၣ်ထုးထီၣ်အသး, ဒီးအဝဲသ့ၣ်ကဘၣ်အိၣ်ဒီးစီၤပၤဖဲအဝဲလဲၤတၢ်တပူၤလၢ်လၢ်န့ၣ်လီၤ. ပှၤတဂၤလၢ်လၢ်လၢအဂုာ်ကျဲးစၢးလဲၤနုာ်ဆူယွၤအတၢ်လုၢ်ဟံၣ် အပူၤန့ၣ်, ကဘၣ်တၢ်မၤသံကွံာ်အီၤန့ၣ်လီၤ.”
8 ပှၤလ့ၤဝံဖိတဖၣ်ဒီးကီၢ်ယူဒၤအပှၤဂီၢ်မုၢ်တဖၣ်မၤတၢ်ဒ်ပှၤ လုၢ်တၢ်အခိၣ်စီၤယဟိယဒါအတၢ်သိၣ်လိနဲၣ်ယုၤအသိးန့ၣ်လီၤ. လၢမုၢ်အိၣ်ဘှံးနံၤန့ၣ်ပှၤလၢတအိၣ်ဒီးမူဒါလၢတၢ်လုၢ်ဟံၣ် ပူၤတဖၣ်တဘၣ်တၢ်ပျၢ်က့ၤအီၤဘၣ်. လၢတၢ်န့ၣ်အဃိ, သုးခိၣ်ဖးဒိၣ်တဖၣ်သူဘၣ်ပှၤလၢအလီၤဘၣ်တၢ်မၤတဖၣ်မ့ၢ်ဂ့ၤ, တလီၤဘၣ်တၢ်မၤတဖၣ်မ့ၢ်ဂ့ၤသ့ဝဲန့ၣ်လီၤ.
9 စီၤယဟိယဒါဟ့ၣ်လီၤသုးခိၣ်သုးနၢ်တဖၣ်လၢဘီတဖၣ်ဒီးကတီၤ တဖၣ်လၢအမ့ၢ်တ့ၢ်စီၤပၤဒၤဝံးအတၢ်လၢအဘၣ်တၢ်ပာ်အီၤလၢ ယွၤအတၢ်လုၢ်ဟံၣ်အပူၤန့ၣ်လီၤ.
10 အဝဲပာ်လီၤပှၤလၢအနးအိၣ်ထုးထီၣ်အသးသ့ၣ်တဖၣ်ဝးတရံးယွၤအတၢ် လုၢ်ဟံၣ်အမဲာ်ညါလၢကဒီဒၣ်အိၣ်ပှိၤစီၤပၤအဂီၢ်န့ၣ်လီၤ.
11 အန့ၣ်ဒီး, စီၤယဟိယဒါဆှၢထီၣ်စီၤယိၤအၣ်ဆူတၢ်ချၢ, ဒုးကုာ်ထီၣ်အီၤစီၤပၤအခိၣ်သလုးလၢအခိၣ်လိၤ, ဒီးဟ့ၣ်ဃီၤအီၤလၢတၢ်ဘူၣ်တၢ်ဘါအတၢ်သိၣ်တၢ်သီတဖၣ်လၢအဘၣ်ထွဲ ဒီးတၢ်မ့ၢ်စီၤပၤအလံာ်တဘ့ၣ်လီၤ. အန့ၣ်ဒီး, အဝဲဘၣ်တၢ်ဒုးကဲထီၣ်အီၤလၢစီၤပၤန့ၣ်လီၤ. ပှၤလုၢ်တၢ်အခိၣ်စီၤယဟိယဒါဒီးအဖိခွါတဖၣ်ဖှူစီၤယိၤအၣ်လၢ သိဒီးပှၤကိးဂၤဒဲးကိးထီၣ်ဝဲ, “မ်စီၤပၤမူဝဲလီၤထူလီၤယိာ်တက့ၢ်.”
12 နီၢ်ဧသၤလယၤနၢ်ဟူဘၣ်ပှၤဂီၢ်မုၢ်ကိးပသူဟ့ၣ်ဆူၣ်ထီၣ်စီၤပၤ အဂံၢ်အဘါအဃိအဝဲလဲၤဝဲချ့ချ့ဆူယွၤအတၢ်လုၢ်ဟံၣ်ဖဲ ပှၤဂီၢ်မုၢ်ပာ်ဖှိၣ်ထီၣ်အသးအလီၢ်န့ၣ်လီၤ.
13 ဖဲန့ၣ်အဝဲထံၣ်ဘၣ်စီၤပၤအသီတဂၤလၢယွၤအတၢ်လုၢ်ဟံၣ်အကျဲစၢၤ, ဆၢထၢၣ်ဝဲဖဲတၢ်လီၢ်လၢအဘၣ်တၢ်ပာ်လီၤဆီအီၤလၢစီၤပၤတဖၣ် အဂီၢ်ဒီးဘၣ်တၢ်အိၣ်ဝးတရံးအီၤလၢသုးခိၣ်သုးနၢ်တဖၣ်ဒီးပှၤအူကွဲၤ တဖၣ်န့ၣ်လီၤ. ကယဲၢ်ပှၤဂီၢ်မုၢ်ခဲလၢာ်ကိးသတြီထီၣ်လၢတၢ်သူၣ်ခုသးခု ဒီးအူထီၣ်ကွဲၤတဖၣ်, ဒီးယွၤအတၢ်လုၢ်ဟံၣ်အပှၤသးဝံၣ်တၢ်သ့ၣ်တဖၣ်ဆှၢဝဲတၢ်စံးထီၣ် ပတြၢၤန့ၣ်လၢအတၢ်ဒ့တၢ်အူ အပီးအလီတဖၣ်န့ၣ်လီၤ. နီၢ်ဧသၤလယၤဖှီယာ်ကွံာ်အကူအကၤတဖၣ်လၢတၢ်သူၣ်ဆါသးဆါ အပူၤဒီးကိးထီၣ်ဝဲ, “တၢ်ပူထီၣ်, တၢ်ပူထီၣ်” န့ၣ်လီၤ.
14 စီၤယဟိယဒါတအဲၣ်ဒိးနီၢ်ဧသၤလယၤကဘၣ်တၢ်မၤသံကွံာ်အီၤလၢ ယွၤအတၢ်လုၢ်ဟံၣ်အလီၢ်ကဝီၤအပူၤဘၣ်. အဃိ, အဝဲကိးထီၣ်သုးမုၢ်အခိၣ်အနၢ်တဖၣ်ဒီးစံးဘၣ်အဝဲသ့ၣ်, “ထုးထီၣ်ကွံာ်အီၤဆူတၢ်ချၢလၢပှၤခိးတၢ်တဖၣ်ရဲၣ်လီၤအသး တဖၣ်အဘၢၣ်စၢၤဒီးမၤသံကွံာ်ပှၤတဂၤလၢ်လၢ်လၢအကျဲးစၢးမၤပူၤ ဖျဲးအီၤန့ၣ်တက့ၢ်.”
15 အဝဲသ့ၣ်ဖီၣ်န့ၢ်အီၤ, လဲၤစိာ်အီၤဆူစီၤပၤအနီ, ဝံၤဒီးဖဲန့ၣ်မၤသံကွံာ်အီၤလၢကသ့ၣ်အတြဲၤဖးဒိၣ်န့ၣ်လီၤ.
(၂စီၤပၤ ၁၁:၁၇-၂၀)
16 ပှၤလုၢ်တၢ်အခိၣ်စီၤယဟိယဒါမၢစီၤပၤစီၤယိၤအၣ်ဒီးပှၤဂီၢ် မုၢ်ပာ်ဖှိၣ်ဃုာ်အသးဒီးအီၤလၢကမၤတၢ်အၢၣ်လီၤအီလီၤတမံၤလၢ, အဝဲသ့ၣ်ကမ့ၢ်ယွၤအပှၤဂီၢ်မုၢ်န့ၣ်လီၤ.
17 အန့ၣ်ဝံၤဒီး, အဝဲသ့ၣ်ခဲလၢာ်လဲၤဝဲဆူဘဧၤလးအတၢ်လုၢ်ဟံၣ်, ဒီးမၤလီၤပှီၢ်ကွံာ်ဝဲန့ၣ်လီၤ. အဝဲသ့ၣ်တီၢ်လီၤကလဲကွံာ်တၢ် လုၢ်လီၢ်တဖၣ်ဒီးတၢ်ဂီၤတၢ်ဖီၣ်တဖၣ်ဖဲန့ၣ်ဒီးမၤသံကွံာ်ဘဧၤ လးအပှၤလုၢ်တၢ်အခိၣ်စီၤမးတၣ်လၢတၢ်လုၢ်လီၢ်တဖၣ် အမဲာ်ညါန့ၣ်လီၤ.
18 စီၤယဟိယဒါပာ်လီၤပှၤလုၢ်တၢ်အခိၣ်တဖၣ်, ဒီးပှၤလ့ၤဝံဖိ တဖၣ်လၢကကွၢ်ထွဲယွၤအတၢ်လုၢ်ဟံၣ်အတၢ်ဖံးတၢ်မၤအဂီၢ်န့ၣ်လီၤ. အဝဲသ့ၣ်ကဘၣ်မၤမူဒါတဖၣ်လၢအဘၣ်တၢ်ဟ့ၣ်လီၤတ့ၢ်အဝဲသ့ၣ်လၢ စီၤပၤစီၤဒၤဝံးဒီးကဘၣ်ဆိၣ်ကဲၤထီၣ်တၢ်လုၢ်တၢ်ပာ်တဖၣ်လၢ အဘၣ်တၢ်လုၢ်ထီၣ်အီၤဆူယွၤဒ်ယူဒၤအတၢ်သိၣ်တၢ်သီလၢစီၤမိၤ ၡ့ဟ့ၣ်တ့ၢ်ဝဲန့ၣ်လီၤ. အဝဲသ့ၣ်ကဲခိၣ်ကဲနၢ်စ့ၢ်ကီးလၢတၢ်သူၣ်ဝံၣ်သးဆၢဒီးတၢ်ဘူၣ် တၢ်ဘါအမူးတဖၣ်အဂီၢ်န့ၣ်လီၤ.
19 စီၤယဟိယဒါပာ်လီၤစ့ၢ်ကီးပှၤပၢၤတၢ်ဖိတဖၣ်လၢကအိၣ်မူ အိၣ်ဒါဖဲယွၤအတၢ်လုၢ်ဟံၣ်အတြဲၤ, လၢကတြီကွံာ်ပှၤတဂၤလၢ်လၢ်, လၢအတကဆှီဘၣ်ဒ်တၢ်အလုၢ်အလၢ်အိၣ်ဝဲအသိးအဂီၢ်န့ၣ်လီၤ.
20 သုးခိၣ်သုးနၢ်တဖၣ်, ပှၤတူၢ်ဒိၣ်ကီၤဒိၣ်တဖၣ်, ပဒိၣ်ပပှၢ်တဖၣ်, ဒီးကယဲၢ်ပှၤဂီၢ်မုၢ်အိၣ်လီၤတဲာ်တဖၣ်ပာ်ဖှိၣ်ဃုာ် အသးဒီးစီၤယဟိယဒါလၢတၢ်ဟးထီၣ်လဲၤသကိးတၢ်လၢတၢ်ဟဲ ကိးထီၣ်စီၤပၤလၢယွၤအတၢ်လုၢ်ဟံၣ်ဆူစီၤပၤအနီအဂီၢ်န့ၣ်လီၤ. အဝဲသ့ၣ်ဟဲနုာ်လီၤဝဲလၢတၢ်မဲာ်ညါအတြဲၤဖးဒိၣ်, ဒီးစီၤပၤဟံးန့ၢ်အလီၢ်လၢလီၢ်ပစိာ်အဖီခိၣ်န့ၣ်လီၤ.
21 ကယဲၢ်ပှၤဂီၢ်မုၢ်ခဲလၢာ်ပှဲၤဝဲဒီးတၢ်သူၣ်ဖှံသးညီဒီးဝ့ၢ် အိၣ်ဘှ့ၣ်အိၣ်ဘှီၣ်ဝဲ, မ့ၢ်လၢခဲအံၤနီၢ်ဧသၤလယၤဘၣ်တၢ်မၤသံကွံာ်လံအီၤအဃိန့ၣ်လီၤ.