24
(၂စီၤပၤ ၁၂:၁-၁၆)
1 စီၤယိၤအၣ်ကဲထီၣ်ကီၢ်ယူဒၤအစီၤပၤဖဲအသးအိၣ်နွံနံၣ်, ဒီးပၢတၢ်လၢဝ့ၢ်ယရူၤၡလ့ၣ်အပူၤအနံၣ်လွံၢ်ဆံန့ၣ်လီၤ. အဝဲအမိၢ်မ့ၢ်ဝဲနီၢ်စံဘယၤလၢဝ့ၢ်ဘ့ၢ်ၡဘၤန့ၣ်လီၤ.
2 ဖဲပှၤလုၢ်တၢ်အခိၣ်စီၤယဟိယဒါအိၣ်မူဒံးဝဲအခါန့ၣ်စီၤယိၤ အၣ်မၤတ့ၢ်တၢ်လၢအဘၣ်ယွၤအသးန့ၣ်လီၤ.
3 စီၤယဟိယဒါဃုထၢန့ၢ်စီၤပၤယိၤအၣ်လၢအမါခံဂၤ, ဒီးအဝဲသ့ၣ်ဆံးစၢ်န့ၢ်အီၤလၢအဖိခွါတဖၣ်ဒီးအဖိမုၣ်တဖၣ် န့ၣ်လီၤ.
4 ဖဲအဝဲကဲထီၣ်စီၤပၤဝံၤတယံာ်ဘၣ်အလီၢ်ခံန့ၣ်, စီၤယိၤအၣ်ပာ်လီၤအသးလၢကမၢပှၤဘှီက့ၤယွၤအတၢ်လုၢ်ဟံၣ်န့ၣ်လီၤ.
5 အဝဲဟ့ၣ်လီၤအကလုၢ်ဆူပှၤလုၢ်တၢ်အခိၣ်တဖၣ်ဒီးပှၤလ့ၤဝံဖိ တဖၣ်လၢကလဲၤဆူဝ့ၢ်တဖၣ်လၢအအိၣ်လၢကီၢ်ယူဒၤအပူၤ, ဒီးထၢဖှိၣ်တၢ်လၢကယဲၢ်ပှၤဂီၢ်မုၢ်အအိၣ်ဒ်သိးစ့ကလၢဝဲလၢ တနံၣ်တဘျီတၢ်ဘှီက့ၤယွၤအတၢ်လုၢ်ဟံၣ်အဂီၢ်န့ၣ်လီၤ. အဝဲစံးဘၣ်အဝဲသ့ၣ်လၢကမၤတၢ်န့ၣ်ချ့ချ့တဘျီဃီ, ဘၣ်ဆၣ်ပှၤလ့ၤဝံဖိတဖၣ်သုးဆၢသုးကတီၢ်န့ၣ်လီၤ.
6 လၢတၢ်န့ၣ်အဃိ, အဝဲကိးနုာ်အဝဲသ့ၣ်အပှၤအခိၣ်စီၤယဟိယဒါဒီး ဃ့ဆူၣ်တၢ်စံးဝဲ, တၢ်ခိတၢ်သွဲလၢယွၤအခ့အပှၤစီၤမိၤၡ့ မၢပှၤဂီၢ်မုၢ်ဟ့ၣ်အီၤလၢတၢ်မၤစၢၤယွၤအိၣ်ဝဲဆိးဝဲအဒဲ အဂီၢ်န့ၣ်, ဘၣ်မနုၤလၢနတမၢပှၤလ့ၤဝံဖိတဖၣ်ထၢဖှိၣ်အီၤလၢကီၢ်ယူဒၤ ဒီးဝ့ၢ်ယရူၤၡလ့ၣ်အပူၤလဲၣ်.”
7 (ပှၤတဖၣ်လၢအပိာ်ပှၤပိာ်မုၣ်အအၢအသီနီၢ်ဧသၤလယၤအခံန့ၣ်, မၤဟးဂီၤကွံာ်ယွၤအတၢ်လုၢ်ဟံၣ်, ဒီးသူတ့ၢ်တၢ်အဃၢၤအဃိာ်စီ ဆှံတဖၣ်အါမးလၢတၢ်ဘူၣ်ထီၣ်ဘါထီၣ်ဘဧၤလးအပူၤန့ၣ်လီၤ.)
8 စီၤပၤဟ့ၣ်လီၤအကလုၢ်ဆူပှၤလ့ၤဝံဖိတဖၣ်လၢကမၤတၢ်ထၢဖှိၣ် အတလါတဖျၢၣ်ဒီးပာ်လီၤအီၤဖဲယွၤအတၢ်လုၢ်ဟံၣ်အတြဲၤဖးဒိၣ် န့ၣ်လီၤ.
9 အဝဲသ့ၣ်ဆှၢလီၤတၢ်ကစီၣ်သကုၤဝ့ၢ်ယရူၤၡလ့ၣ်ဒီးကီၢ်ယူဒၤလၢ ပှၤကိးဂၤဒဲးကဘၣ်ဟဲစိာ်န့ၢ်ယွၤလၢတၢ်ခိတၢ်သွဲဒ်ကစၢ်ယွၤ အခ့အပှၤစီၤမိၤၡ့ထၢဖှိၣ်တ့ၢ်ဝဲအဆိကတၢၢ်တဘျီလၢပှၢ်မုၢ် ကနၢအပူၤအသိးန့ၣ်လီၤ.
10 တၢ်အံၤမ့ၢ်တၢ်လၢအဘၣ်ပှၤဂီၢ်မုၢ်, ဒီးအဝဲသ့ၣ်အခိၣ်အနၢ်တဖၣ်အ သး, ဒီးအဝဲသ့ၣ်ဟဲစိာ်ဃီၤအတၢ်ခိတၢ်သွဲတဖၣ်ဒီးမၤပှဲၤတလါလၢ တၢ်ထၢဖှိၣ်န့ၣ်လီၤ.
11 ကိးမုၢ်နံၤဒဲးပှၤလ့ၤဝံဖိတဖၣ်ဘၣ်လဲၤစိာ်တလါန့ၣ်ဆူစီၤ ပၤအပဒိၣ်လၢအကွၢ်ထွဲတလါအအိၣ်န့ၣ်လီၤ. ဖဲတလါပှဲၤတဘျီလၢ်လၢ်န့ၣ်စီၤပၤအပှၤကွဲးလံာ်ဒိၣ်ဒီးပှၤလုၢ် တၢ်အခိၣ်အဒိၣ်ကတၢၢ်အခၢၣ်စး, ဘၣ်ထုးထီၣ်ကွံာ်စ့ခဲလၢာ်ဒီးပာ်ကဒါက့ၤတလါလၢအလီၢ်န့ၣ်လီၤ. လၢတၢ်န့ၣ်အဃိအဝဲသ့ၣ်ထၢဖှိၣ်န့ၢ်စ့အါအါဂီၢ်ဂီၢ်န့ၣ်လီၤ.
12 စီၤပၤဒီးစီၤယဟိယဒါကဟ့ၣ်လီၤစ့ဆူပှၤအခိၣ်တဖၣ်လၢအဘှီ က့ၤယွၤအတၢ်လုၢ်ဟံၣ်, ဒီးအဝဲသ့ၣ်ကဒိးလဲဝဲပှၤတဖၣ်လၢအမၤတၢ် လၢလၢၢ်, ပှၤတဖၣ်လၢအမၤတၢ်လၢသ့ၣ်ဒီးပှၤတဖၣ်လၢအမၤတၢ်လၢထးလၢကဘှီ ဂ့ၤက့ၤယွၤအတၢ်လုၢ်ဟံၣ်အဂီၢ်န့ၣ်လီၤ.
13 ကယဲၢ်ပှၤမၤတၢ်ဖိခဲလၢာ်, မၤတၢ်ဆူၣ်ဆူၣ်ဒီးအဝဲသ့ၣ်ဘှီဂ့ၤ ထီၣ်က့ၤဝဲယွၤအတၢ်လုၢ်ဟံၣ်ဒ်အဂံၢ်ထံးအတၢ်မ့ၢ်တၢ်အသိး, ဒီးမၤဂၢၢ်ကျၢၤခၢၣ်သနၢၣ်ဝဲဒ်လၢညါအသိးန့ၣ်လီၤ.
14 ဖဲတၢ်ဘှီဂ့ၤက့ၤတဖၣ်ဝံၤဝဲန့ၣ်, ထူစ့လၢအအိၣ်တ့ၢ်တဖၣ်ဘၣ် တၢ်ဟ့ၣ်က့ၤအီၤဆူစီၤပၤဒီးစီၤယဟိယဒါဒီးအဝဲသ့ၣ်ကသူဝဲ လၢကမၤက့ၤလီခီတဖၣ်ဒီးတၢ်အဃၢၤအဃိၢ်အဂၤတဖၣ်လၢယွၤ အတၢ်လုၢ်ဟံၣ်အဂီၢ်န့ၣ်လီၤ. ဖဲစီၤယဟိယဒါအိၣ်မူဒံးဝဲအမုၢ်နံၤတဖၣ်န့ၣ်, တၢ်လုၢ်တၢ်ပာ်တဖၣ်ဘၣ်တၢ်လုၢ်ထီၣ်အီၤဒ်တၢ်အလုၢ်အလၢ်အိၣ်ဝဲအသိး ဘၣ်ဆၢဘၣ်ကတီၢ်န့ၣ်လီၤ.
15 ဖဲအတုၤဝဲလၢတၢ်မှံၤတုာ်ပှၢ်တီၤအလီၢ်ခံ, အသးအိၣ်အနံၣ်တကယၤသၢဆံန့ၣ်, စီၤယဟိယဒါသံဝဲဒၣ်လီၤ.
16 အဝဲသ့ၣ်ခူၣ်လီၤကွံာ်အီၤလၢစီၤပၤအတၢ်သွၣ်ခိၣ်တဖၣ်အပူၤလၢ အအိၣ်လၢစီၤဒၤဝံးအဝ့ၢ်ပူၤ, လၢတၢ်သ့ၣ်ညါနီၣ်တၢ်မၤလၢအဝဲမၤဝဲတ့ၢ်လၢကီၢ်အံၣ်စရ့လး အပှၤဂီၢ်မုၢ်တဖၣ်အဂီၢ်, လၢကစၢ်ယွၤအဂီၢ်ဒီးလၢယွၤအတၢ်လုၢ်ဟံၣ်အဂီၢ်အဃိန့ၣ်လီၤ.
17 ဘၣ်ဆၣ်တုၤစီၤယဟိယဒါသံဝဲတဘျီန့ၣ်, ကီၢ်ယူဒၤအခိၣ်အနၢ်တဖၣ် ကွဲန့ၢ်လွဲန့ၢ်စီၤပၤယိၤအၣ်အသးလၢကဒိကနၣ်က့ၤအဝဲသ့ၣ်လၢ တၢ်ပိာ်ထွဲစီၤယဟိယဒါအတၢ်အတၢ်သိၣ်လိနဲၣ်ယုၤတ့ၢ်တဖၣ်အလီၢ် န့ၣ်လီၤ.
18 လၢတၢ်န့ၣ်အဃိပှၤဂီၢ်မုၢ်ဆိကတီၢ်ကွံာ်အတၢ်ဘူၣ်တၢ်ဘါတၢ်လၢ ယွၤ, အမိၢ်ပၢ်ဖံဖုလၢပျၢၤတဖၣ်အကစၢ်ယွၤအတၢ်လုၢ်ဟံၣ်အပူၤ, ဒီးစးထီၣ်ဘူၣ်ထီၣ်ဘါထီၣ်ဝဲတၢ်ဂီၤတၢ်ဖီၣ်တဖၣ်, ဒီးကစၢ်မုၣ်အၡ့ရၤအဂီၤတဖၣ်န့ၣ်လီၤ. အဝဲသ့ၣ်အတၢ်မၤကမၣ်လၢတၢ်ဒဲးဘးတဖၣ်အံၤအဃိန့ၣ်, ဟဲစိာ်ဃီၤယွၤအတၢ်သးထီၣ်လၢကီၢ်ယူဒၤဒီးဝ့ၢ်ယရူၤၡလ့ၣ်အဖီ ခိၣ်န့ၣ်လီၤ.
19 ယွၤဆှၢလီၤဝံတဖၣ်လၢကဟ့ၣ်ပလီၢ်အဝဲသ့ၣ်, လၢကဟဲက့ၤကဒါက့ၤဆူအအိၣ်အဂီၢ်, ဘၣ်ဆၣ်ပှၤဂီၢ်မုၢ်တဒိကနၣ်ဝဲဒၣ်ဘၣ်.
20 အန့ၣ်ဒီး, ကစၢ်ယွၤအသးလီၤဘၣ်ဝဲဒၣ်လၢပှၤလုၢ်တၢ်အခိၣ်စီၤယဟိ ယဒါအဖိခွါစီၤစကၤရယၤအလိၤန့ၣ်လီၤ. အဝဲဆၢထၢၣ်ဝဲဒၣ်လၢတၢ်လီၢ်ဖဲပှၤဂီၢ်မုၢ်ထံၣ်အီၤသ့အလီၢ်ဒီး ကိးထီၣ်ဝဲ, “ယွၤ, ကစၢ်ယွၤသံကွၢ်ဝဲလၢဘၣ်မနုၤအဃိ သုတစူၢ်အတၢ်မၤလိာ်တဖၣ်ဒီးဟဲစိာ်ဃီၤတၢ်တတၢးတနါတဖၣ်လၢသု လိၤဒၣ်ဝဲန့ၣ်လဲၣ်. သုလဲၤသဒၣ်ကွံာ်တ့ၢ်လံအီၤအဃိ, အဝဲလဲၤသဒၣ်ကွံာ်သုန့ၣ်လီၤ.”
21 စီၤပၤယိၤအၣ်မၤဃုာ်သကိးတၢ်ဒီးပှၤတဖုလၢအကူၣ်တၢ်အၢထီဒါ စီၤစကၤရယၤ, ဒီးလၢစီၤပၤအတၢ်ဟ့ၣ်လီၤအကလုၢ်အဃိန့ၣ်, ပှၤဂီၢ်မုၢ်ကွံာ်စီၤ စကၤရယၤလၢလၢၢ်ဖဲယွၤအတၢ်လုၢ်ဟံၣ်အဂၢၤပူၤန့ၣ်လီၤ.
22 စီၤပၤသးပ့ၤနီၣ်ကွံာ်စီၤစကၤရယၤအပၢ်စီၤယဟိယဒါအတၢ်သးတီ အတၢ်မၤလၢအဟ့ၣ်တ့ၢ်အီၤ, ဒီးမၢပှၤမၤသံကွံာ်စီၤစကၤရယၤန့ၣ်လီၤ. ဖဲစီၤစကၤရယၤကသံအဆၢန့ၣ်, အဝဲကိးထီၣ်ဝဲ, “မ်ယွၤထံၣ်တၢ်လၢနမၤအီၤဒီးစံၣ်ညီၣ်နၤတ က့ၢ်.”
23 တုၤနံၣ်ဆၢက့ၤအလီၢ်တၢ်မဲထီၣ်သီအကတီၢ်န့ၣ်, ကီၢ်စူၤရံအသုးမုၢ်ဟဲထီၣ်ဒုးကီၢ်ယူဒၤဒီးဝ့ၢ်ယရူၤၡလ့ၣ်, မၤသံကွံာ်ကယဲၢ်ခိၣ်နၢ်ခဲလၢာ်, ဒီးက့ၤစိာ်တၢ်ဂုာ်န့ၢ်တၢ်အါ အါဂီၢ်ဂီၢ်ဆူဝ့ၢ်ဒၤမ့ၤစ့းန့ၣ်လီၤ.
24 ပှၤစူၤရံအသုးမုၢ်မ့ၢ်သုးမုၢ်လၢအဆံး, ဘၣ်ဆၣ်ယွၤပျဲ အမၤနၢၤကွံာ်ပှၤယူဒၤအသုးမုၢ်လၢဒိၣ်န့ၢ်ဒံးအဝဲသ့ၣ်မ့ၢ်လၢ ပှၤဂီၢ်မုၢ်လဲၤသဒၣ်ကွံာ်အီၤ, ယွၤ, အဝဲသ့ၣ်အမိၢ်ပၢ်ဖံဖုလၢပျၢၤတဖၣ်အကစၢ်ယွၤအဃိန့ၣ်လီၤ. လၢကျဲဒ်သိးအံၤစီၤပၤယိၤအၣ်ဘၣ်တၢ်စံၣ်ညီၣ်အီၤန့ၣ်လီၤ.
25 အဝဲဘၣ်ဒိဆါဆါကလဲာ်ဒီးဖဲအဒုၣ်အဒါဂုၤက့ၤဆူအလီၢ်ခံန့ၣ်, အပဒိၣ်တဖၣ်အကျါခံဂၤကူၣ်ထီၣ်တၢ်အၢထီဒါအီၤဒီးမၤသံကွံာ် အီၤလၢအလီၢ်မံပူၤလၢတၢ်ဟ့ၣ်ကၣ်က့ၤအဝဲအတၢ်မၤသံ ပှၤလုၢ်တၢ်အခိၣ်စီၤယဟိယဒါအဖိခွါအဂီၢ်န့ၣ်လီၤ. အဝဲဘၣ်တၢ်ခူၣ်လီၤကွံာ်အီၤလၢစီၤဒၤဝံးအဝ့ၢ်ပူၤဘၣ်ဆၣ်, တမ့ၢ်ဘၣ်လၢစီၤပၤအတၢ်သွၣ်ခိၣ်တဖၣ်အပူၤန့ၣ်ဘၣ်.
26 (ပှၤတဖၣ်လၢအကူၣ်ထီၣ်တၢ်အၢထီဒါအီၤန့ၣ်မ့ၢ်ဝဲပှၤ ဧၣ်မိၣ်ဖိပိာ်မုၣ်တဂၤလၢအမံၤမ့ၢ်နီၢ်ၡံမဧးအဖိခွါစီၤ စၤဘးဒီးပှၤမိၤအးဖိပိာ်မုၣ်တဂၤလၢအမံၤမ့ၢ်နီၢ်ၡးမံရံး အဖိခွါစီၤယဟိစဘးန့ၣ်လီၤ.)
27 လံာ်စီၤပၤတဖၣ်အခီပညီပာ်ဖျါထီၣ်ဝဲတၢ်တဲတဖၣ်လၢအဘၣ်ထွဲ ဒီးစီၤယိၤအၣ်အဖိခွါတဖၣ်အဂ့ၢ်, ဝံအတၢ်ကတိၤဆိပာ်ထီဒါအီၤအဂ့ၢ်, ဒီးတၢ်ကွဲးနီၣ်ဘၣ်ထွဲဒီးအဝဲဘှီထီၣ်ကဒါက့ၤယွၤအတၢ်လုၢ်ဟံၣ်ဒ်လဲၣ် အဂ့ၢ်န့ၣ်လီၤ. အဝဲအဖိခွါစီၤအမၤစယါကဲထီၣ်စီၤပၤလၢအလီၢ်န့ၣ်လီၤ.